AS-SALLAM-U-ALAIKUM... EID MUBARAK🙏

AS-SALLAM-U-ALAIKUM... EID MUBARAK🙏🙏🙏

Muslim ten kum sim in leitung bup-ah Islamic holidays thupia diak a neih uh nih - Eid al-Adha leh Eid-al-Fitir ahi hi. Eid pawi pen "Kithoihna kipumpiakna; biakpiakna, mawh maina dinga biakpiakna, Pasian mai-etna, thupha ngetna-a kithoihna, kithoihna dingin ganhing piakna tawh Nek khawm bawlna" (Feast Festival) a cihna uh Eid al-Adha (Arabic: عيد الأضحى‎, romanized: ʿīd al-ʾaḍḥā) pawi tu ni a kipanin bawl kipan uh hi.

Hih 'Feast of the Sacrifice' or "Eid-al-Adha" pawi hong piankhiatna hih bang ahi hi: Khristian biakna zuite Lai Siangtho sunga mah bangin Judaism biakna sungah Akedah kici "Isaac A Kihen'na" (The Binding of Isaac) kici Torah sunga om bangin Islam biakna zuite Lai Siangtho Quran kici sunga sura 37 (Aṣ-Ṣāffāt), āyāt 100–112 sunga kigelh mah bangin Abraham in a tapa tang khat neihsun, Isaac meihal biak piakna biakna tau tungah a hen'na Piancilna (Genesis) 22:1-18 sunga tangthu i muhna panin Eid al-Adha pawi hong piangkhia ahi hi.

Islam biakna ah Eid pawl pen Muslim pen a Ibrahim (Abraham a cihna) tungah Pasian in a kalhna bangin haza loin a thu man'na a lahna dingin a tapa tangkhat neihsun Ishmael (Judaism leh Christianity biakna ah Isaac hi kici zaw) al-Fitr) Pasian mai-etna leh thupha ngetna-a kithoihna dingin biak piakna in a piak ngamna phawkna pawi ahi hi.

Islam biakna LST Quran sungah Ibrahim in a tapa Ishmael meihal biakna tau tungah khau tawh khihcip in dawt dingin a temta tawh a ngim lai takin Topa' vantung mi in vantung panin, “Abraham, Abraham!” ci-in a sam hi. Amah in, “Hiah om ing,” a ci-in a dawng hi. Amah in, “Tangvalpa su kei in. Ama tungah bangmah hih kei in. Bang hang hiam cih leh nang in Pasian na zahtakna tu-in ka thei a, na tapa khat neihsun keima adingin na humcip lohna ka mu hi,” a ci hi. (Piancilna 22:11-12) ci-in Christian biakna LST sunga kigelh tawh kibang hi. Tua khitin khaumang lakah a ki-a a awk tuutal khat Abraham' nungah na om hi. Abraham pai-in tua tuutal kai a, ama tapa' tangin meihal biakna-in a pia hi. Tua ahih ciangin Abraham in tua mun pen, “Topa in hong sik hi,” ci-in min phuak a, tu ni dongin Topa' mual' tungah hong kisik hi, a kici hi ci-in Piancilna 22:13-14 sungah kimu hi.

Topa' vantung mi in vantung panin Abraham a nih veina sam a, “Keimahmah ka kiciam hi, Topa in ci hi. Bang hang hiam cih leh nang in hih thu na bawl khin a, na tapa neihsun na humcip kei hi. Nang thupha kong pia taktak ding a, na suan-le-khakte van-a aksite leh tuipi gei-a sehnel bangin tampi ka phasak ding hi. Na suan-le-khakte in amau' galte' khuapite luah ding uh a, na suan-le-khakte thupha ka piak bangin, leitung minam khempeuh in thupha a ngahna dingun hong ngen ding uh hi. Bang hang hiam cih leh nang in ka thu na mang hi,” a ci hi ci-in a genna Piancilna 22:15-15 kikal sunga kigelh i muh mah bangin Quran' sura 37 (Aṣ-Ṣāffāt), āyāt 100–112 kikal sunga kigelh zia a kammal teng kibang kim khin phial napi-in a neu 122 sungah ISAAC piak dingin Pasian in Ibrahim' tungah tua lai munah na ciam hi ci-in kigelh hi.

Muslim ten Eid pawi hun sungin tuu (sheep) biak piakna dingin go uh a, tuu muh dingin a hamsatna munte ah keel go zaw uh hi. Pasian' (amau Allah a cih uh) mai-etna leh thupha ngetna in meihal biakna tawh kithoihna (sacrifice) ni uh a ni thumna in a tuu/keel gawh uh Muslim ten amau innkuan in ne uh hi. Tua ni cih loh a ni dang thumte pen mizawng daipaam cimawh mite (poor and need) a sate pia-in vak uh hi. Eid pawi hun sunga nektheih a khum leh letsong (sweets and gifts) zong mizawngte leh a tanau nai diakte uh tungah zong hawm uh hi.

Muslim ten Eid pawi hun sungin tuu leh keel tam go thei mahmah uh hi. Ahih hangin ei Khristian ten i pawi thupite i bawl ciangin bawng, vok leh akte i gawh ngeingai hun in ei leh i pawlpi mite bekin gilmul vang liang leh sungpai liangin i nektum bangin netum lo uh a, mizawng leh cimawhte ni thum sung vak uh hi.

Christianity biakna zuite pawi thupite, a diakin Christmas hun ciangin ak, bawng leh vokte a mangsiat mahmah leh a dah mahmah ban uh-ah hong thuaklah mahmah bangun Eid pawi hun sungin tuu leh keelte zong a mangsiat mahmah leh a dah mahmah ban uh-ah thuaklah uh hi ci-in Islam biakna zahko sakna dingin amau biakna lo buang thuakzawhna leh theihsiamna nei lo mite (religious fanatics) in lim kilawm lopipi in keelte lim ah kammal nuihzakhuai nono gelh in kum sim in social media ah kizeel ngeingai gawp (viral) den hi. Ciing kei le'ng hoih ding hi (a gentehna dingin a nuai-a lim/maan li a kinak zatte kong lah pah hi bek a, ka selpho nopna hilo hi).

Leitunga biakna thum bekin Pasian khat bek om hi cih upna (monotheism) nei uh a, tua biakna thumte Abrahamic religions a kici Judaism, Islam leh Christianity ahi hi. Judaism, Islam leh Christianity biakna a kibulphuhna Lai Siangtho kibang napi-in i thu up zia leh thusan zia (doctrine and ideologies) them nonote kibat lohna hang leh i biakna siate in i Lai Siangtho bulphuh loin lam hong pialpih manun biakna lak panin a kimuhdah pen, sisan naisan tam kisuah pen leh luang tam a kithah pen biakna i suah uh pen a dahhuai leh ngaihsun thei le'ng a maizumhuai mahmah thu ahi hi.

I biak Pasian kibang napi-in ei a ki-it leh kihuai ding teng gal leh sa-in kinei zawsop in, i muh theih loh Pasian it kici lanlan napi-in i pianpih mihingte i muhdah miau mawk pen ei leh ei kikhemnate lak panin a lianpen khat ahi hi. Khristian kici pha diak napi-in a Khristian mipihte nangawn a muhdah ki-om lai zen hi.

Mi khatpeuh in, “Pasian ka it hi,” ci napi-in a Khristian mipihte a muhdah leh a zuaupi a gen ahi hi. Bang hang hiam cih leh a muhtheih a Khristian mipih a itlo mi in a muhtheihloh Pasian it theilo ding hi. Khrih in eite tungah hong thupiakna in: Pasian a it mi in a Khristian mipihte zong it ding hi, cihna ahi hi. (1 Johan 4:20-21))
@ Thang Khan Lian #ZUNs reports

MAKAI HOIH I CIH IN KOI DAN HIAM?

Makai hoih i cih in:

¶ Makai hoih i cih in a ngal hatte leh neih leh lamh a neite bek a huaite, a pil a siam leh ama a pumgup leh a bia ngam liang mite bek a huaite hilo a, amah a langpang tangtangte leh a galte nangawn lawm in a kai zote leh a huai zote hi zaw hi.

¶ Makai hoih i cihte pen a mai bekah pai lanlan den in a nungzuite lampial om kha hiam cih nangawn don man loin aktal kiliansak banga a pai gaugaute hilo hi.

¶ Nuntak haksa sa-in silh leh ten ding zong nei lo, nek leh dawn ding nei lo mite it in a huh thei bangin huh a, ama nek ding leh silh ding taang nangawn pia ngam hi.

¶ A kipaampaih leh tuancil mite, a kidapkoih mite leh tuambawl mite, khawhsa an kham lo, silh leh ten ding zong nei lo, sawlbuk nuai-a beel leh dai kawm a teeng, meigongte, pagongte paamlaih loin zong nusiatsan mawk lo hi. It in, huh in, kep dinga kilawm a om leh kem in huai zaw a, tha thak leh lametna thak guan zaw hi.

¶ Nat leh sat thuakin kikep kikhoi na'ng zong a nei zo lo naupangte in pilna siamna a sin theihna dingin vaihawmsak a, a kep a don man loh hun nangawnin amaute lungsim mitkha in en den in mangngilh ngei lo hi.

¶ Lam sam, bah leh ngui, gilkial dangtak mite a mangthang lel dingin nusiatsan ngam loin phawk den a, kem in huai vanvan khial ngei lo hi.

¶ A mai bek ah pai-in makaih lanlan lo a, lamsam, bah leh ngui in a tuk a om kha hiam cih en khial ngei loin lamsam bah leh ngui in a tukte phongto hi. Puak ding kisam a om leh thasial sese loin pua pah a, lam khial lam pial a om khak leh mot nusiatsan loin lampi man lakin lampi man ah tonpih zaw hi.

¶ Makai hoih i cihte pen tai kidemna ah a khatna ngah khak loh ding lai-in a mai bekah a tai lanlan dente hilo a, a nungzuite thanemna leh hatna tawh kituakin kituak takin a tonpih thei mite hi zaw hi.

✍️ Thang Khan Lian #ZUNs