MAHATMA GANDHI' KAMMAL HOIH

MAHATMA GANDHI' KAMMAL HOIH

* Damdam in leitung na lok zo hi.

* Itna omna mun ah nuntakna om hi.

* A thanemte in maisak zawhna nei lo uh a, maisak zo ngei lo uh hi. Maisakna i cih mi thahate hihna kilahkhiat hi.

* Thahatkhat/thakhauhna i cih in pumpi leh taksa hatna panin hong pai hilo a, utna zawh zo theihna (indomitable will) panin hong pai hi zaw hi.

* Leitung in mi khempeuh kisapna piak zawhna dingin a kisapna uh a kicing nei hi. Ahih zongin mi khempeuh i duhhopna/huaihamna khempeuh hong pia zo lo hi.

* Politics ah lutlutna ka nei kei hi ci mi khatpeuh pen tuikia tawh kibang a, tuikia hi napi-in a suahtakna dingin tuipeek ding sawm loin tui lakah lunglungna;awlmawhna (interest in water) nei loin a pang kenkan mi tawh kibang hi.

* A hoih pen in nang leh nang na kimuh theihna dingin midangte' hamphatna leh noptuamna dingin nasem in.

* Khialh theihna dingin suahtakna a om a, mawhna/khialhna ding ciang nangawn bawl theihna suahtakna a om kei leh suahtakna in kimanna ding om lo a, suahtakna in manphatna nei lo hi.

* Nasepna khatpeuh leh sum leh paai meet bawlna ah thuman ding haksa napi thuman zawhna ding a piang zo lo hilo hi.

* Ka inn mun kimkot in kulh tawh ki-umcip in, ka tawlette naksapna dingin a kikhakcip ding ka deih kei hi. Mun khempeuh a ngeina tuamtuam ten a suakta thei pen in hong mut in hong lut theihna ding uh ka deih hi.

* Zing cianga si ding bangin nungta (nuntakna zang) in la, si ngei loin a nungta den ding bangin sin in.

A kaikhawm: Thang Khan Lian

LAIBU KIBANG KHAT; NGAIHSUTNA KIBANG LO NAM NIHTE

LAIBU KIBANG KHAT; NGAIHSUTNA KIBANG LO NAM NIHTE

• Mi nih in Lai Siangtho (LST) kibang sim uh hi.
• Khatin itna (love) neih ding a kisapna hangte (reasons) vive mu hi.
• A khat pen in muhdahna; huatna (hate) ding a hang omte bek mu hi.
• Khatin kipumkhat (unity) ding vive mu hi.
• A khat pen in kikhenna (division) ding vive bek mu hi.
• Khatin khat leh khat liangko kikimna (equality) ding vive mu hi.
• A khat pen in midangte natsak leh suksiatna ding (prejudice) vive mu hi.
• Khatin itna leh lainatna ding a zon'na panin mukhia (discovered compassion) hi.
A khatin midangte khual lohna ding leh lainat lohna (indifference) ding thu bek vive mukhia hi.
Khatin midangte lawmbawlin a pha bawlna (goodwill) ding vive mu hi.
A khat penin ngaihsutna hoih lo tawh midangte liam leh natsakna ding; galbawlna (malice) ding vive bek mu hi.

Mi nih, laibu khat. Laibu khat, ngaihsutna nih.

A laibu (LST) pen limlang hi.

Tua limlang panin a dawk leh kilang leh a vaak hong taangkhia (reflection) nangmah na hi hi.

Na LST simna panin a koi zaw pen tawh na nuntakna leh muhzia a koi zaw pen a kituak hiam?

@ Thang Khan Lian @ZUNs

MAKAI HOIH I CIHTE PEN......

MAKAI HOIH I CIHTE PEN......

"Makai kici peuhmah in a makaih mipite lungsim leh ngaihsutna a zo mite ahi hi," ci-in Anderson na ci hi. Norrish in, "Makai i cih pen a mai-ah, a lai-ah, a nungah pai hi," na ci hi. US President a 33na leh Truman Doctrine pankhiapa Harry S. Truman in, "Makai kici peuhmah in mite hih peih loh leh sep nop loh teng nangawn lawp takin sem hi," na ci hi. George R. Terry in, "Makai i cih pen mailam geelna lawcingsak dingin mipite lungkim tak-a kaihkhop siam mi hi," na ci hi. Dr. Jonh R. Mott in, "Makai khatin a lampi ding thei masa phot a, amah mahin zui masa pah hi," na ci hi.

Makai hi buang, makai om napi a makaih mipite a kituah kei a, mipite lampi tuam ciat ah tuu bangin a vakzau in lampi tuam tekah a kalsuan uh leh amaute makaihpa in a kalsuanpihzia leh a makaihzia kician lo hi kha ding hi. A makaih mipite' lungsim leh ngaihsutna a zawh (influenced) zo kei leh makai kician zo hi ding hi.

Makai hi napi-in a nungzuite tawh kipawl thei lo, kituak thei loin, a tonkhawm theih kei leh makai gina hi zo lo hi cihna hi. A thanemte, a thahatte leh a zawngkhalte tawh kituak takin a tonkhawm thei mipa pen makai hoih ahi hi.

Makai hoih leh muanhuaite in a nungzuite hih nuam loh, hih ngap loh leh a piang zo lo ding zahin a ngaihsutte uh nangawn nawk ngap a, makai ahihna lakkhia in, lungkia loin lawp takin a zawh madong sem ahih gualzo in matun zo veve hi. Tua hangin makai ahihna kam tawh gen sese loh in lahkhia ahih manin a nungzuite in muantak, zuihtak leh belhtak sa-in a nungzui ding tama ngei lo hi. "Makai ka hih manin ka nung hong zui un," ci-in awngawng se lo a, a zuihtham ding lampi man ah makaih in gualzawhpih in, matutpih zo ahih manin a nungzuite in a totna khekhap mah sik in zui ngam uh hi.

Makai hoih i cihte in saupi geelna leh muhkholhna (vision) kician nei uh a, a nungzuite zak ding leh zawh zona dingin a vision genkhia in lawpsakin thapia masa phot hi. A vision hoihte mailam ah a geelnate lawcin'sak theihna dingin mipi lungkim takin kaihkhop siam a, a nungzuite tawh mapang khawm ahih manin a vision neihte mit tawh muh theih dingin semkhia hi. A vision neihte a thu bekin genna tawh khawl loin taksuahsak thei ahih manin a nungzuite in a muanna uh khang semsem a, mipite a tungah lungkim semsem sak zo ahih manin aana (force) zang sese loin mipite kaikhawm zo-in kipumkhatna khauhsak semsem zaw hi.

Makai kician khatin min deihna bek tawh a sep ding bawl dingte mot gengen lo a, sep ding bawl dingin ngimna leh geelna a neihte a lampi tot dingzia leh a sepkhiat dingzia thei masa phot ahih manin amah mahin tua lampi zui masa hi. A lampi sial sa tawn masa in makaih ahih manin mipite in nungthuap in zui uh hi. A totna lampi zuite guaksuaksak loin, lamkal ah kuamah gammangsak loin a tunna dingin a kisehna mun (destiny) dong makaih in tunpih hi.

✍️ Thang Khan Lian #ZUNs

BANG CI LEH MINAM BELHTAK KIHI THEI DING HIAM?

BANG CI LEH MINAM BELHTAK KIHI THEI DING HIAM?

1956 in India gam sunga teng Tedim kampau leh awsuah zaw deuh a zang khangnote kipawlna dingin Chin Students Association ci-in i kiphuankhiat zawh uh 2006 kum in a kum 50 cin'na Golden Jubilee nuam takin i zang thei uh hi. CSA min dingin TCYA ci-in i laih khit nungin i namke min tawh khangno kipawlna tu kum tawh sim leng a kum 64 upa ta hi. Tu ciangciang hong kalsuanpih leh Golden Jubilee pawi muak thei dingin hong makaih EBENEZER Pasian' min i phat masa hi.

Leitungah minam khatpeuh, namke khatpeuh leh gam khatpeuh a belhtak kicite pen lim takin kantel masa leng a thahat leh a vanglian (powerful) veva, a hausate hi masa loin a thuman leh a thutang mite leh gamte na hi zaw hamtang hi. Bang hang hiam cih leh tanglai hun pek panin panin kumpi gam thahat tuamtuam - Assyrian Empire, Persian Empire, Babylonian Empire, Roman Empire, Ottoman Empire, British Empire leh a dangdangte a khan' lai takun na thahat mahmah leh na hausa mahmah napi-un, a tawntungin a kipsuak na om lo hi. Thahatna leh vangliatna; hauhna i cihte pen a kip leh kho suak den na om lo a, a thahat leh a vangliante na thahat leh vanglian den lo uh a, a haute na hau den lo uh hi. Thumanna, thutan'na leh cihtakna lim takin a paai leh vomte pen a belhtak cing leh a muantham cingte na hi zaw hi. Thumanna, thutan’na leh cihtakna cihte pen sum leh paai tawh lei zawh ding hilo a, kuamah in hong guksak theih zong hilo hi.

Ei Tedim Chin Youth Association, Tedim Chin Union kipawlna leh India gam-a Zo minam kua omte kipawlna Zomi Council (ZC) ah namke (tribe) khat ahi Tedim Chin mite a muantak leh a belhtak cing khat i suah theihna dingin a muantak mite; muan dinga kilawmte (trustworthy people) i hih ding kisam masa hi. A muantak minam khat i suah theihna dingin Khristian biakna zuite i hih manin i phawk ding thu bang hiam cih i Lai Siangtho ah i ciahkik kisam hi. Paunak 3:3-10 sungah, “Thumanna leh cihtakna khahsuah ngei kei in la, na ngawngah tuate ok in, na lungtang tungah gelh in. Tua hi leh, Pasian' mai leh mite' mai-ah maipha ngahin na ma vang ding hi. Na lungsim khempeuh tawh Topa muang in la, nang' theihna suang kei in. Na hihna khempeuhah amah phawk in. Tua hi leh lampi man amah in hong lak ding hi. Nangmah a pilin kingaihsun tawm kei in la, Topa zahtakin a sia peel in. Tua hi leh nang adingin damna zatui tawh kibang ding a, na meimate hong damsakin na natnate hong daisak ding hi. Na neihsa leh na anpalte tawh Topa zahtak in. Tua hi leh na ansalte an tawh kidim ding a, beel dimletin leenggahzu na nei ding hi,” na ci hi.

Thumanna leh cihtakna khahsuah ngei lo mi leh minam, Topa a zahtak mi leh minam pen Pasian’ mai leh mite maipha ngahte ahi uh hi. A neihsa a anpalte tawh Topa a zahtak mite ansalte an tawh kidim ahih manin mite in a belhtak in ngaihsun pah uh hi. Leitung-ah minam belhtak leh muantak kicite pen thupha minamte ahi uh hi. Thupha i ngah theihna dingin Pasian a nei minam i hih kisam masa hi cih Late 33:12 sungah, “Topa, Pasian-a a nei minam, ama luah dingin teelna a ngah minamte thupha ngah ahi hi,” a cih panin kitel khinzo hi.

A bekhtak leh muantak minam i hih theihna dingin a muan theih; a nuamtak mi (trustworthy people) i hih masak kisam a, TCU leh TCYA makaite thuman leh citak mahmah napi-in, a mipite i thuman kei a, i cihtak kei leh a mawknapi suak veve ding hi. Mipite thuman leh citak mahmah napi-in, makaite na citak leh thuman kei citciat sese le-uh a mawknapi suak veve ding a, minam dangte muantak leh beltak minam kisuak thei tuan lo ding hi.

Muan theih dinga kilawm leh a muantak mite a kilahkhiatna lim (traits of trustworthy people) bang teng ahi hiam cih zong i ngaihsut masak kisam hi. A gina dinga muang; um (trust) cih pen a manpha mahmah suangmanpha sangin manpha zaw lai hi. I nuntak sungin midangte in hong up, hong muan ngam ciang bekin gamlapi kimainawt thei bek a, lawhcin’na lianpi i ngah theihna dingin tha hong pia hi. I inn sung vai, I biakna leh minam kipawlna vai, i nupa kikal, nungak leh tangval kikal leh lawmta kal ah kimuanna (trust) om loin kituahna, mainawtna leh lawhcin’na piang thei lo hi. Minam dangte in belhtak leh muantak hong sakna dingun muan theih dinga kilawm leh a muantak mite a kilahkhiatna lim nam sawm i neih masak kisam diak ding hi. Tuate in:

1. Amaute thuman hi cih theih, nialna ding om loin a sit ngiat uh hi (They are authentic): Tu hun pen gam leh minam vai (politics) leh biakna vai (religion) tawh kisai-ah thumanna leh cihtakna muh ding neu semsem a, kipawlna khat panin kipawlna dang ah hamphatna delh mi (opportunists) tam mahmah hi. Tua bang mite in tawm vei sung bek hamphatna a ngahna ding uh leh sum tawmkha bek ngahna dingin a thumanna uh leh a cihtakna uh tawh zuak ngam uh hi. Tua bangin thankik bangin a gial a laih themthum, na lulok (tadpole or pollywog) tawh a kibang mi i hih khak loh ding kidophuai mahmah hi. Thumanna leh cihtakna sit (authenticity) i khahsuah mateng minam dangte in muantak leh kingaktham cing hong sa ding uh a, hong zahtak ding uh hi.

I milip a tam miaimuai masak ding a kisam masa pen na hi lo a, i thumanna a sit cinten ahih ding leh i kipumkhatna a khauh ding kisam masa zaw hi. Thuman hi cih theih, nialna ding om loin a sit ngiat (authentic) mite a taktak (real) ahih manin a gamtat luheek, om dan, kampau uh midangte aa sangin sang zaw ahih manin tua bang mite pen midangte in belhtak leh nuantak sa pah uh uh hi. Tua bang mite midangte tungah om sawm sese loin deihhuai, kiniamkhiat leh hopih dingin neelhuai (likeable, humble and easy to talk to) ahih manun pawl leh lawm ding hau-in huai zo uh a. a beltak leh a muantak mi suak ziau uh hi.

2. Amaute kilaih themthum loin kibang (kihual) den uh uh hi (They are consistent): Mikang paunak ah, “Every dog has its day,” a cih bangun mi khempeuh in tuahphat ni a neih bangin tuaksiat ni nei kim ciat hi. Tua mah bangin gualzawh ni leh guallelh ni zong kinei kim ciat hi. Tua bang hi ta sese le zong midangte in a gualzawh leh a guallelh ni , a kamphat ni leh a kamsiat ni-in ahihna kilaih themthum loin a kibang ngitnget den (consistent) mi, gamtatna hoih (positive behavior) a lakkhia den mite mu nuamin pakta uh hi. Mite mit leh lungtang a zo zo i cihte pen thukhensatna khatpeuh ah kipsakna leh a pilhuai kilawm khensatna (affirmative actions and smart decisions) bawl theite ahi uh hi. Tua ahih manin a bangbang a piangin i tuak ta zongin i hihna manphatna (values) khahsuah loin i letkip cinten a, khensatna kip leh a pilhuai khensatna kilawm i neih theih peuh leh minam dangte adingin a ettehhuai leh muantham leh belhtham cingte kisuak ding hi.

3. Amaute sungah thuman thutang om in, nei uh hi (They have integrity): Tu hun pen minam vai leh khuasung kipawlna vai khatpeuh ah ki-itna a kiam semsem hun bek hi loin thuman thutang gum ngam ding mi a tawm semsem hun ahi hi. Hih bang hun lai takin i tawm ciuciau hangin ei sungah thumanna leh thutan’na i khahsuah kei a, i kampaunate leh i gamtatnate ah thuman leh thutang zo den peuh leng mi pawl khatte mit sungah meikhu bangin i sip hangin minam dangte i kiim-ah hong ding ding ngam ding uh hi. Politics leh biakna vaite banah politics vai mah ahi elections ciangin zong i thumanna sum tawh i zuak mang khak ding kidophuai mahmah hi. Minam dangte kiangah i a vote uhzuakin, candidate khat adingin vote leh ballot box guk cihte a ciing zongun i thumanna uh tua hun ciangin i zuak mang khak loh ding kidawm ni.

4. Amaute in hehpihna nei uh hi (They are compassionate): Minam muahuai leh belhtak cing khat i suah theihna dingin hehpihna leh lainatna i neih kisam hi. TCU leh TCSA members sunga cinate, sihna tuakte, cimawh leh meigongte tungah hehpihna i lahkhiat bek hi loin minam dangte tungah zong deidantuamna nei loin i lahkhiat ding kisam hi. Tua banga lahkhiatna pen i minam i laptohna bek hi loin i Khristian ngeina tawh zong kituak hi. Hehpihna leh lainatna haute pen midangte in belhtak leh muantak in ngaihsun pah uh hi. Ei angsung ding bek khual tentan kei ni. Ahi zongin inn gua hah lopi-in gam gua va hah masa dihdih kha kei ni. Kum sim in i TCU/TCSA members sunga dongtuakte leh mizawng ading bangin Christmas leh Kum Thak hun dek ciangin ei sungah silh leh ten, sum leh paai kaikhawmin i makaite a va puak dingin sawl thei zel le hang minam ettehhuai leh a belhtakte kisuak ding hi.

5. Amaute migi in cinh uh hi (They are kind): Ei sung bek hi loin minam dangte lakah i heisuk heitohna, minam vai tawh kisai kipawlna meetings hunte ah i va kihel ciangin zong ei ngaihsutna leh deihna lianlian tawh hong kibang loin thu hong pai loh ciangin zong i migitna leh citna i va lahkhiat zawh ciangin minamte zahtak i suah banah i muanhuaina a va kilangkhiasak kisuak ding hi. Midangte in hong muan leh hong hong up ngam ciang bekin belhtak hong sa thei pan ding uh hi cih mangngilh kei ni. Sum leh paai leh thatang hatna tawh minamte belh leh suan i hih khak leh sawt kip loin sawt kikhom zo lo ding hi.

6. Amaute in a hamsa pal zawhna nei-in phattuamna nei uh hi (They are resourceful): A muanhuai mi i cihte pen na thak sin beh nopna lungsim nei uh ahih manin a theihna uh khan’ beh semsem hi. Amaute pen a pil khinsa bangin kingaihsun masa loin sangnaupang hi ngitnget den uh hi. A hoih zaw suah theihna dingin khan; dei (room) om sak den uh ahih manin midangte thapia-in huh uh ahih manin midangte adingin a hamsa palzawhna ding a guan ban uh-ah, a manphatna uh midangte tungah hawmsawn thei uh hi. Tua ahih manin midam dangte belhtak sa uh hi.

7. Amaute pen kizoptuahna ahi uh hi (They are connectors): Lungsim kihong mite leh a kikhakcip mite tawh kizop theihna ding lampi omte zong uh hi. Tua ahih manin a theihna uh ahih kei leh a tuahkhakna uh panin a sinkhiatna (knowledge or experience) nei mite tung panin a kisapnate uh kicitlahnate sinkhia thei den uh hi. Hih thu hangin midang khatpeuh tawh baihlam takin kizom thei uh hi. Midangte tawh kipawl thei, kizom thei i cihte leh minam belhtak mite ahi uh hi.

8. Amaute kiniamkhiat uh hi (They are humble): A muanhuai mi i cihte in amau ma-ah midangte a om khak ding hazatna nei lo uh hi. Midangte tawh kipawlin nasep khawmna (teamwork) tawh hanciamna a manphatna leh mimal khat i sepkhiat theihna (individually accomplish) a kilamdan’na thei uh hi. Mimal khat bek i sepkhiat theihna sangin midangte tawm mapan’khawmna leh kipumkhatna a kibat lohna theitel uh ahih manin midangte huai uh a, midangte tawh kipawlin nasepkhawm ding hamsa sa lo hi. Hih thu hangin midangte belhtham cing mi suak uh hi.

9. Amaute a kitangsapna munte ah a baihsa in om uh hi (They are available): Amau angsung ding bek khual masa den lo uh a, midangte kitangsap hun lai takin a nai-ah a baihsa in na om uh ahih manin midangte leh minam dangte in suanhuai sap ah uh ahih belhtham cing leh muantham cing sa uh hi.

10. Pilna a man phatna thei uh hi (they know the value of wisdom): Tu hun in minam belh tham cing leh muan tham cing i suah theihna dingin pilna siamna mah i bulphuh a, i neih masak kul hi. Paunak 3: 14-18 sungah, "Pilna nei leng ngun sangin hoihzaw a, kham sangin zong manpha zaw hi. A manpha pen suangmanpha nangawn sangin pilna manpha zaw lai a, mihingte' deihtheih na lakah tehpih theih ding om lo hi. Pilna in khan' hong sausak a, hauhna leh pahtawina zong hong piathuah lai hi. Pilna in nuntakna hong nuamsak a, lungmuang takin hong omsak den hi. Pilna a nei mite a lungdam mi hi a, pilna a nei mite nuntakna singkung tawh kibang uh hi,” na ci hi. Pilna pen suangmanpha sangin manpha zaw pek a, nuntakna hong nopsak banah lungmuang takin hong om sak a, nuntakna singkung tawh kibang ahih manin pilna nei leh pilna a thupisim minamte minam dangte in belhtak sa uh a, muantham cing sa uh hi.

By: Thang Khan Lian

TRUMP' PERSONAL SPIRITUAL ADVISER PAULA WHITE IN ELECTRICITY BILL PIA LO DINGIN THU A HILH BANAH AMA KIANGAH A SUMTE HONG PIA UN CI

TRUMP' PERSONAL SPIRITUAL ADVISER PAULA WHITE IN ELECTRICITY BILL PIA LO DINGIN THU A HILH BANAH AMA KIANGAH A SUMTE HONG PIA UN CI

Feb. 18: RawStory in a genna ah Trump' personal leh White House spiritual adviser, prosperity gospel preacher Paula White Miami khuapi-a a Supernatural Ministry School in, "Khris' nungzuite (Christians) in kha sim in meitha a pia/hawmkhia Florida Power and Light (FPL) kiangah mei bill a piakte uh pia nawn loin ama pawlpi non-denominational, multicultural megachurch New Destiny Christian Center, Apopka, Florida leh ama phuankhiat pawlpi South Tampa Christian Center, Tampa' tunga electricity bill hong pia ta un," ci-in va gen hi ci-in a thugen gen sawn hi.

Paula White in FPL tungah electricity bill kha sim in Christians ten a piak uh pen electric company ahi FPL kici Pasian sangin na hoih bawl zawkna uh na lahkhiatna uh leh FPL company Pasian dinmun in na koihna uh ahih manin note gim na kipiak tawmna uh hi ci hi.

Paula Michelle White-Cain pen Trump tawh a mizia uh a kilamdan' luatna uh om lo hi. April 20, 1966 ( kum 53) in Tupelo, Mississippi, U.S. ah piang a, kum 18 a phakin vision ka ngah a, Pasian in thugen dingin hong teel hi ci hi. 1984 kum in Dean Knight tawh kiteng uh a, ta pasal khat a neih khitun kikhen uh hi. A tapa uh reengage mi hi a, zungol vei (alcoholic) hi kici hi. Tua khitin 1990 in prosperity preacher mah Church of God denomination biakna sia, ta thum nei khinsa Randy White kiten'pih a, nu kik dingin a va kuan hangin 2007 in kikhen kik uh hi. April 27, 2015 in American musician, songwriter, singer leh keyboard tumsiam leh 2014 in a zi a ma Journey rock band singer Jonathan Cain ten'pih kik leuleu hi.

Paula White in pasal nihna Randy White tawh Lakeland property a lei khit uh kum thum khit zawh 2008 in financial bankruptcy tuak uh a, a pawlpi nih Evangelical Christian Credit Union leh Without Walls International in mortgage in a neihna uh 2013 in zuak uh hi. Paula White pen pawlpi thak phuankhia kawikawi in sum zong hi a, March 4, 2014 in senior pastor in New Destiny Christian Center, Apopka ah a sep lai-in Without Walls International Church Chapter 11 federal bankruptcy protection cih tawh court ah file hi. Evangelical Christian Credit Union in a church in $29 million hong ba hi ci-in a church locations mun nih a kikhaksak lohna dingin court ah "litigation tactic" filed hi. Tua hi napi-in CNN' Erin Burnett kiangah White in bankruptcy ka filed ngei kei a, Without Walls pawlpi panin kitawp ka hih manin financial bankruptcy a tuahna vai uh kei tawh kisaikhakna nei lo hi ci ngam lai hi.

American evangelical Christian author, psychologist leh 1977 of Focus on the Family (FOTF) phuankhia James Clayton Dobster in June 2016 in a genna ah Trump Christian a suaksak Paula White hi ci-in minphatna pia hi. White in Donald Trump' political opponent (langte) in aisan'na leh dawi thu zang uh hi (operate in sorcery and witchcraft) hi ci-in ngawh a, January 5, 2020 in a thugenna (sermon) ah Trump in May 2019 in a thupha piakna tawh official recognition a piak banah siah a maapsak Satanic Pawlpi members naupaai khempeuh a nau uh a siat leh tolhna dingin hamsiat ahih manin mawhpaihna lianpi tuak hi.

Paula White leh televangelists dangte in Without Wall pawlpi panin a ministry nasepna leh hauhna Lungdamna thu (prosperity gospel) a genna hangin millions dollars ngah a, a sum ngahna man lote religious organization’s tax-exempt status panin a awk khak lohna dingin inconclusive 2007–2011 Senate Finance Committee investigation kici thukanna a tuah hangin na kithuahpih (cooperate) nuam lo hi.

Conservative Christians hunkhop in Paula White in Jesuh pen Pasian' tapa tangkhat neihsun bek hilo hi ci ahih manin 325 kum in Nicaea khuapi-a First Council of Nicaea ah Trinity (Pa, Tapa leh Kha Siangtho pen pumkhat hi cih doctrine a kikipsakna) tawh a upna kituak lo ahih manin a Christian thu upna leh Chistrian doctrine kituak lo (heresy) hi ci-in ngawh uh hi.

June 2018 in Paula White in Trump' illegal immigration policy a gupna in Herod in kum nih nuai naungek a thah sawm lai-in Egypt gam-ah Jesuh a nu leh pa in a va galtaipih uh pen illegal hilo a, mawh hi leh Messiah hi thei lo ding hi ci hi. Hih bangin White' thugenna American Protestant minister, political activist, national board of the National Association for the Advancement of Colored People (NAACP) member leh chair of its Legislative Political Action Committee len Rev. William J. Barber II in a dawn'na ah, " White pen Christian nationalist hi a, Jesuh pen refugee ahih banah thukham (law) palsat hi (Judahte' Sabbath thukham zong). Roman Law nuai-ah thukham palsat (felon) mite kikhailupna singlamteh tungah khailupna thuak hi," ci hi.

Evangelical Immigration Table group makai Matthew Soerens in Jesuh' hun lai-in illegal immigration cih bang om lo hi ci-in White in Jesuh vai a genna ah thukham palsat lo a cih pen man lo a, LST sungah Egypt kumpi Faro in Judahte thahna ding a thupiakna Judahte in na palsat (Moses' vai bang) uh a, Roman Law a palsat manun Jesuh nungzuite zong thong na kia uh hi ci hi. Rapper leh Christian pastor Shai Linne ah a la khat ah White pen sia man lo hi ci-in, "Fal$e Teacher$" ci la sakkhum hi.

LST sungah Pasian in sawm ah khat pen keima aa ci-in hong kalh bek (Siampi Laibu 27:30; Malakhi 3:8:-11) ahih manin electric bill nangawn Pasian zahin a kingaihsun a kalh leh mi' neihsa i zat man pia loin guk dingin tha hong piate Christian leh sia man a kici ngam zen tam? Hih bang mi spiritual adviser dinga guai mipa Christian thu upna a zuih ngam huai zen tam maw? Siampi Laibu 20:10-15 sungah neih kibang kiten'na leh ganhing tawh mawhna bek suang tawh denlup ding mawhna hilo a, angkawm mipa leh a numei zong suang tawh kidenglup ding cih Pasian in Moses' tungah na gen hi. Jesuh in "Kimakna Thu" a genna Matthai 19:9 sungah a zi/pasal midang tawh mawh lopi a ma-in midang a tenpih mipa/minu pen angkawm (adulterer) hi na ci hi.

Thukham bek bulphuh in mittaw sialkhau let ding i hih teta a LGBT community leh abortion bawl (nauphiatte) a mawhpaihna thu bekbek a gengen Paula White leh Trump zong suang tawh denlup kul lo ding maw? En zong thukham zui zo lo napi-in midang thukham palsatte bek mawhsakna pen eima mit sunga singluang tang lakkhiat masak lopi-in midangte mit sunga ninthem a lakkhiat sawm mi hoih a kineihkhem Fairai mite' ngeina hi bek a, Christian mite' ngeina hilo hi. Thukham zuih zawhna bek tawh hotkhiatna kingah zo ding ahih mawk leh singlamteh tungah Jesuh hong sihna a mawkna suak ding hi. Suang tawh denlup theih ding mawhna bawlte in suang tawh denlup theih ding mawhna bawlte denglum thapai den mawk leng leitung ah kua tu kua ta nungta nawn maw ding?

@ Thang Khan Lian #ZUNs

https://mavenroundtable.io/theintellectualist/atheism-secularism/trump-pastor-tells-followers-to-skip-paying-electric-bills-and-send-her-the-cash-AZIBwN5fLU-SY09vED7dYQ/?utm_source=SP&utm_medium=SP&utm_campaign=SP&utm_term=SP&utm_content=SP&fbclid=IwAR3CpbRsuJQ1xr5sxHO6Ciy9D29Zlc0ehji5MT3_bzeP5WUbH6tXSffA1iU