A LUNGNGAIHHUAI TANGTHU: NA HUH ZAWH DING AHIH KEI BUANG LEH HUH DINGIN KAMCIAM SESE KEI IN
Zan khat phalbi suuksiat lai-in vukkia ziahziah hi. Tua hun lai takin khuavot mahmah nuai-ah mihausa billionaire khat a inn zuanin hong pai lai-in a innkong pua-ah a kon khikhe sa-in a tu puteek khat mu hi. Mihaupa in tua puteek kiangah, "Kong pua-ah hih bangin na om vot sa lo na hiam? Puantungsilh (coat) silh loin hih bangin na om mawk khuadam lam phawkkha lo na hiam?" ci-in hopih in va dong hi.
Puteek in, "Hih bangin khuavot nuai-ah omom ka hih manin ka kingeinaseh hi," ci-in dawng hi. Mihaupa in, "Hong ngak pan in... Ka inn sungah va sungtum in, na puantungsilh ding khat va la pak ding hi. Tawm vei sung hong na ngak in maw?," ci hi. Tua puteek inn nei lo mizawngpa (homeless poor old man) in mihaupa in puantungsilh a piakna dingin a kamciamna thu a zak ciangin lungdam in thangah mahmah a, "Hih lai mah ah kong ngak ding hi," ci-in dawng hi.
Mihaupa a inn sung a lut khit ciangin inn sungah buaicip den ahih manin mizawng puteek pa kiangah a kamciamna mangngilh ahih manin kong pua kankhia loin ihmu suak hi. Zingsang a thawh khiat ciangin puteek pa kiangah a kamciamna phawkkhia vat pan ahih manin puteek omna mun zong dingin hong kipei biangbuang keei hi. Tawm vei sung a zon khit nungin puteek a si sa-in kong giugusa-in om mu a, puteek pa in a sih ma-in a kammal nunung pen a vaikhakna dingin lai khat gelh in hih bang nusiatsan hi:
"Khuavot thuakna leh dona dingin puanlum ka neih loh hangin khuavot thuakzawhna dingin thahatna; vangliatna; hih theihna (power) ka nei hi. Ahi zongin puantual piak dingin nong kamciamna ka zak ciangin nong kamciamna ah awk-in hong khilkhawm (attached) ahih manin khuavot ka do zawhna dingin ka vangliatna nong lakkhiatsak mang hi."
Na kamcipna na kipsak zo loin na pelh ding bek ahih leh kamciam sese kha kei in. Na kamciamna na kipsak leh tangtunsak loh hangin nang adingin bangmah in simtham lo kha ding hi. Ahi zongin na kamciamna na peel a thuakkha mite adingin lametna bek hi loin na khempeuh a hawmpi suaksak thei hi. Thukhenna zum; zumkong (court) ah thuman teci gen dingin kamciam loh phamawh ahih kei buang leh kamciamna a ban bawlbawl mite mi muanhuai lo pente na hi zawsop nuam mahmah hi.
Thu-um Khristian hi ing na kicih leh kamciamna bawl kha sese kei in. Matthai 5:33- 37 kikal kikal ah Topa Jesuh in "Kiciamna tawh kisai a Genna" ah:
"Tanglai-in mite tungah, ‘Pasian tungah na kiciamnate uh pelh kei un la, ama tungah na kiciam bangun tungsak un,’ ci-in a kigenna na zaksa uh ahi hi. Ahi zongin ke'n note kiangah kong gen in ah: Hih ding khat peuhpeuh na neih uh ciangin kiciamna na zang vet kei un. Kiciamna-in vantung na zang kei un — Pasian' tokhom hi veve hi. Leitung zong kiciamna-in na zang kei un — Pasian' khengakna mah hi veve hi. Jerusalem khuapi zong kiciamna-in na zang kei un — Kumpi lian ahi Pasian' khuapi mah hi veve hi. Kiciamna-in na lutang zong na zang kei in. Na lu tunga om samzang khat bek nangawn a kangsa vomsak thei loin, a vom pen na kangsak thei kei hi. Na gen peuhmah ahi ahih leh, ‘Hi,’ ci in la, a hilo ahih leh, ‘Hilo,’ cihna tawh kicingsak in. Tua bang hi loin kiciamna kam na zat ciangin Dawimangpa tawh kizomin thuman lo na hih lamtak hong kilang hi," na ci hi.
(Heart Touching Story kici online panin tangthu tom ka Pu Muan in a post ka muhna panin kong teisawn, behlap leh puahphat ahi hi).
