KEANU REEVES' NUNTAKNA PANIN THA LAKNA: MI DANGTE KHUALNA (CARING OTHERS)
A nuai-a subway sungah mi mawkmawk tuangin a dingpa leh maan dangte pen "The Matrix" trilogy Hollywwod movie star Keanu Reeves hi. Keanu Reeves kici action leh romantic movies tuamtuamte ah piahin a, Hollywwod actors minthang pen pawlte lakah kihel hi. A "biggest films" ci-in a kiciamtehte lakah - The Matrix (series); Speed; John Wick (series); Point Break; The Devil's Advocate; Bill & Ted's Excellent Adventure; Constantine; A Scanner Darkly; The Day the Earth Stood Still; My Own Private Idaho, cihte kihel hi.
Keanu' career ah top highlights:
- MTV Movie Award for Most Desirable Male- Point Break (1991)
- MTV Movie Award for Best On-Screen Duo (shared with Sandra Bullock): Speed (1994)
- MTV Movie Award for Best Male Performance: The Matrix (1999)
- MTV Movie Award for Best Fight (shared with Laurence Fishburne): The Matrix (1999)
- Bambi Award for Best International Actor: The Day the Earth Stood Still (2008)
September 2, 1964 in Beirut, Lebanon ah Keanu Reeves na piang hi. Keanu' pa Samuel Nowlin Reeves Jr. pen Hawaai ah a piang American hi a, Native Hawaiian mi ahih hangin Chinese, English, Irish leh Portuguese' suan leh khak hi. Keanu' nu Patricia (née Taylor) pen Essex, England ah piang a, costume designer leh performer hi. Beirut ah a nasep uh-ah Samuel Nowlin Reeves Jr. leh Patricia kimu kha-in kingai-in tom vei sung na kiteng kha vat uh hi.
Kum nih bek Keanu a phakin a nu leh pa Samuel Nowlin Reeves Jr. leh Patricia kikhen uh hi. A nu leh a pa a kikhen zawh uh a nu'n a innkuanpihte tawh Sydney, Australia ah peempih hi. Tua khit nungin a nu'n New York City, US ah peempih leuleu a, tua lai-ah Patricia in a kimuhpih Broadway and Hollywood director Paul Aaron kici 1970 in na ten'pihin pasal nihna na nei hi.
Keanu Reeves' nu Patricia in Paul Aron a ten'pih zawh Toronto, Ontario, Canada ah peem leuleu uh a, 1971 in kikhen leuleu uh hi. Kum kua bek a phakin Damn Yankees' theatre production ah Keanu Reeves va kihel a, Damn Yankees in Hedgerow Theatre, Pennsylvania ah nasepna a ngahna dingin hilhna hoih leh thukimpihna pia hi. Keanu pa kik Paul Aron' deihsakna leh hilhna hoih hangin acting lamsang ah hong thuk lut kha hi.
1976 in Reeves' nu Patricia in rock music promoter Robert Millerc a ten'pih kik leuleu hangin sawt kiteng man loin 1980 in kikhenpih kik seisai leuleu hi. Patricia zong pasal neih dual bawl leh khawlsan ta ning, ci tuan loin a khuanungin a li veina dingin hairdresser Jack Bond kici a ten'pih kik leuleu hangin 1994 in kikhenpih kik leuleu hi.
Keanu Reeves leh a sanggam numeite (step-sisters) Yorkville neighbourhood, Toronto, Canada ah khangkhia uh a, a neu lai un naukem (nanny) in kem zelzel hi. Reeves' pi (a pa Samuel Nowlin Reeves Jr.' nu) pen Chinese ahih manin Chinese khut siamna, limsuaih siamna (art), sing tawh a kibawl innsung vanzatte (furniture), leh an huan zia (cuisine) tawh na khangkhia khawm hi. Reeves in British comedy shows "The Two Ronnies" cihte kihelin na en-in, a nu in Mikangte zia leh tong, leh gamtat luhekzia tawh na pattah ahih manin tua teng tawh picing khiatpih hi.
Reeves' naupang melmawl leh pau theih cil hun - kum thum a phakin pian'na a pa Samuel Nowlin Reeves Jr. in na nusiatsan (abandoned) hi. Tua khit nung a nu Patriacia pasal thak neih zihzeh na kisan ahih manin pa kik (step-father) lunglutna leh nekzon'na tuamtuam- theatre production nei Paul Aron, rock music promoter Robert Millerc leh hairdresser Jack Bond' nuai-ah na khangkhia hi.
Tua bek hi loin US President Joe Biden' neu lai mah bangin Reeves zong a neu lai-in kammal, laimal leh na limte (symbols) sim leh a khiatna theih ding haksa sa-in dang-awk (dyslexic) hi. Reeves in a neu lai-in hockey player khat suah ding sunmang (dream) a neih hangin tuahsiatna lianpi (serious accident) a tuahna hangin a sunmang neih a hawmpi leh a mawknapi suakin kitamkham/keekzak (shattered) dikdek hi.
Keanu in a tunga i gen teng bek tuahsiatna leh kamsiatna na tuak leh thuak lo hi. 1998 in Reeves' music band Dogstar (1991 – 2002) kici adingin party a bawlsak director David Lynch' assistant Jennifer Syme tawh a party ah kimu kha uh hi. Tua khit nungin kingai-in romantic hun nuam zatkhawm (dating) kipan uh hi. Jennifer Maria Syme (December 7, 1972 – April 2, 20010 in kha giat a paai zawh a taciil uh a min dingin Ava Archer Syme-Reeves ci-in a phuahkholh uh a suah ma December 24, 1999 in si hi.
Tua khit nipi kal tam lo Reeves leh Jennifer na kikhen uh hi. Ahih hangin kilemkik uh a, San Francisco ah April 1, 2001 ni-in zong breafast leh lunch tang dingin a kine (brunch) a nek khawmna (brunching) uh kimu hi. A zing ciangin Reeves' zi Jennifer Maria Syme in Cahuenga Boulevard, Los Angeles ah cars thum kikhawlsak (parked) phu kha-in car accident hangin April 2, 2001 in na sihsan hi. Reeves' lawm hoihpen (best friend) kum 23 mi River Phoenix in zatui tam a zat luatna (overdose) hangin na sihsan hi. Reeves' sanggam numei neupen zong cancer nam tuamtuamte sung panin a khauhpen pawlin a kigen - guh hawm sunga om cancer (leukemia) nei a, sih leh hin' kikal ah nungta liailiai lai hi.
Leitungah actors haupen lakah kihelin, 2019 in a neih a lamsa (net worth) $360 million pha dingin a kituat Keanu Reeves in mi minthang leh hausa khat hi. Ahih hangin amah a cing ding bodyguards kuamah guai sese lo hi. Nuamtalna dingin inn hoih nono tampui mante (luxury houses) bangmah nei sese loin mi mawkmawk bangin kiniamkhiat takin nungta lel hi. Inn mawkmawk (ordinary apartment) ah Keanu teng a, New York City sunga subway ah a tuan' a kimuh mun mahmah banah New York khuapi sungah a khe tawh vak kawikawi nuamsa hi.
"The Lake House," movie filming a bawl lai takin Keanu in costume assistants nih holimna gal zak a, a costume assistant khat in, "$20,000 ka piak kei leh ka ten'na inn ka suplawh leh taanlawh ding hi," ci-in cimawh beidong kisa lua-in kap hi. Tua ni mahin Keanu in a movie bawlna uh-ah costume assistant' bank account ah $20,000 thunsak pah hi. Keanu Reeves in a acting career hun sungin hospitals tuamtuamte huhna dingin sum tampi tak a piakkhiatte lakah "The Matrix" trilogy series panin a ngah $75 million charities adingin na pia hi.
2010 in Keanu in a suahni in moh bawlna (bakery) ah va pai-in brioche moh leh khuaimei (candle) khat bek kikoih va lei a, a bakery mai-ah ne hi. A suahni pawi bawlna dingin a moh nek lai takin a moh leina bakery kiangah va pai-in amah hopihin a khawlte coffee ban taih hi.
1997 kumin zingsang khat Los Angeles khuapi sungah Keanu va vak a, ten'na ding inn nei lo (homeless) khat va kikholhpihin nai tam lo sung ama tangthu genin a va hopsawnna (sharing) leh inn nei lo mipa gente a ngaih dide laitak mi minthangte tangthu leh a gamtat luhek zia teng uh leh a vak suk vak tohna teng a delh kawikawi-in coverage ding a buaipih (paparazzi) pawl khatte in va tuak kha uh hi.
Keanu Reeves' nuntakna pen a neu cil panin a zi masa neih dong a kithamzan nuntakna (broken life) leh a kithamzan innkuan sung panin na khangkhia hi. Leitung leh nuntakna ah a kitamzan pha diakte mahin mi dangte itna leh veina, leh lainatna leh huh nopna lungsim mah na nei pha diak sese uh hi. Keanu Reeves in a deih leh kisap khat a lei zawh ziauna dingin sum hau mahmah khin zo napi-in, ahih hangin ni simin a lupna tung panin tho to-in sum tawh lei zawh loh ding nuntakna teel zaw hi.
Ka nuntakna kitamzan dikdek khin zo hi, ci-in lungkiatna leh lawhsapna vive in hong nungzuih ciangin Keanu Reeves' nuntakna hamsa ngaihsun kik in. Paunak 24:10 sungah, "Haksatna na tuah ciangin na lung a kiat leh a gina lo mi na hi hi," na ci hi. Haksatna leh lungkiatna a om theih hangin haksatna zawh theih hi a, lungkiatna nawk zawh theih hi, ci-in tha la kik zaw in. Cithei nuamsa in na minthan' leh hauh khit ciangin na khankhiatna leh kipatna mangngilh loin nang tungah hong kibawl ding na deih bangin mi dang tungah zong bawl in (ref. Matt. 7:12). Tua ahih manin na hoih sep ding cimtak kei ni. Lungkia loin i sep nakleh a hun ciangin thaman i ngah ding hi. (Galati 9:9)
"A kiliansakte khempeuh in niamkhiatna thuak ding uh a, a kiniamkhiatte khempeuh a lianin kibawl ding hi," ci-in Topa Jesuh in Matthai 23:12 ah na gen hi. A lianin hong kibawl ding i ut leh kiniasmkhiat kisam hi. A kiliansakte khempeuh in niamkhiatna thuak ding uh hi, cih Jesuh' kammal hi.
A thu khupna dingin Keanu Reeves' kammal hoih tawh khum ni: "Kei adingin sum in man leh khiatna bangmah nei lo hi. Sum leh paai zongin tampi ka ngah khin zo a, ahi zongin ka bank account ding hongin ka kilunggimsak nuam kei a, ka nuntakna nuam takin ka zang nuam zaw hi. Tampi ka piakhia a, nuntakna mawkmawk zangin hotels ah giah ciangin suitcase ah ka tung mun zaw hi. Cidamna mah thupi pen hi, cih mi khempeuhin i thei uh hi.”
References:
- Smooth Radio (Keanu Reeves facts: Actor's age, relationships, career, net worth and more revealed)
- Bright Vibes (UNBELIEVABLE STORY OF KEANU REEVES. NEVER GIVE UP!)
- Weekly Gorilla (Keanu Reeves Net Worth)
- Wikipedia (Keanu Reeves)
Thang Khan Lian #ZUNs reports 
