𝐀 𝐊𝐈𝐇𝐓𝐀𝐊𝐇𝐔𝐀𝐈 𝐓𝐇𝐔 𝐓𝐇𝐄𝐈𝐇𝐍𝐀 𝐓𝐎𝐈 𝐋𝐄𝐇 𝐀 𝐊𝐀𝐖𝐂𝐈𝐊 𝐆𝐀𝐌 𝐈𝐓𝐍𝐀

 𝐀 𝐊𝐈𝐇𝐓𝐀𝐊𝐇𝐔𝐀𝐈 𝐓𝐇𝐔 𝐓𝐇𝐄𝐈𝐇𝐍𝐀 𝐓𝐎𝐈 𝐋𝐄𝐇 𝐀 𝐊𝐀𝐖𝐂𝐈𝐊 𝐆𝐀𝐌 𝐈𝐓𝐍𝐀

"Thu tawmno bek a thei tata kamtamin gen ding hau pha diak sese uh a, theih a hau mite in tawmno gen uh hi," ci-in Jean-Jacques Rousseau in na gen hi. Rousseau i cih Genevan philosopher, writer, leh composer hi a, Europe gam buppi sungah kum zalom 17 panin 18 kikal sungin intellectual leh philosophical movement a pian'na ding, French Revolution hong pian'na ding leh modern political, economic, leh educational thought a pian' theinna dingin a political philosophy huzapin nakpi takin na nawk zo hi.

Ei khamtung mite sung pha diakah, hih lai-a Rousseau' kammal man pha diak sese bang hi. A diakin, Zomi in koi ciang huam a, nambing or namkee bang zah huam kha a, pau leh ham, lai leh ngeina (literature and traditions) kibang khin lo napi-in a kinaih bang zah huam kha hiam cih nangawn kan lo, thei loh leh theih sawm vet lo napi-in Zomi cih a haipih pialpual kitam mahmah pong hi.

Pau leh ham kithei teng, kamphen a kul lo teng Zomi hi, ci suk miumiau pongin Zomi sit tui hel loh Zomi diktak a kici lanlan ngam khawng peuh kitam lai hi. Kamphen a kisam lo teng bek Zomi hi, na cih mawk leh na Zomi muhna leh san'na kawcik leh toi lai mahmah hi, cihna hi. Na Zomi muhna in khuata tam lo bek huam zo ding cihna hi. Kawlgam-a om na hih leh na Zomi gengenin Tedim leh Tonzang townships pualam kan lah ding cihna hi. Gamdanga om na hih leh na pau leh ham a thei teng omna na kankhiat khit ciangin Zomi bei ding cihna hi.

Kamphen a kul lo teng Zomi hi, cih a kawcik gam itna (narrow nationalism) tawh Zomi a khiatna mittaw sialkhau let teta ding hi mawk le'ng, gentehna dingin India ah apex body Zomi Council (ZC) nuai-ah namkee (tribes) kua om a, tuate Gangte, Kom, Mate, Paite, Simte, Tedim-Chin, Thangkhal, Zou leh Vaiphei lak panin Kom pau bang thei vet lo ka hih manin Zomi hi kei uh, ci-in ka ut teng genin Zomi sit tui hel loh Zomi diktak ka kici lanlan ngam lai zen ding hi.

Zomi cih i minam min (nomenclature) bekbek na pum haipih pong lai teng, thu tawmno bek thei napi-in na kamtam luat leh a Zomi sunga namkee omte Zomi in sim loin puaseh ahih kei leh simmawh bawl leh sih muhdah leh gal bawlin Zomi na seek neu beh semsem ding hi. Uino bangin a sutuah niloh Zonamkhandal na hi den ding hi. Zomi min leh vang na kiamsak semsem ding hi.

1953 in kiphuankhia-in 1995 ma dongin ZBC ah i om khawmpih i sanggam Hakha leh Falam mite "Chin" cih tuam piak bawl sese in na gal bawl leh sih muhdah den ding hi. Leitungah state i neihsun Chin state ah na kiseek neu semsem banah nang leh nang khualmi leh peemta kisuaksak tawmin, gam mi hinna leh minam kiciamtehna a nei lo "stateless people" Rohingya status ah na kiguanglut ding hi

Na theihna a neu luat lai teng nang leh nang vangik kiguantawmin na gim den ding a, na gal ahi lopi na gal leh sa bangin enin lauhna leh patauhna tawh na kidim den ding hi. Alexander Pope in, "A little knowledge is a dangerous thing," a cih bangin na theihna a toi luat manin na thu theihna a lauhuai mahmah suak zawsop thei ding hi.

Na ngaihsutna a tangzai leh na thawl zawhna zai ding a, na ngaihsutna a kawcik luat leh na thawl zawhna a neu semsem banah na gam na mun neu semsem ding hi. Gam leh minam it lua na minam leh a gam na seek neu behbeh sangin it kei zaw lecin a gam leh a mite adingin meet huai zaw ding hi.

Thang Khan Lian