ADVENT CHRISTMAS A CIH BANG A CIHNA HI A, I ZAT DAN A MAN MAH HIAM? BANG HANGIN DECEMBER 25TH NI CHRISTMAS IN KIZANG HIAM?

ADVENT CHRISTMAS A CIH BANG A CIHNA HI A, I ZAT DAN A MAN MAH HIAM? BANG HANGIN DECEMBER 25TH NI CHRISTMAS IN KIZANG HIAM? (Edited 2021) 

Tanglai-in Khristian masate in Jesuh suahni lian a zat ni ding kinialna lianpi na nei uh a, AD 1 kumin piang lo hi, a ci na tam mahmah hi. Jesuh' hong suah kum pen 2 BCE/BC ahih kei leh 7 BCE/BC, tua ahih kei leh 4 BCE/BC hi zaw kha ding kici a, a suahni lian zong a thei a om loh banah a kiciamtehna na om lo hi. Mary' kiangah naungek a tuam vilvelin a hoih (special baby) Jesuh na nei ding hi, ci-in vangtung mi in a gen (Annunciation) pen March 25th ni hi, ci-in tanglai Khristian masate ngeina' upna hi a, tua ni-in Christmas a zang zong om hi. Jesuh' pian ding a kigenkholh khit kha kua nung 25th December ni pen a suahni dingin a zang zong om uh hi. March 25th ni Christmas ni-in Khristian masate in a zat uh pen a suahni mahin picingin a sih ni (14th of Nisan in the Jewish calendar) hi, ci-a tuat mi a omna hang ahi hi.

Mi pawl khat leuleu in Christmas December 25th ni-in zat dingin a geelna uh pen Winter Solstice (phalbi lai-in sun hun in ni a niam pen in om ahih manin ni a tom pen ni) leh ni dang lai-a thu-um lo (ancient pagan) Roman midwinter pawite - 'Saturnalia' leh 'Dies Natalis Solis Invicti' December 25 kiim pawlin na zang uh ahih manin hih hun pen mite in pawi a bawl hun uh ahih manin 25th December in Christmas zat dingin na teel uh hi ding hi, cih ngaihsutna zong om hi. Christmas a kizat masakna pen 336 AD kum in Rome kumpi lak panin Khristian suak masa pen Rome Kumpipa Constantine' hunin na kibawl hi, ci-in kiciamteh hi.

Tua khit a sawt loin Pope Julius I in 25th December pen Jesuh' suahni pawi bawlna ni dingin zat dingin official in zat dingin na tangko a, tua khit nungin kum simin 25th December ni pen Christmas in a kizang toto suak ahi hi.

ADVENT CHRISTMAS I CIH BANG A KAMMAL MAN LEH KIZAT NGEINA BANGIN I ZANG MAH HIAM?

Christmas hun (season) hong naih tawh kituakin hih hun-ah i hong lut tawh kituakin Advent Christmas cih kammal kilim zak mahmah hi. Ahi zongin hih kammalte gel pen pawlpi liante (traditional mainline church) in zangkhawm; gawmkhawm ngei lo uh hi. "Advent" a zat uh leh advent bek mah zangin, "Christmas' a zat uh leh Christmas kammal bek mah zang uh hi. A hang bel "Advent" leh "Christmas" pen a tuam vilvel hi a, a deihna zong a tuam tuak mah ahi hi. Advent i cih kammal pen Latin pau hi a, "a hong paina" (coming) a cihna ahi hi.

Advent season pen Khristian pawlpi tampite in Christmas hunin Jesuh hong suah a ngakna leh kithawikholhna hun leh i Topa Jesuh' hong paikikna ding (Second Coming) kithawikholhna hunin a kizang hi a, Christmas pen i Topa Jesuh leitungah mihing bangin a hong suahni phawkna ahi hi. Advent pen Topa Jesuh' hong paikikna ding kithawina hun ahih mah bangin hih hun pen mawhsutna leh Topa’ hong paikikna ding thute lungaihna hunin kizang a, antan'na leh thungetna hun (time of fasting and prayer) in kizang hi. Hih pen pawlpi pawl khat (Protestant & Catholic) ah kha khat sung bang hi a, Orthodox pawlpite bangin kha khat leh lang bang zang uh hi.

Hih pen tanglai thu-um mite in Christmas a kilop ma (4th Century) hun pekin kum tampi tak a na zatsa uh ahi hi. Ahi zongin hun hong pai toto in hih Advent pen Christmas tun ma Nipini a lina (4th Sunday) ahih kei leh Nipini a gukna (6th Sunday) a kipanin Christmas tunkim ni (24th December) dong hong kizang ahih manin Christmas dinga kithawikholhna hun hong suak hi.

Tua ma kum bang zah hiam paisa a kipanin ei pawlin Lungdam Bawl malep - Advance Christmas or Pre-Christmas program i bawl ciangin “Advent Christmas” cih kammal kizat dan kan se lo leh tel lopi-in i zang dihdih laizang hi. I Lungdam Bawl malep programte pen mangpau in i gelh nop leh mi dangte' zat bangin Pre-Christmas Celebration, Christmas Cantata, Christmas Carols, cihte pawl mah zang zaw le'ng kilawm zaw leh man zaw ding hi. Advent Christmas i cih sangin ni dangin “Advance Christmas” i cih pen bang man zaw lai hi. Ahi zongin “Advance Christmas” cih kammal lian pen zong pawlpi liante in Christmas malep program genna dingin zang mel lo uh hi. Tua ahih manin pawlpi lianzaw leh picing zawte zat kammalte mah i zat pen picin' huai pen kha zaw dingin ngaihsuthuai hi.

ADVENT CALENDAR LEH ADVENT CHRISTMAS:

Advent calendar pen special calendar hi a, December kha panin Christmas hong tun' ni dong ni simna in kizang hi. Advent calendar pen a tangpi-in December kha a ni masa ni panin kisim to a, ahih hangin Christian Advent ahih manin November kha a ni bei kuan panin a kizat hun zong om hi. Advent calendar taktak pen 1800-1900 kikalin German Lutherans pawlpite in na zang masa uh a, tu-in Khristian tampi ten kizang ta hi.

Advent i cih pen a tangpi-in 1st December panin Christmas tunkim ni (24th December) kikal hun sung hi a, Khristian tampite in Christmas a khiatna taktak phawkna leh kithawikholhna hunin a zat uh ahi hi. Advent cih kammal kilakna Latin panin "a hong paina (coming)" a cih in a khiatna thum nei hi. (1) A beisa kum 2000 val hun lai-in leitungah mihing bangin hong kun sukin mihing bangin Jesuh hong sihna phawkna hi. (2) Tu-in i nuntakna (sungah) i Topa Jesuh hong teng nuamin, hong pai nuam hi cih lahna lim hi. (3) A thumna dingin, mailam hunah naungek hi loin Kumpi leh Thukhen (King and Judge) dingin leitungah Jesuh hong paikikna ding kisakkholhna hun ahi hi.

Advent Sunday hun pen 27th November in kipan thei a (2016 in tua bangin na kizang hi), 2017 in 3rd December panin na kizang a, 2018 in 2nd December (Sunday) ni panin kizang a, 2019 in 1st December (Wednesday) panin kizang a, 2020 in 29th November panin kizang hi. 2021 in Sunday, 27 November panin kizang a, Saturday, 24 December in bei hi. Christmas hun ngakin kithawikholhna dingin Advent kizat masak hun lian kitel lo a, Council of Tours in siampi (monks) 567 ten December kha simin kha a kipat ni panin Christmas dong antang dingin thu a kipiak 480 AD kiim panin hong kizang hi dingin ki-ummawh hi. Advent hun pen December kha-in antan'na hun - Nativity Fast ahih kei leh Fast of December kici hi.

Saint Gregory of Tours in Advent muak leh lopna a neih uh pen kum zalom 15 hunin Bishop Perpetuus in mi siangtho Martin' annek khopna (feast of Saint Martin) 11 November khit panin Christmas a tun' ni dong nipi kal khat sungin ni thum an a tan'na dingun thu a piak manin Advent pen Lent of St. Martin zong kici a, hih panin hong kipan hi. Hih banga antan'na pen kum zalom 6 dong 'Diocese of Tours' kici siampite' khualzinna hun dong ciangtan nei-in (limited) na kizang hi.

AD 581 in Macon Council in Tour zat ding ngeina a bawl tawh kituakin France gam bup-ah St. Martin phawkna dingin annek khawmna a kineih khit nunga kipanin Christmas ni dong kal khatin ni thum antan'na hunin na zang uh hi. Biakna hahkat mite in Council of Macron' thupiakna hawmthawh uh ahih manin Advent season sung Christmas ni a tun' dong antan'na nisim in nei uh hi. Kum zalom 6 a bei kuanin Greagory the Great in biakna doctrine a bawlphatna hangin antang se loin Advent season pen nipi kal li zat dingin na laih hi. Ahih hangin kumpi Charlemagne in Advent season hun sung teng antan' dingin thu a piak manin antang mi tam mahmah hi.

Kum zalom 3 lai-in Advent season hun in antan'na kinak ciin' lua lo hi, ci-in Durand of Mende in ci hi. St. Louis mi siangtho hi ci-in a kipulakna ah Khristian ten antan'na nak ciin' nawn lo uh hi ci hi. St. Andrew hunin Christmas ni dong Advent season hun sung antan'na kinak zat luat nawn loh hangin sawltak (apostle) za St. Martin a kipiak a kipanin leitung bup-a Khristian thu um mite in antan'na na lim zat mahmah uh hi. 1362 kum in Pope' tokhom tungah Pope Urban V hong tut a kipanin leitung nopna (zu leh sex lam) ah kibual loin kikep siangthona (abstinence) ding a kalh hangin Advent season hun sungin antan' ding kalh lo hi. (Tua hun in Rome ten Christmas a tun ma kal nga sung Advent a zat uh a ngeina uh hi. Sacramentary of St. Gregory. Ambrosian or Milan Liturgies ah bel kal guk hi ci hi).

Greek mite in Advent zat hun ciangtan kician nei lo uh a, a utte in 15th November panin antan'na kipan uh a, pawl khatte in 6th December in pan uh a, pawl khatte in Christmas tun ma ni tam loin a sap ciangin antan'na kipan uh hi. Advent kizat zia 1963 kum in Second Vatican Council in Lent zat zia leh Advent zat zia tawm khat a laih ma-in a kizat dan kibang den pian hi. Second Vatican Council in Advent season pen Khrist in a nih veina hong paikikna dingin hong kamciamna mah bangin Khrist hong paikikna ding lametna tawh ngak hun a zat dingin na laih hi.

ADVENT KIZAT ZIA

Advent season hunin mi pawl khatte in Jesuh hong paina pawi zat ding ngakna a pibawl nuam manun bangmah ne loin antang uh hi. Orthodox Church tampite leh Eastern Catholics Churches pawlpite in Advent season ni 40 kiim bang zang uh a, 15th November panin panin Jesuh' hong paikikna Antan'na (Nativity Fast) hi, ci uh hi. Celtic Christians mite in zong 15th November panin Advent na pan uh hi. Advent season sung teng Orthodox Christians mite in sa leh bawngnawi nei loin tang uh a, a ni tawh etna tawh kituakin (depending) ni khat olive thau, zu leh nga ne lo uh hi. America gam-a Greek Orthodox Archdiocese pawlpite in Advent calendar hun sung a ni tawh kituakin nek ding tua bang tua bangte cih nei se uh hi.

Medieval leh pre-medieval hunin England gam mun pawl khatte ah Nativity (Advent) hun pen 'advent images' ahih kei leh 'vessel cup' ci uh a, singkuang (box) koihin puan ngo tawh a kituam glass sin (lid) tawh koih khawmin, Mary leh Jesuh' lim lahna dingin milim nih koih uh hi. Tua singkuang pen puan pan dikdek (ribbon) leh paak (khat veivei apple theigahte tawh) zeem uh hi. Tua singkuang inn khat panin inn khat ah kizawng a, Christmas tunkim ma hun sungin tua singkuang mu kha lote a kamsia bangin kituat liang hi. Tua singkuang a zawng/dom mite in a singkuang a muh ciangun a lungdamna uh lahna dingin sum na pia uh hi.

Advent Carols tawh kituak mel lopi-in Christmas Carols kisate lakah English hymn song sunga 'People Look East'; 'Come, thou long expected Jesus'; 'Lo! He comes, with clouds descending' cihte leh a kinak sak mahmah 'O Come, O Come Emmanuel!' cihte bang la kisa hi.

Christmas ngakna dingin Advent Sunday lite ah khuameivak li (a ngeina dan in a san li) a kual (circle) in kidingsak a, khuaimeivak (candle) khat in Advent Sunday khat ciat a lahna lim dingin kizangte Nipini khat halin khat khit khat ahi dinga piang ding hi cih up cintenna leh lametna (hope and expectation) lahna dingin Jesuh Khrist’ hong suah ding ngakna in kide hi. A kual sungah khuameivak a ngana (a ngeina in a kang kizang) a, tua pen Khrist’ Khuaimeivak (Christ’s candle) lim lahna hi a, tua pen Christmas Ni in kide pan hi.

ADVENT SUNDAY LITE LEH TRADITIONAL ADVENT THEMES LITE DINGIN KHUAIMEI LI KIDETE PEN HIH BANG A LAHNA HI:

1. Pasian’ Mite – Lametna Khuaimeivak: Lametna pen a mialna mun a taan’ meivak lim lahna dingin kide hi. Lametna Khuaimeivak kide taang tiutiau i muh ciangin Jesuh Khrist’ sungah kilemna i muh manin i pawi khamna (celebrate) dingin i zat hi cih lim a lahna hi. Source pawl khatte ah Lai Siangtho' lim lahna (sign) hi a, khuameivak nihna hi na ci hi.
2. Thuciamlui sunga Kamsangte – Kilemna Khuaimeivak: Kilemna pen a mialna mun a taan’ meivak lahna lim hi. Hih meivak i muh ciangin Khrist sunga kilemna pawi i et kawmin pawi bawlna hi. Khuameivak kide pen Thuciam Lui sunga Jesuh' suah ding a genkhol Isaiah leh kamsang dangte lim lahna a kide hi. Source pawl khat ah khuameivak masa lim a lahna hi, na ci hi.
3. Jesuh' thugente ngaikhia ding leh a paina lamkawite taangsak dingin Israel mite kiangah thu a hilh Jesuh' sanggam (cousin) Elizabeth' i tapa Tuiphumpa Johan' lim lahna lim hi – Itna Khuameivak: A mialna mun a taan' ding itna khuameivak lahna lim hi. Hih meivak i muh ciangin Khrist sunga itna i muh pawi a kham ihi hi. Source pawl khat ah khuameivak lina hi, ci hi.
4. Jesuh’ nu Mary lahna – Lungdamna; nuamna (joy) Khuaimeivak: Lungdamna; nuamna pen a mialna mun a taan’ meivak tawh kibang a, tua lim lahna hi. Hih meivak i muh ciangin Jesuh’ sunga lungdamna; nuamna i ngah pawi bawl ihi hi. Source pawl khat ah khuameivak thumna hi, na ci hi.
5. Khuaimeivak ngana pen Jesuh’ hong suah lim lahna hi: Khuaimeivak kuang in leitung khuavaksakpa Jesuh hong phawksak hi. Jesuh’ nungzui le'ng a mialna mun ah kipai lo ding a, nuntakna khuavak taktak i ngah ding hi. Germany ah hih khuameivak ngana pen 'Heiligabend' kici a, Christmas tunkim ni (Christmas Eve) in kide hi. Biakinn mun tampite ah Advent season lim lahna dingin a sandup (purple) kizang hi. Advent Sunday thumna ah Mary lahna dingin a sandaang (pink) ahih kei leh lingpaak (rose) kizang hi.

BANG HANGIN ADVENT PAAKKUAL HOIH A TUAM DIAKIN THUPI SE HIAM? (WHY ADVENT WREATH IS SO SPECIAL)?:

A kualin a kibawl paak pen Khristiante’ Pasian – tawntung Pa, kipatna leh tawpna nei lo, a mong nei lo a bei thei a hong itna lahna hi. Advent hun khuameivakte lim lahna pen Jesuh Khrist’ hong suahna hangin leitung ah Pasian hong pai hi, cih a lahna hi. Advent hun a khuameivakte Advent in biakpiakna pen Christmas tangthu ah i khualzinna lim lahna hi. Christmas Ni hong tun ma-in khuameivak lite Nipini sialin khat khit khat kide-in kitaangsak a, a ngana pen Christmas a pi ni-in kide in kitaangsak hi.

ADVENT CALENDARS

Advent calendars a kizat dan gam tuamtuam ah kibang loin a kizat zia tuam kawikawi hi. UK leh US gamte ah tawlet (window) 24 ahih kei leh 25 a nei paper (lai) ahih kei card kinak zat mahmah a, a tawlet khat December ni khat ni panin nisim in khat khit khat kihong a, a sungah Christmas milim (picture) kikoih om hi. Kum zalom 19 hunin German protestant Christians mite in Christmas a pi ni ngakna dingin a ni simna dingun suanglaipi tunga suangkang (chalk) tawh 1st December panin a kongbiang uh ni khat in khat vei ta na zik uh hi. 1850s hun pek panin Germany ah paper calendars a kizat hangin 1900s panin kinak zat mahmah hi. Calendar lom (mass) cik panin kikhenkhia hiam cih kinialna lianpi om hi. Galpi Nihna hun lai-in cardboard kicing zo lo ahih manin Advent calendars bawl kikhawlsan hi.

Advent Calendars a kibawl cil hun lai-in Christmas tangthu leh Christmas milimte - snowmen leh robins limte kizang a, tu-in bel television programmes leh sports clubs tuamtuamte in Christmas limte nak bawl mahmah uh hi. Tu hun-a Advent calendars kibawlte ah a tawlet nuai-ah December kha kipat a kipanin nisim in a etlawmsakna dingin chocolate kikoih hi. Tua bangin 1958 panin na kibawl pen 1980s panin kinak zat mahmah hi. European gamte, a diakin Germany ah ip ahih kei leh singkuang (bag or box) 24 a mul thipthiap kikhai lingleng a, box or bag khat sungah nisim adingin a sungah letsong kikoih hi.

Tu hunin bel Advent Calendars zuak ding leh companies tuamtuamte in a a van bawlte uh a khotna ding uh ngimna in van tuamtuam - chocolate, paknamtui (perfumes), zu (alcohol) leh numeite mel puahna dingin a kizepnate (beauty products) nak zat mahmah a, ui leh zawhngeute nek ding nangawn bawl uh hi. Leitung tangthu sungah advent calendar thupi pen 2007 in England gam-a London khuapi-a St Pancras Train Station ah kibawl hi. A a meileeng station puahna dingin advent calendar kizang a sangna lam 71m in sang a, a zaina lam 23m in gol hi.

Advent calendar kibawlna tam bei pen (most expensive) 2010 in Belgium gam-a suangmanpha bawlte (jewellers) bawl diamond leh silver in a kibawl glass tubes 24 tawh na bawl uh a, 3.3 million (€2.5 million or £2.1 million) tak bei hi. Scandinavia a Lutheran Churches ten 1700s hun lai-in khuaimeivak neu 24 tawh Christmas ni simna dingun advent calendar a bawl uh a ki-ettehsuksuk tu-in sumbawlna suaksak uh hi.

America gamah Christmas season hun ciangin kilungdampihna lahna dinga khat leh khat kimuakna leh kinosiatna (greetings) kammal dingin "Happy Holidays" cih kilim zat mahmah hi. Ahih hangin Donald Trump leh fundamentalist conservative tampi takin Obama leh Democrats ten "Merry Christmas" cih tawh mi greeting loin "Happy Holidays" kammal a zat uh pen Christmas a manphatna leh a pawi beisak ding a ngimna uh hi, ci-in zuau bulomtang tawh political support leh votes ngahna dingin mi khemna dingin zang uh hi. A Christmas pi ni-in Merry Christmas cih greeting kammal dingin zat man pen a, a Christmas season hun sung Advent hun panin a bei khit Christmas holidays hun sung teng Happy Holidays cih kammal zat pen khialhna leh a man lohna om lo hi. Advent Christmas cik hunin kizang leh kipan a, Christmas in koi ciang huam hiam cih Khristian kici diak napi-in a tel zo nai lo tengin ''Happy Holidays" cih greetings kammal dinga kizang zadah mahmah pong uh hi.

Sources: Project Britain (The Advent Wreath and Advent Candles); The Tradition of Advent (WhyChristmas.com); Reformed Worship (Circle of Light: Four themes for use with the Advent wreath); Whychristmas.com (Why is Christmas Day on the 25th December?); Advent (Wikipedia)

A kaikhawm: Thang Khan Lian #ZUNs  

JUNTA DICTATORSHIP REGIME LEHDO HUNIN SIH DAN KIPIAKNA ZAT HUAI MAH HIAM?

 JUNTA DICTATORSHIP REGIME LEHDO HUNIN SIH DAN KIPIAKNA ZAT HUAI MAH HIAM?

Pasian in Moses' tungah Thupiak Sawmte a piakna ah, "Mi na that kei ding uh hi," ci-in Paikhiatna (Exodus) 20:13 na gen hi. Ahi zongin Judaism leh Islam biakna zuite in phuba lakna dingin tualthahna na lim zat mahmah zawsop uh hi. Ahi zongin Khristian biakna ah Topa Jesuh leh Thuciam Thak sungah khut khakna leh tualthahna a thukimpih a kimu lo hi. Mihing in nuntakna nih a kineih loh banah nuntakna a piangsak leh a nei Pasian bek hi a, sih dan kipiakna hang tawh thukham palsatin gamtatna leh mi gilo bei tuam lo ahih sih dan kipia-in gawtna (capital punishment or death sentence) pen a thukim zo vet lo leh thapia lo pawl ka hi hi.

October 10, 2021 in Al Jazeera news reports in a genna ah, leitungah gam 108 in thukham palsatin hangin mawhna khempeuh sih dan piak na phiatmang (completely abolished the death penalty for all crimes) uh a, tua lakah gam 28 in a beisa kum 10 sungin kuamah tungah sih dan na pia lo uh hi. Gam 55 bekin thukham palsatna mawkmawk (ordinary crimes) sih dan piak na zang lai uh hi, ci hi.

US makaih nitunmna gamte in amau capitalism a zuih loh manun human rights palsat in a tang ngawh niloh uh Venezuela gam pen leitungah sih dan piak a phiat masa pen gam na hi zawsop a, gam lehpeina (treason) leh gal kido hunin galkapte thukham palsatna (military offences in time of war) kihelin thukham palsatin gamtatna hanga mawhna nam khempeuh 1863 kum pekin sih dan piak na phiat hi, ci-in Britanica in "Capital punishment" cih thulu zangin a article ah na gen hi.

1988 kum panin Myanmar in zong thukhenna court in thongkiate sih dan piak (judicial execution of prisoners) a phiat hangin sih dan piak na zang kiaukiau veve lai hi. India in zong Section 354(5) of the Criminal Code of Procedure, 1973 nuai-ah 'Rarest of the rare cases' a cih thukham palsatna ciatciat dingin a dangte sangin a suksia pha diak a gamtang mi a cihte bek khai lup dingin sih dan pia-in a dang teng na phiat hi.

Gentehna dingin, 13 December 2001 in Pakistan based terrorist groups Lashkar-e-Taiba (LeT) leh Jaish-e-Mohammed (JeM) members ten Indian parliament a suamna uh-ah a suam terrorists li kithatte kihelin mi kua si a, mi 18 liam hi. Indian parliament kisuamna ah a khuakpei (mastermind) Afzal Guru kici Kashmiri separatist Feb. 9, 2013 in kikhai lum hi.

Tua loin Dec. 12, 2012 in kum 22 mi physiotherapy intern Jyoti Singh @Nirbhaya (Kihtak nei lo ci-in minphatna media in a piak) kici Munirka, Delhi ah bus sungah pasal nga in hon buan (gang rape) in a zunthak vang sung nangawn mawtaw pei kisiat ciangin a bawlna sik lawng holhsak gawpin a ngoi teng holh siatsakin na bawlsia gawp uh hi. Buanna a tuah ni 11 khit nungin Singapore ah treatment dingin a kipuak hangin dam zo loin ni nih a kikep khit nungin si hi.

Nirbhaya a buan pasal ngate- Mukesh Singh, Vinay Sharma, Mohammad Afroz, Pawan Gupta, Ashay Thakur leh Ram Singh a vekpi un kimawhpaih a, March 11, 2013 in a kikhumna thong sungah a gui-awk Ram Singh cih loh a dangte 20 March 2020 ni 5:30 AM IST in Tihar Prison Complex, New Delhi ah kikhai lum a, kum cing nai lo (juvinile) Mohammed Afroz @Raju kicipa Aug. 31, 2013 in 31 August in thukhenna ah Juvenile Justice Act thukham in numei buan leh tualthat in mawhpaih a, kum thum thongkia dingin dan pia hi. 20 December 2015 in thong panin a suahtak hangun a innkuanpihte in na sang nuam nawn lo uh hi.

Indian parliament kisuamna leh gang rape cases lo buang India ah sih dan kipia cases tu nai in kiza mel nawn lo hi.

Myanmar Feb. 1 coup d'ètat khit nung junta regime forces thah leh mat a ciamteh Bangkok based Assistance Associations for Political Prisoners (AAPP) in tu ni Nov. 24 in a latest data ah, Nov. 23 in junta galkapte in Botahtaung Township, Yangon Region ah a teng Bhone Myint Aung kici junta custody sungah a thusitna uh-ah a thah beh uh tawh kigawmin mi 1,291 that khin zo uh hi, ci hi.

Feb. 1 coup d'ètat khit nung junta forces mat leh henna a tuak 7,530 a, military court mai-ah kidingsakin dan kipia (sentenced in person) naupang nih kihelin mi 306 lak panin sih dan kipia 26; mat dingin arrest warrants kipiak hangin a bu mang 1,954; military tribunal court mai-ah kidingsak lopi-in dan kipia (sentenced in absentia) mi 118 lakah sih dan kipia 39te tawh kigawmin sih dan kipia 65 pha ta hi, ci-in AAPP in gen hi.

Junta coup regime' military tribunal court in February 1 coup khit nung military council' judiciary in sih dan a piak mi 65te a thah lam kiza nai loin sih dan piak dingin thu a khen hi tadih phot hi. Junta deih loin a langpang leh lungphona nei a thah bel 1,291 pha ta hi.

A tunga i gente panin leitungah gam a tamzaw ten sih dan kipiakna tawh gawtna na phiat khin zo uh hi. Sih dan piak a zangzang lai a tam zawte leh a suuksia pha diak gamte pen communist gamte ahih kei leh authoritarianism tawh ki-ukcipna gamte hi bek hi zaw pian hi. Human rights zahtak leh humbit ding, communism or authoritarianism systems zangin hong ukcip a ngongtat junta coup regime lotthal ding ngimna tawh i lehdo san lai takin junta regime forces bangin sih dan piak leh nautang mot thah i ciing leh human rights a zahtak lo junta regime tawh i kilamdan'na om lo cihna hi.

Silngo (yeast) in anlum golpi ahih kei leh tampi pawmsak hi. Seng sunga baal kiseng lakah baal muat khat paikhia kei le'ng a dang teng lawhin muatsak thei hi. Tua ahih manin Kawlgam ah buaina nasiat lai takin junta regime forces mi thah hunsa loin dalan semin democracy lunggulh nautangte sihna ding, numei khat nuntakna buppi suksiatsakna dingin mi buan, hauh nop luat manin khamtheih guihtheih sute nuntakna suksiatsakna ding bek hi loin a innkuanpihte uh ihmu mawhin a koih, khua sungah guktat laktatna pian'sakna dingin khamtheih guihtheih zuak WARNING kipia napi-in a khawlsan nuam lo teitei mite mi dangte nuntakna na suksiatsak beh ma-in PDF ten hong siansiah uh leh sih dan piak ka gup lohna leh deih lohna in hong hunkhia zo lo ding hi.

Hih bang hunin thau na tawi ciangin thukham palsatte thah theihna dingin LICENSE TO KILL nei kisa-in mi na mot thah zialzial leh na gamtatna tawh kituakin a khuanungin war crimes ngawhna tuakin nang zong dan na tuak thei hi. Tu hun pen Technology Age hun hi ta ahih manin thau i tawi manin ngaihsutna nei loin ganhing hangin i gamtat khak leh seelcip zawh ding hilo hi. Ganhing bangin gamtatte ganhing mah bangin a kibawl hun om hi.

Gam buai hun leh gal kidona ah nautangte ns mot thah khak leh ICC or ICJ thukhenna ah war crimes or genocide ngawhna tuakin thukhenna dan panin na peng kha zongin gamdang na lut leh zin theih lohna dingin human rights a gum gamte in BLACK LIST in hong ciamteh kha thei veve lai hi. Tua loin international community mawhpaihna kituakin junta lehdona ah i political movement hong gum teng i gal lianpen suahsakna ding thubaih hi.

Hihte panin na suahtak zawh veve hangin na gamtatna tawh kituakin ama lim leh mel sunin mihing a piangsak Pasian in na tungah thu hong khen veve ding hi, cih mangngilh kei in. Lai Siangtho sungah Topa Jesuh in, "Tua ahih manin note tungah hong kibawl ding na deih bangun mi dangte tungah na bawl un. Moses Thukhamte leh kamsangte’ thuhilhnate pen hih mah a deihna ahi hi," ci-in Matthai 7:12 sungah na gen hi.

Khristian a kicite in ei tungah hong kibawl ding i deih bangin mi dangte tungah i bawl ding pen Khristian a kicite ngeina leh mawhpuakna lianpen ahih banah Moses Thukhamte leh kamsangte’ thuhilhnate tawh zong a kituakin gamtatna ahi hi. Junta regime ukcipna, bawlsiatna leh nengcipna deih loin suahtakna tawh gam ki-ukna i lunggulh lai takin junta regime' military council leh security forces ngongtatna leh mulkimna nei loin a phengtatna etteh kei ni.

 Thang Khan Lian #ZUNs reports  

ZOMITE IN "IDOL" KICI KAMMAL TAWH I KIPAHTAWI UH LEH THANKSGIVING DAY I ZAT HUN NGAIHSUTHUAI KHA LEH KILAWM HI

 ZOMITE IN "IDOL" KICI KAMMAL TAWH I KIPAHTAWI UH LEH THANKSGIVING DAY I ZAT HUN NGAIHSUTHUAI KHA LEH KILAWM HI

Idol cih kammal pen a a khiatna bulpi (original meaning) hong kipatkhiatna taktak Greek kammal "eidolon" - "milim" (image) a cihna hi. Milim (idol or cult image) pen Pasian bangin mit tawh a kimu thei pumpi milim (physical image) - suang leh sik tawh a kibawl milim ahih kei leh mi (statue, or a person) mai-ah kunsukin biakna pen milim pasian biakna (idolatry) kici hi.

Abrahamic religions thumte- Christianity, Islam leh Judaism ah ''idolatry'' kici kammal pen Pasian ahi lo, na dangte biakna cihna hi. Pasian khat bek biaknate (nonotheistic religions) - Christianity, Islam leh Judaism ah "idolatry" pen pasian man lo biakna (worship of false gods) a cihna hi a, Moses' tunga Pasian' Thupiak Sawmte manphatna sungtawng (core value system of the Ten Commandments) in na khamin, phal vet lo hi cih Paikhiatna 20:3 leh Thuhilhkikna 5:7 ah, "Keimah longal pasian dang na bia kei ding uh hi," ci-in Pasian in na gen hi. Siampi Laibu (Leviticus) 26:1 sungah, “Note in nomau adingin a mai-ah na kun dingun milim bawl loin, a kiseek milim hita leh biakna song hita leh na dingsak kei ding uh a, na gam sung uh-ah suang milim na phut kei ding uh hi; bang hang hiam cih leh kei pen Topa na Pasian uh ka hi hi," na ci hi.

Indian religions tampite lak-a (theistic and non-theistic forms of) Hinduism, Buddhism leh Jainism cih biaknate ah idols (murti) pen a bulpi, a ciangtanna om lo a lim kilahna (absolute symbolism) bangin a kingaihsut hangin "The Absolute, or icons of spiritual ideas, or the embodiment of the divine" ci-in na kingiahsun tham lo lai zen hi.

Hebrew Lai Siangtho (Bible) Greek pau tawh a kiteikhia "Septuagint" (kum zalom 3 -2 BCE kikal) kici ah "idol" kici kammal pen pasian leh nusian (diety) tampi nei biaknate (polytheistic religion) in a pasiante uh ahih kei leh a nusiante uh pumpi sik leh tang dinga palai (physical representations of deities) a zat uh a cihna hi na ci a, Hebrew kammal in "elilim" - a thanem, a ciamteh tham lo, bangmah ahi lo (weak, insignificant, nothing); "pesel" = a kisuitawm milim suakta takin a ding (free-standing carved statue); leh "tselim" - milim (image) hi cih bangin na kitei hi. Hebrew Bible khempeuh ah idol pen "pasian man lote ahih kei leh gamdang pasiante" (false or alien gods) a cihna ci-in a khiatna tuam vilvel (pejorative meaning) in na zang bek uh a, Israel leh Israel mi ahi lote tuu leh keel bangin a kikhensiang vilvelna uh ahi hi.

Jewish tradition ah Abraham' pa Terah pen milim bia mi (idolater) hi a, idols na bawlin na zuak hi ci-in Midrash Genesis Rabbah 38 ah kigelh hi. Idolatry kammal hong piankhiatna Greek kammal "eidololatria" kici pan hi a, a khiatna pen milim pasian biakna (worship of idols) a cihna hi a, Latin kammal in a masa penna dingin "idololatria" ci-in na kizang a, tua khitin Vulgar Latin in "idolatria" ci-in na kizang hi. Tua khit nung 12th century Old French kammal in "idolatrie" ci-in na kizang a, 13th century in English kammal ah "idolatry" ci-in kizang pan hi bek hi. Kammal kibang a khiatna kibang nei (synonyms) dingin English kammal in "idol" a cih pen thupi in i ngaihst diak mite a cihna thu um lo mite in hong pheng zat uh a, tua hong kizeel suak ahi hi.

Gam thumna leh gamdang tung khinsate in a muh a tuah khak masaksakte uh i biakna leh i ngeina tawh kituak mah hiam cih saupi lungngai mel loin thupisim lua kha pahpah in, i minam leh i gam-ah hong puaklut sawm khin pah masa kituh uh bang hi (a khiatna kan man sese lo, kan dingin zong ngaihsun sese lo, ahih kei leh thei sese lo zong hi kha ding uh hi). Conservative kici kammal a khiatna in Lai Siangtho (LST) thu a um a, zuite hi ci-in a khia suk ziau giap ngamte, LST um diak kineihin, Christian kici nuam pha diak conservative ei Zomi sunga hon khatin hih IDOL kammal zong zat mawk uh bel kammal zat dingin a khum ka sakpih het loh kammal ahi hi. American ten a cih uh leh a hih khempeuh i etteh pahpah leh a gay marriage rights, abortion rights leh gun rights khawng uh i etteh suk gawp leh i minam man'thatna a kipatna bulpi a suah khak ding thubaih hi.

US ten a zat khempeuh uh ei civilization tawh kituak mah hiam , ei ngeina, ei tunna ciang (level) leh ei thu upna tawh kituak mah hiam cih tawiteh masa sese loin a pum hoihsak suk pah i tam luat manin a sawt loin a sia zaw tampi hong piang beh lai ding bang hi. American ten annual Thanksgiving Day a zat ni uh bang eng suk pah pongin, i zatpih pah pong zong a bul a bal kancian le'ng Christian ngeina hilo hih tuak hi. America tuaksuak mite (indigenous people) Native Americans mite a lom thahna uh lungdam kohna pawi a bawlna panun hong piangkhia minam dangte lom thahna lungdam bawlna pawi na hih tuak thong hi. Historians tampi gelhna panin a kimuh theih banah Native Americans ten a zakdah mahmah uh pawl hi.

Leitung adingin mihingte civilization ah mi kilom kithahna nasia pen "WORST GENOCIDE" mundang ah piang lo a, Native Americans 100 million a kilom thahna tawh Americas nihte ah hong piangkhia ahi hi. Thu um i kicih takpi leh i kammal zatte leh pawi zatte Christian ngeina tawh kituak mah hiam cih zong lungngaih tham mahmah hi.

AMERICAN THANKSGIVING HONG KIPATKHIAT ZIA - LUNGDAMKOH ANNEK KHAWMNA (THANKSGIVING FEAST):

Christopher Columbus in 1492 in South Asia lam sum bawlna lampi zong dingin Japan manawh kimlai America gam na tung zawsopin, Leitung Thak (New World) ka mukhia hi ci-in hong tangko hi. Tua khit nungin Mikang gamkeekte leh England gam-a biakna hanga bawlsiatna thuak ding kihtate America ah peemta leh gamkeek in hong lut uh hi. America gam-ah Europe pan a gambeel a va teng mite (settlers) in a gam keekna uh leh America ah teen'na ding a bawl theihna dingun Native Indian 300 million in thahna/sihna tuak uh a, leitung tangthu adingin kilom kithahna nasia pen (worst genocide in human history) hi lai hi.

1621 in upmawh thu kigenna tawh ki-upsakna tangthu (mythologised) ah biakna pia dinga khualzinte (Pilgrims) leh tualsuak mite Native American ten anlim nono nekkhawmna (gastronomic encounter) nei uh hi cih pen US history ah a zak nop dinga tangthu phuahtawm kiteisawn (fairytale version) hi napi US history ah inndei suang kiu ahih leh inn kingakna tawphah dinga kizang suang suak hi. US ten gam bup Lungdamkohna Ni pawi a neih ciangun lungdamna leh annek khawmna hunin zang uh a, ahih hangin US Presidents ten tua ni-a gawh dinga kipia turkey kici ak nam khat a maisakna uh en dingin mihonpi leh news reporters a dim a ha-in kiphu ngeingai in buai khop den uh ahih mi tampi in hih bang ngeina zadah mahmah in, a gensia tam mahmah ta uh hi.

Historical context panin enpak leng Thanksgiving zatna pen a kihhuai thupiang tuamtuam (nauseating affair) tampi na om hi. University of Texas journalism professor Robert Jensen in AlterNet website ah, "Thanksgiving" cih kammal pen mindaina/maizumna (disgrace) tawh kidim hi ci hi. Robert Jensen in a laigelhna ah, .."1637 in Massachusetts Bay Colony governor John Winthrop in Pequot India mite pasal, numei leh naupang za tampi lawhcing takin a kilomthahna (successful massacre) phawkna dingin "thanksgiving" zat dingin tangpi tangta theih dingin na tangkokhia (proclaimed) hi. Hih bangin American continent (North leh South America ah) ah American Indians minamte 95 panin 99% kikal kilomthah in mangthang uh hi," ci hi.

Historian leh "An Indigenous Peoples' History of the United States" laibu gelh Roxanne Dunbar-Ortiz in Thanksgiving Day kizat pen ngaihsum tham cing mahmah a, lawp luatna dingin tha hong pia ding om lo hi ci hi. 2015 in nial zawh loh ding Native American minamte kilomthahna thu (indisputable genocide of Native Americans) tawh kisai lai a gelhna ah Dunbar-Ortiz in, "Gamkeek a America a lut a teng (settler colonialism) ten milom thahna dingin "genocidal policy" kici a zat loh uh kiphamawh uh a, "Euro-American colonialism" pen "capitalist economic globalization" ahih manin a bul panin milomthahna tawh na kipan hi," na ci hi.

Tua bang mahin tu lai-in Iraq, Libya, Afghanistan leh Middle East gamte a kilom thahna pen Euro-American neo-colonialism policy mah zopna hi a, milom thahna tawh a ngonggamtatna uh pen America ah Native Americans mite leitang suhsakna dingin "capitalist economic globalization" a zat mah bangun tu-in a zang lai uh hi bek a, leitung bei dong zang ding uh ahih manin amau gam ngimna tangtun sakna ding leh meetna (interests) ding ahih peuh leh milom thahna dingin "genocidal policy" khawlsan ngei lo ding bang uh hi.

Tua banah leitang guksakna (land theft) tawh kisai Dunbar-Ortiz in a genna ah Native American mite sum bawlna lampite (trade routes) laksakna leh a leitang uh guksakna hangin nek ding leh a kisam na tuamtuamte haksatna leh kitangsapna piangsak ahih manin milip khan'na ding a dal banah gaamkeekte tung leh European mite van bawlsate tungah a kingak peelmawhna ding uh lampi piangsak hi ci hi.

A phamsa historian Howard Zinn in a laibu "A People's History of the United States" ah Mikang gamkeek ten 'capitalist dispossession' kici zangin 1814 Treaty kici thukimna Native Indian Creek nation tawh bawl uh a, Indian minam khat panin Indian minamte khenkhia (splitting) uh a, a beh leitangte uh khensak in, leitang tawh golhgukna (bribing) zangin pawlkhatte tungah leitang pia uh a, pawlkhatte tuamkoih khiat uh hi. Hih thu hangin a meet bekbek lamet leh haipihna tawh mihaute thuneihna tawh ki-ukna Western capitalism lungtang hong piang hi, ci hi.

Tua loin US ten tualsuakmite Native Americante leitang suhsakna dingin "land grabs" policy zang uh a, a patkung ciin'na (cotton cultivation) dingun pat kumpi gam (cotton kingdom) leh sila zanga lokhawhna leh singkung suanna "slave plantations" cihte bulphuh hong pianna suaksak uh hi. A tom in gen leng a beisa hunin US tangthu phuahtawm bawl ten (mythmakers) thukham tawh kituak loin a ankuang uh-ah "pumpkin pie" leh "cranberry sauce" bek koih ding a thupisim uh pen a lamdang hilo hi.

The United American Indians of New England ten US leh European settlers ten Thanksgiving tangthu a man loin phuaktawm (fabricating) uh a, 1970 panin Thanksgiving Day pen Gam bup Dah Ni "National Day of Mourning" ci-in tu dong lungphona lahna ni-in na zang ngekngek den uh hi. American ten Lungdamkoh ni ci-in anlak pawi ci-in gam bup khawl ni-in a zat hangun America tualsuakmi Native American ten hih ni pen kum zalom tampi sung ka leitang uh hong kisuhsakna (land seizures) leh ngeina tuam ngiat minamte ngeinate beimangsakna/nawtmangsakna (erosion of tribal culture) ciamtehna dinga khawl ni hi ci-in ngaihsun uh a, gam bup dah ni (National day of Mourning) hi zaw hi ci uh hi.

**THU KHUPNA: **Idol i cih lak-a minthang vangvang pen sung milim suihsiam Mark Porter in sumngo zangin a bawl 3,000 pounds a gik, 8.5 feet (2.6 m) a sang Satanic Pawlpite in US gam-a Massachusetts state sunga Salem khuapi-a Satanic Temple kong mai-ah a din'sak uh, a lu keel' lu tawh a kibang "Baphomet bronze sculpture or statue" hi (a nuai-a milim hi).

US gam-ah Khristian biakna hatsak kik ding, White House ah Pasian omsak kik dinga tangkopih US President Donald Trump' government in May 7, 2019 in Salem khuapi-a Satanic Temple pen official religion hi ci-in ciamtehna a piak banah Satanic Temple pawlpite tungah siah lak maapna pia (exempted tax) hi. Tua bangin a thukhensatna a lak pen May 4, 2017 in Religious Liberty Act kici biakna khatpeuh suahtakna ding thukham kipsakna ding leh thukimna dingin a presidential Executive Order suai a kaih manin a pian'sak suak hi. Hih thu pen Trump' kamciamna tawh a kilehbulh hangin US gam religious state hi loin secular state ahihna a thahatsak semna leh US Constitution ngeina bel hi zaw hi.

Pasian um kicici pongin, hong makaihna nung zuizui napi-in Paikhiatna 32 sungah kamsang Moses in Sinai Mual Tung ah ni 40 leh zan 40 sung Pasian tawh a kikholhkhop lai takun a sanggampa siampi Aron' kiangah Israel mite in, “Kithawi in; kote’ mai-ah a pai ding pasian hong bawlsak in. Egypt leitang panin eite hong paikhiatpih to Moses ahih leh bang suak khin cih i thei kei hi,” (Paikhiatna 32:1b) ci-in a kalh ciangun Aron in amaute kiangah, “Na zite, na tapate, leh na tanute uh bil tungah a om kham bilbahte sutkhia un la, kei kiangah tuate hong paipih un,” ci-in Israel mite milim pasian dingin Kham Bawngno a bawlsak mai-ah kunin, a bia pah mite i bat khak pah a, Pasian' hehna hai kibua i thuak khak ding uh thubaih mahmah hi. Kineihkhemna leh milim biakna pen Pasian' adingin a kihuai mahmah hi cih phawkhuai hi.

THANKSGIVING DAY CIK A KIZANG A, BANG NI A KIZANG HIAM? (Thanksgiving Day kipatna leh US history ah thukham a palsatna uh seelmangna dingin kum sim pawi kizang ahihna thu tom kim a etna) a kitel zaw a sim nuamte adingin a nuai-a link mek leng sim theih hi.

https://tklyant.blogspot.com/.../thanksgiving-day-cik...

@Thang Khan Lian #ZUNs

Photo: Satanic Temple' Baphomet broze statue, Salem; Massachusetts  

ZO SUANTE SUNGAH BIAKNA TANGTHU HONG LUTNA LEH BIAKNA PAWLPI THU TANGTHU KUPNA

 ZO SUANTE SUNGAH BIAKNA HONG LUTNA LEH BIAKNA PAWLPI THU TANGTHU KUPNA

Mizoram ah missionary lut masa lakah a minthang diak James Herbert Lorrain, (6 February 1870 – 1 July 1944) pen Scottish Baptist pan hi a, Lusei (Mizo) ten Pu Buanga ci-in samin a min na pia uh hi. Mizoram Presbyterian ten Mizogam ah missionary hong lut masa pen ci-in a thukim leh kipsak uh March 15, 1891 in Tlawng lui pan (river banks) panin Changsil ah a hong lut Rev. William Williams hi. William Williams (11 February 1859 – 22 April 1892) pen Khasi Hills, northeast India ah Welsh Presbyterian missionary hi a, 19th century bei kuanin Khasi Hills tung hi. 20 March, 1891 in Aizawl ah British military expeditions hun lai (1881 and 1889 Lushai expeditions) in British galkapte tawh va hawh a, April 17, 1891 in ciahkik hi.

Mizoram in "Missionary Day" a zat ni uh 11th January pen Rev. Williams Williams leh 1894 in James Herbert Lorrain' tun' ni public holiday in zang uh hi. Rev. Williams leh J. H. Lorrain pen Mizoram leh Assam leh Arnunachal Pradesh states sung mun pawl khatte ah Proterstanism a hong pua lutte leh Mizo lai a bawlsakte ahi uh hi. Mizoram in 11th January ni Missionary Day in ci-in public holiday in a zatzat uh hi napi-in 2012 in Mizoram Presbyterian Church in a 89th General Assembly in ah 15 March ni "Missionary Day" in zat dingin a thukimna bangin na laih uh hi.

Chin Hills, Hakha ah a hong lut masa Rev. Arthur. E. Carson leh a zi Laura. H. Carson pen American Baptist International Ministries pan hi uh a, Karen missionaries huhna (support) tawh Hakha ah 15 March 1899 in hong tung thei uh hi. Amah zom ah hong lutte zong American Baptist International Ministries pan missionaries vive ahi uh hi. Tedim kuam sungah hong lutin Zolai hong bawlsak J. H. Cope zong American Baptist International Ministries missionary mah ahi hi. Chin Hills ah missionaries hong lut masate pen RC, UPC, AG, Presbyterian, Full Gospel, Seventh Day etc denominations pan hilo uh hi. Hih bang pawlpite pen a khuanungin pawlpi doctrines kibat lohna hangin a hong piangkhia tawm ahi hi.

CHIN STATE AH MISSIONARIES TUAMTUAM HONG TUN' HUN:

American Baptist Missionaries mite Chin Hills ah hong tun' hun uh a nuai-a bang ahi hi:-

1. Rev. Arthur E. Carson leh a zi Laura H. Cason - 15th March 1899

2. Rev. Dr. E.H. East leh a zi - 21st March 1902

3. Rev. Dr. Joseph Herbert Cope leh a zi - 21st December 1908

4. Dr H.H. Tilbe leh a zi - 1902

5. Dr J.G. Woodin leh a zi - 3rd November 1910

6. Rev. C.U. Strait leh a zi - 27th October 1925

7. Rev. E. C. Nelson leh a zi - 3rd December, 1939

8. Rev. Johnson leh a zi - 7th February, 1947 cih bang ahi hi.

Carson topa leh tonu hong tun' khit nung Chin Hills ah Lungdamna Thu damdamin a hong kizelh khit nungin 1907 kumin Chin Hills Baptist Association na kiphuankhia masa hi. ZBC phuankhiatna dingin March 1952 in mission secretary Rev. E. E. Soward survey bawlin Chin Hills ah a zin kawikawi masak lai takin Chin Baptist works in-charge a len pen Rev. S.T Hau Go hi a, Hakha based Rev. Robert Johnson leh a zi, leh Tedim based in a nei Nelson holiday in pai uh hi.

Falam Baptist Church ah October bei kuan leh November kha bul 1952 kumin meetings hunin ZBC phuankhiat ding vai kamkupna na nei uh a, "one Baptist organization" ci-in Tuiphum pawlpi kipawlna khatah kigawm ding leh a organization min ah a national title dingin ZOMI zangin Zomi Baptist Convention (ZBC) cih ding Falam Baptist Association, Tedim Baptist Association leh Hakha Baptist Association pawlpite in na thukim uh hi. March 5–7, 1953 Zomi Baptist Convention cih "officially leh universally" a thukimna a neih uh Saikah, Thantlang township ah general meeting hun ahi hi. "Official leh universal" a cihna a khiatna tel nai lo kitam tuak bang hi.

Burma ah a political context dinmun a kilaih tawh kituakin Chin Hills sungah tuiphum pawlpi teng kipawlna ZBC kum 30 in a upat khit nungin Zomi cih a "national title' minpi dingin zat suak ding vai puahphat (review) kisam hiam? cih dotna hong piang hi. Hih vai tawh kisai April 1983 in Thantlang town ah Triennial meeting neihna uh-ah kipuakin kamkumna na nei khawm uh hi.

April 16, 1983 in dominant Associations nga panin min nei thugen ngate in thu a gen khit uh ciangin ZBC organization min ah a national title dingin ZOMI mah zat suak lai ding review kisam hiam cih a proposal a kipsakna dingin vote na khia uh hi. Delegates pai khawm palai 434te lak panin Zomi cih mah zat suak dingin 424 delegates in vote khia uh hi. A tam zawte in Zomi cih mah zat suak dingin phasa uh ahih manin a triennial meeting or session a makaih Rev. James Tial Dum in a national title ah ZOMI mah kizang suak ding hi, ci-in na tangko khia hi.

Khuasak ah 5–9 April 1995 in ZBC Triennial Conference hunin Associations li - Tonzang Township Baptist Association (TTBA), Tedim Baptist Association (TBA), Kale Zomi Baptist Association (KZBA), leh Tamu Valley Baptist Association (TVBA)-te a triennial meetings panin paikhia (walk out) uh a, organization thak Zomi Baptist Convention of Myanmar (ZBCM) cih a phuankhia-in ZBC panin lengkhia (breakaway) uh hi.

Tua khit nung biakna ah church politics ah ZOMI cih a kawcik ngaihsutna (narrow concept), a kawcik minam itna (narrow nationalism), a uang lua ahih kei leh gualheu masakna, mi tawh kinak phamawhsa lo a omna, mi tunga khutkhialh phamawh saklohna gam leh minam itna (exxagerate or agressive patriotism) chauvinism leh jingoism ci-in mikangte kammal ah a kizang church politics nasiat hong kipat bang pian hileh kilawmin, Zomi cih a kawcikin a khiatna ultungsak nopna khang semsem hong bang hi. Zomi church politics leh political party dirty politics tawh Chin State ah ethnic groups dangte leh docrines kibang lo pawlpite tuam bawlna leh gal bawlna lungsim leh khaici kituh hong bang pian hileh kilawm hi. Biakna leh politics a kigulluk luat man hoh hileh kilawm bang hi.

Falam, Hakha leh Tedim Baptist Associations in Zomi cih "officially and universally" in zat dinga thukimna March 5–7, 1953 in a om khinsa kizang toto a, 1983 in thantlang ah trienniel conference hunin na kipsak suak lai uh hi. Ahi zongin Zomi cih "narrown nationalism concept" in ngaihsutna hang ai tam Zomi a kici pha diakte ZBC panin 1995 in i lengkhiat zawh uh April 1, 2013 panin 'Zomi Baptist Convention' panin 'Chin Baptist Convention' a suakkik hi pan hi. Sawt nai lo a, Zomism cih ei bekin i aituam kineihsak phat diak khit nung suak hi.

Tua loin ZBC founder cih theih kuamah om loin founding fathers bel na om mah uh hi. A deihkaih leh personal property danin a ngaihsun nuam teta hi leng bel a FOUNDER khat bek om cih tangthu ahihna tawh kitukalhin (distorted history) in gen miumiau theih na ve! ZBC founder credit mi khat bek i piak sawm teitei le lah Chin Hills ah survey a bawl khit nung Baptist Associations a om tengin:

1. Chin Baptist in kipawlna khat (one organization) neih ding,

2. Agriculture School tawh a kithuah khawm Bible School khat neih ding,

3. Mission Hospital khat neih ding cih a proposal neihte kipumkhatin nasep khawmna ding

ci-in kipumkhatna ding a geelna a neihte (proposals) a lui leh a sung khia Rev. E. E. Soward minphatna (credit) piak huai pen leh kilawm hi. ZBC hong kipatna bulpi (origin) pen pen American mission of the American Baptist Mission (American Baptist Churches, USA) panin Yangon ah July 13, 1813 in missionary hong lut masa Adoniram Judson, Jr. (August 9, 1788 – April 12, 1850) leh Ann Judson hi. 1865 in amau mapan'na tawh Burma Baptist Missionary Convention na kiphuankhia hi. 2006 in 4,522 churches leh 1,142,655 members pha uh a, 2020 in denomination census in a genna ah 5,319 churches leh 1,710,441 members pha hi, ci hi.

E. E. Soward' saupi muhkholhna leh phasakpihna (vision leh recommendation) bangin 1953 in Sia Hau Go' supervision nuai-ah Tedim ah Bible school na kihong masa pen hi. Tua khit Johnsons (Rev. Robert Johnson) supervision nuai-ah Hakha ah a LST sanginn na kituah hi. Tua khit 1959 in Falam ah zawngngeu no nei bangin kituah kik leuleu hi.

Chin Hills sunga biakna pawlpi sungah kitelsiam lohna hong kipatna bulpi leh a hong kuang khiatna hih nengneng khawng hang hoh ai tam maw ci-in ngaihsun thei zel ing. Bang hang hiam cih leh tu hun ciang dongin Chin State politics ah government infrastructure leh project khatpeuh Tedim leh Tonzang townships panin townships dangah a kilaih leh anti-Chin nationalism leh politics huih thau khauh mahmah a, Myanmar government in "oficially recognised" ci-in 35 Chin ethnic groups ah hong ciamtehna pi-in Chin pum muhdahna, lang bawlna leh gal bawlna thu vive online ah a dim a ha kimu den hi. Zo suante sungah kikhenna leh kituah lohna pen politics sangin biakna panin na piang masa zaw leh tua panin hong kizom toto bang zaw hileh kilawm hi.

Chin Hills tangthu sungah a Bible school min na kilaih kawikawi a, 2013 in Chin Christian Institute of Theology na kici a, 1982 kum in a college pen Association for Theological Education in South East Asia in "member institute" in na sang hi. 1991 kumin Association for Theological Education in South East Asia in a bible school Bachelor of Theology (B.Th) course a ciamtehna (accredited) na pia-in na san'sak hi. Tu-in a Bible school ah Agricultural studies course zong kisin thei ta hi.

Mission hospital taksuah ngei lo (never materialized) hi. Ahih hangin Chin Hills ah medical doctor hong pailut nuam hi (Tua hi napi-in bangin khaktan hiam cih ka tel zo kei hi). Mission hospital bawlna dinga equipment allotment $30,000 hong kipia mundang ah kihei (diverted to other place) khia hiau hi. Sum vai, makai tutna kituhna hang, Bible school omna mun ding kituhna leh church leh politics kikhen (secularism) loin a kigulluk sak nuam makai i hauh luat manin ZBC ah Zomi min national title in Hakha, Falam leh Tedim Baptist Associations ten a kipumkhatin i zat kimlai uh a kitamkham na hileh kilawm hi.

Missionaries hong lut masate American Baptist International Ministries pan vive hi napi-in church dominations leh doctrines based in hih zahin Chin state ah organisation or associations a tam miaimuai in i kikhen uh pen church leh politics a kikhen lohna hang leh sum leh paai leh makai leh panmun deih luatna hang liuliau lo Jesuh' sisan leh singlamteh phungah kipumkhat kimlai i kikhenna ding uh thu dang ka ngaihsun zo kei hi. Tu ni ciang dong Zomi sungah thu um mi a kibehlap hanhan lah hilo napi-in biakna pawlpi leh denominations thak nasia takin kibehlapin, pawl kipumkhat kimlai a kitapkhap kawikawi mawk pen i biana makai leh siate pen sia man lo (false teachers) leh upna lampial (heretics) a tam luat hang lo buang a hang a dang ding om kei leh kilawm bang hi.

Sawltak Paul in hong thokik vat thei hen la, Chin State leh Zomi biakna pawlpite kalsuanzia hong mu leh Korin 11:17-19 kikal sungah, "Ahi zongin a nuai-a thu tawh kisai-in note ka hong pakta kei hi. Bang hang hiam cih leh pawlpi kikhopna na neih uh ciangin phatna sangin siatna na piangsak zaw uh hi. A masa penin, pawlpi na kikhop uh ciangin note lakah pawl kikhenna om hi, ci-in ka za hi. Hih ka zak thu a manna om kha dingin ka um hi. Bang hang hiam cih leh kua teng pawlpi mi citak ahi hiam, ci-in a kilatna dingin kikhenna a om mah ding ahi hi," ci-in a gen bangin a hong pahtak lohna thu gen khumin hong tai gawpin hap khat hong suah bak dingin ka um hi.

I biakna tangthu leh kikhenna thu i gen khak ciangin tangthu phawktawm gengen leh mi su tuah, ci-in hong ngawh niloh pawl khat om hi. I biakna tangthu leh pawl kikhenna bangin hong piangsak hiam? Biakna pawlpi kipumkhat kimlai i kiphelkhap manin thu um mi kibehlap tuam hiam? I mission field gol beh hanhan hiam? cihte ngaihsut phat ding deihna hi zaw hi. Kei zong tuiphum pawlpi sung panin a piang, a khangkhia leh Baptist church member ka hi hi. Biakna leh gamvai a khen dan i siam mateng pawl kikhenna, a kipumkhat kimlai kitapkhapna leh kimuhdahna nasiat beh semsem lai ding hi.

Kuamah suktuah nopna hi loin bangin kikhenna hong piangsak hiam? Cik hun-a kipanin kikhenna piang hiam? Zomi national title ki-aituam neihsakin i seek neuh behna hangin bang teng kihamphatpih tuam hiam? cih i lunggaih kik ding deihna hi zaw hi. I docrines kibang lote kitelsiamsakin i omna tekah kikhen behna i pian'sak nawn loh ding lunggulhna hi zaw hi. Biakna ah i kipumkhat leh kiho theih mateng Zomi min zangin party leh political movement min tawh kipumkhatna leh kituahna piang pah hanhan ding i sak khak leh hih sangin kikhemna lianzaw a dang om lo ding hi. Zomi cih pen pawl kipumkhat khenna ding leh namdangte gal bawlna dingin i zat lai teng ei leh ei i kiseek neu beh semsem zaw lai ding hi.

✍ Thang Khan Lian #ZUNs reports