KEI ZONG MI THANEM THEI KHAT HI'NG

KEI ZONG MI THANEM THEI KHAT HI'NG

Kei zong mi thanem thei khat hi'ng.
Ahih hangin...

*Khat vei na deihna kong zuih loh manin ong gensia pah ken...
A hoihzaw ngaihsutna nong piak ding ka lunggulh man hi.

* Khat vei ka khitui luan' nong muh manin pasal kei lua teh!
Hong ci pah kei in...
Ka khitui pen kei din' mun hong phawksak den ka lawm hoihpen hi.

* Khat vei ka lung kiatna nong theih manin...
Citak kei lua teh hong cipah kei in...
Ka lungkiat theihna pen tam vei ka hanciam man hi zaw hi.

* Khat vei ka thanem na muh manin...
Gina kei hong cipah kei in.
Ka thanemnate ka gualzawh theihna dingin
Ka nung panin hong tawsawn hi zaw hi.

* Khat vei ka khialhna tawh lak/manna ding
Om nawn lo zah dongin hong gensia pah ken.
Ka khialhna pen in ka sin theih pen
Hamphatna lianzaw in manpha zaw veve hi.

* A kigen khempeuh Amen 👉kka  piak theih loh manin...
Mi bang lo hong ci pah ken.
Tu hun teh a tamzaw thukim na pen
Man [✔] khin lo ahih man hi.

A gelh : #PaPiang

# Behlapna :
Koimah ciang na tun nop kei leh,
Mipite (mi vakvaite) nung zui in".
- John C. Maxwell

BANG HANGIN LAISIM HUAI HIAM?
A huampi in gen lehang ei Zomite pen laisim a uuk kitam lo a, lai zong thupi kisa khol lo hi. Tua hangin i minam sungah lai nasepna kizekai in, laigelhte leh laibu bawlte bang kisuplawh hun tampi om hi. Ahangin lai ii thupitna leh a tangzaina i theih loh man hi kha dingin ka um hi. A taktakin laisimna pen a thupi mahmah nasep khat hi. Mihing khat i hih nak leh i khantohna ding leh i picinna dingin laisimna tawh lungsim leh khuak-an i zon ding ahi hi. Hi lai-ah ei Zomite bang hangin lai simsim huai hiam cih thu tawm i en ding hi.
A. Mi khempeuh Lungsim Vitamin kisam hi.

Rev. Dr. Chin Do Kham in “Ei mite (Zomite) zawn'na pen sum leh paai zawn'na hi loin ngaihsutna (idea) zawnna hi. Leitung hong kipia zonga bangmah suah lo ding hi hang,” na ci hi. Ngaihsutna zawnna pen lungsim leh khuak zawn'na pan hong piang hi-a, Dr. Johnson pulakna bang hi leh “Lai sim nuam kei leng pilna (lungsim leh khuak an) kinei thei lo hi,” cih in i zawn'na a hang bulpi hong theisak hi. Taksa pumpi’ an ding bekbek kizong a, ahi zongin lungsim leh khuak an ding kizong lo ahih manin Zomite na khempeuh kiam in kizawng takpi hi.
"The Art of Living" a gelh France laigelh siampa Andre Maurois in “Lungsim khempeuh pen amau tawh kituak an (thahatna an -vitamin) kisam hi,” na ci hi. Hi mah hi. Lungsim vitamin a nei lo lungsim pen thanem hi, hawm hi, pilna leh ciimna thei lo hi, thungaihsutna leh geelna-ah peeng hi, tatsiam lo (uncivilized, wild-minded), muhkholhna (vision, dream, ambition) nei lo hi. Hihte khempeuh hong dimsak thei pen laisimna hi. Zawn'na khempeuh ah lungsim leh khuak zawnna mah lauhuai pen, thudonhuai pen hi.
B. Minampi Hihna hong kiciansak hi.
Mi nampi hihna sungah ngeina leh lai pen a thupi pen ahi hi. Lai in ngeina kem thei, kizel sak thei, puahpha sak thei hi. Minam leh ngeina a kipna leh a nuntakna pen lai tawh ki-en thei a, teci ci leng zong kikhial lo ding hi. Lai neihna leh simna pen minampi hihna ahi hi. Lai nei lo minam pen minam picing in kiciamteh ngei lo hi. Tua ahih manin Zomite minam picing/nampi i hihna pen i neih Zolai leh Zolai tawh kigelh leh kibawl laibute in teci ahi hi.
C. Minampite in a lai uh it uh hi. 
Lai itna cih thu-ah gelhna, bawlkhiatna leh sim tangtangna cih in a thu laigil hi. Lai simsimna pen lai a nungta saksak hi-a, a kisim lo lai pen a nungta lo lai hong suak ding hi [eg., old Greek (NT)]. Eite pen lai i neihzawh kum 100 val ta ahih manin lai neihna lam-ah ki-upa pian ta a, minampi khat hihna tawh laisimhuai mahmah ta hi. Lai in mihing khat kia nuntakna leh a huampi nuntakna hong puahpha thei hi. Tha hong pia thei hi. I hihna a mangthang lohna dingin hong kepsak hi. Tua ahih manin lai simsim huai hi. Lai sim tangtangna pen mipi lungsim neihna ahi hi (Sawl 17:11).
@A gelh - Kap Za Khai