MANIPUR KIVAIPUAKNA THU TOMKIM:

MANIPUR KIVAIPUAKNA THU TOMKIM:

Government of Manipur (State Government of Manipur/State Government) pen kivaipuakna lamah a lutung ahi hi. Kivaihawmna a baihlamna/noptuamna dingin Manipur pen district kua in kikhen hi.

Thuneihna pen hih bangin kikhen hi:
1. Executive pen vaihawmna makaite hi a, Governor in makaih hi.
2. Judiciary pen dan leh thubuai omte thukhen in pang hi.
3. Legislative pen dan (law) bawlte ahi hi.

EXECUTIVE: India gam sunga state dangte mah bangin Governor pen State lutangpi hi a, India president pa’ palai (representative) bangin kingaihsun hi. Governor a kiseh ding ciangin India president pan phualpi kumpi (Central Government) dong masa in a seh ahi hi. Chief Minister pen Manipur government lutangpi hi a, Executive thuneihna khempeuh ama khut sungah om hi. Chief Minister pen kiteelna ciangin vote tam a ngah penpente’ party in amau sung panin teel uh hi. Aman a za kum nga sung len hi. Amah pen MLA khempeuhte lutangpi hi a, vaihawmna leh thupukna khempeuh ama khut sungah kinga hi.

JUDICIARY: Judiciaryte pen thukhente ahi hi. Judiciary za let theihna dingin:
1.India mi hi ding hi.
2.University hi ci a kumpi theihpih khat peuhpeuh panin Bachelor of Law (LLB) ai keh Law Degree nei hi ding hi.
3.Thukhen in a tawm pen kum 7 sem khinsa hi ding hi.

LEGISLATIVE : Legislativete nasep pen dan (law) bawl ahi hi. Manipur Legislative Assembly pen unicameral ahi hi. Unicameral i cih ciangin inn khat genna hi a, Legislativete vaihawmna pen inn khat hi a, Vidhana Sabha kici hi. Manipur Legislative Assembly ah member ai kei leh tutna (seat) 60 om hi. Hih 60 lak panin Khamtung (Hill Areas) mi ten member 20 nei a, phaizang (Plain Areas) mi ten 40 nei uh hi. Manipur a Legislative memberte pen Member of Legislative Assembly (MLA) kici a, amau kum nga sung Legislative ah thuneihna len uh hi. Ahih hangin Legislative Assembly a kiphiat (dissolved) leh tomcik sung zong len thei uh hi. MLA khempeuh Chief Minister in makaihin dan bawl uh a, ahih hangin State Executivete thukhensatna pen India Parliament in thukimna a piak kei leh dan hi thei lo hi. Amasa penin a dan bawlte uh Governor in thukimna a piak khit ciangin Parliament ah kipuak hi. Parliament ( Lok Sabha leh Rajya Sabha) in thukimna a piak khit ciangin President pan thukimna suai kai a, tua khit ciang bekin dan (law/constitution) hong suak thei pan hi.

Tu lian a Executive lente:
Governor: Dr.Syed Ahmed in September 27 in cancer natna hangin hong sihsan manin tu lian a Meghalay Governor len V. Shanmuganathan Governor Additional incharge kipia a, Manipur governor len khawm ( additional charge of Manipur) phot ding hi cin Rashtrapati Bhavan in pulak hi.

*Chief Minister: Okram Ibobi Singh (Indian National Congress)
*Assembly: Vidhana (Vidhan) Sabha.
* Speaker: Thokchom Lokeshwar Singh

2012 Manipur Legislative Assembly a kiteelcingte leh a constituency minte uh:
(Sl/no. -Constituency-Memberte min-Party min)
1. Khundrakpam - Thokchom Lokeshwar Singh - INC

2. Heingang - N. Biren - INC
3. Khurai - Dr. Ng. Bijoy Singh - INC
4. Kshetrigao - Md. Amin Shah - INC
5. Thongju - Thongam Biswajit Singh- AITC

6. Keirao - Karam Thamarjit Singh- MSCP

7. Andro - Thounaojam Shyamkumar - AITC
8. Lamlai - Kshetrimayum Biren Singh - INC

9. Thangmeiband - Khumukcham Joykisan Singh - AITC

10. Uripok - L. Nandakumar Singh - INC
11. Sagolband - Rajkumar Imo Singh - MSCP

12. Keishamthong - L. Ibomcha Singh- NCP

13. Singjamei Irengbam - Hemochandra Singh - INC
14. Yaiskul - Elangbam Chand Singh - INC
15. Wangkhei Yumkham - Erabot Singh- INC
16. Sekmai (SC) - Khwairakpam Devendro Singh -INC
17. Lamsang Wangkheimayum - Brajabidhu Singh - INC
18. Konthoujam- Konthoujam Sharat Singh - AITC
19. Patsoi - Akoijam Mirabai Devi -INC
20. Langthabal - Karam Shyam - LJP

21. Naoriya pakhanglakpa - R.K. Anand - INC
22. Wangoi -Oinam Lukhoi Singh - AITC
23. Mayang imphal - Khumujam Ratankumar Singh - INC
24. Nambol - Shri Nameirakpam Loken Singh - INC
25. Oinam - Irengbam Ibohalbi Singh -AITC
26 Bishnupur - Konthoujam Govindas -INC
27 Moirang - Mairembam Prithviraj Singh - INC
28 Thanga - Tongbram Mangibabu - INC
29 Kumbi - Sanasam Bira Singh - INC
30 Lilong - Md. Abdul Nasir - INC
31 Thoubal - Okram Ibobi Singh - INC
32 Wangkhem - Keisham Meghachandra Singh - INC
33 Heirok - Moirangthem Okendro - INC
34 Wangjing tentha - Paonam Brojen - MSCP
35 Khangabok - Okram Landhoni Devi - INC
36 Wabgai - Md. Fajur Rahim - INC
37 Kakching - Yengkhom Surchandra Singh - INC
38 Hiyanglam - Maibam Kunjo - AITC
39 Sugnu - Kangujam Ranjit Singh - INC
40 Jiribam - Thoudam Debendra Singh - INC
41 Chandel (ST) - St. Nunghlung Victor - NPF

42 Tengnoupal (ST) - D. Korungthang - INC
43 Phungyar (ST) - Victor Keishing - INC
44 Ukhrul (ST) - Samuel Risom - NPF

45 Chingai (ST) - M.K. Preshow - INC
46 Saikul (ST) - Yamthong Haokip - INC
47 Karong (ST) - Dr. V. Alexander Pao - NPF
48 Mao (ST) - Dikho- NPF
49 Tadubi (ST) - Francis Ngajokpa - INC
50 Kangpokpi - Mrs. Nemcha Kipgen - MSCP
51 Saitu (ST) - Ngamthang Haokip - INC
52 Tamei (ST) - Z.Kikhonbou Newmai - INC
53 Tamenglong (ST) - Janghemlung Panmei - MSCP
54 Nungba (ST) - Gaikhangam - INC
55 Tipaimukh (ST) - Dr.Chaltonlien Amo - INC
56 Thanlon (ST) - Vungzagin Valte - INC
57 Henglep (ST) - T.Manga Vaiphei - INC
58 Churachandpur (ST) - Phungzathang Tonsing - INC
59 Saikot (ST) - T.N.Haokip - INC
60 Singngat (ST) - Ginsuanhau - INC

Municipal Corporations

Vaihawmna a manlan theihna dingin Manipur state pen municipal corporations 9 in kikhen hi. Hihte pen- Imphal, Thoubal, Kakching, Mayang Imphal, Nambol, Moirang, Ningthoukhong, Bishnupur leh Jiribam municipal councils in kikhen a, tua khit wards kici in tampi in kikhen suk lai hiTua banah Manipur government pen board kici tuamtuam- Manipur Biodiversity Board, Board of Secondary Education Manipur, Council of Higher secondary Education, Manipur State Science & Technology Council, Manipur Urban Development Authority, Manipur Small Farmers Agri-Business Consortium leh Manipur State AIDS Control Society (MACS) cih bangin kikhen suk hi.

Manipur a Political Partyte:

Manipur a political party lian diak a kithei leh kiteelna a cing mun diakte pen Indian National Congress (INC), Communist Party of India (CPI), Rashtriya Janata Dal (RJD) leh Bharatiya Janata Party( BJP) ahi hi. Tua banah Manipur sunga political party tuamtuamte hih bang ahi hi:
A. Democratic Revolutionary Peoples Party
B. Federal Party of Manipur
C. Manipur National Conference
D. Manipur Peoples Party
E. Naga National Party
F. National People's Party (India)
G. Nikhil Manipuri Mahasabha
H. People's Liberation Army of Manipur

-Wkipedia

MANIPUR TAWK KISAI THU TOMKIM:

MANIPUR TAWK KISAI THU TOMKIM:

Manipur pen northeastern India a om hi a, a khuapi (capital) min pen Imphal kici hi. Manipur pen etlawmin khuahun nuam ahih manin India Prime Minister masa pen, Jawaharal Nehru in “Switzerland of India” na ci liang hi. Ni dang lai-in Kangleipak ai kei leh Sanaleibak (Land of Jewels) na kici a, Manipur kumpi, Meidingu Pamheiba in kum zalom 18 in Manipur cin na laih hi. Manipur leilu lamah Nagaland om a, leitaw lamah Mizoram om a, nitumna lamah Assam om in, nisuahna lamah Burma in umkual hi. A leitang pen 22,327 square kilometres (8,621 sq mi) in gol hi. Manipur ah Meitei, Chin-Kuki-Mizo, Naga, and Muslim (Pangal zong a kici) te teng khawmin, Sino-Tibetan languages pau tuamtuamin pau uh hi..
Manipur pen kum 2,500 a kipanin Asia gam tuamtuamte’ sum leh pai (economic) leh ngeina (culture) lamah kikawmtuahna mun ahi hi. Hih thu hangin Indian subcontinent leh Southeast Asia kikhawmtuahna piangsak a, nam tuamtuamte peemna gam, biak leh ngeina tuamtuam kikawmtuahna leh lutna mun suak hi. Gal tuamtuam leh Kidopi Nihna (Second World War) in zong na nawk kha hi.
Mikang ten India leh Burma a uk lai un Manipur pen kumpi tuamtuam ukna (Princely States) ahi hi. 1917-1939 kikalin Manipur miten amau ii kivaihawmna tuamna ding leh thuneihna dingin Britishte kiangah ngetna na nei uh a, 1930 khit nungin Manipur pen Manipur mite deih teelna bangin Burma gam sungah ki-omsakin loin Britishte ukna nuai-ah India gamsungah kikoih hi. Kidopi Nihna (World War II) a beikhit nung September 21, 1949 Manipur kumpipa Maharaja Budhachandra in “Treaty of Accession” kici India kumpi tawh suai na kai a, tua khit a kipanin India gam sungah om hi cin kiciamteh hi. Hih thu hangin mipi pawlkhatin kumpipan a mipite dong masa loin India gam a belh pen pawlkhat thangpai mahmah uh hi. Manipur kumpipan India a belhna hangin kum 50 sung thau tawi in suahtakna ngen a kiphinna (militant insurgency) na om to ngekngek den a, tu dongin om to lailai hi.
Manipur ah phaizang ah teng Meiteite tam pen a, Manipur milip 47% pha uh hi. Khamtung mi 30% a phak hangin Tangpi-tangta pau (lingua franca) dingin Meitei pau Mangpau leh kizang hi. Manipur pen a tangpi in lo khawhna gam ahi hi. Loktak Lake kici hangin meitha (hydroelectric power) a hunkhop pia khia zo hi. India khuapi tuamtuam tawh kikawmtuahna dingin Vangleng phual Imphal airport kici om a, Northeast India a dingin a gol pen nihna ahi hi. Manipur panin Polo kici kimawlna Europe gam tuamtuamah kizel ahih manin a minthanna khat suak hi

MANIPUR AH MINAM TUAMTUAMTE:
Meiteite milip 47 % pha uh a, a tam pen ahi hi. A nihna ah Chin-Kuki-Mizo in zom a, a thumna ah Nagate ahi hi. Naga kicite namtuam-Tangkhul,
Maram,Poumai, Sumi, Angami, Ao, Chakhesang, Chang, Khiamniungan,Konyak, Liangmai, Lotha, Pochury, Rongmei, Zeme, leh Mao kicite ahi hi.
MANIPUR A PAU TUAMTUAMTE:
2001 milip pha zah kisimna bangin nam tuamtuamte hih bang ahi hi:
1. Manipuri (55.21%)
2. Thado (7.76%)
3. Tangkhul (6.06%)
4. Kabui (3.8%)
5. Paite (2.1%)
6. Hmar (1.8%)
7. Vaiphei (1.6%)
8. A dangdangte (21.67%)

Manipur ah Meitei pau (Manipuri) leh Mangpau (English) pen official languages in kizang hi. Manipuri (Meiteilon) sungah Meitei Sanamahi, Meitei Christians, Meitei Hindu leh Meitei Brahmins ("Bamons" zong a kici) kigawmkhawm a, India Constitution ah Eighth Schedule nuaiah pau khatin kihel hi cin kiciamteh hi. Meitei pau ciatciat ahih hangin a biakna uh-Hinduism, Christianity, Sanamahism, Buddhism leh Islam tawh kituakin a kilamdanna om ciat hi. 2001 milip pha zah kisimna ah pau tuamtuama paute leh a phak zah uh hi bangin kiciamteh hi:
Manipuri (1,266,098), Thado (178,696), Tangkhul (139,979), Kabui (87,950), Paite (48,379), Hmar (43,137), Vaiphei (37,553), Gangte (13,752), Kom (14,558), Kuki (12,900), Liangmei (32,787), Maring (22,154), Anal (22,187), Simte (10,028), Zou (20,626), Bengali (27,100), Hindi (24,720), leh a dangdang.
KHAMTUNG GAM A PAUTE:
Khamtung gamah pau 29 om hi cin kiciamteh hi. Hih 29 lakpanin Tan 12 (12th grade) dong pau nam khamtung mite pau 15 tawh sin theihna dingin Manipur kumpi in pia hi. Tuate hih bang ahi hi:
1. Mizo
2. Zou
3. Poula (Poumai Naga)
4. Thadou
5. Vaiphei
6. Tangkhul (Tangkhul Naga)
7. Paite
8. Hmar
9. Mao (Mao Naga)
10. Lianglad (Liangmai Naga)
11. Rongmei ( Rongmei Naga)
12. Maring (Maring Naga/Maring, Maring Khoibu, Maring Narum-saibol)
13. Maram (Maram Naga)
14. Gangte
15. Mate (Mate-Taithul)

BIAKNA:
1.Hindu 41.39%
2.Christian 41.29% (Christian pen Manipur ah missionary ten kum zalom 19 hun lai-in ong puak lut uh ahi hi).
3.Islam 8.40%
4.Adangdangte 8.92%
DISTRICTS:
Manipur pen district 8 in kikhen hi. 2011 kisimna bang leh a leitang golzia hih bang ahi hi.
1.Bishnupur, 496 km.sq., (milip 237,399), Headquarter: Bishnupur
2.Churachandpur, 4570 km.sq., (milip 274,143), Headquarter: Churachandpur
3.Imphal East, 706 km.sq., (milip 456,113), Headquarter: Porompat
4.Senapati, 3271 km. sq., (milip 193,744), Headquarter: Senapati
5.Tamenglong, 4391 km.sq., (milip 140,651), Headquarter: Tamenglong
6.Thoubal, 519 km.sq., (milip 519,422), Headquarter: Thoubal
7.Chandel, 3313 km.sq. (milip 144,182), Headquarter: Chandel
8.Ukhrul, 4544 km.sq., (milip 183,990), Headquarter: Ukhrul

BITNA LEH GAMNUAIMITE KIPHINNA/SECURITY AND INSURGENCY:
Manipur ah gamnuaimi kipawlna tuamtuam 62 om a, Meitei, Naga, Kuki leh nam tuamtuamin zong nei tek in, khat leh khat kibuai den uh hi. Amau kal bekah buai loin India galkapte tawh zong buaina piang mun mahmah hi. India galkap 100,0000 val om hi kici hi. Manipur a gamnuaimi tuamtuam min nei diak pawlkhatte hih bang ahi hi. Uited National Liberation Front (UNLF), Peoples Lliberation Army (PLA) , People's Revolutionary Party of Kangleipak (PREPAK), Revolutionary Peoples Front (RPF), Manipur Liberation Front Army (MLFA), Kanglei Yawol Khnna Lup (KYKL), Revolutionary Joint Committee (RJC), Kangleipak Communist Party (KCP), Peoples United Liberation Front (PULF), National Socialist Council of Nagaland (NSCN-K), National Socialist Council of Nagaland (NSCN-I/M), Naga Lim Guard (NLG), Kuki National Front (KNF), Kuki National Army (KNA), Kuki Defence Force (KDF), Kuki Democratic Movement (KDM), Kuki National Organisation (KNO), Kuki Security Force (KSF), Chin Kuki Revolutionary Front (CKRF), Kom Rem Peoples Convention (KRPC), Zomi Revolutionary Volunteers (ZRV), Zomi Revolutionary Army (ZRA), Zomi Reunification Organisation (ZRO) leh Hmar Peoples Convention (HPC).
Kuki gamnuaimi ten amau a dingin a tuamin state ngen uh a, Kuki National Organisation (KNO) leh United Peoples Forum in khaikhawm hi. Naga gamnuaimi ten Nagate tenna sung teng Nagaland tawh gawmkhawm dingin greater Nagaland/Nagalim ngen uh hi. Hih gamnuaimite ngetnate tuamtuamte hangin Meiteite tawh buaina piang mun mahmah a, Naga leh Kuki, Meitei leh Muslim kikalah ah gal zong na piang ngei hi. Gamnuaimite hangin nautang tampi in sihna tuak ta a, 2009 a kipanin kiam zaw deuh hi. SATP te ciamtehna ah 2009 in nautang 77 si a (100,000 lakah 3 si)), 2010 a kipanin kum simin nautang 25 si den hi (100,000 lakah 1 si). 2012 in bomb puahna hangin mi 107 si a, 2013 in bomb puahna hangin mi 76 si hi cin kiciamteh hi. Gamnuaimi tuamtuamin ko puahsak hi ci uh a, khat leh khat, ai keh leh galkapte a ngimna hanguh hi cin kipulakkhia zel uh hi.

SUM LEH PAI TAWH KISAI/ECONOMY:
Gua pen tam mahmah a, van tuamtuamtuam bawlna ding leh nek dingin kinak zat mahmah hi. Gawtuaithu kici Meitei ten soibum yendem eromba a cih uh kinak nek mahmah in, sum bawlna lianpi khat suak hi. 2012-2013 kikalin Manipur’ subawlna panin a kingah pen Rs. 10188 crore (US$1.5 billion) pha a, a tam zaw pen lo, gamlak, siamgatna leh mawtaw panin kingah hi. India-Burma leh South East Asia gam tuamtuam kikawmtuahna pen Moreh leh Tamu hi a, Manipur pen ‘Gateway to the East’ kici hi. North East sungah Manipur ah khut khawl (handloom and handicrafts) tam pen hi.
Hydro-electricity:
Manipur in Loktak Hydroelectric project panin 2010 in meitha 0.1 gigawatt-hours (0.36 TJ) piakhia zo a, lim takin kipuahpha leh 2 gigawatt-hours (7.2 TJ) piakhia zo dinga, Manipur sung khempeuh mei tawh a vak zo bek tham loin Burma ah zong zuak zo lai ding hi kici hi.

LOKHAWHNA LAM TAWH KISAI:
Manipur khuahun pen buh leh bal, meh leh thei ciinna dingin hoih mahmah hi. Manipur ah thei tuamtuam-litchi, lei bea nam-cashew nuts, walnuts, lengmaw ( orange), thei thuk (lemon), lengthei (pineapple), singtangmai (papaya), sapthei (passion fruit), theikha (peach), naspati (pear) leh a tuamtuam hoihin kinak ciin mahmah hi. Manipur leitang 3,000 square kilometres (1,200 sq ml) ah gua po dim a, India gam aa dingin gua pianna leh a kileina mun lian khat suak hi.
KIKAWMTUAHNA:
Imphal vanleng phual- Changangei a Tulihal Airport kici pen Manipur in vanleng phual a neihsunsun hi a, hih panin Delhi, Kolkata, Guwahati leh Agartala kikawm tuam ziauziau thei hi. International airport dingin kipuahpha lai a, Northeast India a dingin vanleng phual lian pen nihna in pang hi. Lei lamah state dangte tawh kikawmtuahna dingin National Highway NH-39 kizang a, Manipur leh Dimapur (Nagaland) zuatna in kizang hi. Imphal leh Dimapur kikal pen km. 215 km (134 m) ahi hi. National Highway 53 pen Manipur leh Silchar (Assam) kikawmtuahna dingin kizang a, meileeng phual tawh kizom suak hi. A sauna pen km. 269 km (167 m) ahi hi. India kumpi in 2010 in Manipur leh Vietnam kikawmtuahna ding (Trans-Asian Railway, TAR) kici bawl ding na tangko a, hih kizo leh India, Burma, Thailand, Malaysia leh Singapore kikawmtuahna dingin kizang ding hi.
Tourism:
Khualzin mite muhnop mahmah pen leitung mundangah a hing zo vet Unok pak namkhat Shirui Lily kici Ukhrul district sungah kimu in pak den hi. Tua banah Sakhi tawh a kibang pian, leitung pumpi ah koimah ah a kimu lo, Sangai (Brow antler deer zong a kici) Senapati district sungah Dzukou zang lei bekah om hi. Tua loin a muhnop mahmah Tuikulh laam (floating islands kici) Loktak Lake ah om a, kimawlna lam a uuk ten Polo piankhiatna Manipur munuam mahmah se uh hi. 1997 kumin National Games kimawlna Manipur in a zintun lai-in Khuman Lampak Sports Complex kici kibawl a, hih munah kimawlna tuamtuam tualpi tampi om hi. Andro village a Shree Govindajee Temple , Manipur State Museum kici zong Imphal khuapi sungah om a, khualzin mite muhnopna mun khatin kiciamteh hi. Nongin kici vasa zong a kimu mengmeng lo nam khat Manipur ah kimu hi. Northeast sunga dingin tuisiangtho pen Leimaram falls kici Imphal panin km. 48 (30m) a gamla ah om hi. Imphal panin km. 48 (30 m) ah Sahuan ‘Keibul Lamjao National Park’ kici om a, sa leh zu-le-va nam tuamtuam kikoih a, Sangai (Brow Antlered deer) zong hih munah kimu hi. Tua loin West Imphal panin km. 3 (3.7 m) a gamla a om Iroisemba, Imphal-Kangchup Road ah Sahuan, Zoological Gardens dang khat om a, hih munah ah zong Sangai (Brow antlered deer) kikoih hi.
Imphal panin km 27 kigamla a om Ichum Keiram khua-ah Sadu Chiru waterfalls kici om hi. Hih munah waterfalls 3 om a, tuate Agape Park ah om hi. Amasa pen 30 metres (98 ft) in sang hi.
Imphal panin km. 185 (115 m) a kigamla Tamenglong district ah kuahawm Thalon khua-ah Thalon Cave kici om a, tua pen tuipi panin (sea level) 910 metres (2,990 ft) in sang a, Manipur a dingin historical sites khatin kiciamteh hi. Thalon panin km. 4-5 (2.5-3.1m) a kigamla Ukhrul district ah zong kuahawm dang khat Khangkhui Cave kici om hi. Hih mun pen nidang lai-in Dawi Kumpipan (Devil King) a lupna inn dei dingin na zang hi kici hi. Kidopi Nihna hun lai-in Khangkui khuami ten bukna dingin na zang uh hi. Hih mun pen Khangkui khua panin khe tawh nai kal khat bang kipai hi.
PAWI:
Manipur ah pawi tuamtuamte:
Lui-ngai-ni, Ningol Chakouba, Yaoshang, Gan-ngai, Chumpha, Christmas, Cheiraoba, Kang leh Heikru Hidongba leh a dangdang.
Ningol Chakouba: Hih pawi pen Meiteite pawi ahi hi. Hih hun ciangin numei mothaksate (Ningol) leh a tate uh leh a teekte uh kicialin a pate’ innah anne dingin kisam hi. Hih pawi ciangin tanaute zong kihel thei zel uh a, annek khawm pawi bek hi loin a pawi siimte leh mokhaksate tungah nu leh na ten letsong zong pia uh hi. Meiteite bek hi loin khamtungmi pawlkhatin zong hih bawi bawl om pianpian ta hi. Hih pawi pen November kha in kibawl deuh a, pawlkhatin October kha-in zong pawi a kham om veve hi. Ningol I cih ciangin ta numeite a gennopna hi a, pasal neisate bek genna hi tuan lo hi.
Kut: Hih pawi pen Khuado pawi, anlak pawi I cih ahi hi. Kuki-Chin-Zomi ten kizang diak a, Chapchar Kut, Chavang Kut cih bangin min tuamtuam kizang hi. Kut pen Kuki-Chin-Zomite bekin zang loin nam dang ten zong va siim uh hi. Manipur kumpi in November 1 pen Kut Ni cin zum leh sanginnte kikhak hi. Kut ciangin nam laam lahna, kimawlna tuamtuam, lasak leh talent tuamtuam kidemna leh lahna, Miss Kut kidemna cihte kinei tawntung hi.
Yaosang: Hih pawi pen February leh March kha in kizang hi. Hindute pawi ‘Holy’ kici tawh a zat dan kibang pian a, Manipur a dingin pawi lianpente lakah khat ahi hi. Colour tuamtuam tawh kimawlin, pawlkhatin tui colour tawh helin kimawlna in zang uh hi. Hih pawi hun pen nungak leh tangvalte suakta takin a kipolh theih hun ahih manin Meitei ten ngaklah mahmah diakse uh hi.
Christmas: Lungdam pawi pen Christiante pawi lianpen hi a, lenkhawmna, annek khawmna, kikhopna hunin kizang a, December 24 leh 25 in kinei hi. Pawlkhatin kumthak dong pawi a kham suak zong om hi.
Cheiraoba: Hih pawi pen Meiteite kumthak pawi hi a, Sajibugi Nongma Panba zong kici hi. March ai kei leh April kha-in hih pawi kilawm hi. Hih pawi hun ciangin annek khawmna kinei a, ni nih khit ciangin kum khat sung cidamin haksatna teng pal suakin, kantanin a sangzaw a kahtohna cih lim lahna in mual tungah kah ngeingai uh hi.
Pangalte pawi:
Manipur a Muslimte Pangal kici hi. Pangal ten leitunga Muslimte zat hun tawh kituakin Ramzan kici amau a dingin ‘Holy month’ in kingaihsun a, an tanna nei uh hi. Ramzan pawi ni 13 sung a zat khit ciang un kha det ni-in an tang nawn lo uh a, Id-Ul-Fitr kici pawi kham in annek khawnna pawi nei uh hi. Hih hun ciangin naupang ten a puak thei kimawlna (crackers) te halin, mutpuak leh thau limte tawi in a lawmte tawh inn khat panin inn khatah Id sum ("Id ki Paisa") cin sum donna nei uh a, gualnopna hun nuamin zang uh hi. Mo thaksa ten a teekte innah nitak hun zang khawm uh hi. Id-ul-Adha kici pen Manipur a Pangalte a dingin a pawite lak uah a thupi nihna in kingaihsun hi.
Gaan-Ngai: Hih pawi pen Zeliangrong minamte pawi lakah a thupi penin kingaihsun hi. Hih pawi pen Meiteite calendar Wakchang kha in kizang a, ni 5 sung pawi kikham hi.

+4

Israel Prime Minister (PM) Benjamin "Bibi" Netanyahu tangthu tom kim:

Israel Prime Minister (PM) Benjamin "Bibi" Netanyahu tangthu tom kim:

Benjamin Netanyahu pen October 21, 1949 in Tel Aviv, Israel ah piang a, Jerusalem ah khangkhia hi. Unau 3 sung panin a milai pen ahi hi. 1956-58 leh 1963-1967 kikal a innkuan un Cheltenham Township, Pennsylvania, U.S. ah teeng uh a, Cheltanham ah sang kah in, tua lai mahah graduate man hi. A high school kah lai-a kipanin thu kiniallna [debate] ah kihel uuk mahmah ahih manin tu dong Philadelphia awkaih mangpau in pau lai hi. Kum 13-19 ahih sung a taw zaw a pa, Benzion Netanyahu' sepna Philadelphia, US ah om hi. A pa pen Philadelphia ah history professor sem ahi hi. A graduate man khit, 1967 in Israel ah ciah kik nawn a, Israel Defense Forces ah elite unit "Sayeret Matkal" a kici ah sem hi. Galdona tuamtuam-ah kihel in, 1967 kum a Sabena passenger jet (vanleng) mi 571 tuanna, Tel Aviv ah a kipikawi (hijack) lai-in a suahtaksakna ah Prime Minister lui, Ehud Barak makaihna nuai-ah Codename "Operation Isotope" kici ah zong na kihel hi. Tua Operation ah a liang thau in kap kha-in liam hi. War of Attition kici [cross border assault raids] 1967-70 sungin zong kihel a, tua khitin a unit uh-ah team-leader in a za khang hi. Operation Inferno [1968] ah zong kihel hi.

Politic lutna:

1972 kumin Army Service a zawhin US ah pai kik nawn a, architecture leh business administration degree Massachusetts Institute of Technology panin ngah hi. 1976 in Boston Consulting Group ah sem hi A sanggampa (a u) Yoni, Uganda gamah Air France airliner kihijack suahtakna dingah a va kihelna ah va si ahih manin Israel ah ciah kik hi. October 1973 in Israel a ciah khitin Yom Kippur War ah Sayeret Matkal commando unit sungah sem a, Suez Canal ah Egyptte tawh kidona ah va kihel hi. Israel commando-te makaihin Syria gam va lut pih hi [Tu dongin hih thu kiseelcip (classify) lai hi] . Tua khit a kipanin Counter-terrorism ah nakpi takin kihel a, tua in a political background ding lampi kipatna hong bawlsak hi. Washington D.C. a om, Israel Embassy ah 1982-84 sung sem a, 1984-88 sung United Nations ah Israel ambassador sem kik nawn leuleu hi. UN ah a sep sungin Nazi War Crimes thuguk lai [archives] tampi hong pholak (declassify) khia hi.

Politic lamah a lawhcinna:

1988 in Netanyahu pen Knesset ah (Israelte' parliament) member dingin right-wing Likud Party ten teelcing uh a, deputy minister for foreign affairs ah hong sem zom pah hi. Kum nga khit nungin Likud Party chairman dingin cing kik nawn in, prime minister candidate ding hamphatna hong ngah hi. 1996 in PM dingin teelcing in hong om a, tua kiteelna-ah PM Simon Prez [Labour candidate] zo hi. Netanyahu in 1999 dong PM hong sem to-in tua hunin Hebron and Wye Accords kici kilemnate ah suaikai a, Palestine tawh kilemna ding 'Peace process" lampi ding hong pan hi. A term sungin government privatization, liberalized currency regulations and reduced deficits cihte ah nakpi takin pan la hi.

Knesset Kiteelna (election) ah a commander luipa, Ehud Barak zo lo ahih manin kitawp (resign) a, tua khitin Private sector ah semin, private circuitte vehna nei kawikawi hi. Ahih hangin 2002 in politics ah hong lut kik nawn a, Minister of Finance a cin' ma sung teng Minister of Foreign Affairs za na len hi. March 31, 2009 in PM a nih veina dingin hong cing kik nawn leuleu hi. Tua a PM kiciamna a neih khit a thugenna-ah gam kipumkhatna ding leh Palestine gam pen galvan tawh a kivaihawm/makaih lo, Israel gam a om ding a thukim thei ahih ding a deihna nakpi takin gen hi. June 2009 in Bar-Ilan University ah a thugen..." President Obama' kiangah Palestine gam in galvan zat khawlsan/nusia in, Israel gam pen Jewish state in namkip dingin a ciam a, a thukim ding leh kilemna taktak om thei pan ding hi" ci'n gen hi.

Iran Nuclear Program a deih lohna:

Netanyahu in P5+1 [ U.S., Russia, China, France, England + Germany] gamte leh Iran in Nuclear Deal thukimna ding a vaihawmna hangun United States tawh November 2013 a kipanin kitelsiam lohna nakpi takin hong nei uh hi. Netanyahu in U.S. leh Iran in nuclear deal a thukim ding uh deih lo hi. Hih nuclear deal pen Iran in gamdang tawh sum leh pai, galvan leh a tuamtuam kizopna panin gakna (Sanctions) a neihna panin a khahkolna ding leh beisakna dingin Iran in Nuclear galvan bawlna dingin a kizang Uranium a bawl (enrich) pen a tawmsak (reduce) ding hi ci hi. Netanyahu in CNN thukante kiangah, "Hih thukimna pen leitung khangthu-ah khialhna lian pen [biggest historical mistake] hi ding hi," ci'n deih lo hi. Tua banah, "Hih nuclear deal pen kizepna khi tawh kibang lel a, Iran in nipi kal tom khat sung khit teh nusia/paikhia pah lel ding a, kum tampi tak a kibuaipih Iran tungah gaknate [sanctions] sutna suak lel ding hi" ci'n nial hi. Netanyahu in "Iran tungah gakna khahkol in om leh Iran in nuclear galvan bawl kik nawn pah dinga, Iran in nuclear nei leh Israel bek hi loin leitung bup adingin lipkhap mahmah hi," ci hi. Ahih hangin hih Nuclear Deal tukimna kibawl veve hi.

Gaza buaina:

2014 nipi lai-in Middle East ah buaina hong kuang leuleu in, Israel tangvalno 3 Palestine Hamas ten hong that khit ua kipanin Israel in zong Gaza a Hamaste' hatna leh bukna munte July 8 panin August 28, 2014 (kha 1, nipikal 2 leh ni 4 sung) sung hong kap zialzial uh hi. Leitung in Hamaste' rocket kap leh Israel in vanleng tawh Gaza ah bomb a khiatna hangin tangpi tangta, numei, naupang tam si lua ahih manin mawhsakna hong pulak kawikawi uh hi. Tua hunin Netanyahu in a cabinet minister 2 kumpi nasepna a gensiat manin tawpsak a, a coalition parliament phiat [dissolved] in kiteelna 2015 March kha in neihpih kik hi.

A cin' kikna hangin thubuai:

Netanyahu in March kha a kiteelna ah Isaac Herzog'  Zionist Union Alliance-te zo kik hi. Ama' party [Likud Party] in parliament [Knesset] ah tutna 30 ngah uh ahih manin Party teng lakah tam pen ahih manin party kipawlkhawm [coalition] government makaihin PM dingin cing kik hi. Kiteel ma-in Netanya in Arabte tuam bawl in a thugen, Palestine gam om sak loh ding hi'ng ci'n a genna hangin Israel vote tampi ngah hi ci'n a lang ten mawhsak uh a, leitung gam tuamtuamin zong mawhsak uh hi. Ahih hangin a cin' khit teh a thugenna ah gam nih [2 state solution] pen sabuai-ah om lai hi ci'n gen kik hi.

Netanyahu' zi min pen Amin Sara hi a, naupang lungsim lamsang siavuan [child psychologist] ahi hi. Ta 2 - Yair leh Avner nei uh hi. A zi masa [1978 kum a kikhenpih] tawh tanu khat nei hi. Laibu zong a tuamtuam gelh a, terrorism tawh kisai tam gelh mahmah hi. A laibu gelh pawlkhatte - Self-Portrait of a Hero: The Letters of Jonathan Netanyahu (1963-76); International Terrorism: Challenge and Response (1979); Terrorism: How the West Can Win (1987); A Place Among the Nations: Israel and the World (1992); Fighting Terrorism: How Democracies Can Defeat Domestic leh International Terrorism (1996) ahi hi.

Netanyahu Israel Prime Minister dingin 4 vei kiteel cing ta a, David Ben-Gurion cin' zah tawh kikim ta hi. Ahih hangin 3 vei kizomin Israel' khangthu ah Prime Minister cing masa pen hi lai hi. Israel khangthu ah Prime Minister sawt len pen ahi, David Ben-Gurion zom ah amah ahi hi. A term a tawp dong a sep suak leh Israel PM sawt len pen suak ding hi. Netanyahu pen Israel gam pan-a piangkhia PM masa pen hi lai hi.

NI KHAT NI CIANGIN

NI KHAT NI CIANGIN

Ni khat ni ciangin: 

I beh min, i phung min, i gam min cih banga minam kilawh ahi zongin, mite in Lushai peuh, Kuki peuh, Chin peuh hong ci ta uh ci-a i kicih suk pah ahi zongin, eite lakah Laimi, Mizo, Zomi ci-a min tuamtuam i kicih pen mi' hong muhna leh etna pan zumhuai a, ei kimuhna panin zong suphuai, haihuai ahih ciangin min khat puam khatin kilo thei le'ng i nahlawh peekzaw ding hi cih i phawk ni hong tung pelmawh ding hi.

Ni khat ni ciangin: 

I beh pau, i khua pau, i gam pau cih banga pau tuamtuam bulbawl ciat nei a, minam pau cih ding tang kam zat diak i neih nop het loh pen mite hong etna leh muhna panin neuhuai a, ei adingin zumhuai, haihuai, suphuai lua hi ci-a kampau nam khat bek zat ding a kulna i phawk ni hong tung pelmawh ding hi.

Ni khat ni ciangin: 

"Ko ngeina", "No ngeina", ci-a i bangkua, i khua, i beh ngeina, innluah, gamluah, man leh mual, khutkhialh bankhialh thu donga zatdan tatdan tuam ciat Kawlgam, Vaigam dongah i neih sangin ngeina khat zat khop ding hoihzaw, kilawmzaw hi cih i phawk ni hong tung pelmawh ding hi.

Ni khat ni ciangin: 

Biakna zuihna kibang, Lai Siangtho bu khat a len ciat mah ahi Khristiante in Baptist, Presbyterian, Methodist, Adventist, Pentecostalist, Catholic, Evangelical, Ecumenical leh min tuamtuama kivawhte i kimudah a, kitelkhial a, hi zah-a saisa i bat sangin, khat leh khat ki-it in, zum khat nei khawmin, sumpi zek khawmin, biakna khatah gil kah khawm thei liailiai leng Jesuh nungzui i hihna kilang zaw ding a, i khuavak zong tangpha zaw ding hi cih i phawk ni hong tung peelmawh ding hi.

Ni khat ni ciangin: 

"Ni khat ni ciangin" i cihcih niloh pen tu khang, tu kum, tu kha, tu ni, tu nai laitak mah hi pah lian hi ci-a i gam, i lei makaite, uliante, laitheite, a kipan tangpi tangta donga "Uimeikang" mah banga om khawng thei nawn lo zah-a thu i kikup khop pah pialpual ciangin Zo minam i hihna pen zumhuai liailuai, zumhuai niangnuang cih bang hi nawn lo ding a, "Tu ni ei sunni hi e," ci-in ki-angtangsak mahmah zaw thamin a hong bawl Pasian min i phat ding i phawk ni hong tung pelmawh ding hi.

- Rev. Khup Za Go (Zoheisa Magazine 1988, Lamka, laimai 75)

SYRIA GALTAI A SI MI 3 A KHUA UAH VUI

SYRIA GALTAI A SI MI 3 A KHUA UAH VUI

Sept. 5, 2015: Sept.2 in Syria galtaite tuanna teembaw nih Turkey panin Greek tuikulh Los zuan a pai lai tum a, southwest Turkey a Bodrum kianga om Akyarlar lui piau ah si luang 12 kimute lakah naupang 5 leh numei khat kihel hi. A site lakah kum 40 a upa Abdullah Kurdi' zi leh a tapa nih- Aylan Kurdi (kum 3) leh Galip kihel hi. Aylan Kurdi luang tuipiau a maan kizaih penTwitter leh newspaper tuamtuamah tuang a, leitung mi tampi lungsim lawngkha mahmah hi.

Zan halin Abdullah Kurdi in a zi leh a tate gel a tenna khua Kobani ah pua kik in va vui hi. Kobani pen ISISte leh Kurdish galkap (PKK) te kikapna munpi ahih manin a luang a puak kik lai un Syria galkap ten si luang cingin Suruc panin Kobani dong va kha uh hi.

Abdullah Kurdi in a tuanna teembaw uh a tum in, "Ka tate ka khut ah ka pawm lai-in tuihual hat lua ahih manin ka talkhiasak kha hi," cin kap ngeungeu hi.

-Rueters/The Independent

+5

TURKEY LUI PIAU AH SYRIA GALTAI LUANG 12 KIMU

TURKEY LUI PIAU AH SYRIA GALTAI LUANG 12 KIMU

Sept.3, 2015: Zanin Syria galtaite dinga upmawhte tuanna teembaw nih Greek tuikulh Los zuana pai lai tum a, southwest Turkey tui piau ah luang 12 kimu hi cin Turkeyte navy ulian ten pulak hi. Hih teembaw nihte pen Turkey tuikulh Bodrum kiangah om Akyarlar ah kimu hi. Teembaw a tuang teng mi 23 hi cin gen beh uh hi.

A site lakah naupang 5 leh numei khat kihel hi. Mi sagih kihonkhia a, mi nih lifejacket zangin suakta uh hi. Thunei ten mi nih kihunkhia zo lo hi cin gen uh hi.

Syria buaina hangin galtai mi tul tampin Turkey a Aegean tui tawnin Greek gam a tun khit ciangun European Union gam tuamtuamah tai uh hi. Turkey thunei ten nung nipi kal nih sungin Los zuan ding a pai tui kia mi 100 val teembaw tawh kihonkhia ta hi cin gen uh hi.

Aid agencies-te tuatna ah nung kha bekin rubber teembaw zangin Greek zuan a pai mi 1,800 val ta hi ci hi. Red Cross ten nisim in rubber teembaw zangin Kos zuan a pai mi 200 val den hi cin a Twitter account uah gelh uh hi. Greek coastguard ten a genna uah zan halin galtai mi 1,800 val Athens kianga om Piraeus tung uh hi ci hi. Africa pana galtai mi tul tampi zong Libya panin Italy zuanin pai uh a, Italy a tun khit ciangun Europe gam tuamtuammte ah tai uh hi.

United Nations refugee agency,UNHCR ten a genna ah zan halin Mediterranean Tuipi ah si luang 4 kimu a, Nigeria, Ivory Coast leh Senegal pana galtai mi 781 kihunkhia hi cin gen uh hi.

Tu kum bekin galtai mi 2,500 val Mediterranean tuipi kan sawmin si ta hi cin UNHCR in ciamteh hi.

- Al Jazeera/Reuters