JESUH' MAW, A THUPHA? KOI ZAW TEEL DING NA HIAM???
Tu hun ciangin i Khristian thu-up zia leh i siate' thugennate pen thupha ngahna ding vive bek kilim gen leh kinak otpih mahmah mawk hi. Jesuh' sangin a thupha kinak gen zaw in, a Jesuh' deihna leh hong thupiakte zuih ding lamsang kinak gen nawn mel loin thupha ngahna "materialistic blessings" bekbek mah lunggulhna nei-in Khristian thu-upna paipih in, a tangkopih kitam mahmah ahih manin gammial kikeek beh loin, kha mangthang mat ding ki-awlmawh loin kivei nawn lo hi.
Thupha ngahna ding leh panmun hoih ngah ding lunggulhna hang bek tawh pawlpi khat panin pawlpi dang ah ban tai kawikawi in, pawlpi thak phuankhiat behbeh in, kha mangthang mat ding leh leitung bup ah Lungdamna Thu kizelhsak ding lunghimawhna nei kitawm mahmah ta mawk ahih manin a dahhuai mahmah thu hi a, Khristian upna paikhial khin zo hita hang ci leng kikhial het lo ding hi.
Pasian' thugen a tam zaw ten Pasian' deihna leh Lai Siangtho' deihna bulphuh cinten in thugen ding sangin a thugente uh a za a ngai mite lawp theihna ding vive bekbek, a thugente uh a za leh ngaite zaknop ding bek leh a lungkimna bek uh mah gen ding pibawl zaw ta uh ahih manin i Khristian thu-upna in zungthuk kha zo lo a, i upna kip zo loin kho zo lo hi.
Thupha kilim gen mahmah in, thupha ngahna ding vive kilim gen mahmah napi thupha kipatna bulpi leh thupha khempeuh a pia thei pa Pasian' deihna kitam gen mel nawn lo a, thupha nak Pasian' maipha zon ding zia leh a lungkimsak ding zia kigen kha nawn mel lo hi.
Jesuh in Matt. 11:28-30 kikal ah a genna ah, "Na semin vangik pua-in a gim mite khempeuh aw, ka kiangah hong pai ta un. Note tungah lungsim tawldamna ka hong pia ding hi. Keima hakkol zamin kisuan un la, kei kiangah hong kisin dih un. Kei pen kiniamkhiatin nem hithiat ka hih manin ka kiangah na tawl uh a dam ding hi. Bang hang hiam cih leh note kong suat ding ka hakkol nuam a, na puak ding uh van zong a zang mah ahi hi,” ci-in a genkhia hi," na ci hi.
Khristian ihih manin vangik puak ding panin peng in, gimna, ze-etna, bawlsiatna thuak lo dingin hong kikamciam lo a, i vangikte leh i gimna, ze-etna i tuahte, bawlsiatna i thuakte hong thuakpih leh puakpih ding hi'ng cih tawh Jesuh in hong ciam zaw hi cih i phawk ding kisam hi. Jesuh' hakkol zam in kisuan in, nisim in singlamteh pua-in i zuih ding i Khristian mawhpuakna hi zaw hi.
Thupha lunggulh lo leh deih lo kuamah ki-om lo ahih manin thupha i ngahna theihna dingin Jesuh' hong thuhilhna i lungngaih phat kik kisam hi. "Thudang khempeuh sangin Pasian’ ukna leh ama deihna na zuih theihna ding uh thupi ngaihsut masa zaw un. Tua hileh hih na kisapna dangte khempeuh uh zong hong piathuah veve ding hi (Matt. 6:33). Pasian’ ukna leh ama deihna i zuih theihna ding uh thupi ngaihsut masa zaw leng i kisapna dangte khempeuh zong hong piathuah veve ding hi bek hi. Thupha i ngah theihna dingin Pasian’ ukna leh ama deihna i zuih theihna ding i thupi ngaihsut masak zawk kisam hi cih Topa Jesuh in hong ciam khin zo hi.
I deih, i lunggulh thupha i ngah theihna dingin Topa sungah lungkim masa phot limlim leng amah in i deihna hong pia ding hi. Topa tungah na vai khempeuh ap in,amah muang masa limlim phot leng ama'n hong sem ding hi. Tua hi leh amah in i dikna khuavak bangin, i thumanna nitaang bangin hong langsak ding hi. Topa’ mai-ah khawl dide in lungduai takin ngak zo limlim leng ama'n i kisapna khempeuh hong tel lua mahmah ahih manin hong pia ding hi (Late 37:4-7).
Thungetna i hatkat zawh man, i upna leh lametna a khauhpai zawh mani thupha ngah ding na hi peuhmah lo a, sia ten thupha hong ngetsak leh piak zawh man tawh thupha ngah ding na hilo a, Pasian' ukna leh ama deihna i zuih theihna ding i thupi ngaihsut masak zawk a, ama' tungah i vai khempeuh ap in, amah i muang masak ciangin i ngah dingin kilawm a sak a thuphate a kicingin i ngah ding hi.
Nisim i Khristian khualzinna ah zawhna dingin do lo phamawh a, do loh in gualzawhna om lo hi; zan khuamial om loin sun nitaang om lo hi; a man (cost) om loin lei theih loin i deih khat ngahna dingin a man piak kul hi; singlamteh tunga ling om loin kumpi lukhu om lo hi cih i phawk a, i mangngilh loh ding kisam hi. Thupha i ngahna theihna dingin thupha khempeuh kipatna bulpi leh nei pa i lungkim masak a, a maipha zongin i ngah masak a, ama deihna i zon masak loh phamawh hi.
Nisim in singlamteh pua in kalsuan ding hanciam limlim leng thupha ngahna dingin lampi tawn kihi ding hi.
✍️ Thang Khan Lian #ZUNs
No comments:
Post a Comment