US MID-TERM ELECTIONS AH REPUBLICANS TEN SENATE AH TUTNA NGAH BEH; DEMOCRATS TEN HOUSE OF REPRESENTATIVES AH THUNEIHNA KHUPLEPSAK

US MID-TERM ELECTIONS AH REPUBLICANS TEN SENATE AH TUTNA NGAH BEH; DEMOCRATS TEN HOUSE OF REPRESENTATIVES AH THUNEIHNA KHUPLEPSAK

Nov. 8: Kum nih hal a US House of Representatives tutna 435 kituhna lak panin tu ciang dong tutna 416 a kisim khinsate lak panin Democrats ten Republicans panin thuneihna suhsak zo uh a, tutna 221 (+26) ngah ta uh a, Republicans ten 196 (-26) uh hi. Democrats ten a beisa kum nih sungin White House ah Republicans ten thuneihna a let khit nungin maban ah a gamtatna uh ki-encik ding hi ci-in kamciamna nei uh ahih manin maban ah Donald Trump' presidency in nan'na;khamna (restrains) khauh zaw sem tuak ta ding hi.

Election campaign bawlna ah minam leh peemta; gambeel vai ah kitattuahna nasia takin a piang khit nungin kum guk term Senate kituhna ah bel Trump' Republicans ten tutna 100 lak panin tutna 51 (+2) ngah ta uh a, Democrats ten 46 (-2) ngah ta uh hi. Republicans ten House ah tutna tam zaw (majority) a ngah uh khahsuah uh ahih manin Trump' adingin supna leh guallelhna lianpi khat suaksak a, Trump' presidency mipi a tam zaw deih lohna thukhenna (referendum) kilatna suak kik hi. House a tutna kisim om lai ahih manin Democrats ten kum giat khit nung majority a ngahkikna dingun tutna 23 a kisap zah val ngah khin zo uh a, a lui sangin tutna 30+ bangin tam ngah zaw dingun kilamen hi.

Hih elections a tutna tuh numei, Native Americans leh Muslim candidates tam penna kum ahih manin US history adingin a ciamteh thamcing suak hi. Muslim congresswomen dingin a masa dingin Democratic candidates Rashida Tlaib leh Ilhan Omar cing uh a, Congress a tutna ngah lak panin a naupang pen dingin kum 29 mi nih Democrats Alexandria Ocasio-Cortez leh Abby Finkenauer zong cing uh hi. House a cing khinte lak panin Democrats numei 83, Republicans numei 22 kihel hi. (report latest ka muhna tan in).

Democrats ten majority House ah a ngahna vai tawh kisai CNN's Van Jones in minam tuamtuam candidates-te a genna ah, "Tu-in Democratic Party thak pen a khangno zaw, sansim kangsim eng sim melpua zaw (browner), a nunnem zaw mi hita hi. US ah party khat ukna bei ahih manin Pasian' tungah ka lungdam hi," ci-in gen hi. Democrats ten Senate ah majority ngah lo ding uh hi ci-in poll in a genna man a, Congress a inn nihte (Senate leh House) a control zawhna dingun vote level kicing ngah zo lo uh hi.

Ahih hangin House ah Democrats ten majority ngah uh ahih manin President Trump' tax returns, business ah bawlna vai, Trump administration ah nekgukna vai leh 2016 election campaign ah Trump' campaign leh Russia' kipawl in mi khemna dingin thusim neikhawm (collusion) uh hi cih ngawhna vai tawh kisai thukankhiatna (investigations) ah House committees makaih thei ta ding uh a, president nangawn court ah thudotna (subpoena) ah ding dingin kalh thei ta ding hi. Tua banah Democrats ten Trump' thukhun bawl ding geelna lianpite (legislative ambitions) a khak theihna dingin nawhna bawl in, Mexico gamgi ah kulh cian' ding cih Trump' kamciamna lawhsam zosak kha thei uh a, second major tax-cut ding dalna leh sumbawlna (trade) ah Trump' hardline policies dal nuamtuam sa ta ding uh hi.

"Tu ni pen Democrats leh Republicans sanga thupi zaw hi a, Trump' administration tungah Constitution's checks and balances [executive, judicial leh legislative thuneihna upadi zanga kahiang dangte (branches) ah thuneihna huzaap zatna dalna] hi ding hi," ci-in House Democrats leader Nancy Pelosi in Democrats gumte kiangah gualzawhna thugenna a neihna ah zan in gen hi. House elections ah guallelhna lianpi tuak napi Trump in a Twitter ah, "Tu nitak pen gualzawhna lianpi hi," cih zan in tuangsak hi.

Kum 72 mi reality TV star lui, sumbawlmi panin politician suak Trump in a beisa nipi kalte ah Trump in conservation pumgupte kiangah a rallies a bawlna mun tuamtuam ah Latin America panin US gam manawh zuan a peemta leh galtai hong paite (migrants caravans) vai a genna ah thu mi' uptheih ding kam uang leh huatna kampau (rhetoric) nak zat mahmah in terrorist om uh a, America hong sim sawm uh hi ci a, liberal Americans mite pen mihon buaina bawlte (mobs) a kei langpangin nasemte hi ci-in a nak gen zah tawh elections results ah kilamdan'na piangsak zo tuam lo hi.

US presidents ten a beisa hunte ah House mid-terms elections ah guallelhna na tuak mun mahmah uh a, 2010 in zong President Barack Obama' Democrats ten congressional elections ah guallelhna na tuak uh hi. Tu-in zong Congress ah thuneihna Republicans ten Senate, Democrats ten House ah thuneihna len in, makai kikhenna a om banah executive power lianpi nei nuam Trump in president len ahih manin politics ah kikhenna thuksem (deeper polarization) leh thukhenna bawlna ah traffic kawcikna khauh sem (legislative gridlock) om in thukham (legislation) bawl hamsa semsem ding hi.

House ah Republicans ten a majority uh khahsuah uh ahih manin Republican ten Congress dei nuainung leh tungnung a control lai uh bang nawn lo ding a, Trump' presidency term nih om lai-te ah Democrats tawh kimaisakna;kilemna (compromise) ding lampi a zon loh phamawh ta ding hi. Ahih hangin party nih kikal ah kituakin pan’khawmna (bipartisan) dingin khantohna ding nate puahphatna dingin huhna (infrastructure improvement package) ahih kei leh zatui a man zah a zuak dingin humbitna tawh zatui man khan’sak lohna dingin pankhawm a nasepkhop theihna ding dei (room) om ding hi. “Din’na kikhat tawh mawhpuakna lak ding kihanciam khawm ding a, ka din’ theih lohna munte uh-ah kiding lo ding hi,” ci-in House a Democrats leader Pelosi in ci hi.

Republican ten Senate ah majority tutna tam kikhia loin Democrats Senator Bill Nelson (Florida), Joe Donnelly (Indiana), Heidi Heitkamp (North Dakota) leh Claire McCaskill (Missouri) zo kiau uh hi. Governors tutna kituhna (gubernatorial contests) 36 lakah Democrats ten 2016 in Trump gum Florida leh Ohio panin Governors tuhna ngah uh hi. House ah Democrats ten majority tawh gualzawhna a ngah khit nung uh maban ah Saudi Arabia, Russia leh North Korea tungah US policy khausak in, China leh Iran’ tungah a US policy "hot-button issues" ngeina mah lenkip dingun kilamen hi. Tua loin 2016 elections ah Trump campaign leh Russia’ kizopna vai tawh kisai congressional investigation hong pan thak le uh Trump’ nuntakna haksasak semsem ding uh a, tua dingin thukanna kinei lai federal probe kici makai US Special Counsel Robert Mueller’ investigation report ngak lai uh hi.

2016 election ah Trump campaign leh Russia kizopna man hi cih Muller’ report panin a kimuhkhiat leh House majority vote zangin Trump in federal investigation dal a, Russia tawh kizopna man mah hi cih a kimuh leh Trump paihkhiatna dingin impeachment proceeding kipan thei hi. Ahih hangin Republicans majority Senate ah vote 100 lak panin seh thum lak panin seh nih (two-third) lo tawh Congress in Trump paikhia zo lo ding ahih manin piang zo dingin uphuai lo hi.

Elections lai-in Democratic candidates a tam zaw ten a tawp kuanin Trump a mawhsakna uh moh leh bawngnawi khal a kibawl nektheih “bread-and-butter issues” lamsang – healthcare om khinsa insurance protections kepbitna ding leh a khanghamte adingin Medicare healthcare kepbitsak ding Social Security retirement kepbit ding cihte nak gen mahmah uh hi.

Vote ngah dan leh khiat dan:
Democratic numeite, khangnote leh Hispanic voters nak ngah mahmah uh hi ci-in Reuters/Ipsos Election Day pollin mu hi. Numei 55% ten tu kum House tutna kituhna ah Democrats party gum uh hi (2014 in 49% in gum uh hi). Kum 18-34 mi 62%-34% voters ten Democrats gum uh hi (2014 in 54% to 36% hi. 2014 in 54% voters in a gup sangin tam in gum zaw hi. Tua kum mah in 36% in Republicans gum uh hi). Nasep mite ading leh Puerto Rican mi ahihna a tangkopih
Democrat Alexandria Ocasio-Cortez in gualzawhna ngah ahih manin Congress ah gualzawhna ngah numei naupang suak hi. 2014 in Hispanic voters 18% ten Democrats a gup sangun tu kum in 33% voters in gum uh ahih manin voters tam zaw in gum uh hi.

Democratic candidate minnei mahmah Liberal House member Beto O'Rourke in Senate tutna conservative state Texas ah Republican Senator Ted Cruz’ khut ah lel hi. Democratic African American Andrew Gillum in Florida ah Republican Ron DeSantis’ khut sungah lel hi. Senate Democrats ten Supreme Court judge confirmation ding vai-ah Brett Kavanauh a langpanna hangun Trump gum states-te a voters ten Senate vote khiatna ah phu lakik uh hi. Congress chambers a Republican caucuses ah Trump’ party sunga moderates pawlte guallelhna hangin conservatives suuk zaw sem tam ta hi.

House Intelligence Committee member Eric Swalwell in zan zingsangin NBC's Today Show ah Democrats ten House ah majority a ngah khit nungun January 2019 ciangin Democrats ten House ah thuneihna hong let ciangun Republicans ten investigations a bawlnop lohte uh investigations pat dingin geelna kinei hi ci-in gen a, “Russian investigations a guam awngte kidimsak ding hi. Lungkimna ding hi loin Americans ten Trump in nekgukna ciing mah hiam cih thei nuam uh ahih manun a tax returns kankhiatna, Oval Office ah sum lut ziate kankhiatna leh gamdang tawh sumbawlna ah Trump’ kizopnate kankhiatna kineih sawm hi,” ci hi.

Trump in zan in a Twitter ah, “Democratic Party ten siah piate sum mawk beisakin House level ah kei leh ka administration’ tungah investigations hong pat uh leh Republicans in zong Democratic Party’ in thukim kiseelte a pholakkhiatna (leaks of classified information; Hillary Clinton’ vai) leh thudangte zong Senate level ah investigations kipan ding a, kimawlna ah Democrats leh Republicans kimawl thei ding hi,” cih tuangsak hi.

Source: The Guardian; Al Jazeera And News Agencies; Sputnik
@Thang Khan Lian #ZUNs