REVOLUTIONARY MAKAI TANGTHU: CONGO GAM MITE' NGALLIAM PATRICE LUMUMBA' SUAH NI PHAWKNA

REVOLUTIONARY MAKAI TANGTHU: CONGO GAM MITE' NGALLIAM PATRICE LUMUMBA' SUAH NI PHAWKNA

July ni 2 ni pen democracy ngeina bangin Prime Minister dingin a kiteelcing Patrice Lumumba' suah ni ahi hi. Congolese National Movement party makai Lumumba 2 July 1925 in Katakokombe, Belgian Congo (tu in Democratic republic of Congo a kici ta) ah na piang a, 24 June 1960 – 5 September 1960 kikal sung bek democratically elected Prime Minister leh Minister of Defence of the Republic of the Congo panmun na len khawm man hi. A khangno lai-in a kithah hangin ama nasepna panin a kiluahsuk sawn a nasepna (legacy) tu dong mang loin kiphawk den lai hi.

Patrice Lumumba in galkap thahatna zangin gam dangte ukkhumnna a langpanna (anti-imperialism) hang leh Congo gam kipumkhatna ding vision a neih manin Belgium leh United States gamte i gal suak hi. Hih thu hangin US President Dwight D. Eisenhower' thupiakna tawh US secret agency CIA in Lumumba thahna dingin a haza (toothpaste) ah gu helsakin suam in thah (assassinate) ding na sponsored uh hi. Ahih hangin tua bangin CIA in thah dingin a geelna Congro gam-a CIA Station Chief Larry Devlin in thukimpihna na pia lo ahih manin nasepna ding uh leh a ngimna uh zo zo loin lawhsam in na khawlsan uh hi.

Tua khit nungin United States leh Belgium kigulluk in Lumumba a kimatna leh thakhat thu-in a thuneihna tokhom tung panin paihkhiat (coup) ding geelna in Lumumba' political langte tungah a simtham in golhguk sum lutsak (covertly funneled cash) uh a, a political langte in Lumumba man in vua gawp in, a bawlsiat dikdek khit ciangun that uh hi. Lumumba hih bangin a kibawlna pen hazatna leh huaihamna (greed) gam tawh a kidimte in government thak bawl dingin geel simna a nei a lawm hoih nih - Maurice Mpolo leh Joseph Okito zang uh a, 3 December 1960 in Léopoldville panin 150 km gamla a om Thysville military barracks Camp Hardy ah kitonpih in kikhumcip hi. Lumumba a thuneihna tokhom tung panin a kilotkhiat ciangin kivua gawp in a kibawlsiat khit zawh in firing squad-te thau in kikaplum sak a, kum 35 bekin a upat hun 17 January 1961 in Élisabethville, Katanga ah kithat hi.

Tua khit nungin CIA in Belgium leh France gamte kipawlpih in gamdang panin Congo' lei sung sumpiangte (natural resources) buluh in a kigukkhiatna (looting) etcik in a gal panin na thu pia-in na makaih uh hi. Gbadolite khuapi-a chief-of-staff Mobutu' teenna (palace) ah US, France leh Belgium gam panin senior government officials-te va hawh mun mahmah uh hi. Lumumba a kithah khitin Congo gam thuneihna pen US leh Belgium leh France in ut bangbangin thuzawh in a pei theih (pupet) President Joseph Kasa-Vubu leh chief-of-staff Joseph-Désiré Mobutu' khut sungah om hi.

LUMUMBA' KITHAHNA HANG HIH BANG AHI HI:

1960 kum in Belgium colonialism ukna panin Congo in suahtakna a ngah khit zawh a sawt loin Congolese army sungah kiphinna (mutiny) piang ahih manin Congo crisis kici Congo gam buaina kipan hi. Lumumba in Belgian in a gup Congo gam panin lengkhia nuam in Congo government a lehdo Moise Tshombe' makaih Kantangan secessionists kicite bengdai dingin United States leh United Nations tungah huhna ngen hi. Ahih hangin US leh UN in Lumumbu' ngetna a nawlkhinsakin a nolhsan ciangin cimawh beidong a kisa Lumumba in Soviet Union gam tungah huhna ngen hi. Lumumba in Soviet tungah huhna a nget manin Cold war hun in Soviet in a huh ding deih loin a langpang President Joseph Kasa-Vubu leh chief-of-staff Joseph-Désiré Mobutu bek hi loin US leh Belgium gam tawh a kitelsiam lohna uh hong piang hi.

Tua khit nungin Congolese state authorities ten Mobutu' makaihna nuai-ah thong sungah Lumumba khum uh a, nakpi takin a bawlsiat khit zawh ciangun 17 January 1961 in Élisabethville, Katanga ah firing squad-te thau tawh kikaplumsak hi. Lumumba' political ideologies bulpuh pen African nationalist leh African mite kipumkhatna ding pan-Africanist hi a, 1958 panin a kithah dongin Congolese National Movement (MNC) party na makaih hi. Lumumba a kithah khit nungin martyr bangin kingaihsun a, pan-African Movement zai semsem hi. 2002 kum in Belgium in Lumumba' kithahna ah a kigolh khakna hangin maisakna ngen hi.

LUMUMBA PHAWKNA:

Lumumba a kithah khit zawh Congolese politician leh military leader Mobutu regime hun 1966 kum in Democratic Republic of Congo (DRC) ah national hero leh martyr hi ci-in kiciamteh a, Lumumba a kithah ma ni a zan hun in a kikhumna leh a kibawlsiatna mun Brouwez House pen presidential thukimna leh letmat thuh in a thupiakna tawh Congo gam-a biakna pia dinga khualzin mite zinna leh paina (pilgrimage) mun kisuaksak hi. 30th, June 2018 in Belgium gam-a Bruzelles khuapi-ah Lumumba square kici a phawkna dingin kihong hi. Hih square pen DRC in suahtakna a ngawh zawh a kum 58 khit nungin Matonge neighborhood lutna ah a honna kinei hi.

USSR gam-a Peoples' Friendship University min dingin "Patrice Lumumba Peoples' Friendship University" ci-in 1961 kum in kilaih hi. Soviet Union gam a tuk khit 1992 kum in "The Peoples' Friendship University of Russia" ci-in a min kilaih kik hi. 1961 leh 1993 kikal sungin Poland gmte' khuapi Warsaw khuapi sunga street min khat Lumumba street ci-in kiphuak in kizang hi. Ukraine state capital Kiev khuapi sunga street khat Lumbumba street ci-in kiphuak a, 2016 kum in Pope John Paul II phawkna dingin pope min tawh kilaih hi. Ukraine gam-a Artyomovsk (tu in Bakhmut ci-in a kikheel) khuapi-ah Lumumba street ci-in a min kitamsak hi. Serbia gamte' khuapi Belgrade ah Lumumba phawkna dingin ama min zangin street leh student dormitory om hi. Sierra Leone gam-a rapper Kao Lastking Denero in Patrice Lumumba a zahtakna a lahna a la titles "STORY OF LUMUMBA" cih na zang hi.

African American Civil Rights Movement makai Malcolm X in Lumumba pen, "Africa continent sunga vak kha lak panin mi thupi pen hi. Lumumba in mipite tung panin thuneihna leh vangliatna (power) ngah ahih manin kuamah kihtak nei lo hi. Hih thu hangin kihta mahmah uh ahih a thah uh kul hi," ci hi. Revolutionist minthang Che Guevara in Lumumba' kithahna thu a zakin, "Leitung bup revolution hangin martyr in thahna thuakpa hi," ci hi.

LUMUMBA' KAMMAL HOIH:

"Hihna a manphatna leh thupina (dignity) om loin suahtakna om lo hi. Thuman thutang om loin hihna manphatna leh thupina om lo hi. Kuamah tungah kinga loin tangdin'na ahih kei leh suahtakna (independence) om loin mihingte a suakta kuamah om lo hi."

Sources: Red Fish; The Guardian and Wikipedia

@ Thang Khan Lian #ZUNs

AK GAWH ZIA NAM KHAT BEK A OM LOH MAH BANGIN POLITICAL STRATEGY NAM KHAT BEK NA OM LO HI

AK GAWH ZIA NAM KHAT BEK A OM LOH MAH BANGIN POLITICAL STRATEGY NAM KHAT BEK NA OM LO HI

(I political society, political system etna leh muhna kupna)

Ei Zomi sunga political makaite leh politics uk leh thei a kisate muhna ciang pen amau ngaihsutna bang lianlian a nei lo teng a mudah, a langpang, makaite hawmthawh in a langpang leh gensia cih ciang bek kitam a, BLACK LISTS in a ciamteh nuam pahpah kitam lai ahih manin a dahhuai thu bek hi loin a kamsiathuai i khanmawh mawk lianpi na hi gige hi. Politics pen tua dan na hi vet lo a, ngaihsutna kibang lo teng platform khat ah dinsak a, kipumphat rheihna dingin public mobilization siamna tawh huai zawhna na hi zaw den hi. Leitung leh vantung ah thuneihna sangpen leh khempeuh nei Pasian nangawn in amah langa pang den Satan nei den hi cih phawkhuai mahmah hi. Pasian in a langpa Satan' langpan'na awlmawh luat in nei ngei lo ahih ama vangliatna tawh na zo den ahih manin Satan sangin Amah mai-a kun leh a nungzui ding tama lo hi.

I milip tamna pen ah ruling party ahih kei leh panmun sangpen leh hoih pen i ngah zawh kei kei leh politics paizia a theitel zo nai vet lo, democracy kici pen mipite power cihna ahih lam thei loin mipite vote khia thei ding ciang bekin muhna leh etna kinei lai cihna hi kha kha ding hi. Zomi min tawh political party leh kipawlna tampi na om buang ahih manin ngaihsutna leh muhna gen kha om zek leh tangtel sihtan bang pah in, Zomi ciatciat buang nang tua lamte hi teh, a pualamte hong kicin'lah leh hong pauna ding thu om vet lo hi cih ngaihsutna pen DICTATOR or AUTHORITARIAN (fascist) vai leh tua bang ngaihsutna lungsim na hi zaw den hi.

Judah ten homeland a ngah theihna dingun Zionist Movements in leitung bup-a Judah khempeuh huamsak in a thugenna uh bildawh in ngai in na thudon uh a, May 14, 1948 kum in suahtakna a ngahna thu uh na tangkopih uh hi. Suahtakna taktak a ngahna uh a kiciamteh sak theihna dingin minam dangte leh gam dangte diplomacy zangin na thuzawh zo uh hi. America in British colonialism panin July 4, 1776 in suahtakna a ngah theihna dingin amau minam bek kipawl loin French leh Spanish mite huhna ngen in kihuhsak uh a, suahtakna na ngah zo pan bek uh hi. Politics i cih pen ei minam bek pankhawmna na hi den loin mi dangte tawh pankhawn zia a siamte na muibun in na lawhcing uh hi cih comparative political studies bawl kawikawi leh minam tampi tung panin i sinkhiat theih ding na tam lua mahmah hi.

State ahih kei leh gam khatah ruling party dinmun in i din' theihna dingin ei minam bek hi loin mi dangte huai siamna tawh mapan' khawm dan i siam kisam masa hi. Tua loin majority minam hi napi-in multi-party democratic gam-ah thuneihna taktak ngah zawhna ding na baih den lo hi cih i phawk ding kisam mahmah ta hi. "Politics kici ah a tawntunga gal (permanent enemy) kici om lo hi," cih pen i mangngilh loh a, i galte nangawn lawm-a kaihzawhna pen gualzawhna leh thahatna thusim na hi ah thanemna hi peuhmah lo hi cih phawkhuai mahmah hi.

Politics ah makai hi napi-in makaih a siam het lo na om kawikawi veve a, sazuk in kimanna ding nei loin a luzaang ah a ki a puak ngaungau bangin makaih za na pua ngaungau na om kawikawi a, min leh za (credit) bek deih napi-in mawhpuakna tavuan a thudon vet lo na om hi. Pil tuak mahmah napi a pil hai a na om kawikawi mah bangin i hai bawlte zong na pil hai nuam mahmah hi cih phawkhuai hi. Tua ahih manin makai hi cih manin milim pasian (idol) zah a biak ding leh nautang hi lel e ci-in simmawh bawlin va dap koih niloh tuam theih ding zong kuamah om tuan lo hi. Thuneihna taktak pen mipite khut sunga om ahih manin mipite' thuneihna neumuh sak loin mipite tawh pankhawn leh tonkhawm siam pen lawhcinna leh lamzanna bek tham loin a kiseel sim khinkhian gualzawhna thusim na hi zaw hi. Mipite' thuneihna kilaamto sakin a makaih za thuneihna (power) a gawmkhawm siamte zahin politics ah makai lawhcing om lo hi.

Democratic society ah makaite thuneihna hun (term) in ciangtan nei a, mipite' thuneih hun in ciangtan nei lo hi cih i phawk kisam mahmah a, thuneihna tokhom tung panin hong lawnkhia thei gige pen mipite hi cih phawkhuai mahmah in i mangngilh loh ding kisam hi. Tua ahih manin political society ah thuneihna ngah theihna ding, thuneihna kip leh kho in (stable power) i let theihna dingin a kingakna bulpi leh a inn sutpi pen mipite na zaw khinkhian den hi cih i mangngilh loh a, mipite thuneihna tawh makaih za kilaptoh theihna dingin public mobilization siam kisam a, mipite aw ngaih khiat a kisinhuai mahmah thu na hi gige hi.

Milim a tam pen (majority number) i neihna ah thuneihna, panmun hoih i ngah zawh kei leh mipite mawhna hi loin makaite' makaih siam lohna hang, mipite kipumkhatna dingin platform i bawl siam zawh loh man, mipite aw i ngaihkhiatsak lohna hang liuliau na hi zawsop den hi cih i phawk mateng majoritarian ihih hangin minam dangte khut nuai-ah ki-om ngitnget den ding a, minam dangte nengniam leh nungdelh minamte kihi ngitnget den ding hi cih phawk hun mahmah ta hi. Political society ah makaite in makaih zia a siam peuh a, platform khat ah dinkhawm theihna dingin public mobilization a siam peuh uh a, vision a neih peuh uh leh mipite kipumkhatna ding a hamsa masa pen na hilo hi.

America ah Mikang ten ruling party ngah zo kei mawk leh mivomte leh mi dangte mawhna hilo hi. India ah Hindu ten thuneihna a ngah zawh kei leh genzawh loh minam dangte mawhna hilo hi. Kawlgam ah zong Kawl ten thuneihna a ngah zawh kei leh ethnic groups dangte mawhna hang hilo hi. Paulap siamna leh mi dangte mawhsak hat zawh thu tawh i thanemna leh lawhsapna seel zawh ding leh kisiamtanh zo ding na hilo hi. A makaite' political leadership kiciat lohna hang leh ginat loh hang na hi veh aw!!! Ei sungah e le? Mipite ngawh ding maw ahih kei leh bang tan vei nam dangte ngawhngawh thapai ding maw? Tua in a damna zatui ding hilo a, eima thanemna leh citlahna ki-etphat a, kipuahphat ding a kisam masa na hi zaw hi.

Ak gawh zia nam khat bek om lo a, vasa leh gamsa mat zia ding zong nam khat bek na om lo hi. I political movement kalsuan zia a dik lohna om a kha hiam ci-in political postmortem i bawl zelzel ding a kisam hi zaw a, a natna leh a hoih lohna a om leh paihkhiat kisam hi. Tua loin cidam bang napi-in a cina na kihi zawsop kha thei hi. Tua ahih manin a beisa hunte lungngaih kikna leh mailam ding ngaihsutna leh etna (retrospection leh introspection) zong i neih ding kisam mahmah kha ding hi. Ak gawh zia nam khat bek om lo ahih manin political movement kalsuan ding zia zong nam khat bek na om lo hi cih i phawk hun mahmah ta hi. I tuat i sil ngil khinsa lampi bek mah ah pai ngaungau den zong cimtakhuai thei ahih manin lampi thak a nuam zaw leh a baih zaw zong i zon leh i sial a kisam na hi kha ding hi.

Political society ah minam dangte hong nuainehna leh sat hangin i awlmawh tuan kei a, hong sukgawp hangun thuhilhna hi ci-in ngaih theih tuam kei a, sinna (lesson) i lak theih kei leh amaute hong nuainehna, satna leh sukgawpna kithuak ngitnget den ding hi. Ak gawh zia nam khat bek a om loh bangin political strategy leh diplomatic tactics nam khat bek om om ahih manin a muibun zaw ding, a mainawt zaw thei ding ahih leh i political strategy leh political movement maimawt zia laih zelzel huai mahmah hi.

Zakna ding bil a nei khempeuh in na za ta un. Ak gawh zia nam khat om lo hi. Hih thu lim takin ciamteh... kidawm!!! 👊

✍️ Thang Khan Lian