US IN JERUSALEM STATUS VAI UNSC AH A VETO ZANG

US IN JERUSALEM STATUS VAI UNSC AH A VETO ZANG

Dec. 19, 2017: US President Donald Trump in Dec. 6 in UN Security Council (UNSC) resolution 478 (1980) palsat in Israel khuapi dingin Jerusalem ciamtehna (recognition) dingin thukhensatna a bawl zan in UNSC in a thukhensatna a dok kikna dingin Egypt in a gelh UN draft resolution tawh a nawh hangin UN in a veto power a zat manin UNSC ah daangkoihna tuak kik leuleu hi. UN draft resolution in US leh Trump min lo loin Jerusalem status laihna dingin thukhensatna hangin poi kisa hi ci hi. UNSC a member 15 lak panin US cih loh member 14 ten draft resolution deih in vote khia uh hi.

UNSC member 14 in draft resolution thukimpih in vote a khiat manun UN a US ambassar Nikki R. Haley in, "Security Council ah tu ni-in i muh pen simmawh bawlna ho gawpna (insult) hi. US in kum guk val khit nungin a veto a zat masakna hi. Lungdamna tawh veto kizang lo a, ut lohna nei lopi in veto kizang lo hi. Veto ka zat uh pen America gam suakta ahihna tawh thuneihna khempeuh a neihna (sovereignty) humbitna ding leh Middle East process ah America' tavuan humbitna dinga a tavuan ko adingin maizumna bul hilo hi. UNSC member dangte maizumna ding hi zaw hi," ci pong hi.

UN draft resolution in, "Thukhensatna leh gamtatna khat peuhpeuh Holiy City of Jerusalem adingin a gam lim leh mi om zia, ahihna leh a ngeina (demographic, character and status) laihna dingin Security Council resolution a om thukham a palsat loh ding hi a, Security Council resolution palsat a thukhensatna leh gamtatna khatpeuh kimanna ding leh zatna ding bei (null and void) hi," ci hi.

UN peace envoy Nickolay Mladenov in UN Security Council member 15 ten a vote khiat ma un, "USte thukhensatna hangin Gaza panin Israel rocket thum tawh kikap pah a, tua khitin Trump' thukhensatna deih lo-a Palestine lungphona neite leh Israel securityte kinawktuahna piang pah hi," ci hi. UN draft resolution in gam khempeuh in Jerusalem khuapi-ah a diplomatic missions (embassies) uh a laih suk lohna dingun thupia sawnsawn lai hi.

#Bottom line: Trump thukhensat gumte leh international law bul leh bal thei lo leh zahtak lo tengin thukhensatna hangsan leh a ciamteh tham hi a cih hangun Trump' thukhensatna pen international law leh UN resolution palsat mikmek den hi cih a ngaihsutna uh kilang a, mailam saupi en lo-a thukhensatna man lo a ciamteh tham cing leh kimanna leh kizatna ding om lo thukhensatna suak lai hi. International law, UN resolution leh sovereign states khempeuh rights zahtakna ding a kam bembem a otpih leh hihte palsat ci-a gam teng ban ngawh thapai den US in ama taw kheng thei loin mi' taw kheng ko sakin international law, UN resolution leh sovereign states palsat in a gamtatna ahi hi. Leitung bup leh gam lim amau thahatna laih ziauziau thei ding kisa kim lai tua bang piang thei lo hi cih a sinna uh suak hi.

*Kei mimal ngaihsutna: Jerusalem khuapi pen LST en leng hun bei ding ciangin Armageddon galpi kipat ahih kei leh kipat ma pawl khawngin Israel khuapi suak ding ahih kei buang leh ka um zo kei mai hi. Tu lianin US leh Israel hanciamna pen, "Na mu kha bek ding a, na ne kha kei ding hi," cih tawh kibang lian ka sa hi. Pasian' deihna leh geelna a tangtun ma buang gam khat leh nih hanciamna tawh Israel khuapi dingin Jerusalem kipsak ding pen international law leh sovereign rights palsatna lianpen ahih manin mawk piang zo lo ding hi.

Source: Reuters
@Thang Khan Lian #ZUNs

Show More Reactions

TURKEY IN JERUSALEM VAI UN GENERAL ASSEMBLY AH VOTE KHIAT DING NGET SAWM

TURKEY IN JERUSALEM VAI UN GENERAL ASSEMBLY AH VOTE KHIAT DING NGET SAWM

Dec. 18, 2017: US President in Israel khuapi dingin Jerusalem a ciamteh manin Turkey in UN General Assembly ah resolution pass nading ngetna neih sawm hi. Turkey in hih bangin UN General Assembly ah vote khiatna neih dingin ngetna a bawl sawm hangin Monday ciangin UN Security Council (UNSC) in Trump' thukhensatna dalna dingin draft resolution a bawl sawm US in a veto zangin a ki-upmawh man hi ci-in Turkey ulian ten Al Jazeera news kiangah gen uh hi.

UN Security Council ah non-permanent member 10 leh permanent member (voto power nei) 5 om uh a, US thukhensatna UNSC member 9 in a vote tawh dal thei hi. Monday ciangin Security Council session hun-ah Jerusalem vai US thukhenna dalna ding leh Tel Aviv panin Jerusalem ah US embassy laihna dingin draft resolution dalna dingin US in a veto zang dingin ki-ummawh hi. Tua hangin Turkey, Palestine leh gam bang zah hiam in member 193 omna UN General Assembly ah vote khiatna neih kul ding hi.

US thukhensatna dalna dingin UN Security Council resolution draft pen Arab gam-a USte pawl hoih mahmah Egypt in a gelh (drafted) hi a, tua draft ah leitung gam khempeuh in UNSC resolution 478 (1980) palsat in kuamah in Jerusalem ah a diplomatic mission (embassy) uh a laih loh ding uh, Holy City of Jerusalem leitang leh gammi kilaihna ding, a om dan leh dinmun laihna dinga thukhensatna pen UNSC tawh kituakin thukhensatna a bawl ding hi cih tuang hi.

Turkish foreign ministry sources in Al Jazeera newste kiangah UNSC ah draft resolution a kibawl hangin US in a veto zang ding uh ahih manin Turkey in a pan'na laih a, hih thubuai pen UN General Assembly ah Resolution 377A nuai-ah "Kipumkhatna dinga resolution" ("Uniting for Peace") kici tawh vote kikhiat sawm ding hi ci hi.

1950 Resolution 377A ah Security Council omna dingin a tavuan a zawh kei leh General Assembly in leitung bup-ah muanna leh bitna a omna ding a ngaihsut pah ding hi cih tuang hi. "UN General Assembly ah resolution seh thum suah seh nih (two-thirds) vote tawh resolution ki-pass thei hi. UN General Assembly ah US thukhensatna dalna dingin two-third votes a kingah khit hangin Turkey leh pan-Islamic gamte kipawlna gol pen IOC in vote tam zaw ngahna dingin kihanciam beh lai hi," ci-in Turkey foreign ministry sources in ci hi.

Organisation of Islamic Cooperation (OIC) i cih Islamic gamte kipawlkhawmna 1969 kum-a kiphuankhia hi a, IOC bills pen Muslim gamte kituak takin a aw uh bangin kituat hi. US thukhensatna deih lote lak-a makaipi pen NATO a member leh US pawl ahi Turkey hi a, nung kal in Turkey khuapi Istanbul ah member 57 ten OIC summit a neihna uh Turkey in makaih a, East Jerusalem pen Palestine khuapi hi ci-in pulak uh hi (UN General Assembly ah resolution kibawl leh vote 57 tak nei pah uh cihna hi).

Turkish parliament' foreign affairs commission chairman leh ruling party MP Taha Ozhan in. "Trump' thukhensat deih lohna thu paukhia dingin Turkey in a gam kiimte nawhna nei a, gam kiimte ngaihsutna kingak lai hi. UN General Assembly ah resolution kibawl leh a beisa kum tam loin US , Israel leh gam tawm khat ten UN non-member observer state status piak loh dingin a vote khiat uh kipawk lai hi," ci hi.

UN General Assembly 2012 vote ah Palestine gam non-member observer status piakna ding gam 138 in resolution thukim uh a, gam 9 in thukim lo uh hi. Turkey President Recep Tayyip Erdogan in zan in Turkey in Tel Aviv panin East Jerusalem ah embassy kilaih suk sawm hi ci hi. "Tu lianin Jerusalem ukkhum in om ahih manin tua mun ah embassy kilaih thei lo hi. Ahih hangin Jerusalem ah i consulate general un ambassador palai zaa len hi. Pasian in phalna hong piak leh i embassy uh Jerusalem ah kihong ding hi," ci-in Karaman province leitaw ah a thugenna ah gen hi.

1967 in 6 Days War khit nungin East Jerusalem political affairs pen Palestine Authority tavuan dingin ki-ap a, Palestine ten mailam hun adingin a khuapi dingin ngaihsun uh hi. Ahih hangin West Jerusalem lam uk Israel in Jerusalem khuapi kikhen lo-a kipumkhat Israel khuapi hi-in 1980 in Jerusalem Law kici tawh Israel Parliament in na pulak hi.

Nung kal bei kuan (weekend) in Turkey khuapi tuamtuam ah anti-US leh anti-Israel lim (signs) lak-a lungphona nei tul tampi ten US leh Israel deih lohna deih thu tangkona kammal (slogans) zangin awng ngeingai uh hi.

Source: Al Jazeera
@Thang Khan Lian #ZUNs

Show More Reactions