HUN (A MANPHAT ZIA)

HUN (A MANPHAT ZIA)

• Hun in kuamah ngak nei lo hi.
• Hun in, kuamah adingin khawl hun cih bang nei lo hi.
• Na paulap bawlnate hangin hun na zekai tuam lo ding hi.
• Thukhensat thei loin na om hang lel tawh hun na zekai tuam lo ding hi.
  
Na phunphunnate hangin hun na khawlsak lo ding hi.
Na kisik kikna hangin hun mualliamsa hong kileh kik lo ding hi.
Tua ahih manin hehna, kisik kikna, lunghimawhna (lungkhamna) leh huatna (muhdahna) tawh na hun mawk beisak kei in.
Bang hang hiam cih leh hun hong kilehhei kik in, nang tawh hong kahpih ngei lo ding hi.
A beisa hunte ama pai-in paisak in la, na mailam hun ding lunghimawhna khawlsan hun ta hi.
Na hun neihsun TU HUN hi.
Tua ahih manin, ngimna man (dik) tawh na hun zat sawm hamtang in.
Sepkhiatna hoihte tawh na hun zang in.
Lunghulhna man leh hoihte tawh na hun zang in.
Ngaihsutna man leh hoihte tawh na hun zang in.
Mi hoih mi dikte tawh na hun zang in.
Hun pen huih mut bangin leng hi; hih pen thuman hi.
Ahih hangin na khate zal in, hun tawh kituakin a sangna mun ah na lengto thei a;
Na hanciam theihna hoih pen tawh teembaw bangin hun na hawl thei hi!
Hih lampi na tawn kik kei ding hi cih phawk in la,
A man nei leh a hoih pen dingin hun zang in.
Hun… ama zia leh tong tawh a kituak dingin gamta in… mainawt zom zel in.

(The John Maxwell Team kicite Executive Director len Julius Sevilla in “TIME” kici a genna panin kong tei sawn hi – Thang Khan Lian)

SAIPI LEH UIPI GAITE KITONA (CHALLENGE)

SAIPI LEH UIPI GAITE KITONA (CHALLENGE)

Saipi 🐘 leh 🐕 uipi khat a gai (naupaai) hun uh kituak kha hi. Kha thum khit ciangin ui in ta nei-in, a no nga pha hi. Tua khit kha guk zawh in tua ui gai kik a, a kha kuana in no sawm-le-nih nei kik hi. Ui in tua bangin a gai ngeina bang leh a no neih ngeina bangin gai in, no nei zom ziahziah toto hi.

A kha sawm-le-giat hong cin' ciangin saipi kiangah uipi va hawh a, uipi in saipi kiangah simmawhna leh neumuhna tawh, "A gai takpi mah na hi hiam? Bang hi mawk ahi hiam? I gai hun leh a ni lah kibang lian hi. En in, tu-in ke'n no thum vei nei-in ta tampi ka nei khin zo a, amaute picing khin ta uh hi. Tua hi napi-in nang na nau na paai den lai hi. A koi dan hi mawk a, naupaai pong napi cin bang hangin no nei thei lo na hi hiam?" va ci hi.

Saipi in nui kawm in ui en in hih bangin dawng hi: "Na telsiam loh thu bang hiam na theihsiam ding kong deihsak hi. Ka sunga ka paai pen ui hi loin sai hi. Kum nih ta in khat vei no ka nei hi. Ka sung panin ka no hong suakin lei ah kiden' suk ciangin leitung in hong theihpih hi. Ka no in lampi a kan ciangin mihingte khawl in, pakta in en uh hi. Ka sunga ka paai pen mihingte bek hi loin leitung nangawn hong thudon leh phawkpihna ngah hi. Tua ahih manin ka paai pen thupi in, gol hi."

Midangte lawhcin'nate na muh ciangin nang leh nang na kimuanngamna khahsuah kha pah kei in. Amaute in a lawhcin'na uh hong kisialhpih ciangun eng in, haza pah kha kei in. Na sep gimna, na nasep silbawlnate leh na hanciamnate ah lawhcin'na na ngah pah loh ciangin lungkia in, thanem in, khakun pah kha kei in. Nang leh nangin, "Kei hun hong tung peelmawh ding hi," kici in la, lei a den ciangin midangte in lamdangsakna leh pahtakna tawh hong en ding uh hi. 👑

✍️ Thang Khan Lian