TERRORISTS KICITE KUA HI ZAW A, TERRORISTS DING A PIANGKHIASAK TAKTAK KUATE HI ZAW HIAM???
May 17: Indian citizen ka hi a, kuamah in kinengniamna, kituatcilna, neihsa lamsa kisuhsakna leh kiguksak, thuman lopi-in leitang keekna, mi lom kithahna thu, mihing hihna manphatna kibeisakna (dehumanised) cihte hong hilhcian ding uh ka kisam kei hi. 1997 buai kum in zong ka neu cil panin ka sangkahna sanginn leh ka inn uh hong kihalsak a, ka khua ui uh-ah ka inn mun uh ka taanlawh uh a, ka lawi neihsunte uh hong kiguksakin, ka kham leh phaizang lei uh khaici leh buh ciing napi-in a gah khat beek ka ne kha kei uh hi. Sin khak leh tuah khak leh pal khaksa tampi ka neih khitsate panin keima khom in ka telsiam mahmah khin zo hi. Hih bangin thuman lopi-in kibawlna leh gal eh sa tuah a hakasatna ka ciam khin zo hi. Tua bang i tuah taktak ciangin nuamin kinui peempaam het lo hi.
I1757 kum in Batte of Plassey ah British gakapmang Robert Clive in guazawhna a ngah khit nung Aug 15, 1947 kum dong British colonial power in India gam kum 190 piikpeek tuancilin, nengniamin, India gam hauhna gu khia uh a, India gam sungah a gam uh keek gol behbeh uh hi. ngongtatna leh ngongtatna ahi lo (non-violent leh violent means) tawh suahtakna lunggulhna in Britishte a lehdo ngam khempeuh, a thuman lohna uh leh a ngongtatna uh a gen ngam eh pholakkhia khempeuh "terrorist'' bangin ciamteh uh hi.
15 August 1942 in India Nusiatsat Un cih "Quit India Movement" a betdaihna dingin British ten Armed Forces Special Powers Ordinance of 1942 kici thukham na bawl uh a, British colonial empire gensia leh langpang leh lehdo ngam peuhmah hehpihna nei loin bawl uh hi.
Tua thukham India in suahtakna a ngah khit nung nangawnin Armed Forces Special Powers Act (AFSPA), 1958 kici Indian Parliament in thukham bawlpha a, "disturbed areas" a cih buaina tawh a kilawi ngei lo "self-determination" leh "autonomy'' ngenin a kiphin thau tawite omna kiim sungah Indian Armed Forces in numeite a buan uh a, naupang leh nautang mawhna nei lo a mot thah zongin thukhenna panin a peng/suahtak (immunity) theihna dingun "special powers" na pia miumiau hi. Tu dong mah hih thukham "disturbed areas" tengah kizang lai zen a, tua kiim leh kuam sunga teeng mite 'second class citizens' tawh a kilamdanna om lo hi.
Manipur state sunga piang ka hih manin AFSPA kizatna mun-a khangkhia ka hihna tawh kituaakin galkap ten a ut peuh uh a mot thah zongun "terrorist" hi ci thei ziau thei uh a, numeite a mot hon buan uh a, naupang melmawl a mot thah zongun a luanghawm kiang peuh ah thau koihin terrorist tawh kipawl leh kizopna nei hi, terrorist tawh kikaptuahna ah si kha hi, ci-in suakta ziauziau thei uh hi cih ka tecian mahmah hi. Terrorist ci-in ciamtehna ngah ding baihlam mahmah hi.
Tua bang special power a kizatna ah khangkhia ka hih manin illegal in Israel in Palestine mite leitang kum 73 sung piikpeek keekin a suhsakna uh, numeite a buannate uh, nautang a ut peuh uh a thahna dingn leh bawlsiat leh nencipna dingun LICENCE TO KILL AND OPPRESS OTHERS a nei bang keekin a ngongtatna uh, media buildings nangawn pengsak loin a utna peuh uh-ah bomb khiat ziauziau in Hamas terrorist kikap hi, ci-in a peng thei ziauziau leh kisiamtanna dingin a paulap bawl ziate uh ka telcian mahmah hi. Kuamah hong hilhcian ding ka kisam kei hi.
British ten India gam kum 190 piikpeek nengniamna leh tuatcilna tawh a ukcip hun sungun a kisiamtanna dingun, ''Minam mawlte khua a musak ding leh pilna a guan dingin Pasian in ukna ko tungah hong pia-in hong teel hi,'' cih kisiamtanna dingin paulapin na zang uh a, "British Empire sungah nitum ngei lo hi,'' ci-in a kumpi gam uh a zaina na kisialhpih mahmah uh hi.
Ahih hangin Gandhi in India mite makaihin, ngongtatna zang sese loin peaceful means zangin (violent means zang extremist groups a om kiaukiau tei sam hangin) mipite tawh pangkhawmin a lehdo khawmpih ciangin Aug. 15, 1947 ni-in tua hun in a kumpi gam uh a gol pen leh galvan hioihpen a nei leh military lamsang ah a thahat pente bawng hawlin na delh khia zo lel uh a, England gam lo buang a kumpi gam uh bei mang ta hi. Thuman lopi-in minam dangte ukcip leh nengniam zawh tei napi-in a tawntung ki-uk khum zo lo hi.
Feb. 1 ni-in Myanmar general election ah military-backed USDP a gualelh dikdek khit nungin Myanmar armed force commander-in-chief Min Aung Hliang' makaih galkap (Tatmadaw) in ukna buluh uh a, civiian political makaite leh mipil misiamte, khangno makaite, CDM eh lungphona ah ah kihelte ban matin thong sungah deng uh a, nautangte lom thah hong kipan uh hi.
Junta dictatoship a lehdo leh langpang in kamkeek ngam khempeuh kituana/ngongtatna a piangsakte (rioters) or terrorists hi, ci-in ngawhin ciamteh ziauziau uh a, khua khat khit khat ah junta galkap uk leh om khumna (occupation) hong keek uh hi. A nunung penna dingin May 15 in Chin state ah Mindat town la uh a, zan in Tedim ah Chin mi mot thah uh hi, cih i zak ciangin kilungdam vet loin na kisa mahmah hi.
India gam mite in a beisa kum 190 sung a thuakna uh, Jammu and Kashmir leh North East Indian states pawl khatte ah AFSA thuakna, Feb. 1 coup khit nungin Kawlgam mite thuakna ka telcianpih leh thuakpih luat manin kum 73 sung piikpeek nencipna, bawlsiatna, nengniamna, a leitang uh aana tawh a kisuhsakna, a innte uh panin aana tawh hawlkhiatna, a biakinnte uh suakta takin Pasian a biak theih lohna dingun Palestine mite Judaism' Toarah sunga kammal deihkaihna leh self defense paulapin a bawlsia Israel regime pen a pakta thei ding ka hi ngei hi. Israel mite a muhdah ka hi laizang kei a, a political leaders uh, a government uh tatsiatna a thukimpih lo ka hi bek hi.
Hih thu hangin Hamas a gum leh terrorist group a gum ci-in ngawhna online ah ka tuah ziahziah mun pian ta hi. A military thahatna uh kisialhpihin kihumbitna ding a nei lo (defenceless) nautangte lom thahna, a teen'na innte uh panin tualsuak mite hawlkhia-in terrorist group do hi ung, a kici pongte ngongtatna ka thukimpih lohna Indian Constitution Article 19(1) in "freedom of speech and expression" hong piak manin ka ngaihsutna ka genkhiat ngam manin "Hamas a gum hi teh.. terrorist thapia hi teh" hong kici ding leh tua bangin hong kingawh miau pah ding ahih mawk leh....
American colonies khempeuh British colonial power in a ukcip khum lai-in China panin niangteh (tea) a puak lutte uh American colinies sungah siah lakna theihna dingin May 10, 1773 in thukham a kibawl uh Townshend Act (or Tea Act) kici siah piakna thukham na bawl hi. Townshend Act deih loin American gam it mite (patriots) "Sons of Liberty' a kicite lungphona lahna neite Native (Red) Indians mite bangin kineih leh kisiamsia (diguised) uh a, East India Company in British teembaw ah niangteh hong a puak khempeuh uh Boston Harbour ah tuipi sungah 16 December 1773 khiatsak uh hi.
Thuman loin hong ukcip leh nengniam kumpi lehdo ngam man, tua bang kumpi leh galkapte ngongtatna thapiak nop loh manin "TERRORIST" kicih pahpah ding hileh Boston Tea Party thupiang ah Sons of Liberty a kici American gam it mite leh British coonial empire panin suahna ngahna dingin American revolution war of independence ah a kihel khempeuh zong "TERRORISTS'' mah hi, i cih uh kul ve maw???
American writer minthang Mark Twain in, "When the rich robs the poor, it's called bussiness. When the poor fights back, it's called vioence,'' ci-in a genna na man mahmah hi. Kum 73 sung piikpek mihing ahihna manphatna uh a kibeisak (dehumanised), mi gilo leh kihhuai hi ci-in a kingaihsun tawm (demonized), a neihsa uh - leitangte kisuhsakin a innte uh panin a kihawlkhia (dispossessed and evicted) Palestine mite rights gumin a ledo ngam Hamas movement pen Israel leh leitung gam tuamtuamte in "terrorist" hi ci-in a ciapteh pen a lamdang hilo hi. Israel in Hamas ten office dingin zang uh hi, ci pongin media buildings ah bomb khiatin a suksiat a lamdang hilo hi. Tua bang thupiang a pian' masakna hilo hi.
Myanmar junta coup khit nungsang CDM ah kihelte, lungphona ah kihelte, Zo thau tawi-in junta forces a lehdo ngamte zong Myanmar military council in "terrorists" mah hi ci hi. Junta forces ten thuman thutang a gen jornalists ban mat uh a, media offices tuamtuamte a ban buluh ban uh-ah media min neite licence ban phiatsak hi. Terrorist cih kammal i zat nop takpi leh a terrorist taktak kuate hi zaw a, terrorists a cihte a piangkhiasak kuate hi zaw hiam cih kantel masa leh thei lopi-in mot zat ngam huai lo hi.
Gamkeek hun (colonial era) bei ta ahih manin kum zalom 21 hun pen i nengniam zawh leh zawhthawh zawh midangte eh mi dangte sia bangin bawl hun, nencip hun, bawlsiat hun, zawhthawh thu tawh a neihsate uh aana tawh susah ziauziau in a teenna inn mun leh lo munte uh hawlkhiat theih hun hilo hi. Mawhna nei lo mi kolhbulhin, ut bangin uino leh vokno bangin thah ziauziau theih hun hilo hi. Pasian leh lai Siangtho in tua bangin ngongtat theihna ding thuneihna leh suahtakna hong pia dihdih lo hi. Na biakna zuih pen Pasian tawh na kizop na kipawlna ding eh na kha in nuntak tawntungna a ngahna ding hi bek hi.
Mi khat adingin terrorist pen mi dang khat adingin suahtakna ding galdo mi (freedom fihter) hi. I khantawn in kolhbulh tuakin a kihencip den ding leh sila bangin nengniamna a thuak den dingin hong piangsak Pasian in i khutte leh khete ah henkol kibulh sa-in hong piangsak aizang lo hi. Vangliatna leh gualzawhna, hauhna leh damnate hencipna leh nenniamna a tuak mite leh thongkia mite'n suahtakna ngah hen! Leitungt bup-ah thuman lopi-in nengniamna, nencipna eh hencipna a thuak mite khempeuh in suahna ngah ta hen!!!
Viva Revolution!!!! 
Thang Khan Lian #ZUNs reports
