CRIMEA GAMAH CZECH LEH SERBIA MP-TE A VA HAWH MANUN UKRAINE IN BLACK LIST IN CIAMTEH
March 21, 2017: Kiginni in Crimea in Urkraine gam a nusiatsan in Russia a belh uh kum thum a cin'na pawi khamna nei uh a, Nipini in European Parliament, EU member palaite, CIS gamte pan leh Latin America gamte panin politician palaite (delegates) a hun khop zong Crimea gam va tung uh hi. Hih thu hangin Ukraine thangpai mahmah a, gamdang politiciante black list in ciamteh lo se in, Czech leh Serbia thukham bawlte (MPs) black list in kiciamteh a, Urkraine gam kum nga sung hong lut theih lohna dingun kidal ding hi ci-in zan in National Security and Defense Council of Ukraine (NSDCU) spokeswoman Elena Gitlyanskaya in pulak hi.
Zan a gam tuamtuam panin Crimea gam tung palai ten Crimea gam sung mun tuamtuam en dingin zin kawikawi ding uh a, khua sung thunei tuamtuamte tawh zong kimuhkhawmna nei ding uh a, ni thu sung taam ding uh hi.
NSDCU Secretary Oleksandr Turchynov in, "Crimea gam-a ni thum sung zin kawikawi ding Europe politiciante Ukrainian security service ten thu lim takin kanna nei uh a, tuate lak-ah Czech mi khat leh Serbia mi lite pen Crimean autonomous republic leitang ah phalna nei loin om uh ahih manin Ukraine leitang kum nga sung kisiksak lo ding hi," ci hi.
#Behlapna: Crimea in Russia pen March 2014 in mi a tamzaw deihna bangin gam bup vote khiatna "national referendum" kici na nei uh a, 97% in Russia beel nuam zaw uh ahih manun Russia a belh ahi hi. Ahih hangin Ukraine, US leh EU in Russia in Ukraine sim in, thagum tawh Crimea laksak hi ci-in ngawh pong uh a, US leh Eu in Russia tungah khalna koih khum zaw lai uh hi. Crimea gam mite pen a tamzaw Russia kampau a zang vive ahi hi. Ukraine in tu dongin Crimea pen Russia in a uk khumna leitang hi cici lai uh a, hih thu hangin Russia leh Ukraine kitanauna nakpi takin siat lawh hi. Russia leh Ukraine zong December 1991 mai-in gam khat- Soviet Union (USSR) ahi hi.
Source: Sputnik
A tei: Thang Khan Lian @ Laibu Saal
A tei: Thang Khan Lian @ Laibu Saal
