KISITTEL PHA NI
A beisa kum sawt loin Leeds (England) ah pastor khat in pawlpi sia dingin sapna ngahin, pai hi. A tun khit nipi kal sawt loin mun khatah mi dang khat tawh kimuhna ding nei in bus ah tuang hi. A bus tuan man/saap (fare) sum dongpa'n 50 pence (hamu) a valin pia kha hi. Tua sum bang lawh ding ka hiam ci'n tawl khat lung ngai deda hi. A lungsimah, "Hih mawtaw sap val na piak kik ding hi. Na piak kik loh phamawh hi," kici hi. Tua khitin, "Mangngilh lel aw, hih maat khat bek lel tak...pia kik kei le cin kuan phamawh sa ding hiam? Bus pu ten nisimin sum tam pipi ngah lel uh ahih manin mang tuam lo ding uh hi. Pasian' ong piak bangin ngaihsun lel in la, kem lel in," kici hi.
A kum dekin a bus kongah tom khat khawlin, tua sum val a pia a mawtaw sum dongpa kiangah, "Nong sum leh khialh hong pia kik ning ei lawm," ci'n pia kik hi.
A sum dongpa'n nui kawmin "Oh! hi maw, lungdam ei...nang pastor hong tung thakpa kicipa hilo na hia? ci'n sang kik hi.
Pastor pa'n, "He, hi mah ing," ci'n dawng hi. A sung dongpa'n, "Pha hi. Hun sawtpi koi-ah kikhawm ding ka hiam ci'n na lung ngaingai hi veng...Sum a val in kipia pia leh bang a cih tam? ci hi veng.. kong et khiatna hi. Mai nipini ciangin na biakinn uh-ah hong kikhawm pah ning maw sia,?" ci'n dawng kik hi.
Pastorpa zong a bus a tai khit phetin a tuah masak pen mei khuam lenin tung lam en kawmin, "Oh! Topa Pasian, Na nasempa sum maat khat bek tawh zuak kha dek mawk veng e," ci hi.
Thu-um mi ten i gamtatna leh i nuntak zia pen Lai Siangtho sim ngei lo khatin a Lai Siangtho simna in hong zang kha thei hi. Hih thu panin thu um mi ten i nuntakzia i kisittel ding lungngaih huai mahmah hi. Thu-um lo leh lawki mite lakah Jesuh min pen i tal ah gelhin, i liangko ah nisim a i puak ding i tavuan ahi hi.
Na ngaihsutna kisit tel in, na kampauna suak thei hi.
Na kam pauna kisittel in, na gamtatna suak thei hi.
Na gamtatna kisittel in, na zongsat suak thei hi.
Na zongsatte kisittel in, na gamtatzia, lu heek zia suak thei hi.
Na gamtat zia, lu heek zia kisittel in, na nuntak tawntungna ding lam ong lak suak thei hi.
