THEI BANG SENLAI HUN IN BAWLLUNG THUKHUNTE
(Football Rules of our childhood)
1. A tai hat lo penpen ding leh a giltui penpen kungpang (goalkeeper) dingin kidingsak den pianin kung kingaksak hi. Players tua zah cih om sese loin a om zahzah hi kisui-in kimawl hi.
2. A kimawlna puai (match game) a bei hun (match time) cih huncian om sese loin gim/tawl mahmah dong ahih kei leh a bawllung kimu thei nawn loin khuamial dong kimawl BEST OF GIM MAHMAH DONG or BEST OF KHUAMIAL DONG hi. (Rule no. 6 lo buang kimawlna khawl cih om mengmeng lo hi).
3. Kung ah a kikhum (score) a tam leh a tawm in pua loin a zo leh lel cih bang om thukhen masak ih om sese loin a khum nunung pen in zo hi.
4. Phit mut (referee) cih bang kisam sese loin players khempeuh phit tum hi ziau hi.
5. A kam hathat ahih kei leh a kineihkhem siamsiam tungah foul kipia hi. A nasia leh val lua diakte bek foul kipia hi.
6. A bawllung neipa i nuaksak khak ahih kei leh i hehsak khak peuhmah kimawlna kipan cil pan nangawn a game man ziau a, a bawllung man in inn ciah vingveng ahih manin tukpeng tualpi ah khat leh khat khe kisui-in kimawl cih lah hi hi thei sam lo ahih manin nu leh pate' sap kul sese loin inn kizuan baih mahmahin sap kul sese lo hi.
7. Kimawlna ah a siam pha diak nihte (2 best players) gel team khat ah a pan'khawm ding uh kiphal lo ahih manin lamsak leh lamkhang kidem i hih kei buang leh team players ding deihdeih kiteel thei hi.
8. Team players ding a kiteel ciangin a nunung penna dingin hong kitengkhiat leh a siam lo pen kicihna hi teh cihna bangin in kingaihsun ahih manin kimindaisakna leh kimaizumsakna hi. Tournament kician neih ciangin team players kikim kimawl kimlai hong kilaih (substituted) or a ngak pawlin hong kikoih (benched) pen a siam lote a kibawl zia ahih manin kisimmawhna sangpen in kituat hi.
9. Penalty ngah ciangin kungpang siam pen in kungpangpa va laih in kungpangpa kung (goal) panin hong kihemkhia a, a team lang lamte in a phal loin a kam hat zawh uh leh (complaint a khauh leh) kungpangpa mah in va ngak kik veve hi.
10. Tukpeng tualpi panin bawllung mun simtham (remote destination) ah a suikhia a om leh a suikhia pa mah kizongsak hi. A suikhia pa bawllung nei pa ahih kei leh player siam pente ahih khak leh players lakah kilai a hat lo pen leh naupang pente kisawl hi.
11. Kimawl sim in a bawllung nei pa mah bangin a best player pen a team omna lam kibang den a, amau ututna lam teel thei uh hi. A bawllung puai khawl hun ding thuneihna nei bawllung nei pa bekin tua bek ah thunei zaw den hi.
12. Kimawlna puai a kipat ding ciangin phit mut om sese lo ahih manin i kam mah tawh kigenin kipan hi.
13. Team lang khat lam leh a lang lam a kitelkhialh lohna dingin a lang lamte puan suahin kimawl (play shirtless) ahih kei kei leh kawng peuh ah puan gak uh hi.
14. Nungdal ah a ding a tuam ngiat, mai tai cih bang om loin a kisapna munmun ah a ut peuh kitai kawikawi ahih manin "massive attack, massive defence" game hi. Kimawl kimat ma bekin taina mun leh din'na mun kihawm hi.
15. Tua bang hi napi-in a bawllung nei pa pen FIFA ahih manin ama thuthu hi a, a ut leh bawllung delh in a ut kei leh delh lo hi.
16. Offside cih bang om sese loin a ngalhat pen leh a tai hat pen in goal tham thun zo a, siam luat kisam sese lo hi. Best player in goal tam khum pen den lo a, bawllung tawh a tai hat penpen in goal tam thun zo hi.
17. Kimawl laklawh lai takin na nu leh pate in hong sam leh nang pan'na mun ah mi dang khatpeuh din'sak pak theih a, nong ciahkik ciangin laih kiin kimawl na zom thei hi.
@ Thang Khan Lian #ZUNs report
