ISRAEL PRESIDENT LEI PERES SI TA + A TANGTHU TOM KHAT
Sept. 28, 2016: Israel president lui leh Nobel Peace Prize ngah ngei Shimon Peres (1923 - 2016) a beisa nipi kal nih in lungphuhat (stroke) in a tuk a, tua khit nung khua phawk mel loin zato inn ah a lup khit teh dam zo loin tu zingsang nai 3:00am (0000GMT) in a lupna tungah ihmu in si suak hi ci-in a siavuanpa leh Peres' sungpa zong ahi Rafi Walden in AFP news agencyte kiangah gen a, Israel media ten zong si ta mah ci-in gen uh hi. Peres pen kum 93 a upa ahi hi. "I pa uh tung panin a kiluahsawn (legacy) pen eite' maban ahi hi. Zingciang hun ding en khol in, geel khol den un cih hong hilh hi," ci-in Peres' tapa Chimi Peres in press conference a neihna ah gen hi. Israel gam bup leh leitung bup in hong nusiatna hangin a dahna uh hong thuak khawmpih hi cih kitel hi ci-in gen beh hi.
Mipi ten zahtakna nunung pen a lah theihna dingun Peres' luanghawm zing ciangin Israelte parliament (Knesset) ah kikoih ding a, thai ciang (Friday) in Jerusalem khuapi sunga hanmual - Mount Herzl kici ah ama' lunggulhna bangin hih lai-ah kivui ding hi.
Israel Prime Minister Benjamin Netanyahu in Peres' sihna hangin ama ai tuamin a thuakpihna leh dahpihna pulak a, "Israel mite' itpa ahi hi," ci hi. Israel cabinet i tu ni-in Peres in hong nusiatsanna hangin a thuakpihna leh dahpihna uh hun zang ding uh hi. US President Barack Obama in zong Peres a zahtakna pulak pah in, "Ka lawm hoih leh Israel adingin mi poimawh hi," ci a, a kivuina ah kihel ding ahihna pulak hi. Canada Prime Minister Justin Trudeau in: "Shimon Peres pen kilemna ding a deih mi ahi hi. Hong nusiatna hangin a dah leh kap-a maute ken zong a kibangin ka thuakpih hi," ci-in gen hi.
Ahih hangin Al Jazeerate' Middle East analyst Yehia Ghanem in Peres pen kidona ah thukham palsatpa (war criminal) in kiciamteh ding hi. 1996 Qana massacre kici ah Peres in Prime Minister a let lai-in Israel ten Lebanon gam-a Qana khua suam in, mi 106 lom that uh hi ci hi. Peres phatte pen Israel gumte hi lel a, a taktakin ci leng Peres in Qana kha mite kithahna dingin thupia hi ci-in gen beh hi. Palestinian peace negotiator lui Diana Buttu in hihpa pen a kipat cil a kipan kidona ah thukham palsat den pa hi a, Palestine mi khempeuh thah cimit ding a deihpa ci hi.
Peres pen Sept. 13 in a lungtang natna hangin tuk a, Tel Aviv kianga zoto inn ah kikem den hi. Israel President a 9 veina (15 July 2007 – 24 July 2014) na len a, Israel Prime Minister a 8 veina (4 November 1995 – 18 June 1996) na len a, 4 November 1995 – 22 November 1995 sung Acting Prime Minister na len kik leuleu ahih manin PM nihvei a lenpa suak hi. Palestinete leh Israelte kilemna ding hanciam in, Palestine mi ten independent Palestinian state a neih theihna dingun Oslo Accords kici a pian theihna dingin a hanciam in a pang palaite lakah kihel ahih manin 1994 in Oslo Accords a pian' theihna dingin a palai seppih Prime Minister Yitzhak Rabin leh Palestinete makai Yasser Arafat tawh kikop dingin Nobel Peace Prize na ngah khawm uh hi. Stroke in a tuk khit in gam makai tuamtuam ten a damna ding deihsakna kam vaikhak ngeingai uh a, tuate lakah Pope Francis, US President Barack Obama, Clintonte innkuan, Donald Trump, Britain Prime Minister lui Tony Blair leh Russia President Vladimir Putin kihel hi. UN Secretary General Ban Ki-moon in, "Peres in Israel leh Palestinete kikalah kilemna ding a pian' theihna dingin gim leh tawl khual loin na hanciam a, gim ing cih paulap hun nei se loin na nasem den hi," ci hi.
Peres pen 1923 in Poland gamah piang a, kum 11 a phakin Britishte thuneihna (mandated) Palestine ah a innkuanpihte tawh na peem uh hi. Zionist movement ah hong kihel in Israel Prime Minister masa len dingpa ahi David Ben-Gurion tawh hong kimu a, David Ben-Gurion pen a etteh den mi khat suak hi. Kum 29 bek a phakin Defense Ministry ah director general len a, Israel pen nuclear nei gam hi ci-in a kiciamteh lian nai loh hangin Israel nuclear programme piansakna dingin a hanciam mahmah khat hi ci-in kiciamteh hi.
Source: Wikipedia/Al Jazeera News And Agencies
