LUNGSIM LIMLANGH

LUNGSIM LIMLANGH

Ngaihsut kibang lo mi nih nasep khop pen
Tha kituak lo bawng leeng kai tawh kibang hi.
Ui in a kihtakte tawngin a kihtakte pet a,

Mihing hong kihta ten hong koko in,
Hong kihta lote in hong su-ek hi.

Pasian in mawhna pulak pah lo, thukpah lo a,
A pulak ciangin mi mai-ah pulak in, a thuk kik teh a khangin thuk hi.

Tu lai nungak tangvalte ki-it loin kingai uh a,
Khantawn ading hi loin tawlkhat adingin kiteng uh hi.

Na lian khat i sep zawh ciang bekin phatna kingah a,
Na nengno khat i sep khialh ciangin nangawnin
Gensiatna kingah hi.

Mi pawl khatte a mi pum piangthak in, a neihsa piangthak lo a,
Mi pawl khatte a mipum piangthak loin a neihsate piangthak hi.

I piak ding sumpi a tawm ciangin kithuman zo lo a, i
I piak ding sumpi a tam ciangin kihaza thei hi.

Nuihna khempeuh nuamna hi kim lo a,
Kahna khempeuh dahna hi kim lo hi.

Vantung a tung mite adingin leitung pen hell tawh kibang a,
Hell sung a tung mite adingin leitung pen vantung tawh kibang hi.

Mihing in ei bek aman i kisa a,
Ahi zongin Pasian in kei mawh nei hing a cite deih hi.

Hong kiphat ciangin nuih pah pekpak ken la,
Hong kigensiat ciangin gum pah ngeungau kei in.

Kiphatna zong gensiatna kipatna hi thei a,
Kigensiatna zong pahtakna hi thei hi.

Mihai sawm in hong muhkhialh sangin,
Mipil khat in hong muhkhialh dah huai zaw hi.

Mi hai sawm in hong phat sangin,
Mipil khat in hong phat ut huai zaw hi.

I muan pente mah in hong khemzo pen a,
I ngaih pente mah in hong mudah zo pen hi.

Pilat mai-ah Jesuh a kisit theih mah bangin,
Pawlpi mite mai-ah siate thu kisit hun om thei hi.

A kamtam pente nasem pente hi leh,
Siate sang a khasim piak tak zaw tampi om ding hi.
A mi na muhdah manin a thu nial ken la,
A thu na deih loh manin a mi mudah ken.

An na duh mah bangin,
Nasep na duh leh na puksi ngei kei ding hi.

Gilkial loh na’ngin an nek a kul mah bangin,
Puksih loh na’ngin nasep kul hi.

Innkuan sungah sila leh to om lo ahih manin,
Nasep kituh lo a i kikhiat laiteng nasep zo leh innkuan nuam om thei lo hi.

A tak kolh khempeuh a pil kim loh hangin,
A pil khempeuh a tal kolh kim hi.

Mi i hawmthawh nop leh amah sangin,
Sep zawkna leh hoih zawkna i neih phot kul hi.

Kisawl ciang bek a sep pen mi thanuam kici thei lo hi.
Pasian gal pen Satan hi a, mihing gal pen mihing mah hi.

Thu na lang zak leh,
A lang bek mah um pah in.

Meigit khatin gam khat a kat theih bangin,
Thopuan sung thu in khua khat siasak thei hi.

Na kiangah mikhat hong kigensiat leh,
A kilem lohna uh leh ama pianzia thei masa in.

Pastor khat a lungdam khempeuh tawh a lungdam kim loh hangin,
A dah khempeuh tawh dah khawm hi.

Zu leh va in a gawl sih pih a,
Mihing in a lungsim sihpih hi.

Pasian in lem a sak nak leh,
A lem lo munte ah zong lem veve hi.

Sihna lamdang i sa a, a sihna lamdang lo zaw in,
Suahna lamdang zaw tham hi.

Natna lamdang i sa a, a natna lamdang lo zaw in,
Damna lamdang zaw tham hi.

Haina lamdang i sa a, haina lamdang lo zaw in,
Pilna lamdang zaw tham hi.

Mi minthangte a sih teh minthang zaw a,
Mi minsiate a sih ma-in minsia hi.

Mi khempeuh khatvei tek kikhem zo a,
Tua khemna hong kitheih leh khantawn hong ki-um nawn lo hi.
Pasian in a tawisan mi khat na nen’niam leh,
Pasian in tawisang veve ding a, nang na min dai ding hi.

Natna in Pasian tawh hong kinaisak a,
Sihna in Pasian tawh hong omkhawm sak hi.

A cinghte tungah Pasian cingha,
A huaihamte tungah Pasian ciil hi.

Thau-muuk sangin laikung kihtaak huai zaw a,
I galte sangin I lawmte kihtak huai zaw thei hi.

Itna a kiam leh mawhna kizong a,
Itna a khan leh dikna kizong hi.

Pawisiimna sangin sigalna hoih zaw a,
Sigalna sangin nat vehna hoih zaw lai hi.

Na khempeuh ah paulap bei mawh a,
A piang khempeuh lungkim leng,
Paulap khempeuh bei pah hi.

Thupha ciamteh theihna pen gual zawhna hi a,
Thusia ciamteh theihna pen guallelhna hi.

Mawhsakna pen dikna pulakna hi thei a,
Gensiatna pen pahtak piakna hi thei hi.

Thupha simsim le teh thusia ta zo lo ding a,
Thusia simsim leteh thupa ta zo lo diing hi.

Guah zuk ma-in huih nung thei den a,
Thupha ngah ma in ze-etna kituak thei hi.

Pawlpi kimkhat in siate thu dong a,
Kimkhat in siate thuhilh hi.

Thupi na nasak mahmahte Pasian adingin thupi lo thei a,
Thupi na nasak het lohte Pasian adingin thupi zaw thei hi.

Sahang in mi a peh ding teh ngik masa a,
Mihing hong bawl sia dingte in hong pakta masa hi.

Mi ih gensiat leh ei a kiphat pian i hipah a,
Mi i phat leh ei a kiniamkhiat i hipah hi.

Mipilte’ gamah mipoite kihehpih a,
Mihaite’ gamah mipoite kisimmawh hi.

Hong ngaite sangin hong itte teenpih huai zaw a,
Hong itte sangin hong hehpihte teenpih huai zaw lai hi.

Khatvei minthan’ khantawn ki mang lo a,
Khatvei minsiat khantawn kimang hi.

Nang deih bangin a pian kei leh,
Nang deih bang Topa' cipah in.

Nang deih bang Topa' na cih leh,
A piang bangbang ah lungkim in.

Na dinmun sanga na kiniamkhiat zawk leh,
Na dinmun sangin hong kitawisang zaw ding hi.

Na dinmun sanga na kitawisan’ zawk leh,
Na dinmun sangin hong kiniamkhiat zaw ding hi.

Gualzawh ma-in guallelhna a om leh,
Tua gualzawh na limci thei pan hi.

Tu ni-a mihaupa zing teh khutdawh suakthei a,
Tu ni mipilpa zing teh mihai suakthei hi.

Sia i deih ciangin paulap tampi tawh i zong a,

I deih nawn lo ciangin paulap tampi mah tawh i hawl khia hi.

-Job Thawngno (Job Thawngno’ LUNGSIM LIMLANGH)

NUNTAKNA I CIHCIH BANG HI MAWK HIAM?

NUNTAKNA I CIHCIH BANG HI MAWK HIAM?

Tu ni-in mipa khat piang a,
Zing ciangin si hi.

Tu ni-in mipa a taih inn sungah teng a,
Zing ciangin lei nuai-ah teng hi.

Tu ni-in mipa in a car hawl a,
Zing ciangin dam lo puakna mawtaw in pua hi.

Tu ni-in mipa in nuntakna neite sinna (biology) sim a,
Zing ciangin ama; tangthu kigelhna (biography) kisim hi.

Tu ni-in mipa in a duh teng ne a,
Zing ciangin ganhing neu nonote' an suak hi.

Tu ni-in mipa/minu nasem zingin lot takin ding khia-in, nasep kipan a,
Zing ciangin Nu/Pa kici hi.

Tu ni-in mipa a inn sungah tawlnga hithiat a,
Zing ciangin hankuang sungah tawlnga in,
Mi ten, “Na kha tawldam ta hen,” ci uh hi.

Tu ni-in mipa in a inn-ah theigah a lim nono ne a,
Zing ciangin ama’ pumpi pen a theigah nekte’ gahna
Singkungte adingin leihoihza (manure) suak ziau hi

A dam sungin mipa gualzo den hi ci-in
A min a thang vangvang hangin,
Zing ciangin khuai in khatvei a deh bangin
Sihna gu in vat lum ziau hi.

Tu ni-in mipa pen mihau pen hi ci-in a kitheih hangin,
Zing ciangin a neih a lamte koi-ah om a,
Bangci banga kizang hiam cih thei nawn lo hi.

Nuntakna i cihcih kisialhpih dingin bang hi lel ahi hiam???
Thuman in i gamtat a, Jesuh' lim leh mel sun a.
I nuntak ding thupi pen hi.
HIH LEITUNG PEN I INN DING HILO HI
CIH MANGNGILH KEI NI.
EI PEN PEEMTA LEH KHUAZINMI BEK IHI HI.

Nei leh lam kisa-in kem bembem in ham hen.
Khutsung lumlet bangin mitphial kalin bei thei ziau hi.
Hau na kisak hangin mizawngte tawh na tunna ding mun kibang a,
Leikha' an ding mah na hi lel hi. 

“Mi khat peuh in hih leitung khempeuh a ngah hangin,
A nuntakna bulpi suplawh leh bang phattuamna om ahi hiam?. Ama nuntakna bang tawh lei lei kik thei nawn ding ahi hiam”.
(Marka 8:36).
A mawknapi, a mawknapi na khempeuh a mawknapi.
(Thuhilhna (1:2b)

.......“Hih thute khempeuh ban-ah gen ding thu khat bek om hi.
Mihing hong kipian’sakna, a thubul pen in:
Pasian zahtakna leh a thupiaknate man’na ahi hi.
A pha hita leh a simtham hita leh,
A simtham-a i hihte nangawn, i hihna khempeuhah,
Pasian in thu hong khen ding hi,” (Thuhilhna 12:13-14).