ASSAD IN PUTIN KIANGAH, "KA GAM NONG HUTKHIAT MANIN LUNGDAM ING," CI
Nov. 22, 2017: Syrian President Bashar al-Assad in Russian President Vladimir Putin' tungah lungdam ko a, "Syria ah Russia in nong huh manun ka gam uh nong hunkhia hi," ci-in Russia Black Sea resort Sochi ah zanhal in a kimuh un ci hi ci-in Kremlin in zan in a statement ah pulak hi.
Assad leh Putin in Sochi ah a kimuhna uh-ah "terrorism" vai tawh kisai leh Syria ah gal kum sagih cing dek buaina venna dingin political settlement bawlna dingin kamkupna nei khawm uh a, Assad in Syria buaina nensak ding deih parties khempeuh tawh kihona nei dingin kimansa-in ka om hi ci hi ci-in Kremlin statement in gen beh hi. Putin in Assad kiangah kong kithuahpih zom ding uh hi ci-in dawng hi.
RIA news agency in Kremlin spokesperson Dmitry Peskov in a genna ah Assad leh Putin in naikal kiim kamkupna nei uh hi ci hi ci-in gen hi. Syria gal 2011 in a kipat khit nung Russia ah Assad nih vei bek a zinna hi pan hi. Syria President Assad in huhna a nget bangin Russia in Sept. 30 in Syria ah galdo hong kipan a, kha khat gal a do khitin Oct. 2015 in Moscow khuapi-ah Assad leh Putin kimu uh hi.
Nung kha-in Syria gam-a a lengkhia (factions) tuamtuam ten kikuhkhawmna nei uh a, tuate lakah Syrian government leh kumpi langpang pawl tuamtuamte (opposition groups) Kazakhstan gamte khuapi Astana ah kimukhawm in kapkupna nei uh hi.
Syria gal vensakna dingin leitung bup kipawlna UN leh Russia, Turkey leh Iran in ahih theih bangun hanciam uh a, gal vensakna ding ngimna tawh buaina khan' beh lohna ding geelna tawh Russia, Turkey leh Iran hanciamna tawh "de-escalation zones" kici Syria gam mun li ah kibawl a, hih munte ah kikaptuahna khawlna dingin terrorist groups cihte kihel loin Syria kumpi leh rebels ten ceasefire agreement nei uh hi.
Syria gal hangin mi 465,000 sita a, 12 million in teenna ding kinei nei loin om (displaced) khinzo uh hi. Syria gal pen democracy golzaw deih nitumna gamte kiphinna hangin ngongtatna hong piang a, US leh nitumna gamte huh rebels leh terrorist groups ten gamkeek in Syria kumpi laih ding hanciam uh hi. Syria kumpi tuk ding leh Syria gam kiphelkhap ding hong bat ciangin President Assad in in Russia huhna ngen a, Russia, Iran' huh Hezbollah thau tawite huhna hangin tu dong Syria gam kikeek lo hi bek hi.
US makaih gam kipawlkhawm (US-led coalition forces) gam 65 + rebels + terrorists teng in Syria kumpi leh Russia galkap tam lo a dona uh phualpi leh US leh a makaih leh a pawlte guallelhna phual suak hi. US ten democracy deihna banga kumpi kiteelcing laihna dingin a zat ngitnget den uh a "regime change" policy uh lawhsapna suak kik hi.
Source: Al Jazeera
@Thang Khan Lian #ZUNs
http://www.aljazeera.com/news/2017/11/assad-putin-saving-country-171121061839648.html
