ZOMI NAMNI MESSAGE
I Zogam nuntakzia haksat luatman, silh leh teen man tam luat man, lo gam kuam leh gamte keu luat man, khawhsa an kham loin, khawi leh vulh a pun' loh man,sum leh paai kicin loh manin i ciin leh tuai, nu leh pa, lawm leh gual ngaihte nusia in nuntakna ding zongin tuipi, tui gal kan tanin gam nihna, gam thumna-ah nuntak ding zongin om kitam mahmah hi. Mi' gam mi' leitangah pilna, siamna sin in, sum zong paai zongin mangvom, mangkang thunuai-ah nisim in nasem in i hanciam tek hi. Mi' gam mi' lei-ah zia leh tong thei loin ei guak in tang khat kisa in i Zogam i ngaih ngaungau hun tam mahmah hi. Pawl khat leuleu lah kamphatna tawh ci thei, nuamsa in i gam i lei nangawn phawk lo liangin i tumtum in a om zong i om veve hi.
I Zomi namni hong tun' tawh kituakin i gam i lei i omna tek pan in ngaihsun in i Zogam galkhua don ciat ni. Pilna, siamna zonna ding, sum leh paai kicin loh manin tu leh hei manin lo lam zuan-a pai laizom lungmawl naupangte liam leh bai tuakin, nat leh sat a tuak ciangin kikep kikhoi dan thei loin hun lo, kul lo pi-in sih hanmual ah zuante lungngaih huai mahmah hi. Pil leh siam, neih leh lam, dam leh hat lunggulh Zomite honkhia kai khia dingin nang leh kei hong ngak uh hi ci i phawk a, i theih ding ut huai hi. A nei zo, a lam zo zaw deuh Zomi ten i huhnate na kisam uh a, galkhua hong don den uh hi. Pilna siamna nei ten i hih theih zah tawh hanciam in lailungmawl Zomite i hut khiat i kaih khiat ding i tavuan ahi hi. Pilna sin ten i sinna ah hanciam keeikaai in, sum leh paai zong ten zong nakpi takin i hanciam tek ding hi a, mai lam ding saupi i khual hun ta hi. Mi dang a huh thei ten huh in, mi dangte a hanthawn thei ten hanthawn in, lam lah dan a siam ten lam lak ding kisamte lam lak in, a nei a lam ten a cimawhte i huh theih bangin i huh ding kisam hi. Ei Zomite pen nampi lungsim nei leh Thangho leh Liando mimtang kihawmna leitang a piang, a khangkhia i hih manin i pilna i hauhnate pen aituam nasepna ding bek hi loin i minam khantohna dingin i piakkhiat, i zatkhiat ding i ngeina leh i tavuan ahi hi. Kikep kikhawi nang nei lote khutzep in i et hiathiat ding pen i pu i pa' ngeina hi lo a, i pu i pa' gen "nek khawm nuam, puak khawm zang'' a cih i mangngilh loh ding ahi hi.
Ei Zomite pen gam dang, mun dangah pilna sinna sangin nasep sil bawl lamsang a sem leh a sin i tam zaw hi. I sep, i sinte pen i gamah khat vei ciangin i zat theih ding hun hong tung pah ta ding hi. Democracy vaihawmna tawh hong kilaih ta ahih manin a diakin Kawlgam bangah nasep siam ten sai gol pipi hong tung zihziah thei ding uh hi. Nasepna lamsang zong thupi mah hi ahih hangin i siam hangin manager za tan ciang (i kamphat leh) kitung thei a, director za ciang tun ding hamsa kha ding hi. Tua ahih manin pilna sinna lamsang mah thupi bawl leng mi tungah kileng zo pen ding a, zing ni thai ni ciangin gam makai, ulian kisuak thei ding ahih manin pilna sinna lam zong i hanciam phat mahmah ding ngaihsut huai hi. Pilna sinna lamsang i thupi bawl kei leh i gam pen namdangte vaihawmna leh thunuai-ah omcip ding a, mite uk khum i hi den ding hi. Gam keek hun (colonialism) hun hi nawn lo a, democracy hun hi ta ahih manin i pu i pa' liamkiatna, lutang phumna gam pen en pilna siamna nei in puah peuh leng kuamah in hong keek, hong sut thei lo ding hi. I gam i lei en i puah kei leng namdang ten hong puahsak, zuunsak lo ding cih phawk huai hi.
Min leh vang deih man a beh leh phung, ang sung bekbek kikhualna, pawlpi hangin kideidanna beisak hun ta hi. A kibang lo teng gawm thei leng picinna leh kituahna leh khantohna ahi hi. Khat leh khat aw kidang githa khau zong hong kisai khawm ciangin hong kilawm se a, mel tuamtuam a nei Sakhituihup zong khat in hong kigawm ciangin etlawm diak se hi. Cihtakna, thumanna khasuah loin i Pasian mah mai et in kipumkhat leng Zomite kikhangto ding hi. Zomi namni ahih tawh kituakin "I gam leh minam adingin a hoih a pha khat peuh i sem na hiam" cih lungngai pha kik in, i LST ah "Topa, Pasian-a nei minam, ama luah dingin teelna a ngah minamte thupha ngah ahi hi" (Late 33:12) cih phawl tek ni. Topa'n Zomite hong laam to ta hen!
Zomi Namni Thupha na vek un.
