NEKGUK GOLHGUKNA TAWH KISAI CIAMNUIH

NEKGUK GOLHGUKNA TAWH KISAI CIAMNUIH

Contractor khat in Minister khat kiangah, "Tu tung development project hong lut tawh kisai nasepna (contract) nong piak leh sum tampi tak golhguk (bribe) in kong pia ding hi," ci-in kamciamna nei in contract va ngen hi.

Minister in Contractor pa' kamciamna um pah ahih manin file ah "Approved" cih gelh pah sam sam hi. Ahih hangin ni nih khit, kal khat khit... hun hong kiveivei hangin Contractor pa'n a golhguk sum Minister pa pia ngei mahmahmawk lo hi. Minister pa'n zong 'hong khem hi ta thong ve e maw?' ci-in contract a piak khak kisik kik mahmah hi.

Tua lai takin Minister pa' peon nasep len pa'n, "Pu aw, kisik kikna ding leh buaina ding thu bangmah om lo hi. A file a 'APPROVED' na gelhna laimal mai-ah 'NOT' cih behlap ziau lecin 'NOT APPROVED' cih suak ding a, na contract piak thukim lo cihna suak ahih manin a mawknapi hi ding hi," ci-in hilhna hoih (advice) pia hi.

Peon pa' hilhna hoih hi ci-in Minister pa'n a file ah "NOT APPROVED" cih gelh pah hi.

Tua khit ni nih nungin Contractor pa'n a contract ngah manin golhguk sum piak dingin a ciam bangin Minister pa' bank account ah a sum khak hong lut hi. Minister pa zong cihna ding thei loin lungsi deda in om a, a thusim kipholakkhiat ding leh a nasepna panin suspension a ngah khak ding kihta in liing kauhkauh hi.

Tua lai takin Minister pa kiangah peon pa hong lut phelphal kik a, Minister pa'n thu om dan teng na hilh pah samsam hi. Tua leh peon pa'n a ngian hong zang kik leuleu a, file la-in "e" laimal bek "Not" cih kammal nungah a behlap ciangin "NOTE APPROVED" cih suak ziau hi.

Minister pa lah lungdam in nui pempam a, Contractor pa lah lungdam in nui hemham hi. Ahih hangin kua in government ah thuneihna len in nasem sakin taisak hiam (who is running the government)???

Nasepna za neu mahmah napi khuaktai leh khuak zat siam in ngian siamte mah in government ah thuneihna nei zo pen uh hi. Za lian mahmah len in tu leulau napi khuak zang thei lote a nuai-a mi ten a ut bangbangin suk pei to pei kawikawi lel uh hi.

✍️ Thang Khan Lian #ZUNs