MAKE TRUMP GREAT AGAIN!!! (Critical analysis on Trump)
Galpi Nihna hun in om dan, gamtat-luhek leh kampau a kipan silh leh teen neek leh taak bawldan ngeina, khantohna, pilna siamna leh zat siamna, taanga pu leh pate ngei nate, pu leh pate tung pana kiluah ngeina leh neih leh lamh (cultural heritage) manpha tam a kisuksiat luat manin tua bangte gal kidona ah suksiatna a pian' kik ding deih loin UN member gam tengin 1954 in cultural property gal kidona ah suk kik vet loh a, humbit dingin thukimna suai na kai uh hi. Tua bek hawmthawh in US leh Iran 1972 agreement suaikai kik uh a, gal kidona ah leitunga "natural and cultural heritage" omte humbitna dingin kamciamna nei-in thukimna suai na kaih kik beh uh hi.
US Constitution ah galdona ding, galkap sawl theihna ding leh galvan lei leh zuak theihna ding leh military actions lakna dingin Congress thukimna lak masak ding hi cih thukham om napi-in, tua palsatin January 3 in Islamic State (ISIS) dona ah Iraq gam ah US kipawlpih General Soleimani kici pa Baghdad International Airport ah suamlupna dingin thupia in, civilian airport ah terrorism gamtatna tawh international assassinations gamtang kua hi mawk hiam? Trump in Soleima kithahna vai a kisiamtanhna thu a genna ah intelligence source a kingahna panin a piang vat kisuammna (imminent attacks) om a, gal pian'sakna ding hi loin gal a pian'na ding dalna hi ci pong hi. Hazatna hanga kitelkhialhna ahih kei leh gal kidona beina dingin kithahna tawh veng ding hi leh Cain in Abel a thah a kipanin gal cih bang na om ngei nawn lo ding hi.
Iraqi Prime Minister Adil Abdul-Mahdi in Soleimani kithahna vai tawh kisai Jan. 5 in parliament ah Trump kisiamtahna ziau hi cih keel luphum a dawkna dingin hih bangin na gen hi: "Iran in Saudi leh Iran gam kikal-a kitelsiam lohna (diplomatic rapprochement) vai tawh kisai Iraq ah kikupna nei dingin Soleimani kimuhpih dingin geelna ka nei hi. Trump in a simtham in Soleimani thah ding a sawm hangin ka kimuhpih sawmna hangin kei tungah mimal tungah a lungdamna hong ko hi. Soleimani a kithah ni zingsang in Saudi in Iran adingin message hong piak a dawn'na pia dingin hong pai Soleimani kimuhpih ka sawm hi. Ahih hangin tua bang hun in Iraq in phalna a piak lohpi-in American helicopters leh drones hong leng a, US embassy leh military base ah galkap koih beh dingin hong ngetna uh kinolhsak hi," ci hi.
ISIS-te ukna khuapi Syria-Iran gamgi a om Amirli, Iraq gam-a khuapi golpen nihna Ramadi, Saddam' pian'na khua Tikrit, Iraq gam-a ISIS kumpi gam (Caliphate) khuapi Mosul lak kikna leh hutkhiatna dingin Iraq galkapte a dokhawmpih (Soleimani' phuankhiat pro-Iranian Hased al-Shaabi) lai-in US in tunglam panin huhna pia napi Saudi leh Iran kikal a kigalneihna vai peace mission a hong pai kimlai i gam sovereignty palsatin civilian airport ah hong kithat vat mawk i lung a kim ngaungau zen tam? I inn vengte kigalneihna lemtuah ding sawmin i hanciam lai takin kilemna palai dingin i inn sunga hong lut khat khualmi khatin i innsung ah hong golum miau leh i nui peempaam zen tam?
Iraq gam-ah kilemna ding thu gen dingin Soleimani thahna dinga thupiak mawk bang ngaihsutna ahi zen tam? Republicans president George W. Bush in Iraq gam a sim theihna dingin US in Iraq-Iran War (1980-88) in a gup leh chemical galvan a piak Saddam Hussein in weapons of mass destruction (WMDs) kici milom thahna galvan minute 40 sunga zattheih ziau ding nei hi cih intelligence kinei hi ci-in Iraq gam zuau bulomtang tawh sim in, Iraq-Iran War ah US in a gup leh chemical weapons a piak pa uh kithahna ding leh ISIS hong pian'na ding lampi a sial'sak bangin Trump in intelligence man lopi leh ISIS thahat kik sakna (Iraq gam-ah US galkapte om tawntung theihna ding) ding ngimna tawh Soleimani a suamlupsak ahi zel tam? 2016 elections ah US leh Trump' campaign kigullukna (collusion) vai-ah US intelligence agencies ten collusion om mah hi a cih lai-in zuau thu hi ci-in US intelligence community zuaugente a suaksak den pa in House in a presidency panin a paihkhiat (impeached) khit nungin a zum panin Senate in a kihepkhiat (removal from office) khak ding a lauh man leh 2020 elections ah a vote zon'na dingin Soleimani a kithahna ding thu a piak ahi zaw tam?
Soleimani kithahna kisialhpih in, mi uptheih ding thu a phuahtawm gawp khit ciangin Iran in thukkik vet nai lo napi Iran in hong thukkik peuhmah leh Iran gam-a cultural sites kihelin mun 52 kikap ding hi ci-in a gen bek tawh lungkim zo loin gal kidona ah gitlohna gamtatna/thukham palsatna "war crimes" ka gamta ding hi ci-in vauna bawl beh lai kua? Gam nih kikal a kamciamna tawh thukimna suai kikai khinsa bombi zip banga kaihsuk kaito a, ek nusiat a nusiatsan ding tangkopih kua? A thuman Christian khatin kamciamna tawh thukimna suai kikaisate khat khit khat khuplet zialzial in, ngongtatna tawh gamtat ding leh House ah impeachment inquiry ah teci pan'na neite ban vau lau (intimidated) in, gam khat khit gam khat nuaitummang dingin vauna a bawlbawl zen tam? A muh theih loh Pasian a it a kici Christian khatin a muh theih mihingte hih zah in a vauvau tam?
Cultural sites humbitna dinga thukimna suaikai napi suksiat ding sawm a, war crimes ka gamtang ding hi cih vauna bawl a leitung bup ngongtatna leitang suaksak nuam a awngawng khat Christian ettehhuai zah a ngaihsut bel LST ah ciahkik hun mahmah ta hi cih kilang hi. Amah pumphat lo media teng American gal suaksakin gal a pulak khum, ama a pumgup lo peuhmah Christian langpang bangin ngaihsunin ut bangin a ko zialzial gawp, Christian sunga kikhenna guam lianpi a piangsak khin gam makai khat Christian muanhuai in a ngaihsuthuai ngam lai zen tam?
A campaign bawl cil lai pek panin leh president a let khit nung nangawnin gamdang ah kigolhna (foreign intervention) ka khawlsan ding a, Americans galkapte inn ciahkik sakin America gam lam kikin, America gam ka liansak kik ding "Build America and Make America Great Again" ci a ku laulau in kamciamna tawh thuneihna tokhom a ngah pa in galkap sapkik malak sangin sawllut behbeh a, gamdang gen khak loh in Middle East bekah galkap 16,000 dek bang sawl beh khinzo a, gal gim namsak semsem hi.
Gamdang ah kigolh khawlsan nak sangin Iraqi sovereign right leh Iraq gam-ah US galkap ciangtan nei-in ISIS dona ah a huh dingin a om theihna dingun thukimna US-Iraqi security accord kici palsat in civilian airport ah International assassinations bawlna ding thu a piak manin Iraq parliament in Jan. 5, Nipini in American troops a kidawhkhiatna (withdrawal) dingin vote khiatna tawh resolution passed khin hi. Tua hi napi-in US troops hong ki-withdraw sak peuhmah leh Iraq tungah a gawtna dingin khalna (sanctions) ka koihkhum ding hi ci-in US galkapte inn ciahkik sak dinga kamciampa in vauna bawl kik leuleu hi.
Kamciamna khat khit peel, zuau vive gengen, thukimn khat khit khat botsia leh a palsat, US Constitution palsat a Make Trump Great Again ultungsak zaw, a zi thumte lak panin a masa pen leh thumna Czechoslovakia gam mi Ivana Zelníčková (m. 1977; div. 1992) leh Yugoslav republic of Slovenia gam mi Melania Knauss (m. 2005) pen immigrants hi napi-in anti-immigrants tawh vote zong, ngia tuuvun silh khat Christian makai muanhuai hi ci-in thupi sa veve napi thuman ka gum cih ngam lai bel ngaihsuthuai mahmah ta a, lawki suak zaw mai leng hoh vaisiangtho zaw ding hi. Tua hi leh ngongtatna, angkawmna, zuaugenna, muhdahna leh huatna lungsim, angsung ding khual luatna tawh duhhopna leh huaihamna gup pen phamawh lo zaw tuam kha lai ding hi.
Secular gam-ah politics pen biakna vai tangkona ding pulpit hilo hi. Ahi zongin secularism spirit palsatin biakna tangkopih a, vote zon'na leh thuneihna ngah theihna dingin biakna zang gam makaite, a pawlpi pastor luipa in biakinn ah khat vei beek a muh ngei lo (Trump dan), min leh za deihin uliante maipha leh love gifts ngah ding a zong biakna makaite' thungetsakna maante leh thungen kimlai peuh maan kizaihin a Christian hih diakna a lahna dingin pubnlic ah posts a uk mahmah gam makaite sangin a innkuan sungah biak piakna a makaih khial ngei lo, a tu a tate Bible Study a makaih zote, zing devotion leh Nipini biak kikhop a pai khial lo politiciante bang ettehhuai kha thei mah ding hi.
Ahih kei leh kum 95 a phak khit nung leh a natna hangin a tukna ah a nungguh a tattan (pelvis bone) khit nung nipi nih ma-in ciangkhut khun in Maranatha Baptist Church, southwest Georgia town of Plains ah Sunday School minute 45 sung a va hilh kik tentan Democratic party panin US president lui Jimmy Carter bang ahih kei leh Christian sunga kikhenna, kimuhdahna leh kideidanna piangsak lo zaw in, kipumkhatna leh kitheihsiamna ding a tangkopih biakna makai ngaihsutna picing neite bang Christian kicite adingin ettehhuai masa zaw ding hi.
Gam makai khatin thuneihna a let hun sung leh a nuntak hun sung pen ciangtan nei ciat hi. Na Christian thu upna thalakna dingin gam makai khatin a thuneih hun sung bekin biakna vai a tangkopihna hang lel tawh na upna zung na khak sawm leh a thuneihna hun leh a nuntakna a bei ciangin na upna zung khak tui kibuak ngei lo, nisa mu loin a si pah singkung bang ding hi. Upna kician a nei nuam, a citak leh a thuman (truthful and righteous) Christian na suah nop takpi leh sia nengnengte, kamsang leh thusuak ngah kici-in mihingte' maipha leh minpha ngahna ding leh mi pawl khatte zaknop ding bek thugen hahkat teng thugente na bulphuh sangin Pasian' kammal Lai Siangtho bek mah sim zaw in la, kimakaihsak lecin na tuk ngei kei ding a, lam na pial ngei kei ding hi.
Jesuh a kithah ma-in Pilate in mipite in thuman hi ci-in khahkhiat dingin a nget uh mi gilo Barnabas leh hazatna tawh golhguk pia-in a mawhpaih uh leh a thumanna kuamah in a gup ngam loh Jesuh koi zaw that zaw ding ci-in mite a dotna ah, "Kua ka khahkhiat ding deih zaw na hi uh hiam?" ci-in dotna a bawl bangin tu hun in zong a thuman zaw dingin Trump teel zaw ding maw ahih kei leh Jesuh teel zaw ding maw cih dotna lianpi Christian hi buang biakna leh politics gawmkhawm dente adingin dotna aw ging ciaiciai den lai hi. Kua teel zaw ding? Nang deihna bangbang hi.
🗣️MAKE TRUMP GREAT AGAIN?
OR
🗣️MAKE JESUS GREAT AGAIN?
Reference:"Iraqi PM reveals Soleimani was on peace mission when assassinated, exploding Trump’s lie of ‘imminent attacks’' @ The Ron Paul Institute for Peace and Prosperity; "US: Trump Threatens War Crimes Against Iran" - Laws of War Prohibit Deliberate Attacks on Cultural Property @ Human Rights Watch; "Days after breaking pelvis, former president Carter is back teaching Sunday School @ LA Times & Wikipedia
