UNESCO PANIN ISRAEL IN A KIDOKKHIATNA DING NOTICE PIA

UNESCO PANIN ISRAEL IN A KIDOKKHIATNA DING NOTICE PIA

Dec. 30, 2017: US nungzuihna dingin United Nations Educational, Scientific and Cultural Organization (UNESCO) panin kidokkhiatna (withdraw) dingin Israel in notice file ta hi. Israel in East Jerusalem a ukkhumna a gensiatna hang leh 2011 in full membership a piakna hangin 2011 khit nung Israel in UNESCO nakpi takin mawhsak hi.

UNESCO Director-General pi Audrey Azoulay in zan in UNESCO panin Israel in kidokkhiatna dingin thukhensatna a bawlna hangin poi kisa mahmah hi ci hi. Siamsinna, ngeina leh science lamsang laptohna dinga kibawl UNESCO ah 1949 panin member a kihel Israel in UNESCO a mun man nei hi ci-in gen beh hi.

Israel leh US in UNESCO panin kidokkhiatna dingin zaksakna "withdrawal notice" kici October kha-in na pia uh a, Dec. 31, 2018 panin official in kidokkhiat ding ci napi UNESCO ah permanent observer mission ding na delh ding uh ci haihai lai dep uh hi. US Department of State in UNESCO panin kidokkhiatna ding zaksakna a piakin UNESCO pen "Israel langpang a khentuam nei" ("anti-Israel bias") leh "kipuahphatna poimawh a neih ding hi" ci-in ngawh hi. Tua khit a sawt loin Israel Prime Minister Benjamin Netanyahu in UNESCO panin Israel kidokkhia ding a, UNESCO pen "kimanna nei lo theatre hi" ci hi.

UNESCO kitheihna pen leitunga mun leh go manpha kiluahsuk sawn omte (heritage) humbitna dinga a nasepna thupi diak a, tuate lakah World Heritage sites munte humbitna ding hahkat mahmah a, gam khangto laite (developing counties) ah pilna leh siam sinna ding lamsang nakpi takin nasem hi. May kha-in UNESCO in Jerusalem vai tawh kisai a resolution ah Israel in East Jerusalem UN resolution palsatin a ukkhumna nakpi takin gensia hi. July kha-in UNESCO in Israel in a ukkhumna West Bank a Hebron sunga om Old City pen a mangthang baih ding leitung bup mun poimawh (endangered World Heritage site) hi ci-in a ciamteh manin Netanyahu in UNESCO in Judah mite munte thusim loin awlmawh lo hi ci-in ngawh a, UN ah huhna sum $1 million piak kikhiam ding hi ci-in na pulak hi.

Hih bang thukim lohnate UNESCO sungah kigen veng a, UNESCO pualam ah kigen veng ngei lo hi ci-in UNESCO Director-General pi Audrey Azoulay in ci hi. "UNESCO member states sunga thukim lohna omte vote khiatna tawh kivengsak a, kitelsiam lohna ven'sakna ding kihona (dialogue), kipawl a nasepkhawmna (co-operation) leh kithuah a nasepkhawmna (partnership) tawh ni dang sangin kinak hanciam zaw hi ci-in gen beh hi.

#Behlapna: Israel ah UNESCO' World Heritage List sungah mun kua kihel a, tuate lakah Tel Aviv khuapi-a White City, Negev khua-a sehnel khuapi lak-a om Incense Route leh Mount Carmel a om human evolution kicihna munte kihel hi. US i cih pen member gam 195 kihelna, kum 78 a upa hi a, November 16, 1945 in kiphuankhia ahi hi. Thunei ut leh thukhel gam nih kidokkhiatna hangin a dau tuam ding hilo ahih manin a genhak leh gam khatin ek a ek a nek leh ek ne pah ngam leh gam khat leh minam khat a nengniam nuam ut leh dictator banga leitung bup kipawlna a thunei nuam teng kidokkhia mengmeng lai leh vaisiang zaw ding hi.

Source: Al Jazeera
@Thang Khan Lian #ZUNs

KUMPI LANGDOMITE BEISAKNA: ANALYSTS IN BANG HANGIN US LEH ISRAEL IN IRAN MAISAK ZO LO DING HIAM CIH GEN

KUMPI LANGDOMITE BEISAKNA: ANALYSTS IN BANG HANGIN US LEH ISRAEL IN IRAN MAISAK ZO LO DING HIAM CIH GEN

Dec. 30, 2017: US National Security Council (NSC) source in Sputnik kiangah Tel Aviv leh Washington in Iran gamtatna minsiatna (malign) dingin nasemkhawm mah uh hi ci-in gen hi. University of Tehran a professor leh political analyst Mohammad Marandi in Sputnik Radio kiangah bang hanga US leh Israel in Iran galbawl hiam cih gen hi.

Sputnik: Iran panin vauna/kihtakna "Iranian threat" kici Israel Prime Minister Benjamin Netanyahu leh US President Donald Trump in kido ding hi a cih bang muhna na nei hiam? Iran gam gilo; dawi bang suahsakna (demonizing) dingin a hanciamna uh bang teng lawhcing ding uh hiam?

Mohammad Marandi: Iran dawi banga suahsakna ding hanciam den uh a, Iran galbawlte huhna pia den uh hi. Israel in Lebanon ukkhum ahih manin Lebanon' suahtakna dingin Iran in national liberation movement a gupna leh huhna a piak manin Hezbollah hong piangkhia hi. Hezbollah ten Israel a do-in Israel in a leh pian ciangin Lebanon nusiatsan hi. Tu-in Iran in Palestine mite gum a, Iran in South Africa ahi a Palestine ahi zongin minam deidantuamna (apartheid) a kipat cil panin gum hi. Tua hangin Iran hong kigalbawlna kipan hi.

Kei ngaihsutna ah tu nai diakin Israel in Syria ah kumpi langdo kipawlnate (extremist groups) a gupna pen Saudi Arabia cihte tawh kipawlin Middle East panin huhna pia uh hi. Tu-in al-Qaeda, al-Nusra Front cihte Syrian-Israeli border a om uh a, a liamte (PM Benjamin Netanyahu') Israel regime in na kem in na don hi. Tua gamgi kiim mah ah IS (Daesh) om napi Israel in IS leh a pawlte khat vei beek kap ngei nai lo hi. Israel ten Syria thanemna ding hanciam a, a beisa kum nih panin Hezbollah, Russia, Iran leh adangte huhna hangin Syria gam-a lumpi langdote Syria leh Iraq ah zo uh hi. Tua hangin Israel in a thanem kisakna lungsim nei hi. Saudi Arabia tawh a kipawlna uh sawt mahmah ta ahih manin US leh Israel pangkhawmin a kimuhtuahna hangun bangmah kilaihna piang tuam lo dingin ka ngaihsun hi.

Sputnik: US leh Israel' geelna pen Middle East ah Iran' gamtatna ngim ding cih ahi hi. A geelna bangun semkhia le uh Middle East kiim a gam khat leh khua leh tui leh a kiim ah buaina (local conflicts) piangsak lo ding hiam?

Mohammad Marandi: He, hi kik zel mah hi. Western media ah na muh tawh na kibang lo a, a media uh a man loin mi thuzawhna ding leh upsak ding leh mi daihsak ding (to silence) ngimna hi. Middle East kiim ah US leh a pawl ten IS (Daesh) gum in huh uh hi. Americans pawlkhatte kiangah hih thu ka gen ciangin thangpai uh hi. 2012 in Judicial Watch in a suahkhiatsak USte Defense Intelligence Agency (DIA) documents pawlkhat en lecin US leh a pawl ten Syria ah kumpi langdo kipawlnate buai kipat cil panin huhna a piakna thu uh tuang hi. Kumpi langdo kipawlnate (extremist groups) Syria leh Iraq gamgi teng ah gamtang uh hi.

Hih banga kumpi langdo kipawlnate a khuanungin ISIS ahih kei leh amau leh amau Islamic State hong kici uh hi. DIA director lui leh President Trump' head of organisation (DIA) a national security adviser lui General Michael Flynn in nung diakin Al Jazeera ten a interview na-ah US in Middle East kiim ah a pawlte thukimna tawh lawptakin huh dingin thukhensatna bawl hi ci-in a gen banah thuman tawh lahna ding (evidence) tampi omte lakte WikiLeaks documents leh emails in Saudi Arabia leh gamdang ten 2014 panin ISte a huhna thu kitel hi. Tua loin US Secretary of State lui John Kerry in Syria kumpi langpangte (opposition activists) tawh a sim in secret meeting a neihna thu zong a gen banah President Assad tungah nawhna bawl ding leh do dingin IS ten Damascus a manawh theihna dingun US ten ISte huhna kipia hi ci-in gen hi.

Tua ahih manin ISte khan'na ding leh hatna dingin US kigolh in huhna a piak bek tham loin al-Qaeda leh al-Nusra Front terrorists-te hatna dingin US in huhna pia hi. Tua banah, ka gensa bangin Israel zong al-Qaeda huhna pia-in a kigolh banah a gamgi ah ISte om den napi dai om hithiat in kap ngei lo hi. Tua ahih manin kumpi langdo kipawlnate zawhna dingin Iran in Syrian government tungah huhna pia hi. Tua mah bangin Russiate, Hezbollah group-te leh Iran, Syria leh Russia gamte gualzawhna hangin Syria ah kumpi langpang a kipawlna tuk a, tua mah bangin a lo thei loin Iraq ah tuk uh hi.

Syria government do IS galkap a tam mahmah hangin Iraq government zong ISte thuaklah in tuk man dek tak hi. IS ten Syrian government zo hi leh a galkapte uh Iraq kumpi do dingin sawl ding uh hi. Tua loin kumpi langdote hangin Lebanon dinmun zong kihtakhuai mahmah ding hi. Iran in Iraq government leh Syrian government a huhna hangin kumpi lando kipawlnate kizawhna dingin huh ahih manin hih thu hangin Iran, Saudi Arabia leh US kikal ah kitelsiam lohna lianpi piangsak beh hi.

Source: Sputnik
@Thang Khan Lian #ZUNs

Photo 1: Iran galkapte
Photo 2: Tu-95MS in Syria ah terrorist-te vankoihna munpi KhA-101 cruise missiles tawh a kapna

US TEN DIER AZ ZOR PANIN ISIS MAKAITE TUAHKHIA KIK LEULEU

US TEN DIER AZ ZOR PANIN ISIS MAKAITE TUAHKHIA KIK LEULEU

Dec. 30, 2017: US helicopters ten IS makai lubawkte Syria gam-a Deir Az Zor province sung mun tuamtuam panin Syria leilu lam mun bitna munah hemkhia (evacuated) uh hi ci-in mit tawh thupiang mu ten gen uh hi ci-in Syrian SANA news agency in suaksak hi. SANA reports in a genna US helicopters ten IS makai a hepkhiatte uh Kurdish rebels leh US galkapte tu lianin a omna mun al-Hasakah province ah Nilaini in puak uh hi ci-in gen beh hi.

Sources in a genna ah US helicopters bang zah hiamte omna ding nei lote tawlkhat sung kikoihna al-Saad camp ah niam cikin leengin (conducted low-altitude flights) al-Hasakah province leilu lam-a om al-Hasakah Dam ah bawh in IS makai a puakkhiatte uh US in a phuankhiat leh galvan tawh huhna piak uh New Syrian Army (NSA) kicite omna munah puak uh hi ci uh hi.

A beisa in zong SANA in US helicopters ten IS makai 47te Medecins Sans Frontieres (MSF) siavuan ten gamnuaimi liamte a kepna uh al-Hasakah ah va puak ngei uh hi ci-in mit tawh mute genna sources panin suaksak ngei hi. A beisa khate ah Syrian government in US in Syria a kumpi lehdo ISte leh terrorists groups tuamtuamte intelligence huhna kihelin huhna tuamtuam pia in Syrian armyte omna mun a suam theihna dingin huhna pia den uh hi ci-in ngawh mun mahmah ta hi. Syria government in US air power (vanleng) zangin mun tampi Syrian army-te suksiatna ding panin humbitna dingin hemkhia den uh a, Syrian army ten terrorists omna mun a nawk ding ciangun US ten terrorists-te huhna pia uh a, terrorists ten Syrian army-te 'accidental' attacks kici tawh a suamna dingun na huh mun mahmah ta hi ci hi.

Tu kal bulin zong Syrian government in US makaih gam 70 val kipawlkhawm "US-led coalition at the UN" kici ten IS/Daesh a om laite/suakta laite (remnants) tawh thukimna (deals) bawlin gamta khawm in kipawlkhawm uh hi ci-in ngawh hi.

December kha kim in zong Russian Ministry of Defense in US-led coalition ten al-Hasakah-based camp zangin "New Syrian Army" kici terrorists/jihadist militants-te training pia uh hi ci hi. Refugeete teci pan'na panin Russian intelligence in a genna ah al-Hasakah pansan camp ah IS leh al-Nusra Front terrorist tawh kipawl a kizopna nei gamnuaimi 750 bang om uh hi ci hi. October 2007 in Kurdish rebels makaih rebels tuamtuam kipawl Syrian Democratic Forces (SDF) ten Syria gam-a ISte khuapi Raqqa a nawk lai un Raqqa panin US galkapte huhna tawh IS galkapte 400 kikhemkhiate FSA ah lut uh hi. US-led coalition spokesman in Russia galkapte ngawhna nial a, Sputnik news kiangah "kimanna nei lo" hi ci hi. Deir Az Zor province i cih pen tu lianin Syria ah ISte hatna leh omna mun omsun hi a, Syria galkap ten Russiate huhna nawh a nawkna mun uh ahi hi.

US-led coalition in hih bang ngawhnate a nial den hangin Obama' administration hun lai pek panin US media tampi mahin US ten rebels leh terrorists groups-te a huhna, Pentagon in galvan leh training a piakna thu om den a, helicopter tawh galvan ISte a khiatna uh muh ding video zong tampi om hi. Trump' administration in Obama' administration policy mah a zuizui hi lel a, a nasia zaw in a huhna a pia hi bek hi. Syria buaina zong US makaih nitumna gam ten 1980s ma pekin Syrian President Bashar al-Assad' pa Hafez al-Assad in President a let lai pekin kumpi laihna dingin (regime change) ding na pan ta uh a, lawhsap den uh hi. March 15, 2011 panin US leh nitumna gamte huhna piak leh a vanzat uh rebels leh terrorists ten Syria kumpi thau tawh do-in laih ding hong kipat manun tualgal hong piang ahi hi.

Source: Sputnik and Wikipedia
@Thang Khan Lian #ZUNs