MALAYSIATE VANLENG KIKAP KHIA PEN RUSSIA GAM PANIN KIKAP KHIA HI CI
Sept. 29, 2016: Malaysiate vanleng Malaysian Airline flight MH17 (Boeing 777) kici July 17, 2014 in Amsterdam panin Kuala Lumpur zuan dinga leng Ukraine gam nisuahna lamah na kikap khiatsak a, a sunga tuang teng mi 298 in sihna tuak hi. Hih vanleng kikap khiatsakna thu thukansiam (investigation experts) leh upadi banga nasemmi (sitni/sihni; prosecutors) ten sawtpi a kan khit uh teh zan in thukan ten Russia gam-a Ukraine kumpi lehdote (rebels) omna mun panin Russiate bawl BUK missiles tawh a kikap khia hi ci-in thukhupna nei ta uh hi. A sunga tuang leh sihna tuakte pen gam tuamtuam mi ahih hangin a tam zaw Dutch (Netherlands gammi) ahi hi.
Nitumna lam gam ten Russia kawk in a ngah bawl hangin Russia in bel Ukraine Air Forcete kap khiatsak hi a, a vanleng kiat lai-in Ukraine vanleng nih in delh a, khatin air-to-missile zangin a kap khiat uh hi ci hi. Hih thupiang mit tawh a mu ten zong gal vanleng nih in delh a, a vanleng khat nung kik in, khatin delh suak hi ci uh hi. Hih thupiang hangin nitumna leh nisuahna gamte kikal ah kitelsiam lohna lianpi tak piang zo hi.
Upadi banga nasemmi ten (prosecutors) kua kap khiat hiam cih ngawhna ding leh thu bawl khumna ding (charges) mu/nei thei lo uh a, ahih hangin sihna tuakte' innkuanpih ten bel kuate kap khiat hiam cih thu kician thei nuam in nawhna nei uh hi. Upadi banga nasem ten ngawhna ding kician lah thei tuan lo uh ahih manin nitumna leh nisuahna gamte kikal ah kitelsiam lohna khangsak zaw sem ding uh bang lel hi.
Thukan (investigators) ten a thumuhna uh pen vuk khal tung bek mu pan uh a, vuk khal sungah bang thu teng om a, tualthat ahih kei leh galdona ah thukham palsat hi cih ngawhna (war crimes) a ciamteh theih ding uh kisam hi ci-in Al Jazeera reporter Neave Barker in hih thu a kipulakna mun Nieuwegein khua panin gen hi. Russia in bel hih thukante' (international investigation) thu muhna pen khentuam leh paihtuam nei a, politics thuzawhna hang tawh a pulak uh hi ci hi. Nitumna gam ten thu haksa khat peuhpeuh a tuah ciangun a ngawh ding uh leitang zongin thu pong phuak tawh uh a, tua pen amau ngeina leh pian zia hi ci-in Russian Foreign Ministry spokeswoman Maria Zakharova in a thupulakna ah gen hi.
Malaysiate vanleng kap khiatna dinga kizang BUK missile Ukraine gam-a Pervomaysk panin tang khat leng a, khat Russia gamah ciah kik (returned) hi ci-in Netherlands, Australia, Belgium, Malaysia leh Ukraine panin upadi banga nasemmi (prosecutors) ten gen bialbual uh hi. Rebels ten kua sawlna-a a kap uh hiam a hih kei leh amau thu tawh a kap mah uh hiam cih kithei lo hi ci-in gen beh uh hi. MH17 pen July 17, 2014 in BUK system kizangin 9M38 series missile tawh Russian Federation leitang panin kikap khia a, BUK system pen Russian Federation leitang ah kikoih kik hi ci-in Dutch police tawh kipawl a thukan makaipipa Wilbert Paulissen in ci hi. MH17 a kikap khiat lai-in rebelste leh Ukraine galkapte kikaptuahna a nasiat lai tak ahi hi.
Hih vanleng kikapkhiatna hangin EU leh US in Russia mawhpaih in Russia tungah khalna (sanction) koih khum uh hi.
Source: Al Jazeera News And Agencies
