MULLER IN TRUMP' TRANSITION TEAM PANIN EMAILS 1000 VAL NGAH HI CI

MULLER IN TRUMP' TRANSITION TEAM PANIN EMAILS 1000 VAL NGAH HI CI

Dec. 17, 2017: US President Donald Trump' transition team- thukhen/sitni (lawyer) in 2016 US presidential election ah Trump campaign team leh Russia kigullukna (collusion) ngawhna vai thukanna nei special councel Robert Muller in a thukanna neih sungin emails "tul sawm tampi" ngah hi ci-in ngawh hi. Trump for America, Inc (TFA) counsel Kory Langhofer in Laizing (Thursday) in primary Senate and House oversight committees tungah a laikhakna ah, "General Service Administration (GSA) a career staff ten TFA' thusim kizaktuahna 'privilege communications' kici kihel in a private nate a ngahte special council' zum-ah thukham tawh kituak loin pia hi," ci-in ngawh hi. GSA i cih pen federal agencies managing leh supporting lamsang tavuan len ahi hi.

Kory Langhofer' laikhak Politico news in suakkhia sak a, tua-ah Langhofer in, "Special council zum in GSA in hih bang dotnate (questions) nei lo ahih kei leh uk lo hi cih phawk lo a, tua lai poimawhte leh "emails 10,000s-te thukanna ah nasia takin zang hi," cih tuangsak hi. Langhofer' ngawhna leh laikhak Democrats leh thukham lamsang siamte (legal experts) ten a thulimsim lohna pulak pah uh a, tua bang laikhak leh ngawhna pen Mueller' thukanna Trump-Russia probe kici a neumuhna ding uh leh a pom nop lohna uh kilang hi ci uh hi.

Mullers' Russia-Trump investigation kici pen thukanna kician lim takin a pai theih loh manin deidantuam nei lo ding ci-a Special Counsel Robert Mueller in makaih in May kha panin presidential election ah Russian government leh Trump campaign' kizopna kanna kipan hi. Muller' thukanna hangin tu dong mi li awk kha in ngawhna tuakin ta a, tuate lakah Trump' National Security Advisor Michael Flynn zong awk kha hi.

'Privileged' (Thusim)
Langhofer in TFA in a ""executive or quasi-executive functions" kici zangin nasem a, hih pen "federal agencies" sep ding hilo a, mimial kithuzaksak tuahnate (communications) leh pawlkhat mimal tawh kisai hi a, pawlkhat aituam ading kuamah theihpih loh ding (privileged) kihel hi ci hi. Hih banga thukham palsatin TFA in a thu ngahte pen nung kal hi ci hi. Langhofer in a laikhak ah FBI ten national security leh policy tawh kisai tavuan len kumpi kilaih a semte (transition members) mi kua tung panin emails, laptops, mobile phones leh na tuamtuamte Aug. 23 in ngen hi ci hi. Langhofer in presidential transition teams-te panin government agencies private recordte ngah nawn loin a kihumbitna dingin manlang takin Congress a gamtat ding hi cih tuangsak hi.

Special council' zum spokesman Peter Carr in Reuters news agencies kiangah statement a bawlna ah, "Thukham palsatna thukanna (criminal investigation) a kineih ciangin emails kingah den a, emails kingahte account phalna kikepbit sak ahih kei leh thukanna a man in kinei hi ci hi. Langhofer in hih bangin GSA in thukham pasat in a ngawhna thu Al Jazeerea news ten a dot hangin GSA in dawng kik nai lo hi. Democrats leh legal experts ten Langhofer' laikhak leh ngawhna mawhpaih in gensiatsak pah uh a, Muller' thukanna a minsiatsak nop man uh hi bek a, "executive privileges" bangmah GSA in palsat lo hi ci uh hi.

Federal prosecutor lui Renato Mariotti in thukanna nei ten email a ngah uh a kilawm lohna om lo a, a lamdang hilo hi ci-in a Twitter ah tuangsak a, ulian/mihaute thukham palsatna thukanna (white collar criminal investigations) a kineih ciangin hih bangin emails kingah den a, tua bangin emails ngahna vai mawhsak ten bang gen uh hiam cih thei lo uh hi ci hi. California panin Democrats Congressman Eric Swalwell in, "Private documents-te koi danin government email system a kikoih thei hiam? Bang muh ding kihta uh hiam? Kimanna nei lo thulim lo hi (Baloney) cih kamsia zat khum hi. Hih pen Muller' #TrumpRussia probe thukanna kihtakna, minsiatsak nopna leh gakcip nuam man hi cih a Twitter ah tuangsak hi.

2008 in President lui Barack Obama' transition team a thukhen Norm Eisen in, "Trump' transition team a om khempeuh warning ka piakhol a, transition emails vai privacy cih om dingin lametna nei kei un ka ci hi. Emails ah a account neite min kituangsak lo-a ptt.gov ci-in kiciamteh hi," ci hi. "Executive privilege kici executive na letma uh kizang thei lo a, Trump in executive a let ma executive privilege cih bang om thei lo hi," cih a Twitter ah tuangsak hi.

2008 in Transition (Obama-Biden 08) a Deputy GC len Norm Eisen in a Twitter ah, "Transition (Obama-Biden 08) hun lai-in Deputy GC ka len hi. Transition emails privacy om ding cih lametna kinei lo hi (seel sim zawh ding hilo a cihna). Emails kitheihna dingin a account zangte min kituangsak lo a, "name@ptt.gov." kici ziau hi. Trump' Transition team in hih bangin kap in a zakdahna thu a pulakkhiat (whining) pen legislation puahphat deih in a kalh nop man bek uh hi," ci hi.

Trump leh White House in 2016 presidential election ah Russia tawh kizopna/kigullukna bangmah om lo a, Muller' investigation in zong bangmah mu nai lo hi ci-in a nial den hangin Muller' investigation ah Trump' campaign team ulian li awk kha ta uh hi. Trump' National Security Advisor lui Flynn in zong Trump a zum-ah a tut ma-in Russian ambassador kimuhpih lo hi'ng ci-in FBI kiangah a thugen dokkik a, ka zuau ka gen mah hi ci-in a mawhna kipulakkhia khin zo a, Muller investigation ka kithuahpih ding hi ci hi.

Trump' campaign adviser George Papadopoulos in zong Russia kigolhna thu FBI in hong thusitna ah ka zuau ka gen hi ci-in October in a mawhna na pulakkhia khin zo hi. Trump' campaign manager lui Paul Manafort leh sumbawlmi a kithuahpih Rick Gates' tungah zong ngawhna (charges) 12 kiciamtehte lakah US langpang/minsiatna dinga (conspiracy) a nasem, sum a man lopi in ngah (money launering), leh sum a man lo-a ngahna tuamtuam ngawhnate kihel a, October kha-in mawh hi'ng ci-in na kipulakkhia ta uh hi.

#Bottom line: Trump-Russian probe lah Trump adminstration kihta mahmah in dal sawm den napi Muller investigation lah hat semsem a, thuman leh thuman lo damdam in hong kitel dingin lamethuai hi.

Source: Politico; Al Jazeera
@Thang Khan Lian #ZUNs

Photo: Trump-Russian probe Special Counsel Robert Muller

JERUSALEM VAI TRUMP' THUKHENSATNA UNSC IN RESOLUTION THAK TAWH A DAL THEI DING HIAM?

JERUSALEM VAI TRUMP' THUKHENSATNA UNSC IN RESOLUTION THAK TAWH A DAL THEI DING HIAM?

Dec. 17, 2017: Trump in Israel khuapi dingin Jerusalem ciamtehna dingin kum 10 bang zah hiam US policy a laih khitin leitung gam tuamtuam ah lungphona piang hi. Trump' thukhensatna hangin Turkey President Erdogan zong thangpai mahmah a, Turkey in a embassy East Jerusalem ah a laihna ding hun hong tung ding hi ci hi. Trump' thukhensatna vai UN Security Council (UNSC) in draft resolution thak tawh a dalna ding bawl sawm a, tua draft resolution UN Security Council members a tam zaw in gum dingun kilamen hi. Ahih hangin US in UNSC ah a veto power zangin dal kha ding hi ci-in diplomatic sources panin kiza hi.

Jerusalem's Status vai UNSC resolution thak:
UN Security Council in Trump' thukhensatna zatna ding leh kimanna ding om lo (null and void) cihna ding draft resolution leh Jerusalem status vai gam khat vei thukhenna (unilateral decision) dalna ding bawl sawm hi. Monday in UNSC in Jerusalem vai kamkupna a neihna ah drafted resolution thak bawlna ding zong gen kha uh hi ci-in diplomatic source in ci hi. Ahih hangin cik ciangin UNSC in draft resolution bawl ding hiam cih kitel nai lo hi.

UNSC draft resolution ah Khuapi Siangtho (Holy City) Jerusalem khuapi status, a gam leh mi om zia/zah (demographic composition) leh hihna laihna dingin thukham nawngkaisak (legal affect) thei ahih manin UNSC resolution palsat in thukhensatna tawh laihna pen a kimanna ding leh kizatna ding om lo hi ci-in ngaihsun hi cih tuang hi ci-in Reuters reports in gen hi. Tua loin Holy City of Jerusalem ah diplomatic mission (embassy) laihna dingin UNSC resolution 478 (1980) zuih ding kisam a, UNSC 478 (1980) palsatin kuamah gamtang loin a kidop ding uh cih zong tuang hi.

AFP in a genna ah draft resolution in Jerusalem buaina pen "kihona neihna tawh ven'sak" ding leh US in hih bangin amau bekin thukhensatna a bawl pen poi mahmah hi ci napi Trump' thukhensatna a min in lo lo hi. US President Donald Trump in thunung leh thuma ding leh thupiang ding awlmawh masa loin Dec. 6 in Jerusalem pen Israel khuapi dingin a ciamteh manin Arab gamte leh leitung bup in a thukhensatna gensia ngeingai uh a, lungphona neite Israel securityte kinawktuahna hangin mi li-in sihna tuak ta hi.

Veto kizang kha thei:
US in UNSC in Trump' thukhensatna kimanna ding nei lo hi ci-in resolution thak bawl hi leh UNSC a permanent members leh veto power nei US, France, Britain, Russia leh China in veto power zangin dal thei uh a, ahih hangin Trump' thukhensatna a kip theihna dingin UNSC a member 15 om lak panin members 9 in a gup ding uh kisam hi. Diplomats ten AFP news kiangah a genna ah UNSC a member 14 a tam zaw in resolution neih thak ding a gup kei uh leh US in maikal sungin a veto zang kha ding hi ci uh hi.

UN a US ambassador Nikki Haley in bel Trump' thukhensatna pen "thuman hi a, hih dinga kilawm hi" ci hi. UNSC in draft resolution a nial leh Trump' thukhensatna kimanna om lo cih theihna dingin UN General Assembly ah UN member ten vote khiatna nei ding uh hi.

Palestinian mi ten bel UNSC resolution thak khauhzaw sem bawl ding leh US in a thukhensatna a dokkik ding kalh uh hi. December 8 in UN Security Council in US bek gamtangin Israel khuapi dingin Jerusalem a ciamteh khitin emergency session nei a, tua hunah UN member khempeuh phialin US thukhensatna mawhpaih a, USte lawm hoih pen leh pawlte EU nangawn in US gum lo hi.

Buaina thak kipat kikna (New surge of Unrest)
Trump in Jerusalem status laihna dingin thukhensatna a bawlna hangin Israel in Palestine leitang a ukkhumna Gaza Strip, West Bank leh East Jerusalem ah tul tampi in lungphona nei pah uh a, lungphona neite leh Israel security kinawktuahna hangin Palestine mi giat in sih lawh ta hi (Israel in Gaza tung lam panin a kap a site tawh simkhawm in). Tuesday in Palestine gam-a Hamas movement ten Israel tungah kiphinna dingin third "intifada" kici pulak uh hi. Intifada masa pen 1987-1991 leh a nihna 2000-2005 hangin Israel leh Palestine mi tul tampi in luang na kham lawh khin zo uh hi.

Palestine lungphona nei ten Trump' thukhensat khit nungin US leh Israel laante (flags) leh Trump' milimte Gaza City khuapi pen Jerusalem cih lahna dingin na khai ngeingai uh hi. Israel in Jordan ukna East Jerusalem pen 1967 Six-Day War in na laksak uh a, 1980 in Israel Parliament in Jerusalem Law tawh Jerusalem khuapi pen "a bup in kipumkhatin" Israel khuapi hi cih na pulak hi. Tua pen modern history adingin Israel in a khupi Jerusalem hi ci-in a pulakkhiat masakna hi bek hi.

Ahih hangin Israel parliament thukimna Jerusalem Law pen UNSC resolution palsat ahih manin leitung bup in Jerusalem khuapi bup Israel khuapi cih thukimpihna pia lo a, tua bangin Israel khuapi dingin Jerusalem kikipsak leh Middle East buai kipatna hi ding a, East Jerusalem khuapi pen Palestine mite leitang ahih manin Palestine mite thukimna palsat uh hi ci uh hi.

#Bottom line: Trump' thukhensatna gum leh thukimpih tu lian in gam gen tham om nai lo ahih manin Trump hanciamna leh nasepna dahpa lo kho a suahna ding baih mahmah lai a, UNSC a draft resolution a kibawl khit ciang leh UN General Assembly ah vote kikhia leh thucian kitel ding cihna suak hi. UNSC resolution kibawl leh US in UNSC members 9te vote a ngah loh phamawh ahih manin a gum ding nasia takin pawl ding zongin a buai zel loh uh kisam hi cihna suak hi.

Source: Reuters; AFP; Sputnik
@Thang Khan Lian #ZUNs