BOSNIAN CROAT MI SLOVADAN PRALJAK IN THUKHENNA INN SUNGAH GU DAWN IN SI

BOSNIAN CROAT MI SLOVADAN PRALJAK IN THUKHENNA INN SUNGAH GU DAWN IN SI

Nov. 30, 2017: Yugoslavia gam a kikeek ma-in Bosnian War hun lai-in war crimes gamta ci-a ngawhna tuak Bosnian Croat forces commander leh kum 20 thongkia dingin The Hague in dan a piak General Slobodan Praljak in sihna gu (poison) dawn in zan in si hi ci-in Croatian state TV in a gen khitin si mah hi ci-in International Criminal Tribunal for the former Yugoslavia (ICTY) tribunal' spokesperson in ci hi.

ICTY in kum 20 thongkia dingin dan a piak lai-in, "Kei, Slobodan Praljak in thukhenna ka nial hi. War criminal hilo hi'ng," ci hi. Tua khitin General Slobodan Praljak in thawl neu a tawi hongin gu dawn a, ka dawn gu hi ci hi. Thukhenpa'n a thukhenna (hearing) suspended in siavuan a sap pah hangin dam zo loin si hi.

Hih thupiang pen ICTY in 1992 -1995 Bosnian War hun lai-a war criminal thukhenna tawpna dingin 2013 in a kimawhpaih Bosnian Croat political leh galkap makai guk Bosnian Muslim bawlsiate, hawlkhiate leh lom thahte thukhenna a neih laitak hi. Sarejevo khuapi panin Al Jazeera newste kiangah Detecor project deputy editor Denis Dzidic in, "Tribunal building ah ambulance kisam a, kum 20 thongkia ding hi ci-in Slobodan Praljak kizasak hi. Hih bang thupiang lai-in thukhenna a kim khat kizo ta a, war criminal thum mawhpaihna thu thukhenpa'n pulakkhia khin ta hi," ci hi. Zan nitak lam in thukhenpa'n thukhenna kizo nai lo thum teng zong thukhenna dan a vek un pia veve hi.

War criminal a ngawhna tuak gukte Bosnian Croat statelet Herzeg-Bosnia kici prime minister lui Jadranko Prlic kihel in, kimawhpaih khin siksek a, 2013 panin thukhenna mai-a ding teng a kigawmin kum 11 thongkia dingin dan kipia hi. Tua loin zan in ICTY tribunal in Bosnian Croat armed forces i.e. "Croatian Defence Council" (HVO) in Bosnia ah municipalities giat a ukna uh Bosnia and Herzegovina leh Croatia buaina ah leitung gam tuamtuam kigolh in galvan tawh HVO huhna pia uh a, hih buaina ah thuneina len Croatia-te Croatian Defence Council zang uh hi ci-in thukhenpa Judge Carmel Agius in ci hi.

ICTY thukhenna in Croatia president phamsa Franjo Tudjman pen Bosnia panin Croat mini-state (state/gam neu) bawlkhiatna ding geelna bawlpa hi ci hi. ICTY in 2013 panin thukhenna na pan a, Franco Tudjman kihelin ulian gukin Croatia mite pumkhatin gawmna dingin Bosnia and Herzegovina panin "Greater Croatia" bawlkhiatna dingin Bosnian Muslimte bawlsiatna dingin a geelna uh "joint criminal enterprise" kici tawh thukhenna a neih uh ahi hi.

Mostar a milom kikhumna kipawlna a suaktate kipawlna Association of Concentration Camp Survivors of Mostar a kihel Edin Batlak in, "Thukhenna lungkimhuai a, hih bang thukhenna hangin Bosnia and Herzegovina leh Croatia kitanauna hoihsak tuam ding hi. Politics hoih loin thukhenna tuak hi. Bosnia and Herzegovina tungah Croatia a thuman a,
Bosnia and Herzegovina a humbit a, a sovereignty a zahtaksak ding hi. Hih thukhenna pen Croatia mite dan piakna hilo in politics hoih lo dan piakna hi a, Herzeg-Bosnia ah a policy uh hun siat lai-in zatna ding politics hoih lo zang uliante tunga thukhenna hi," ci hi.

Zan a ICTY tribunal thukhenna pen a tawpna hi a, mai kha ciangin ICTY in a kong khak ta ding hi. Nung kal in zong ICTY in Bosnian Serb military chief lui General Ratko Mladic in milom thah leh ngawhna tuamtuam tawh mawhpaih in dam sung thongkia dingin dan na pia hi. Bosnia War ah war criminals a ngawhna tuak 161 panin 90 kimawhpaih hi. Ahih hangin Bosnia War lai-a mi tampi thahna a kigolh leh bomb 76+ val vei khia NATO gam maite leh geelna nei leh a kigolh US ulian kuamah kimawhpaih lo ahih manin a lungkim lo mi tam mahmah lai hi.

#Bottom line: Thukheneihna lianpi nei-in policy man lo, duhhopna politics hoih lo leh minam khat deidantuamna, bawlsiatna leh cimangsakna dingin na geelna a lawhcing liang zongin thukham in hong mat ni tung peelmawh ding a, leitungah dan na tuak kei zongin hun bei ciangin thukhenna mai-ah dan na tuak veve ding hi.

Source: Al Jazeera
@Thang Khan Lian #ZUNs

Show More Reactions

NORTH KOREA IN BALLISTIC MISSILE TEST LEULEU

NORTH KOREA IN BALLISTIC MISSILE TEST LEULEU

Nov. 29, 2017: North Korea in September kha kim in ballistic missile a test khit zawh tu zingsang 3:17am local time (18:17 GMT) in South Pyongan province sunga om Pyongsong khuapi panin lawnkhia hi ci-in South Korea army ulian ten pulak hi ci-in South Korean news agency Yonhap news in gen hi. North Korea a ballistic missile test lak panin a golpen hi lai hi kici hi. North Korea in bangmah a gen ma-in South Korean army officials, South Korean news agency Yonhap, Japan uliante leh US State Department in North Korea missile a test ciangin a gen masa ding a kituh ngeina bangun kituh kik keei zel uh hi.

Japanese Defence Minister Itsunori Onodera in North Korea missile a sangna lam (altitude) 4,000 km dong ah leng a, Japan gam-a "exclusive economic zone" (EEZ) deng hi ci hi. US Defence Secretary James Mattis in a missile ni dangte sangin hatzaw ahih manin North Korea' missile bawl ten leitung mun khat pen kap ban ahih manin leitung bup vauna bawl zo hi ci hi. "Hih missile test panin North Korea in a missile range un leitung mun khempeuh kap ban hi cih a lah nopna uh hi," ci-in Seoul khuapi panin Al Jazeera reporter Kathy Novak in ci hi.

US Department of Defense in North Korea missile test lam 1:17 p.m. EST in na thei a, a missile tuatna masakna (initial assessment) panin intercontinental ballistic missile (ICBM) hi ci-in Pentagon Spokesman Col. Robert Manning in a statement ah gen hi. North Korea intercontinental ballistic missile (ICBM) test pen nuclear galvante kithuah thei leh US kap ban ding namte hi. Pentagon in North Korea missile test ICBM hi ci-in a genna a man leh US leitang kap ban dingin North Korea in nuclear capable ICBM a neih ding dal theih bangin US in dal ding hi ci-in a kamciamna bek etna ah kamciam in a awngawng US President Trump' pang betna leh kamciam peelna thum vei hita hi. North in Trump in President a let khit zawh ICBM thum vei test a, ICBM li (Sept. 2 in nih khat vei in test) a lotkhiatna hita hi.

North Korea missile test hangin South Korean President Moon Jae-in in a top advisers teng tawh national security meeting nei dingin a kilamet banah Japanese Prime Minister Shinzo Abe in zong UN Security Council emergency meeting a neih dingin a nawh banah US, South Korea leh Japan in North Korea missiles test vai genkhawm dingin UN Security Council ah emergency meeting neih dingin nawh henhan kik leuleu uh hi. NATO Secretary General Jens Stoltenberg in zong North Korea' ballistic missile test a mawhsakna thu pulak a, North Korea' nuclear leh missile programs pen leitung kilemna ding bitna dinga vauna piangsak leh dengdel sak hi ci hi.

"North Korea missile test a gam kiim-ah ki-awlmawh mahmah a, a test khit uh minute nga khitin South Korea in thau tang zangin galdo sinna (live-fire drill) nei pah uh a, South ten North message a khak nop in na missile test uh kithei/kiman (detect) pah leh thuk kik dingin kithawi (kap khiatsak ding) hi ung a cih nopna uh hi ci-in Al Jazeera reporter Kathy Novak in ci hi. Nung kal in North Korea gam "state sponsor of terrorist" ci-a ciamteh Trump in North Korea missile test vai, "Hih thupiang kidal/kikem/ki-uk in kibuaipih (we will handle) ding a, North Korea tawh kisai buaina ah US dinna kilaih lo hi ci hi.

North Korea in Sept. 15 in Hwasong-12 missile a test Japan leilu lam Hokkaido tungah a lengsak in Pacific a dengsak khit ballistic missile a test masakna hi. Sept. 3 in zong North ten a nuclear bomb test lak panin golpen H-bomb kici test uh a, United Nations General Assembly leh leitung makaite thangpaisak mahmah a, UN leh US in khalna (sactions) bawl khum hi. Tua khitin North Korea missile test a gam tunga lengte kapkhiatna dingin Japan in zong a anti-missile defence khauhsak beh in, USte Aegis Ballistictic Missile Defence leh Patriot anti-missile cihte behlap in a omna mun bang a laih keei hangun tu zingsang a North ten a missile test uh Japan gam-a "exclusive economic zone" (EEZ) deng kik zel napi na kapkhia man lo leuleu kik uh hi.

North Korea in tuni-a a intercontinental ballistic missile (ICBM) test pen Hwasong-15 thak hi a, US leitang mun khatpeuh kapban hi ci-in a pulakna statement North Korean state television ah kikhahkhia hi. UN in khalna guk vei bawl khum khin in, US ten khalna a bawl uh tawh lungkim loin "terrorist state" in ciamteh beh napi North Korea pen khalna a kibawlnate sakol sat bangin a hai tai semsem suak zawsop hi.

Source: Al Jazeera; Sputnik
@Thang Khan Lian #ZUNs .

SOUTH ASIA AH POPE HONG ZIN, INDIA IN A HAWH DING CIAL LO

SOUTH ASIA AH POPE HONG ZIN, INDIA IN A HAWH DING CIAL LO

Nov. 27, 2017: Catholic pawlpi sunga biakna makai lianpen Pope Francis South Asia - Myanmar leh Bangladesh ah ni guk sung taam dingin zan in hong zinkhia ta a, Myanmar gam sik masa hi. Myanmar leh Bangladesh gam-ah Pope a taam sungin Rohingya galtaite thu nak gen mahmah ding hi kici hi.
India gam-a Catholic ten Pope in India gam zong hong sikna dingin kumpi tungah ngetna a kineih hangin India government in Pope muak ding lunglutna bangmah hong lakkhia lo hi ci-in Catholic Bishops Conference of India (CBCI) senior ulian khat in ci hi.

The Hindu newste kiangah CBCI ulian pa'n a genna ah, "Pope hanciamna hangin Vatican hong kigolh manin Yemen gam-a thau tawi ten a mat uh Father Tom Uzhunnalil kikhahkhia thei ahih manin Myanmar leh Bangladesh ah a zin kawmin India in zong Pope a na zindo ding kilawm hi. India government in Pope a zindona ding ulian (highest level) ten Pope a cial ding uh ngetna kinei napi amau tung panin a hoihlam dawnna bangmah kingah lo hi. Catholic ten Pope in India gam zong hong sik ding kilunggulh mahmah hi," ci hi.

Pope Francis in Myanmar ah a taam sungin Rohingya refugees buaina vai Nobel pahtawina ngah leh Myanmar State Counsellor Aung San Suu Kyi a kimuhpih ciangin genkhawmna nei ding uh hi. "Myanmar leh Bangladesh zin dingin ka kitawi lai takin mi khempeuh tungah kilawmtatna leh nosiatna ka khak hi. Kong muh ding kal ka ngaklah mahmah hi," ci-in nung kal bei kuan (weekend) in Pope in social media message ah khahkhia hi.

India gam-a Catholic Church ten Pope hawhna ding vai kumpi in geelna a neih ding statement a pulakkhiat pen Indian External Affairs Ministry in Pope hong zin theihna dingin a vaihawmna thuneihna man len ten “proper mechanism” thukhensatna a bawl uh kul hi a cih khit nung hi. "India leh Khristian biakna kizopna pen kum 2,000 cing dek ta a, India gam ah Khristian upna in gam hausa sakin khangto sak mahmah hi. India leh Holy See (Pope) kizopna pen hoih mahmah a, a beisa kumte a kipanin khauh semsem hi," ci-in External Ministry spokesperson Raveesh Kumar in November 23 in a cih hangin CBCI ulian pa' thugenna dawng lo hi.

Pope a khualzin sungin India panin Archbishop of Mumbai Cardinal Oswald Gracias, Cardinal Mar George Alencherry, Cardinal Placidus Toppo leh Diocese of Tripura Bishop Lumen Monteiro tleh West Benggal state panin siampi pawlkhat ten zong Pope kimuhpih ding uh hi. Senior Catholic sources in India government in Pope zindo ding gupna hong piak loh hangin kilungkia loin Pope hong hawh theihna dingin cialna back-channel talks tawh neih ding kihanciam veve lai a, government huhna tawh 2018 kum kim pawlin India in Pope Francis kimuak sawm hi ci-in Bishop Theodore Mascarenhas in ci hi.

#Behlapna: Hih bangin biakna makai lian khatin Myanmar leh Bangladesh gam hong sik pen kumpi ulian lubawk pente hong sik khak sangin thu um mite adingin nakpi takin angtanhuai zaw pek lai hi. Oct. 31, 1517 in Catholic biakna sungah Lai Siangtho palsat hi ci-in Martin Luther in a muhte "95 Theses" kici Germany gam-a Saxony a om Wittenburg Castle Church baang ah siktukilh in kilh in, a 95 Theses va suang hi. Catholic panin lengkhiat ding, kiphinna neih ding leh pawlpi thak phuankhiatna ding geelna tawh Luther in 95 Thesis a va suang hi lo, a thu sungkhiat thu nam 95te kinialna (debate) neih dingin bekin a suang ahi hi.

Luther' 95 Theses pen Solas nga bulphuh hi. Solas ngate hih bang hi: 1. Sola Scriptura: Pope, bishops leh siampite thuneihna hilo in LST in thuneihna sangpen nei hi (Scriptue alone). 2. Sola Fide: Jesuh upna bek bulphuh in hotkhiatna/gupna kingah thei hi (faith alone). 3. Sola Gratia: Pasian' hong itna leh hehpihna bek tawh gupkhiat leh hotkhiatna kingah zo bek hi (grace alone) 4. Solus Christus: Jesuh bek i Topa, Gumpa leh Kumpipa hi (Christ alone) 5. Sola Dei: Pasian' minthanna ding bek-a kinungta hi (to the glory of Lord alone) cih teng bulphuh hi napi Catholic biakna makai ten Luther telkhia in pawl sung panin tuamkoih/kizopna khaktan (excommunicated) uh a, hawlkhia uh hi. Hih thu hangin biakna kibawlphatna (reformation) nasia takin hong piang a, tua panin Protestant hong piangkhia hi zaw hi. Catholic panin Protestant hong pian'khiat ciangin biakna nihte kikal ah kum za tampi kitelkhialhna leh reformation betdaihna (Counter-Reformation) ding hanciamna hangin sisan naisan kisuahna leh biakna gal lianpi hong piang a, mi tul za tampi in sihna tuak lawh uh hi.

Ahih hangin Catholic biakna sungah reformation piangkhiatna leh Luther, John Calvin leh Henry VIII in pope thuneihna (papal authority) man lote a to ngamna uh awlmawhna leh kibawlphatna nakpi Council of Trent (1545 - 1563) kikal in thukikupkhawmna a neihna hangun Catholic pawlpi in Reformation thu bullette a tamzaw pom thei in, Catholic leh Protestant kikal ah kideidanna hong bei hiaihiai a, Catholic pawlpi in Protestant biakna zuite thu upna panin pialte. thu um lote (infidel) ci-a a muhna uh hong kilaih in kilem kikna (reconciliation) hong piang thei kik hi.

Khristian thu upna pawl nih a kikhen kum 500 cin'na tu kum Oct. 31 in Sweden a pawi thupi takin kibawl a, a pawi honna nangawn Pope Francis in a neih banah hih pawi ah Catholic pawlpi makaite angtang mahmah uh a, tampi tak kihel in nuam takin kilem kikna kipsakna ding hanciam pha uh hi. Hih bangin Catholic leh Protestant makaite kilem kik in, unau bangin kinosiat in, kinam in a kikawi kik khit ban uh-ah Catholic pawlpi in Reformation bulphuh a tamzaw pom khinzo napi Reformation hong piankhiatna bul leh bal thei lo leh a hoih lo lam bek khauhpaihpih biakna mitdeldel sialkhau let pawl (religious extremist) teng leh biakna hahkat lo teng peuhin doctrine bekbek buaipih in, pawl dangte tawh kinialna ding leh kilangbawlna ding bek leitang zon in a hun uh a mawk beisak ngam tam mahmah lai hi.

Pawlpi doctrine bek buaipih in, pawl dangte tawh kilem thei lote pen Khrih tawh kipawl nai lote leh Khrih langpang ngam lai teng hi a, Sawltak Paul in Efesa 2: 13-14 ah, "Ahi zongin a gamlapi-ah a om ngei hi napi-in tu-in Khrih Jesuh tawh na kipawlna hangun ama sihna in Pasian kiang hong tun'pih hi. Khrih mahmah in Gentail mite leh Judah mite pawl khatin hong bawl ahih manin eite tungah nopsakna hong piapa ahi hi. Hih minam nihte khenin gal a piangsak dalna pen Khrih in ama pumpi tawh a sat kham hi," cih thu a tel zo lo nai lo mittaw banga lampai lai teng bek ahi hi. Biakna doctrine bek bul letin mitdel a bang a muh theih a pianpih mihingte it lopi in muh theih loh Pasian it ing a ci ngamte pen leitungah mi kamsia pen leh amau leh amau kikhemkhem teng leh buai ding buai lo buai loh ding teng buaipih teng hi bek hi.

Source: The Hindu; Wikipedia; History.com; National Public Radio; Crux
@Thang Khan Lian #ZUNs

US IN FALSE FLAG ATTACK BAWLNA DINGIN SOVIET VANLENGTE LEISAWM HI CIH JFK FILES AH TUANG

US IN FALSE FLAG ATTACK BAWLNA DINGIN SOVIET VANLENGTE LEISAWM HI CIH JFK FILES AH TUANG

Nov. 25, 2017: US President lui JF Kennedy kithahna tawh kisai file pomawh (document) nung diakin a kikhahkhiate (released) ah US government in Soviet Union mawhsakna ding leh a mawhna zonna dingin Soviet vanlengte lei sawm in, tuate tawh false flag attack kici lan man lopi tawh US gam leh USte pawlte suamna dingin zat sawm uh hi cih thusim geelna secret plan document kimukhia hi. US government in hih bang ngian leh geelna a neih pen Soviet Union ahih leh a pawlte (Soviet bloc) do theihna ding paulap hoih a zonna ahi hi.

Lai pomawh pawlkhat mipi muh dinga kipholakkhia (partially declassified document) ah March 22, 1962 meeting ah Kennedy administration committee high level sunga Cuban government laihna (overthrow) dingin tavuan kipia Special Group Augmented (SGA) kihel a, tua meeting ah Cuba gam uk laihna ding leh Soviet vanlengte ngah theihna ding vai kikupkhawmna nei uh hi.

SGA group sungah Attorney General Robert Kennedy, CIA Director John McCone, National Security Advisor McGeorge Bundy leh Chairman of the Joint Chiefs of Staff Lyman Lemnitzer kihel a, tua loin tua committee ah Secretary of State Dean Rusk leh President Kennedy zong kihel dingin ku-um hi. SGA groupte meeting neihna ah Soviet vanleng false flag attack bawlna dingin a leisawmte uh Soviet aircraft minte lakah MiG-17 leh MiG-19 fighters, Il-14 military cargo transport cihte zong kihel a, a gal a panin lim takin etna leh sitna (distant observation and/or up close examination) neihna panin bawltawm ahih loh lam a kitheihna dingin a bawlkhiat/piangksakna (reproduce) dingin sum bang zah bei ding a, hun bang zah bei ding hiam cih zong tuatna leh genkhawmna nei lai uh hi.

Tua loin geelna dang a neih uh CIA analyst ten Soviet vanleng hawlte a gam panin lehtai/taisiate (defecting pilots) tung pan ahih kei leh Soviet in a kipawlpih loh gamte (non-Soviet Bloc countries) tung panin Soviet gal vanlengte ngah ding cih tua document ah tuang hi. Ahih hangin hih bang geelna pen baihsam vet loin nawngkaihuai mahmah hi. Tua loin Soviet gal vanlengte nei-in Soviet galkapte vanleng hawlte kineih in US leh a pawlte suamna dingin Soviet vanlengte zang leng (stage false flag attacks) Soviet gam galkap thahat tawh zat theihna dingin paulap ding hoihpen hi cih a document ah tuang hi.

"Tua bang vanlengte pen huih lakah galte vanlengte tungah ngian bawlna ding leh mi khemna ding galdona (deception operation) dingin a kizat theih banah Soviet gal vanlengte US leh a pawlte galphual omnate kapna dingin kizang leh US kigolh theihna ding piang theih ding hi," cih a document ah tuang hi. Tua bangin a sim tham a galdona (covert operations) dingin Soviet vanlengte US ah bawlkhiat ding hoihpen hi cih zong a document ah tuang hi.

Hih banga secret plan document pen Pentagon leh Joint Chiefs of Staff in false flag operation bawlna dingin CIA leh agencies dangte tungah US nautangte leh US galkapte panmun terrorist attack bawlna dingin "Operation Northwoods" kici geelna a neih tawh kizom hiam cih kitel lo hi.
Operation Northwoods pen US nautangte leh galphual omna mun terrorist strike (suamna) bawl a, tua banga amau ngongtatna Cuba government ngawh a, Cuba simna kisiamtanna dingin Pentagon leh Joint Chiefs of Staff in false flag operation geelna a bawl uh ahi hi.

US political historian Robert Dallek in hih bangin Kennedy administration in Soviet gal vanlengte ngahna ding/bawlkhiatna ding a geelna pen CIA Director McCone in hong ngaihsutkhiat hi ci hi.

#Behlapna: President John F. Kennedy pen a motorcade ah a zi Jacqueline Kennedy tawh Dallas, Texas ah a presidential motorcade ah Dealey Plaza ah tun laitak un Nov. 22, 1963 12:30 pm in Lee Harvey Oswald in a mawtaw naikal khatin 11.2 miles a hat a tai Elm Street panin 186 feet ah na kaplum hi. Kennedy kithah in US President thum - Lincoln, Garfield leh McKinley kithat khin zo a, amah president kithat a lina suak hi. Vice-President Lyndoh B.Johnson in Kennedy za laih pah hi. Kennedy kaplumpa Lee Harvey pen US Marine a sem ngei hi.

Tualgen minthang USte lungsim leh ngaihsutna pen taang lai leh tu hun in kilamdang ngei lo a, hih bang lungsim a pu a pa ua kipanin a vom ngitnget leh a paikhia thei lo "ngia tuu vun silhte" leh midang mawhna ding guan tawm leh zon ding bekbek geel a buai dente ahi uh hi.

Source: Sputnik
@Thang Khan Lian #ZUNs

EGYPT GAM THAU TAWI TEN SUAM, MI 235 KIIM SI; EGYPT IN MI GILOTE THUK KIK PAH

EGYPT GAM THAU TAWI TEN SUAM, MI 235 KIIM SI; EGYPT IN MI GILOTE THUK KIK PAH

Nov. 25, 2017: Zan in North Sinai provincial capital El Arish nitumna lam panin 40km gamla a om Bir al-Abed khuapi gol lua lo (town) ah Friday Prayers a man khit uh a sawt loin Muslim biakinn (mosque) bomb leh thau tawh kisuam a, mi 235 kiim a sih banah mi 120-130 in liamna tuak hi. Egypt President Abdel Fattah el-Sisi hih suamna pen "thukham palsat" leh "dawilok" mite gamtatna hi ci-in a televised statement ah pulak hi.

Bir al-Abed mosque suamte kuate hiam cih zong a kipulakkhia leh thukanna bangmah kinei nai lo napi in Bir al-Abed khua-a mosque a kisuam khit naikal sawt kihal loin Egypt Air Force-te gal vanlengte vantungah kimu pah phengphang a, Bir al-Abed kiim-a om mual tung lak kap ziahziah pah uh hi. Sky News Arabia report in Egypt in thuithe vanleng (drones) zangin Bir-al Abed mosque suam a kigolhte gamnuaimi 15 that a, sehnel gam kiim ah gal vanleng ten bomb nasia takin khia hi ci hi. Al Arabiya news in Northern Sinai ah terrorist-te mawtaw leh galvan sengna munte kikapsiatsak hi ci hi.

Zan a mosque koi dan leh bang hanga kisuam?

Bir al Abed khua-a Sufi mosque ah Friday prayers a neih lai un a biakinn ah 4WD vehicles kici mawtaw li va lut hi. A biakinn suam ten biakinn sungah bomb puahsak uh a, tua khitin biakinn sunga omte thau tawh phengkap gawp uh hi. Biakinn sung pan a taikhiate zong biakinn suam ten kap gawp uh hi. Egypt state media in mi 235 a sih banah mi 120 liam hi (news dang pawlkhat ah 130 kiim liam ci) ci hi. Egypt gam tangthu adingin suamna lak panin a nasia pen hi lai hi.

Bir al-Abed mosque pen North Sinai khuapi liante pua a om ahih manin a suam nuamte adingin muitum baihlam hi. Tua loin hih biakinn pen Sufi upna (sect) zuite biakinn ahih manin muitum in kinei hi. Sufi biakna zuite pen ISte kihel in Islamic ngongtat pawl tuamtuam ten thu-um lo; thubullet um lote (infidels) ci-in ngaihsun uh hi. Ahih Friday's prayers ah Sufi sect lote zong tua hun ah kihel uh hi.

Bir al-Abed mosque kisuamna pen Gaza a tengte haksatna hangin Egypt-Palestine gamgi Rafah kantanna ni thum sung tu ni (Kiginni) a kipanin a kihon dek laitak a thupiang hi. Rafah crossing pen August kha-in kikhak a, zan a thupiang hangin security dinmun dengdel hi ci-in Egypt in khak zomsuak lai ding hi. Zan a thupiang pen ko gamtatna hi ci-in a kipulakkhia a om pah loh hangin a beisa-in North Sinai sung IS tawh kipawl thau tawi ten suam mun mahmah uh hi.

Cairo khuapi-a Nile University professor Timothy Kaldas in, "ISte gamtatna dingin kilawm hi. Northern Sinai ah Egypt kumpi in ISte a betdaihna ah a kipawlpih minamte thuk kikna dinga suamna hi," ci hi. Sinai Peninsula pen Arab Spring hangin kiphinna a kipat khitin Army Chief lui leh tu-a President Sisi in 2013 in Muslim Brotherhood makai leh democracy deihna banga kiteelcing President Mohamed Morsi galkap thahatna tawh paikhia khit nung a lungkim lo Sinai a gamnuaimi om ten 2014 in ISte thumang ding; cihtakna piak dingin kamciamna nei uh hi. Tua khit nung Sinai ah ISte tawh kipawl ten mun tuamtuam suam in, kumpi lehdo a thau tawi a kiphinna "armed anti-government campaign" hong nasia mahmah hi.

Tua khit nung nautangte ngim leh muitum in a kineih khit ciangin galkapte leh policete muitum leh suamin kinak neih mahmah a, za tampi si ta uh hi. 2014 in suicide bomber in galkap 33 a thah manin President Sisi in Sinai Peninsula ah "state of emergency" koih a, hih kiim pen "terrorism leh terrorists bu tomna phual hi" ci hi. 2017 in zong mun tampi kisuam ta a, October in Egypt security 6 kisuam lum a, September in 18 kisuamlum hi.

Zan a Friday's prayer a kisuam khitin Egypt kumpi in ni thum dah ni pulak a, President Sisi in tuahsiatna tuakte leh a innkuanpihte tungah a thuakpihna leh dahpihna pulak a, suamna bawlte thuk kik lohin kikoih lo ding hi ci hi.
Al Jazeera newste Middle East analyst Yehia Ghanem in, "Egypt gam uk galkap ten Sinai leh a gam sung teng uh-ah ngongtatna (violence) piangsak a, Sinai ah a ngongtatna nasia pen hi. Ngongtatna in ngongtatna mah ta in nei (piangsak) hi. Hih pen a ngeina hi," cihsan hithiat hi.

UN Security Council leh UN secretary-general Antonio Guterres in zan a mosque kisuamna a mawhsakna thu pulak in, a mulkimhuai leh terrorist dawilokte gamtatna hi ci-in a statement ah tuaksak a, terrorism gamtatna limlim pen thukham palsatna leh thukham tawh kituak lo a, diksak theih loh hi ci hi. Donald Trump in zong, "Leitung in terrorism thuak thei lo a, galkap thahatna tawh zawh a, a ngaihsutna leh thusanzia uh zong zawh ding kisam hi. Egypt mosque ah terrorist suamna pen mulkimhuai a, dawilokte gamtatna hi. President Sisi a sawt loin ka hopih pah ding hi. Ni dang sangin khauhzaw leh pilzaw/siamzaw in gamtat ding kisam hi. Kulhbang kisam hi, (travel) ban kisam hi," ci-in a Twitter ah kulh ciang ding leh travel ban mah a ma' ngeina bangin otpih leuleu hi (terrorist khauhzaw leh pil/siamzaw a do ding pen kulh cian ding leh travel ban lo a dang thei zo lo hih tuak hi).

Leitung makai dang tuamtuam in zong a dahpihna leh thuakpihna uh pulak uh a, tuate lakah Pope Francis in lungsim hoih leh ngaihsutna hoih tawh ngongtatna nusiatsan a, kilemna pom ding hi ci-in a statement ah a dahpihna pulak a,
EU President Donald Tusk, NATO secretary-general Jens Stoltenberg leh British Prime Minister Theresa May in zong a mawhpaihna thu uh leh a dahpihna leh lamdang a sakna uh pulak uh hi. Turkish prime minister Binali Yildirim in, "Mawhna nei lo nautang 235 si a, za valin liamna tuak hi. Hih bang a ngongtatna Islam ngeina leh mihing gamtatna hiam? ci hi. Gam tuamtuam a mawhpaihte lakah Qatar, Italy leh Kuwait zong kihel hi

Source: Al Jazeera
@Thang Khan Lian #ZUNs

MYANMAR LEH BANGLADESH IN REPATRIATION DEAL KICI GALTAITE PUAK KIKNA DING THUKIMNA SUAIKAIHNA NEI TA

MYANMAR LEH BANGLADESH IN REPATRIATION DEAL KICI GALTAITE PUAK KIKNA DING THUKIMNA SUAIKAIHNA NEI TA

Nov. 25, 2017: Bangladesh leh Myanmar in Aug. 24 panin Myanmar galkap ten Rakhine state ah military operation a bawl ua kipanin Bangladesh gam-a galtai lutte Myanmar ah puak kikna dingin thukimna "memorandum of understanding on repatriation deal" kici thukimna suai Thursday in kai uh hi. Hih thukimna pen Myanmar khuapi Naypidaw ah Bangladesh Foreign Minister A.H. Mahmud Ali leh Myanmar State Counsellor Aung San Suu Kyi in thukimna suai a kaih uh ahi hi.

Repatriation deal gam nih ten thukimna suai a kaih manin galtaite puak kikna kha nih khit ciangin kipan ding hi ci-in Dhaka a diplomatic sources in The Hindu newste kiangah gen hi. Myanmar in Rakhine ah military operation a bawl khit nung Bangladesh ah Rohingya galtai 600,000 kiim lut uh hi. Hih thukimna pen "kalbi masa pen (primary step) hi a, Myanmar in Rohingya galtaite la kik ding hi. Tuin nasep kipat kul hi. Bangladesh kong ciah kik ciangun thucian kong hilh ding hi," ci-in Bangladesh Foreign Minister Ali in Bangladesh TV channel-te kiangah gen hi.

Galtaite puak kikna (repatriation) cik ciangin kipan ding hiam ci-in a kidong ciangin, "A lak kikna ding nasep kipat kisam hi. A innte uh kihalsak a, a kilak kik kisam hi. Bangladesh in registration form hong piak ciangin Rohingyate lak kik ding mansa-in ki-om hi," ci-in Myanmar’s Ministry of Labour a permanent Myint Kyaing in gen a, registration forms pen amau personal details tawh kisai Rohingya ten a gelh ding uh hi ci hi. Repatriation deal suai a kikaih ma-in Bangladesh Prime Minister Sheikh Hasina in Myanmar in manlang takin Rohingyate a lak kikna dingin nawh a, "Myanmar tawh gam nih kihona (bilateral talks) neih kizom a, Myanmar gammite a gam uh-ah kipuak kik ding hi," ci hi.

Diplomatic sources in a genna Bangladesh in galtaite a kilak kikna ding a kilak kik khawlsan hun ding geelna (time frame) neih ding kalh napi Myanmar in thukim lo ahih manin Bangladesh in verification process bawlna dingin UN agencies a kigolh ding a deih hangin Myanmar in thukimpih lo leuleu hi ci hi. "Ka lamet bangun a lawhcing loh hangin na tampi ah thukimna kinei thei hi. Kilemna dingin tu khawm a kihona bangmah (any negotiation) piang zo nai lo hi," ci-in senior Bangladesh ulian in Bangladesh news agency kiangah gen hi. .

Thukimna taktak a neih theih loh hangun Myanmar in Rohingya galtaite lak kikna dingin gam nih ten Foreign Secretary-level ah joint working group tungtawnin repatriation process pan ding uh hi. Hih bang kihona ah Bangladesh Foreign Secretary M. Shahidul Haque, Myanmar a Bangladesh ambassador M. Sufiur Rahman leh Home Ministry palai leh Prime Minister’s Office palaite zong kihel hi.

Ms. Suu Kyi’ zum in zanhal a thukimna dinmun pen gam nih tuak i gualzawhna (“win-win situation for both countries”) hi a, gam nih ten kitelsiam lohnate kamdam in gam nih kikal ah kihona tawh vensak ding hi ci hi.

Source: AFP and The Hindu

@Thang Khan Lian #ZUNs