IRAQ AH IS-TE A HATNA DINGIN US IN IS-TE HUH

IRAQ AH IS-TE A HATNA DINGIN US IN IS-TE HUH

April 17, 2016: Iraq gam-a ISte do dinga kipiakhia Iraqi volunteer forces (hihte pen pawl tuamtuam kipawlkhawm hi) kicite commanders ten US leh Iraq gam kiim-a gam tuamtuam ten ISte Iraq ah a hat theihna ding leh a suaktak theihna dingun huhna pia zom zel uh hi ci'n gen uh hi. Ansarullah al-Nujaba Movement spokesman Hashem al-Moussavi in nung Nilaini in US in Iraq ah gamnuaimi ngongtat tuamtuamte huhna pia zom zel lai hi ci'n gen hi. Fars News Agency in a genna ah US in ISte huh hi cih lahna ding lai poimawh (documents), video leh maante al-Nujaba Movement galkap ten kaikhawm uh a, tua-ah US makaih leh a pawl ten (US-led coalition forces) Iraq ah ISte huhna ding vanleng panin a khiat laitak uh video in lak uh hi ci'n Hashem al-Moussavi in gen hi ci hi. Al-Nujaba Movement spokesman Hashem al-Moussavi in a gen behna ah al-Nujaba Movement galkap ten ISte nai kal 48 nasia takin kido a, IS ten lel ding hi cih a kitheih ciangin US ten vanleng zangin ISte zat ding siktum (mortar shells) leh galvan tuamtuam hong khiat uh hi ci'n gen hi.

Seyed al-Shohada battalions kicite politburo Hassan Abdel Hadi in zong a genna ah said US ten ISte do dinga ISte ukna sunga om Iraqi volunteer galkapte hong kap niloh kiheh mahmah hi ci'n gen hi. Iraq a volunteer galkap ten ISte a mun tuamtuam ah kizawhna munte IS ten a lak kik theihna dingin US in huhna pia a, ahih hangin Iraq ah pawlkhatin US makaih leh a pawlte zuau leh ngian um veve lai ahih manin dahhuai mahmah hi ci'n gen beh hi.

February kha in zong Iraq ulian min gen loh khatin Iraq ah ISte tu dong a suahtak theih laina uh pen USte huhna hang bek hi ci'n na gen ngei hi. US ten helicopter zangin Fallujah khuapi sunga om Albu Arim panin IS makai lian tampi pua khia uh hi cih lahna ding (evidence) kinei hi ci'n FNA newste kiangah gen beh hi. Hih IS makai liante puak khiatna dinga kizang vanleng cing dingin US ten a helicopter uh zang uh a, tua hun lai takin pua khia kei le uh Iraq galkapte IS makai lian teng that ding uh hi ci'n gen beh lai hi.

Nung kum October in zong Kata’ib Hezbollah (Hezbollah Battalions) popular forces kicite spokesman Jafar al-Hosseini in IS makai kimante thusitna kinei a, US in huhna tuamtuam - logistical backup and intelligence support hong pia uh hi ci'n hong gen uh hi ci hi. US ten galvan bek tawh ISte huhna pia loin Iraq galkapte panmun leh ISte a do hun ding uh thusim (intelligence) nangawn pia lai uh hi ci'n gen beh hi. Beiji khua a kido ding lai-in zong US ten ISte commanderte kiangah Iraqi popular force (galdo dinga kipiakhia pawl tuamtuamte genna) ten Fallujah hong do lo ding uh a, Beiji hong do ding uh hi ci'n thu na pia khol uh hi ci'n gen beh lai hi. Jafar al-Hosseini in Nilaini in Anbar province panin US galkapte a kipuakkhiatsak khit ciang bekin Ramadi khuapi kila zo siang pan ding hi ci'n gen hi. "Ka galkapte un tu lai takin operations nih - Ramadi khua ISte khut panin lak ding leh Anbar probvince panin USte hawlkhiat ding tavuan nei uh hi," ci'n FNA newste kiangah gen hi. Anbar province panin US galkapte kinotkhia leh Salahuddin province sung leh Beiji khua lak ding manlang tuam pen ding hi ci'n gen beh hi. .

Iraq ulian ten zong Syria ah Takfiri terrorist group (Sunni Muslim gamnuaimi kipawlnate genna) do ding cih pau lamin US ten Syria ah ISte galvan piapia hi ci'n ngawh mun mahmah ta hi. Nung kalin zong Anbar province sungah US ten vanleng tung panin ISte ading galvan khiat uh ci'n Iraq police ten gen uh a, a khiat lai un USte vanlengin Hadisah Tuikulh-a Iraq policete kihona khaktansak (communication jammed) uh hi.

-Your News Wire

MIPILTE I CIH IN

MIPILTE I CIH IN

• A nap a nit ciang mun teng gam teng singkhuah tung, suangthu tung, khuam tung leh tutphah tung cih bangah siak kawikawi, tat pahpah cih bangin hih nuam lo hi.
• A cil pen lam pai lai, mi tawh kiho lai, kikhop laitak khawngin se ziauziau nuam lo hi.
• A khaksuah zong an nek lai, kikhopna sung, sanginn sung cih bangah la daldal nuam lo hi.
• A zun a ek a suah ciangin zunbuk ekbuk zuan hi. Numei hi-in pasal hi leh lam pai lai peuh, mi muhna peuhah tha suk pah, pek pah cih bangin hih nuam lo hi.
• A zing thawh phetin a mai phiat pah hi. A kam khuah pah hi. A ha nawt siang sinsen hi.
• Ha kawm ah an neng bang peuh, zanah tepna ha vom neinai peuh tawh lawmte mai-ah pau ding, nuih ding sitai sa lo hi.
• A zanah tepna hangin mite in mawtaw, meileng, vanleng, teembaw a kham lawh khak ding dahhuaisa hi.
• A um, a beel, a nik, a puan, a inn, a lo a siangtho sak hi.
• Van zat khat peuhpeuh a senna mun a neisak dimdiam hi.
• A zinte, a lenglate in a nopsak theihna ding, lungkim na’ngin a hopih thei hi.
• Mi inn-ah a hawh ciangin hita leh, mi inn-ah a tun ciangin innteekte lungsim thei-in, innteekte mitheek a en gige hi.
• Naupangte amah sang khangno zaw mite nopneh bawlin kam kilawm lo pipi tawh hai hopih zanzan cih bangin hih nuam lo hi.
• Amah sanga teek zaw, hamzawte hehpihna nei a, zahtak bawl siam hi. Amah zong ni khat ni ciangin amau bangin teek ding, vuai ding, tha tual ding ahih lam a kiphawk hi.
• Mizawngte, gentheite, tagahte, mi bang lote a muhkhak ciangin, a tuahkhak ciangin nuihsan mawk loin hehpihna leh khasiatna tawh a en tawntung hi.
• A gam leh a lei khualin, thu manpha la manpha kan a, Pasian zahtakin thunget a hahkat hi.
(Beh lapna: Biakinn a kai ciangin biakinn sung khawng leh mi inn khawngah a hawh ciangin a phone tawh buaibuai loin, mekmek lo, paupau lo hi)

(Sia Khup Za Go in Zo Aw, April-June, 1986, laimai 18-19 panin a gelhna panin kiteikhia ahi hi).

ZOMI CIH CIANGIN

ZOMI CIH CIANGIN

Zomi cih ciangin:

Zo ngeina limtak lenin, puahin, kipsak hi.
Zo pau limci sakin, khangsak hi.
Zo lai bulbawlin mainawtsak hi.

Zomi cih ciangin:
Zogam itin, khual hi.
Zo la phuakin, sa hi.
Zo heisa hahin, etlawmsak hi.

Zomi cih ciangin:

Zo min phuakin , thangsak hi.
Zo puan silhin, kizem hi.
Zo nik tengin, kalsuan hi.

Zomi cih ciangin:

Zo Minam Ni phawkin, tang hi.
Zo Kum Thak bawlin, Khua do hi.
Zo suan Zo note pantahin, don hi.

Zomi cih ciangin:

Zomi in Pasian’ lim leh meel hi,
Zogam in Pasian’ khutma hi,
Ci-in um in, mi dangte a it hi.

(Sia Khup Za Go in Dec.22, 1983 ni-in a gelh Zo Aw Vol I, No.3, July-Sept. 1985 a kisuaksak laimai 18 panin a kiteikhia ahi hi)

ZOMI-IN KA SUAK HI

ZOMI-IN KA SUAK HI

Zomi-in ka suak hi,
Zomi-in ka nungta hi,
Zomi in ka si ding hi cih thu -

Kam dimdim tawh i kikopih hangin,
Dalpau lasakna tawh i gualnoppih hangin,
Laibu leh thukizakna ci tengah i kuih hangin,
Zomi leh Zogam in a phattuampih ding,
Mizawng leh gentheite in a phattuampih ding,
Khua lian leh khua tate in a meet lawh ding,
Sepna i neih kei leh:

A ging thei zam leh khuang ahi zongin,
A kitum thei daltuah leh daktal ahi zongin,
A kimut thei tamngai leh pengkul ahi zongin,
Tawh a kibang i hi ding hi.

(Sia Khup Za Go in Zo Aw, Vol. I, No.3 July-Sept, 1985 ah a gelh laimai 22 pan a kiteikhia ahi hi).