POPE FRANCIS IN KOREAN PENINSULA LEH SYRIA KIMUAN LAM KIK UN CIN KUNH
Jan. 9, 2018: Pope Francis ten leitung bup kipawlkhawm a hanciamna nei (concerted international efforts) ten Korean Peninsula leh Syria ah kimuanna lam kikna ding leh gal na do ma un thuneihna meetna ngah ding na ngaihsut ma un mihing nuntakna a manphatna ngaihsut in koih masa un ci-in political makaite kiangah kum sim foreign policy vai tawh kisai genna a neihna ah kunh hi. Pope in a thugenna ah gam 185 ambassadors kiimte (*UNGA resolution thukim teng hi pah hi) kiangah Jerusalem tu lian dinmun (status quo i.e. East leh West Jerusalem kikhenna leh Jews, Christian leh Islamte ading khuapi siangtho ahihna) kuapeuh in zahtak a, kihuatna leh kigalbawlna khan'sakna dingin kidawm un ci-in zong ngetna bawl hi.
Pope Francis in a thugenna ah US min a minloh loh hangin a thugenna ah thu tampi Trump administration genna leh a tungah ngetna ngen bangin gen hi. Pope in leitung bup mikim cidamna (universal health care) piakna ding, global warming dalna dingin 2015 Paris Agreement ah kiciamna kipsak ding, gambeelte huaina dingin na hoih zaw sepna ding leh nuclear khiam/dalna dingin nuclear disarmament kinialna siangtho ah kihel ding ngetna nei hi.
Galpi bei khit leitung bup ah galpi dalna dingin US President Woodrow Wilson’ sawmna League of Nations kum 100 cin'na hun ah Pope Francis in tu ni-in leitung makai ten Galpi Khatna vutte panin sin ding om a, "gualzawhna in cih pen galte maizumhuai tak-a zawhna hilo a, gal pian'na dingin 'lauhna/vauna thukham' tawh kidal zo lo a, 'dai tak-a thungaihsutna thahatna' tawh gal pian'na kidal zo bek hi," ci hi.
Pope Francis in Korean Peninsula ah nuclear gal om ding kihtakhuaina thu zong a patauhna gen a, November kha-in special Vatican nuclear conference ah atomic galvan kitaitehna dingin phattuamna a hang om lo a, atomic/nuclear stockpiles kisengkhawm teng suksiat ding a hang na khempeuh om hi cih kigen hi ci hi. Korean Peninsula ah nuclear galpi om ding pen global hot spots rundown adingin nambat khatna hi ci hi.
Pope Francis in a thugenna ah ama' teenna continent Latin America khat vei lo kha a, Venezuela ah mihing phattuamna ding dinmun (humanitarian situations) nakpi takin siatna lam Venezuela gam in manawh a, Holy See in kumpi leh kumpi langpangte (opposition) in kihona neih theihna ding pan ka lak hangin lawhsam hi ci hi. Argentine pope in tu kum a Venezuela gambup kiteelna in a gam buaina uh a ven'sakna ding uh leh gam mite mailam hun ading lametna guan dingin ka lamen hi ci hi.
#My take: Pope thu ka post khak ciangin Antichrist hi, 666 hi, Christians langpang hi, Israel/US langpang hi cih comments pia ka mumu hi. Pope in leitung bup makaite cik in Antichrist thu hanthawn a, cik in Christian langpan'na thu leh gal pian'na ding thu kampau ngei hiam cih source kician nei ten a thugen a ni, a kha leh kum tuangsak in hong gelh le un zaknophuai mahmah ta hi. Pasian' teelsa hi, Christian makai hi ci-a na gengen uh Trump hih bang hi. Galpi Khatna hangin siatna lianpi, millions sihna leh khuapi tampi vut leh vai suakte gam makai ngaihsutna nei ten a muh ciangun na sa lua-in Galpi pian' kik ding dalna dingin in League of Nation hong phuankhia uh hi.
League of Nation phuankhia makaipite lakah US Presidentte makai in a kihel det lam mangngilh vat hi ding hiam ahih kei leh history thei lo/sim ngei lo hi zaw hiam ah Galpi Thumna dalna ding, cimawh gentheite huhna ding, galdaihna pian'sakna ding a kiphuankhia UN langpan' ding leh kidokkhiat ding vauna leh UN kipawlna ah gaambeelte leh galtaite huhna ding a kibawl UN Global Compact on Migrants and Refugees, global warming leh climate change dona ding Paris Agreement leh leitunga mun leh van poimawhte kepcingna ding, siamsinna leh science laptohna ding UNESCO panin Trump in US a dokkhiat leh sovereign rights zahtakna nei loin leitung bup a vauna leh huhna piak khiam/khalna bawl cihte pen leitung bup ading leh cimawh gentheite adingin kha 10 val zek Us President len pan Trump nasepkhiatna thupi pen leh letsong lian pen ahi hi.
International law ka gen khak ciangin hong tangsel den tam dep hi. International law ah gal bawl masakna thukhun om lo a, Christian leh leitung mite langpang leh deidantuam thukhun om lo a, thuneihna ngahna dingin gal bawlna ding thukhun om lo a, deidantuam nei loin tawi tehna man leh tawi khaina man kizang hi. International palsatna hanga Galpi Khatna leh Nihna piang hi a, international palsat ding phamawh sa lo, minhoih deih Trump kici pa hi hek hi. Christian kici ten cimawh genthei leh mizawngte it in huh uh a, thukham/thukhun zahtak in, gal om ding hanciam loin kilemna ding hanciam zaw uh hi.
LST in "Kilemna ding deihin a hanciam mite in Pasian' tate cihna ngah ding uh ahih manin thupha ngah mi ahi uh hi," ci-in Jesuh in Matt. 5:9 ah na gen a, Paunak 29:7 in, "Midikte in mi cimawhte ading thu khual uh a, mi gilote in tua bang khualna thei lo uh hi," na ci a, "Cimawh genthei simmawhna in a bawl Pa simmawhna hi," LST in na ci ahih manin kua Antichrist hi a, kua pen in Pasian' tate cih ngah zaw ding ai diam?
Source: Agence France-Presse
@Thang Khan Lian #ZUNs
