PUTIN IN RUSSIA LEH US KIDO LEH LEITUNG AH KUAMAH A SUAKTA OM LO DING HI CI

PUTIN IN RUSSIA LEH US KIDO LEH LEITUNG AH KUAMAH A SUAKTA OM LO DING HI CI

June 7, 2017: US mi leh Hollywood ah action movie director lakah a min nei mahmah Oliver Stone in modern-day international politics buaina tawh kisai Russian President Vladimir Putin a interview na nei hi. Stone in Putin kiangah US leh Russia in galkap thahatna zangin kido bang hi leh bang a ci ding hiam cih dotna bawl a, Putin in leitungah kuamah a suakta om loin si khin ding hi ci-in dawng hi.

Putin in Stone kiangah,"US leh Russia 'hot war' kici kido hi leh leitunga mihing khempeuh si khin dingin ka um hi," ci-in a dawn'na US Showtime TV channel ah kisuaksak hi. Putin in
North Atlantic Treaty Organization (NATO) in NATO om theihna ding kisiamtang sakna dingin gal ding bekbek zong den hi ci hi. Tu hunin Cold War hun bangin nisuahna gamte galkap thahatna zang dinga kipawlkhawmna Eastern Bloc kici om nawn lo a, Soviet Union gam zong om nawn lo hi. Tua ahih manin bang hanga NATO om lai a, a om laina dingin bang kisam hiam? NATO in miphin ding leh gal ding zong den a, tua paulap in NATO a om ding kisam hi ci-in kisiamtang sak hi," ci-in Stone kiangah gen hi.

Stone in, "America in kiteelna nei in, Trump in gualzawhna ngah hi. Tua ahih manin kikhekna (change) ding lametna (kitanauna a ngei batsak kikna ding) om hiam?" ci-in dong hi. Putin in, "Lamet etna e? Lametna om den hi. US ten hanmual ah hong paipih in, hong vui mateng uh Russia-US kitaunauna a ngei batsak kikna dingin lametna om veve lai hi," ci-in Putin in dawn'na thu zan in media tuamtuam in suaksak hi.

US media reports in a genna ah Stone in Putin a interview ma-in a kisakkholhna dingun 1964 in US filmmaker Stanley Kubrick in nuclear galvan zangin US leh Soviet Union kido bang hi leh bang thu piang ding hiam cih a upmawhna pansan in a film bawl "Dr. Strangelove or: How I Learned to Stop Worrying and Love the Bomb" kici en masa uh hi ci-in suaksak uh hi. The Daily Beast news outlet in a genna ah Putin in "Dr. Strangelove or: How I Learned to Stop Worrying and Love the Bomb" film bawl Kubrick in tu hun a thupiang ding na mukhol a, tu hun in galvan hoihzaw sem kinei ta ahih manin tua galvan thakte tawh kithuk kik hi leng bang piang ding hiam cih mukholhna na nei hi ci-in gen hi ci-in suaksak hi.

Stone in Kubrick' film bawl "Dr. Strangelove or: How I Learned to Stop Worrying and Love the Bomb" DVD Putin tungah pia napi a DVD a kawm (cover) bek hi a, a sungah a DVD om lo ahih manin Putin in, "Hih pen America ten letsong (gifts) dingin a mi a piak uh a tuam ngiat hi," ci hi ci-in US media report ah tuang hi. Stone in Trump a interview na four-part a kicingin Showtime in June 12-15 ciangin suaksak ding hi.

#Behlapna: Oliver Stone film bawlte lak-a a minthang diakte: Vietnam War tawh kisai trilogy - "Platoon" (1986), "Fourth of July" (1989) leh "Heaven & Earth" (1993); Salvadoran Civil War-based drama "Salvador" (1986), financial drama "Wall Street" (1987) , Jim Morrison biopic "The Doors" (1991); American Presidency trilogy - "JFK" (1991), "Nixon" (1995) W. (2008) leh a film bawl nunung pen NSA contractor lui Edward Snowden' tangthu "Snowden" (2016).

@Source: Sputnik; Wikipedia
@Thang Khan Lian