NORTH KOREA IN TU KUM SUNGIN NUCLEAR GALVAN 20 NEI ZO DING
Sept. 16, 2016: North Korea in 2006 in a masa pen dingin 1 kiloton (kg.1000) bek a gik nuclear galvan sitna nei uh a, tua khit sit zom zel in, tu kum bekin nih vei sitna nei ta uh hi. A nunung pen dingin nung kalin 30 kiloton (30,0000) a gik nuclear bomb sitna a nga veina ding sitna na nei leuleu uh a, US in Kidopi Nihna in Japan gam-a Hiroshima khuapi ah "Fat Boy" cih atom bomb a khiat sangin nakpi takin hatzaw hi. North Korea in nuclear bomb bawlna dinga kizang uranium kici nakpi takin a hatsemna dingin puahpha (enrichment) uh ahih manin tua uranium kipuahpha ten radioactive material kici a kicingin ngah zo ding uh ahih manin tu kum sungin nuclear bomb 20 nei zo ta ding uh hi kici hi.
North Korea in nuclear sitna ni sawm sungin neih kik sawm uh a, weapons experts ten a upmawhna uh-ah N.Korea in nuclear bawlna dingin a kizang thei veve plutonium stockpile (a neihsa teng) tawh tu lian--a nuclear a neih teng gawmin tu kum sungin 20 nei zo ding uh hi ci uh hi. Report khatin 38 North news ah a suaksakna ah weapons experts ten North Korea in uranium tampi khol ta a, kum khat sung bekin uranium Kg. 150 (330 pounds) piang khiasak zo ding uh hi ci uh hi. N. Korea in a nuclear galvan a bawlte short-range leh medium-range missiles ah kizang thei ding hi ci-in Siegfried S. Hecker in gen a, ahih hangin US kap kha dingin nuclear pua thei ding ICBM (inter-continental ballistic missiles) pen kum 5-10 kikal in nei pan dingun ummawh huai hi ci-in gen beh hi. Ahih hangin private intelligence firm Soufan Group in N.Korea in nuclear tawh kithuah (nuclear-armed) ballistic missile kum li sungin nei zo ding a, ballistic missiles hat mahmahte ah nuclear galvan 2020 ciangin nei zo ding hi ci hi.
North Korea ten nuclear a sit niloh uh vauna dingin US in Pithai ni (Tuesday) in South Korea gam-a Osan Air Bas ah nuclear pua thei B-1B Lancer bombers vanleng nih thahatna lahna dingin lengsak uh a, N.Korea na dual tuam loin B-1B nih bekin nuclear galvan nga vei sitna nei khin gam khat do zo lo ding a, gamkeek US in nuclear galvan zangin kiginkholh loh kalin hong kap nuam man uh a ngian uh hong lak uh hi lel hi cihsan uh hi.
Nuclear galvan pen lauhuai mahmah a, uranium 600 milligrams (dime khat sangin zang zaw) pen puak kham leh a lauhuai mahmah a bomb dinga kizang conventional chemical explosive TNT kici 13,000 tons a hat piangsak zo hi. Nuclear bomb pen uranium 235 leh plutonium 239 panin kibawl a, a puak ciangin neuron kici piangsak a, tua in atoms kicite kikhensak ahih manin atoms in a puak beh zom thei ziahziah ding 'fissile material' kici piangsak a, khawl loin puak zom ziahziah hi. Nuclear bomb khat bawlna dingin Urainium 245 kg. 25 bang kisam hi.
-Union of Concerned Scientists/ The Museum of Unnatural Mystery/Sputnik
