PASIAN A KIKHEM ZO DINGIN NGAIHSUN KHA NGEI KEI IN
Thungetna kici pen Pasian tawh kipawlna leh kithuzaktuahna (communication) hoih pen hi a, Pasian' maipha zon'na leh i kisapna teng i ngetna leh i mawhna hong maisakna dingin ki-apna ahih manin private communication hi. Tua ahih manin thungetna nei kimlai maan leh videos kizaih in tuate mi' muh dingin social media khawng ah khahkhia in post niloh pen Pasian adingin a sanhuai biakna hilo a, milim biakna tawh kilamdang lo hi. Mihoih a kineihkhem Farisai, Sadduci leh Thukham hilh siate ngeina hi.
Tua banga thungetna pen upna tawh thungetna tawh a kibat tei sam khak hangin mite pahtakna leh thupisak ding lametna leh upna tawh thungetna hi zaw hi. Thungetna neih lai limlim pen maan leh videos zaih i ciin' niloh pen Pasian' deihna tawh kituak het lo ding ahih manin tawpsan huai mahmah hi. Mi thungetna peuh maan leh videos khawng va zaih lawp leh uk pawl adingin zong Pasian leh thungetna nei mite va nawngkaisakna ahih manin tawpsan huai mahmah hi.
James 5 sungah "Lunduaina leh Thungetna" cih thulu sungah, "Upna tawh thu a kinget ciangin Topa in cinate noptuamsak in, damsak ding a, mawhna nei ahih leh zong a mawhna maisak ding hi. Tua ahih manin na ci uh a damna dingin khat leh khat tungah na mawhna uh kipulakin thu na kingetsak ta un. Mihoihte’ thungetna in vang nei a, na lianpi sem zo hi," (James 5:15-16) na ci hi. Lungduaina, upna, mawhna imcip loin pulakna banah thumanna, midik leh mihoih hih masak lohpi in thungetna pen thungetna mawkna suak hi cih kimu a, maan leh videos na kizaih un, ci lo hi.
Paunak 15: 8 sungah, "Topa in mi gilote’ biakpiakna kihhuai sa a, thuman mite’ thungetna-ah lungdam hi," na ci hi. Gitlohna tawh kidim in thungetna leh biakpiakna pen Pasian adingin a kihhuai biakpiakna hi, cih i phawk ding kisam hi. Topa in meihal biaknate leh biakpiaknate sangin thu man ding deih zaw a, tuutal thaute tawh meihal biakpiakna sangin thu manna deih zaw hi," ci-in 1 Samuel 15:22 sungah na gen hi.
Topa Jesuh nungzui taktak i kicih nop leh Thungetna tawh kisai Jesuh’ Genna (Luka 11:2-4) genna ah bang na gen hiam cih a deihna lim takin lungngai in tua bang zuih ding hanciam huai mahmah hi. Jesuh in thungetna tawh kisai a genna ah.....
“Note in thu na nget uh ciangin mite’ muh theih dingin a kineihkhem mite in kikhopna inn sung leh kongzing lamka lai-ah a ngetnop se uh bangin na gamta kei un. Tua bangin a gamtate in thaman a ngah khin ta ahihna uh lim takin phawk un. Ahi zongin thu na nget uh ciangin na inn sung uh-ah tumin kong khak un la, na muh theih loh uh na Pa uh kiangah na ngen un. Tua hileh kuama muh lohin na gamtatna uh a hong mu na Pa un note’ tungah thaman hong pia ding hi," (Matthai 6:5-6) na ci hi.
Jesuh in a gen behna ah, "Note in mi dangte’ hong mawhna na maisak uh leh vantungah a om na Pa un zong note’ mawhna hong maisak ding hi. Ahi zongin note in mi dangte’ hong mawhna na maisak kei uh leh vantungah a om na Pa un zong note’ mawhna hong maisak lo ding hi. “An na tan' uh ciangin a kineihkhem mite bangin maikhingin om kei un. Amaute in an a tan' lam uh mite in a theih ding uh a ut manun gilkial mai pua-in a om uh hi. Amaute in a antan thaman uh a ngah khin ta ahih lamtak lim takin thei un," (Matthai 6:14-16) ci-in na gen beh lai hi.
Muh theih loh Pasian' kiangah thungen hi napi-in mi dangte in thu um, thunget hahkat leh Khristian taktak hi, a cih ding uh a lametna bek uh tawh a thunget laitak peuh un maan leh videos kizaih in a post mite leh tua banga thungetna neite maan post khiatsak sawnte pen mihing maipha ngahna ding a zong leh mihingte kiangah thunget a hahkat mahmah teng hi bek uh hi.
Leitung ah Jesuh hong vak lai-in Galilee Tuili Gal khat Gandara gam-ah dawi honpi (legion) vei mipa in Jesuh a muh ciangin dawi vei mipa nakpi taki awngin Jesuh' mai-ah khukdin in, “A Lian Pasian’ Tapa Jesuh aw, kei bang hong nuammawh na hi hiam? Kei, gim nong piak lohna dingin ka hong thum hi,” ci-in nakpi takin a kiko hi (Luka 8:28). A sung panin dawi a kihawlkhiat ding deih lo dawi vei mipa nangawn in thu na ngen hi cih phawk dingin kisam hi.
Tua ahih manin social media ah thungetna maan leh videos post mite leh a thungetna uh mi dangte buaina ding vangik guan liangin maan kizaihsakte peuh thupi va sak luat khak pen Pasian thupisakna hi loin a mihing thupi i sak luatna lahna hi. Mi dangte thupisakna leh muanna sangin Topa thupisakna leh muan ding hoih zaw hi (Late 118:8).
Khristian man leh diktat khat adingin thungetna peuh maan kizaihsak in mihing muh dingin social media ah post duaiduai niloh sese pen a ciin'huai pen hi het lo hi. Mihingte' maipha leh pahtak ding zonna hi lel hi. Pasian a kikhem zo dinga ngaihsun tengin tua bang lim ciin' mahmah uh hi. Mihingte pawl khat na khemzawh tei sam hangin Pasian na khem zo ngei kei ding hi. Pasian a kikhem zo dingin na ngaihsut a, na khemkhem sawm leh gimna na ngah ding a, Pasian' hehna hai na tungah hong kibuak suk ding hi. Thunget hun leh Pasian phatin laamna leh dian'na hun pen maan leh videos kizaih hun hi loin Pasian bek tawh kihona hun leh phatna hun hi zaw hi.
"Pasian a kikhem zo dingin ngaihsunkha kei un. Mi khempeuh in ama vawh nam khaici mah ngahkik ding hi. Mi khatpeuh in ama leitung pumpi deihna khaici a vawh leh sihna ngah ding a, Kha Siangtho deihna khaici a vawh leh Kha Siangtho tung panin nuntak tawntungna ngah ding hi," ci-in Galati 6:7-8 ah Sawltak Paul in na gen hi. Kumpi David in, "Pasian’ san theih biakna pen lungsim ki ahi hi. Pasian aw, a kitamzan, a kisik lungsim na simmawh kei ding hi," Late 51:17 ah na ci hi.
I thunget laitak, Pasian min phatin i laamna leh dian' laitak pen Khristian i hihna i lahna thupi pen hi masa loin, i gamtatna leh i kampauna panin a kilangkhiate leh mi dangte i bawl zia leh mi dangte tungah a hoih a pha leh thupha i bawlte pen i Khristian hihna lahkhiatna thupi pen na hi zaw hi. Zakna bil a nei khempeuh in na za ta un. Thu ciamteh theihna dinga ngaihsutna nei kici khempeuh in na ciamteh ta un.
Hih thu lim takin Ciamteh... Kidawm. Takhh!!!
Thang Khan Lian #ZUNs
Thungetna kici pen Pasian tawh kipawlna leh kithuzaktuahna (communication) hoih pen hi a, Pasian' maipha zon'na leh i kisapna teng i ngetna leh i mawhna hong maisakna dingin ki-apna ahih manin private communication hi. Tua ahih manin thungetna nei kimlai maan leh videos kizaih in tuate mi' muh dingin social media khawng ah khahkhia in post niloh pen Pasian adingin a sanhuai biakna hilo a, milim biakna tawh kilamdang lo hi. Mihoih a kineihkhem Farisai, Sadduci leh Thukham hilh siate ngeina hi.
Tua banga thungetna pen upna tawh thungetna tawh a kibat tei sam khak hangin mite pahtakna leh thupisak ding lametna leh upna tawh thungetna hi zaw hi. Thungetna neih lai limlim pen maan leh videos zaih i ciin' niloh pen Pasian' deihna tawh kituak het lo ding ahih manin tawpsan huai mahmah hi. Mi thungetna peuh maan leh videos khawng va zaih lawp leh uk pawl adingin zong Pasian leh thungetna nei mite va nawngkaisakna ahih manin tawpsan huai mahmah hi.
James 5 sungah "Lunduaina leh Thungetna" cih thulu sungah, "Upna tawh thu a kinget ciangin Topa in cinate noptuamsak in, damsak ding a, mawhna nei ahih leh zong a mawhna maisak ding hi. Tua ahih manin na ci uh a damna dingin khat leh khat tungah na mawhna uh kipulakin thu na kingetsak ta un. Mihoihte’ thungetna in vang nei a, na lianpi sem zo hi," (James 5:15-16) na ci hi. Lungduaina, upna, mawhna imcip loin pulakna banah thumanna, midik leh mihoih hih masak lohpi in thungetna pen thungetna mawkna suak hi cih kimu a, maan leh videos na kizaih un, ci lo hi.
Paunak 15: 8 sungah, "Topa in mi gilote’ biakpiakna kihhuai sa a, thuman mite’ thungetna-ah lungdam hi," na ci hi. Gitlohna tawh kidim in thungetna leh biakpiakna pen Pasian adingin a kihhuai biakpiakna hi, cih i phawk ding kisam hi. Topa in meihal biaknate leh biakpiaknate sangin thu man ding deih zaw a, tuutal thaute tawh meihal biakpiakna sangin thu manna deih zaw hi," ci-in 1 Samuel 15:22 sungah na gen hi.
Topa Jesuh nungzui taktak i kicih nop leh Thungetna tawh kisai Jesuh’ Genna (Luka 11:2-4) genna ah bang na gen hiam cih a deihna lim takin lungngai in tua bang zuih ding hanciam huai mahmah hi. Jesuh in thungetna tawh kisai a genna ah.....
“Note in thu na nget uh ciangin mite’ muh theih dingin a kineihkhem mite in kikhopna inn sung leh kongzing lamka lai-ah a ngetnop se uh bangin na gamta kei un. Tua bangin a gamtate in thaman a ngah khin ta ahihna uh lim takin phawk un. Ahi zongin thu na nget uh ciangin na inn sung uh-ah tumin kong khak un la, na muh theih loh uh na Pa uh kiangah na ngen un. Tua hileh kuama muh lohin na gamtatna uh a hong mu na Pa un note’ tungah thaman hong pia ding hi," (Matthai 6:5-6) na ci hi.
Jesuh in a gen behna ah, "Note in mi dangte’ hong mawhna na maisak uh leh vantungah a om na Pa un zong note’ mawhna hong maisak ding hi. Ahi zongin note in mi dangte’ hong mawhna na maisak kei uh leh vantungah a om na Pa un zong note’ mawhna hong maisak lo ding hi. “An na tan' uh ciangin a kineihkhem mite bangin maikhingin om kei un. Amaute in an a tan' lam uh mite in a theih ding uh a ut manun gilkial mai pua-in a om uh hi. Amaute in a antan thaman uh a ngah khin ta ahih lamtak lim takin thei un," (Matthai 6:14-16) ci-in na gen beh lai hi.
Muh theih loh Pasian' kiangah thungen hi napi-in mi dangte in thu um, thunget hahkat leh Khristian taktak hi, a cih ding uh a lametna bek uh tawh a thunget laitak peuh un maan leh videos kizaih in a post mite leh tua banga thungetna neite maan post khiatsak sawnte pen mihing maipha ngahna ding a zong leh mihingte kiangah thunget a hahkat mahmah teng hi bek uh hi.
Leitung ah Jesuh hong vak lai-in Galilee Tuili Gal khat Gandara gam-ah dawi honpi (legion) vei mipa in Jesuh a muh ciangin dawi vei mipa nakpi taki awngin Jesuh' mai-ah khukdin in, “A Lian Pasian’ Tapa Jesuh aw, kei bang hong nuammawh na hi hiam? Kei, gim nong piak lohna dingin ka hong thum hi,” ci-in nakpi takin a kiko hi (Luka 8:28). A sung panin dawi a kihawlkhiat ding deih lo dawi vei mipa nangawn in thu na ngen hi cih phawk dingin kisam hi.
Tua ahih manin social media ah thungetna maan leh videos post mite leh a thungetna uh mi dangte buaina ding vangik guan liangin maan kizaihsakte peuh thupi va sak luat khak pen Pasian thupisakna hi loin a mihing thupi i sak luatna lahna hi. Mi dangte thupisakna leh muanna sangin Topa thupisakna leh muan ding hoih zaw hi (Late 118:8).
Khristian man leh diktat khat adingin thungetna peuh maan kizaihsak in mihing muh dingin social media ah post duaiduai niloh sese pen a ciin'huai pen hi het lo hi. Mihingte' maipha leh pahtak ding zonna hi lel hi. Pasian a kikhem zo dinga ngaihsun tengin tua bang lim ciin' mahmah uh hi. Mihingte pawl khat na khemzawh tei sam hangin Pasian na khem zo ngei kei ding hi. Pasian a kikhem zo dingin na ngaihsut a, na khemkhem sawm leh gimna na ngah ding a, Pasian' hehna hai na tungah hong kibuak suk ding hi. Thunget hun leh Pasian phatin laamna leh dian'na hun pen maan leh videos kizaih hun hi loin Pasian bek tawh kihona hun leh phatna hun hi zaw hi.
"Pasian a kikhem zo dingin ngaihsunkha kei un. Mi khempeuh in ama vawh nam khaici mah ngahkik ding hi. Mi khatpeuh in ama leitung pumpi deihna khaici a vawh leh sihna ngah ding a, Kha Siangtho deihna khaici a vawh leh Kha Siangtho tung panin nuntak tawntungna ngah ding hi," ci-in Galati 6:7-8 ah Sawltak Paul in na gen hi. Kumpi David in, "Pasian’ san theih biakna pen lungsim ki ahi hi. Pasian aw, a kitamzan, a kisik lungsim na simmawh kei ding hi," Late 51:17 ah na ci hi.
I thunget laitak, Pasian min phatin i laamna leh dian' laitak pen Khristian i hihna i lahna thupi pen hi masa loin, i gamtatna leh i kampauna panin a kilangkhiate leh mi dangte i bawl zia leh mi dangte tungah a hoih a pha leh thupha i bawlte pen i Khristian hihna lahkhiatna thupi pen na hi zaw hi. Zakna bil a nei khempeuh in na za ta un. Thu ciamteh theihna dinga ngaihsutna nei kici khempeuh in na ciamteh ta un.
Hih thu lim takin Ciamteh... Kidawm. Takhh!!!
Thang Khan Lian #ZUNs
