IIT TEN A NOLHPA TU-IN RS.50 MAN COMPANYTE' CEO SUAKTA

IIT TEN A NOLHPA TU-IN RS. CRORE 50 MAN COMPANYTE’ CEO SUAK TA

Srikanth Bolla pen India leitaw lam Andhra Pradesh state sung khuata khat-a piang ahi hi. Pianpih mittaw ahih manin a inn veng ten a nute kiangah na tapa a ngek lai uh puan tawh a mai tuamcip sakin that (smother) lel un na ci uh a, pawkhat in mittawsa a piang cih pen mawhna leh hamsiatna ahih manin a kimanna ding om lo hi na ci uh hi. A nu leh pa’n kha khatin a sum muh uh a kigawm pen Rs.1,6000 bek a phak hangin Srikanth pen itna leh deihsakna lianpi tawh kem in, sangkahsak ding hanciamin nei nei uh hi.

“NA KHAT PEUHPEUH HIH THEI HING”

Tu-in Srikanth pen kum 23 bek pha pan napi in Hyderabad pansan Bollant Industries kicite Chief Executive Officer (CEO) za len ta hi. Bollant Industries in mi bang lo a piang leh lai thei lote ading nasepna bawlsak a, nasem crore 50 bang nei uh a, eco-friendly, disposable consumer packaging solutions kici vante bawl uh a, a company pen crore 50 man dingin kituat hi. Srikanth in, “Leitung in hong neu muhin ‘Srikanth aw, na pianpih mittawpi tawh bangmah sem thei lo ding hi teh’ hong cih hangin leitung ka nung etsan a, ‘Na khempeuh hih theih loh nei lo hing’ ka cihsan a, tua-in tha hong pia hi,” ci’n YOUR STORYte kiangah gen hi. Srikanth in laisimna lamsangah a nu leh a pa ten a pattahna hangin a lungdamna ko a, leitung-a kampha bangin kingaihsun hi.

INDIA PRESIDENT LUI DR. KALAM TAWH NASEM KHAWM

A sangkahna a lawm ten ‘mittawpa’ ci’n simmawh bawlin kuama’n kikholhpih nuam lo uh a, kuama’n a kimawl ding a phal loh banah tutna gual nung lam bekah sawl den uh ahih manin mi bang lote adinga sanginn kibawl ‘school for special children’ kicihna ah a sangkahna laih hi. Class 10 laivuanna ah a sangpen ngah a, a sangkah sungin chess leh cricket kimawlna uk mahmah hi. Class 10 (tan X) board exams (laivuanna) ah 90% tawh zo a, 10+2 hong sin kumin haksatna tampi mah hong tuak kik a, Science subject a sin nuam hangin mittaw ahih manin kisang lo hi. 10+2 a man khit in Indian Institute of Technology (IIT) leh India gam-a engineering college minthang tampi ah a kahna ding ngetna lai khia kawikawi a, koimah ah na kisang lo hi. IIT ten mi bang lo (disable) ci’n laivuanna a lut theihna ding hall ticket na pia nuam lo hi. “Mi dang ten a ngaihsutna uh tawh mittawpa hong suaksak uh hi,” ci’n YOUR STORYte kiangah gen hi. A thanuamna leh a hanciamna leh cihtakna hangin khangnote thapiakna dinga kibawl Lead India Project (a movement to empower the youth through value-based education) ah sep theihna ding hong ngah a, India president lui ‘People’s President’ a kicipa Dr. APJ Abdul Kalam tawh na hong sem khawm kha hi.

IIT TEN A NIALPA MIT TEN NA SANG UH

IIT ten Srikanth pen mittaw ci’n hall ticket nangawn a piak nuam loh hangin a ngimna leh hanciamna khahsuah tuan loin foreign Universities tuamtuamah kah theihna ding ngetna nei kawkawi hi. Leitunga dingin technology lamsang university hoih pen pawla kigen US gam-a om Massachusetts Institute of Technology (MIT) ah kah theihna dingin hamphatna ngah a, mittawte lak panin MIT university kah masa pen hong suak hi. MIT in gamdang panin sangnaupang 120 bek la uh a, tuate lakah hong kihel hi. May 2013 in MIT panin undergraduate degree in Computer Science and Business Management zo hi. US ah a om sungin India ah mittawte huh dingin ciah kik nopna lungsim hong nei hi. India ah hong ciah kik khit ciangin educational and vocational rehabilitation degree ngah theihna ding sang naupang 3,000 bang huh a company un huhna pia ta a, mi zawngte leh mi bang lote huhna dingin paper bawlna company Hyderabad ah phuan khia a, a company bawl khiatin mi bang lo 150 sepna guan ta hi ci’n Your Storyte kiangah gen hi. Srikanth sunmang pen India President hih ding ahi hi.

Lo nasempa tapa, a khua panin km 5 lam pai-in sang kah in, a sanginn ah Physical Training (PT) nangawn ah a lawm ten a kihelsak nuam loh pa pen tu-in production plant company 4 – Hubli (Karnataka), Nizamabad (Telangana), Hyderabad (Telangana state khuapi ah nih) neipa suak ta hi. Andhra Pradesh state sunga om Sri City ah zong 100% solar operated (ni tha kizang) company khat hon’ sawm lai hi. A company min dingin Srikanth’s company ci’n ama min mah tamsak a, funding $ 2 million (Rs. 13 crores) a ngah banah a company panin Rs.9 crores ngah ta a, a nasemte 70% pen mi bang lo/mipoite (disables) sepsak ding ngimna nei lai hi.

-THE LOGICAL INDIAN/YOUR STORY/THE TIMES OF INDIA

RUSSIA IN SYRIA PANIN KIDONA VANLENG TAMPI A LAK KHIAT HANGIN HELICOPTER GUNSHIPS TAWH LAIH

RUSSIA IN SYRIA PANIN KIDONA VANLENG TAMPI A LAK KHIAT HANGIN HELICOPTER GUNSHIPS TAWH LAIH

April 8, 2016: Syria ah moderate rebels leh Syria kumpi'n ceasefire a neih man un Russian President Vladimir Putin in March 15 ni in Syria gam-a Russia galdote leh vanlengte a sap kik manin leitungin lamdangsa mahmah hi. March 15 khit nungin Russiate vanleng Su-25 attack jets, Su-24 bombers leh powerful Su-34 fighter bombers-te Syria-a a omna phual uh Latakia nusia in Russia gamah ciah kik uh a, vanleng hawlte innkuanpih ten a muakna uh leitunga media tuamtuam ten suaksak uh hi. Leitungin Russia in Syria nusiatsan sawm hi mawk maw a cih lai in Russia in Syria gam-a a vanleng phual Latakia sunga om Hmeinim airbase ah Antonov transport aircraft (van puakna vanleng) tawh galkap leh bomb khiatna vanleng (fighter bomber squadrons) tampi mah puak kik hi. Russia in kidona vanleng la khia hi cih a kingaihsut lai in Russia in galvan leh galkap tampi tak van puakna vanleng tawh Syria ah koih kik hi ci'n Military Sciences, Royal United Services Institute a Fellow Research Justin Bronk in gen hi.

Syrian activist ten a genna ah Russia in tung lam panin Aleppo a kapna hangin Aleppo mite dipkuasak mahmah a, Russia in Syria President Bashar al-Assad galdona nasia zaw semin huh ding kipan in, Mi-35 Hind helicopter gunship tampi Syria ah sawl beh a, tua helecopterte tawh zat khawm dingin Mi-35 Hind helicopter gunship sanga hoih zaw Mi-28 Havoc leh state-of-the-art Ka-52 Alligator a masa pen dingin a hun khop sawl beh hi ci hi.

Russia in a vanlengte tampi a lak khiat hangin a lak khiatte sangin a hoih zaw Su-30 leh Su-35S fighters hun khop koih lai a, Su-24 bomber aircraft zong a hun khop mah koih lai hi. Syria kumpi leh moderate rebel forces (a ngongtat lua lo Syria kumpi lehdo gamnuaimite) ten ceasefire a neih man un Aleppo ah kikaptuahna dai deuh ta a, tu-in Syria ah Russiate a kigolhna hang taktak ahi ISte do ding hong kipanpan ding uh hi zaw hi. Nung kalin Russiate huhna (Russian air and technical support) tawh Syria galkap ten Palmyra khuapi a lak zawh pen Syria galkapte adingin gualzawhna leh a lawhcinna lian pen uh suak hi. Palmyra khua kiim-a ISte leh Syrian rebelste ukna munte a kilak theihna dingin kidona vanlengte sangin niam cikcik a leng thei helicopter gunshipste zat ding baih lam zaw hi. Russia ten Aleppo ah a beisa in unguided missiles leh cluster munitions (carpet bombing) bombte zangin Syrian rebelte ukna bomb a khiat hangin ISte pen a omna leh bukna munte uh laih kawikawi uh ahih manin a phattuam ding bangin phatuam zo lo ahih manin helicopter gunship zangin sa bet a ben ding sawm zaw ta uh hi. Ahih hangin helicopter gunshipte pen kidona vanlengte tawh teh in niam len lua ahih manin Syrian rebels ten USte galvan piak liangko tung pan a kikap thei shoulder-fired anti-aircraft missiles (MANPADS) vanleng kapkhiatna hau uh ahih manin lauhuai thei ding hi.

US ten Iraq leh Afghanistan ah a nak zat mahmah uh AH-64 Apache helicopter kicite tawh Russiate Mi-28 Havoc pen kibang pian ahih manin a lenna mun khat ah tawlkhat sung a om theih banah, ciah kik mengmeng in missiles, rockets leh cannon thau zang thei ahih manin lei lam pan-a galdo Syria galkapte tawh kipawl thei zaw ding hi. Ka-52 Alligator pen unconventional aircraft banga zat dingin hoih mahmah a, a tunga kipei (rotor blades) nih nei in, a mei ah (tail rotor) rotor om se lo a, a manlang banah galvan tawh a kikap ciangin khak ding baih lo a, stealth cruise missiles, T-90M tank model suakthak tawh kithuah hi. Ka-52 Alligator pen Syria ah a kizat masakna pen hi lai hi. Mi-28 pen Russian regular armyte standard attack helicopter hi a, Ka-52 Alligator pen Russian special forces ten organic air support a neihna ding lieuliau a kibawl ahi hi. Hih helicopterte pen khuasiat hun, meii kai nuai leh zanin zong kizang thei hi.

Russia in kidona vanleng golte a tam zaw a lak khiat hangin helicopter gunships kicite tawh laih a, Putin in Syria a uk nuam manin galdo hilo zaw in tu-in nitumna gamte (US leh a kipolhpihte) sangin nakpi takin lawhcing zaw ta a, ISte dona ah a makaipi suak ding hi ci'n Royal United Services Institute (Military Sciences) a Research Fellow Justin Bronk in a laipaih (articles) ah na gelh hi.

-Al Jazeera

Show More Reactions