TRUMP' REPORT CARD: A GAM SUNG (DOMESTIC) POLITICS BUAINA PANIN FOREIGN POLICY TONA TAMPI NAWK DING NEI LAI
Jan. 18: President Donald Trump in US presidencies luite sepkhiatna kan lopi in ama presidency hun-a nuclear mekna (button) golpen hi a cih bek hilo in a sepkhiatna a thupi pen, a golpen hi ci-in kisialpih hi. A beisa kalte ah Trump in a Twitter leh a thugennate ah ama hun in stock market a khan'na thu nak kisiahpih mun mahmah ta hi. Jan. 5, 2018 in a Twitter ah, "November 9, 2016 in Dow Jones 18,589 panin tu ni-in a kiciamteh lak panin a sangpen 25,075 in khang a, a beisa nipi kal nga panin tangthu adingin record sangpen 1000 points in khang hi. Hih pen Make America Great Again agenda i cih ahi hi! Nasepna, Nasepna, Nasepna. a sum a tuatin (value) 6 trillions dollars," cih tuangsak hi. (A nuai-a charts-te en lecin a zuau bulomtang gen leh tangthu kan lo leh thei lo ahihna na mu ding hi).
Trump in tangthu adingin a sangpen hi a cih pen bang dang hilo a, Obama' hun a stock market record leh ama hun a etteh a gen na hi bek hi. "Fake News Media ten Stock Market ah record thak a pian' lam leh US economy khan' lam gen mel lo uh hi. Ahih hangin mipi ten tua thei uh hi. Gentehna ding President "O" in hih zah nambat ngah hi leh leitung adingin tangthu lianpen hi ding hi. Tu-in Dow points 25,000 val ta hi," ci-in Jan. 5 in a Twitter ah tuangsak hi.
Trump in Dow points a khan'na thuman tawh lah ding (evidence) nei a, stock market khan'na thu a kisialpih den hangin US presidents luite hun ah zong nasia sem in na khang ahih manin ama hun a stock market khang a kisiahpih det hangin thuthak hilo hi. A nambat a en hi leng Trump hun a khang pen a sang pawl hi mah hi. Nov. 2016 in Trump in gualzawhna a ngah a kipanin Dow Jones Industrial Average a et nop leh hih link panin na en in http://www.politifact.com/…/how-trump-obama-compare-stock-…/ .
Hih nambat en leng Jan. 5, 2018 in a tweet ma dong Dow points khanna pen 18,589.7 panin 2,5075.1 hi a, 35% pha dek tak ahih manin Dow points bek etin Obama hun sangin khangsak zaw hi cih kimu hi. Obama in a let (tu-a Trump' let hun etin) Dow points khan'na pen 9,139.3 panin 10,572 in khang hi (a tunga link na mek lecin kitel takin et theih hi). A points khan'na timeline i et ciangin kilaihna lian lua lo a om hangin kilawmdan'na lianpi piangsak hi. Ahih hangin Trump' presidency pen kum khat phakna ding ni nih in sam lai a, kum thum val om lai ahih manin a nasepna hoih mah hi ci-a genkholh theih hi nai lo hi.
Bang hang hiam cih leh Jan. 20, 2017 in president a let ni leh Jan. 5, 2018 in Dow points khang zah leh Election hun kibang lo hi. President a let cilin Dow points 19,827.3 panin 25,075.1 khang a, 26% tungzo ahih manin tam khang veve hi. Trump' president let hun tawh Obama' president let hun enkak hi leng Obama' hun in Dow points 7,949.1 panin 10,572 in khang a, 33% tak khang ahih manin Obama demzo lo hi.
Obama' presidency hunin Great Recession kici hangin US economy nakpi takin a kiat in, a niam pen a tun hangin Dow points May 9, 2009 in na nak khan' zaw a, 6,547 tak tung veve a, president a let a kipanin kha sawm sung Jan. 5 in 61% takin khang hi. Tua ahih manin Trump president sangin Obama presidency hun a khang pen a leh nih phialin tam zaw hi. US president luite tehkak ding hi leng Trump presidency pen market ah a ciamteh tham hilo hi. A beisa president luite en pak hi leng Presidents Obama, Bill Clinton leh Ronald Reagan presidencies term nih (kum 8) sungin nambat li percentage khangzo a (three-digit percentage increases), three-digit percentage a khangsak zo lo pen Great Recession hangin Republican President George W. Bush hun a kum tapna ahi hi. A nuai-a chats en lecin a dum pen Democrats presidents, a san pen Republicans presidents hun a Dow leh market ciamtehna hi a, Republics ten Democrats presidentte khan'sak zah dem zo dek lo uh hi. US President lui li etna panin Clinton leh Obama demzo om lo uh hi.
President lui lite record etna:
1. Length of term
2. Closing Dow Jones Industrial Average
3. Percentage increase in the Dow Jones Industrial Average
*Barack Obama: 1. 8 years ; 2. 19,827; 3. + 149 percent
*George W. Bush: 1. 8 years; 2. 7,949 -3; 3. 25 percent
*Bill Clinton: 1: 8 years; 2. 10,578 ; 3. + 227 percent
*George H.W. Bush: 1. 4 years; 2. 3,242; 3. + 45 percent
*Ronald Reagan: 1. 8 years; 2. 2,235; 3. + 135 percent
*Donald J. Trumm: Kum thum sung ngak lai ni.
Stock market a khan' hangin gam economic cidam hi cihna zong hi pah lo hi. Bang hang hiam cih leh US gammi khempeuh in stock market ah sum a meet dingin koih (invested) lo uh ahih manin stock market ah Dow Jones points khang pen economic metric adingin a poimawh pen na hilo hi. Trump administration in taxes leh regulation lamsang ah policies nak bawl mahmah ahih manin stock market growth, van man khang/kiam vat (inflation) niam a, corporate (mihau sumbawl) ten meetna ngah uh hi ci-in experts ten ci uh hi. Destination Wealth Management phuankhia leh Destination Wealth Management a CEO Michael Yoshikami in, "Stock market khan' ciangin minhoih lak ding thuhoih hi. Ahih hangin kia leh kua'n minhoih la ding hiam? Tua ahih manin stock market kia leh gensiatna tuah ding tam zaw ding cihna hi," ci hi.
*Jan. 20, 2017 in Trump in US 45th President len a, Obamacare phiatna dingin executive order suai masa pen a kaih pah hangin tampi vei phiat sawm napi tu dong phiat zo nai lo hi.
*Jan. 23 in Obama' makaihna tawh kibawl Trans-Pacific trade deal sumbawlna thumkimna khawlsanna dingin executive order suaikai hi.
*Jan. 8, 2018 dong Trump in Executive orders, memoranda leh proclaimations orders 389 suaikai ta hi.
*Feb. 13, 2017 in National Security Adviser in Russian ambassador Sergey Kislyak a kimuhpih manin kiteelna ah kigullukna om hi ci-ih ngawhna a om manin kitawp hi.
*Trump in golf clubs mun 88 pha-in hunnuam zangin kimawl a, a hun mawk beisak in siah piate sum mawk beisak hi ci-a phun tam mahmah ta hi.
*April 7 in Senate in Trump in Conservative sung panin Supreme Court judge a 34na dingin Niel Goruch a thukimna pomsak hi.
*May 9 in Trump campaign leh Russia kigullukna thukan FBI Director James Comey kici pa Trump in tawpsak hi.
*May 19-26 kikal in Trump in a masa pen dingin gamdang zinkhiat kipan a, Saudi Arabia, Israel, Vatican, Brussels leh Italy gamte pha hi. Saudi tawh $ 110 arms deal ka bawl hi ci-in a gen hangin tua zah seh thum suah seh khat zong pha lo hi kici a, Obama hun a beisa a thukimna suai kikaisa teng tawh a genkhawm na hi zaw hi.
*June 1 in Trump in leitung bup in khuahun kilaihna leh khualum dona dingin kipawlkhawmna 2015 Paris Climate Accord panin US ka dokkhia ding hi ci-in pulak hi.
*July 21 in White House Press Secretary Sean Spicer kitawp a, a zalaih dingin Trump in a phat mahmah Anthony Scaramucci WH Communication Chief dingin guang hi. Ni 20 khit nungin tawpsak kik pah hi.
* Sept. 19 in Trump in UNGA North Korea gam makai Kim Jong-un zahko a, "Rocker Man pen amah leh amah suicide mission manawh hi," ci-in North Korea gam leitung panin nuaimang dingin vau hi. Kim in uihai ham ci-in dawng kik hi.
*US State Department ulian a tawpsak leh a amau leh amau kitawp 100+ val pha hi.
*Oct. 12 in leitunga na/mun lui manthang baih dingte kepbitna ding, science leh siamsinna lam laptohna ding leitung bup kipawlna UNESCO panin US dokkhia hi.
*Oct. 17 in Syria gam-a IS khuapi Raqqa lakna dinga nawk rebels tuamtuam kipawlkhawm Syrian Democratic Forces gum a, galvan tampi pia hi.
*Oct. 17 in Special Counsel Robert Muller in Russia tawh Trump campaign kigullukna vai-ah Trump huh ngei Paul Manaford, Rick Gates leh George Papadopoulus kigullukna ah mawhpaih hi.
*Nov. 7 in Virginia leh New Jersey Governor kituhna ah Democrats ten gualzawhna ngah uh hi.
*Dec. 3 in galtaite leh gambeelte huhna dinga kibawl UN Migrant and Refugee Pact panin US dokkhia hi.
*Dec. 6 in Israel khuapi dingin Jerusalem a ciamtehna thu leh Tel Aviv panin Jerusalem ah US embassy laih dingin pulak hi.
*Dec. 8 in Trump' top West Asia Adviser Dina Powell in White House ah ka sepna ka khawlsan ding hi ci-in pulak hi.
*Dec. 12 in Alabama state Senate election ah Democrats candidate Doug Jones in Trump' gup Republican Roy Moore zo a, Republicans ten kum 25 val a tutna uh a khahsuah masakna pen uh suak hi.
*Dec. 20 in Senate in kum 30 khit adingin US tax system laihna ding thukimna pia a, Trump adingin legislation ah a gualzawhna lianpen masa pen suak hi.
*Trump presidency sungin stock market growth a kisialpih den hangin a tangpi/a lom a etin average growth 20% bek tung hi ci-in Graphic News in ci hi.
*Trump in Bills suai a kaihte lak panin 99 bek thukham (law) suak zo ahih manin 1953 khit nung US Presidents lak panin Bill suai a kaihte thukham suaksak zo tawm pen in ciamtehna ngah ahih manin Trump' White House pen nasem lo leh vatawt khebai (dysfunctional and lame-duck White House) ci-in kiciamteh hi.
*Trump in nasepna (jobs) 2017 in 1.06 millions ka piangsak hi ci-in ama mimal nasepna bang keekin a kisialpih pong hangin 2016 in Obama in nasepna 2.24 millions na piangkhia zo hi.
*Trump' president nasepna thukimpih 37% bek pha zo hi.
#My take: Trump nasepkhiat lak-a ciamteh tham omsun pen leitung bup kipawlna panin US dokkhiat, gam tuamtuam vau den, a Twitter panin a ut teng genin media ten gal bawlna thu khahkhiat, huhna piaksate kisiahpih in khiam, gambeelte, galtaite US lut ding dal cih bang hi lai hi. Nasepna leh markets leh economy khan'na a kisiahpih hangin president luite hunin zong na khang lua a, ama ' hunin a khan lua hi tuan lo hi. Kum khat zong len nai lo ahih manin a hoihna thukhensatna bawl pah ding baih lua lai hi. US President lak panin a ciamteh tham lo pen pawl ahih hangin "Kei pen a kip/kho mahmah, a ciim ngiat ka hi hi," ci liauliau hi. (I'm "a very stale genius"). Trump leh amah gumte thugente pen Fake news leh zuau bulomtang, kiphatna leh "Trump in US economy khangsak a, sepna tampi piangsak hi" cih gen belin a neih hangun President luite tawh teh in a hoih hilo hi. Amah bel president luite record hoih nei om lo bangin vote zong lai bangin pau phiatphiat a, thukhan mel lo amah pumgup ten a thugen teng um in upmawh teng genin pumphat ngam eueu lai uh hi.
Source: Politifact; Independent; VOA; New York Times: The Wire; The Guardian; and The Hindu
@Thang Khan Lian #ZUNs
