US HOUSE IN SHUTDOWN BEISAKNA DINGIN VOTE KHIA; TRUMP IN GUALZAWHNA PULAK

US HOUSE IN SHUTDOWN BEISAKNA DINGIN VOTE KHIA; TRUMP IN GUALZAWHNA PULAK

Jan. 24: US federal goverment ni thum sung shutdowm om khitin Congress in zan in US government nasem kik dingin vote khiatna nei uh a, House ah shutdown beisakna dingin 266-150 vote kikhia ahih manin ahih manin federal government in tawlkhat sung sum zatna ding bill (short-term bill) bawl thei ding cihna suak hi. Senate Majority Leader Mitch McConnell in DACA ngah 800,000 kiimte humbit dingin kihona neih dingin kamciamna a piak manin Senate Minority Leader Democrat Chuck Schumer in government in na a sep theihna dingin short-term funding bill Feb. 8 dong bawlna ding phalna pia hi. Feb. 8 ciangin DACA ngahte (Dreamer kicite) ngahte humbitna dingin DREAM Act kici thukhun bawlna vai ding genna neih dingin thukim uh hi.

Democrats leh Republicans kikangtuahna bei phot suak ahih manin President Donald Trump in gualzawhna pulak pah samsam a, zan nitakin government in a ngeina bangin na a sep kikna ding thukham (measure law) suaikai a, tu ni-a kipanin nasep kipan kik ding hi. "Hih kikangtuahna bei ding ahih manin noptuamna piang hi cih ka thei hi. Ahih hangin kikangtuahna taktak beisiang dek nai lo a, tu tadih in khat leh khat nung kibet theuhtheuh hun nai lo hi," ci-in House Speaker Paul Ryan in ci hi.

"Democrats ten khuaphawktheihna (senses) hong nei kik uh ahih manin la lungdam hi. Federal government thukham bawl (lawmakers) za tampi ten nasem kik ta uh hi," Trump in a statement ah gen hi. A Twitter ah, "Kap a om Schumer in a maizumhuai guallelna telsiam mamah ta hi. Kulhbaang a om kei leh DACA om lo ding hi. Bitna leh bit tak-a om ding kisam hi. Pangkhawmin a thahat a vanglian i mite adingin galkap thahat kisam hi. Republicans adingin gualzawhna lian hi a, Democrats-te Shutdown kuahawm tung uh hi. Tu-in mikhempeuh, Republicans, Democrats, DACA kihelin, adiakin a lian in i galkap teh Border Security gualzawhna ding ka deih hi. Gualzawhna i ngah theihna dingin kihona sabuai ah kimu ni," cih tuangsak belbal hi.

US gam-a kumcing lo naupang DACA tawh a lut "Dreamers" kicite humbitna ding hun March kha ciang bek om lai hi. Trump in Sept. kha-in DACA phiat ahih manin tua khit nung 17,000 in humbitna (protection) khahsuah ta uh a, hong tung ding kalte ah a kihumbitna dingin DREAM Act a kibawl kei leh 2,000 in humbitna khahsuah ding uh uh hi ci-in left-leaning Center for American Progress in ci hi. Dreamers-te humbitna ding genkhawm dingin Republicans ten kamciamna pia uh ahih manin Democrats ten three-day shutdown beisak dingin thukhensatna bawl uh hi.

Democratic party huhna tawh Feb. 8 ciang dong short-term bill passed nading Senate ah kibawl thei ta dih ding cihna suak hi. Bill version tuamte bawlna ding pen ni bang zah hiam hun la ding hi. Party nihte kilem kik pak theihna hangin US stocks khang kik a, shutdown ni thum sungin US economy in 0.44 trillion suplawh man hi. Shutdown a bei hangin Dreamers-te vai kihona neihna ding ah Dreamers 800,000 kiimte humbitna dingin US-Mexico kulhbaang cian'na leh immigration enforcement adingin sum zat dingin Trump in kalh lai ahih manin Democrats ten a pan'na uh lenkipin kulhbang cian'na dingin federal sum zat ding bill a thukimpih kei uh leh Feb. 8 khit ciangin shutdown pian' kikna ding baih mahmah thei lai hi. Trump in sawtpi kimang ding gambeelte vai thukimna (long-term deal on immigration) i gam adingin a hoih leh kibawl bek ding hi ci hi.

Top Senate Democrat Chuck Schumer in Democrats ten shutdown beisakna dingin Republican gum in vote kikhia ding a, nung kalin White House in kihona neihkhawm ding a ut loh man leh thukimna lianpi bawl president (great deal-making president) a nawl kiu khatah a tut manin shutdown piang hi ci-in na gen khinzo hi. Amah leh a lawmte leh a innkuanpihte Mar-a-Lago, Florida ah a president let kum khat cin' ni hun nuam zat ding geelna nei napi nung kalin White House ah Trump an huan (stewing) in om hi.

Immigration leh Trump's border wall funding bawlna pen party nihte kituah lohna lian pen ahih manin Feb. 9 ciangin short-term bill bei ding ahih manin short-term bill bawl kik hun zel ahih manin Republicans leh Democrats kikal ah kikangtuahna a pian' kik leh nung kal sung tenga US politics buaina mah a pian' kik ding baihlam mahmah hi. Senate a Minority leader Schumer in Senate Majority Leader Mitch McConnell kiangah March 5 cianga bei ding naupang gambeel a Deferred Action on Child Arrivals (DACA) program tawh lutte humbitna dingin Republicans ten kamciamna hoih mahmah nong piak ding uh Democrats ten lamen hi ci hi.

DACA a kihumbit kei leh naupang 700,000-800,000 kikal sungmang neite (Dreamers) huih lakah mang ding cihna suak hi. Shumer in Republican ten Dreamers-te humbitna ding a thukim kei uh leh Democrats Senators-te bek hilo in Republicans Senators ten zong President muanna kinei lo ding hi ci hi. Trump in political support a ngahna pen gambeelte (immigrants) khempeuh thukham palsatte, mi gilote; kimanna nei lote (criminals and scroungers) ci-in immigration law khauhsak a, puak kik ding a kamciamna hang ahi hi.

Immigration bill bawlna vai-ah mainawtna a piang theih kei leh hih buaina ah Democrats ten shutdown pian'na ding nawh kik thei uh hi ci-in Brookings Institution a sem Molly Reynolds in ci hi. Senate Majority leader McConnell in Democrats tawh nasemkhawm dingin kamciamna a bawl hangin House in Senate Bill bawl thei ziau uh cihna hi pah lo a, House Speaker Ryan in DACA leh immigration vai Senate inn muanna hoih tawh kikalsuan hi ci hi. Funding agreement bawlna thukim lote lakah 2020 presidential election cianga tuh dinga lametna nei lakah Kamala Harris, Bernie Sanders, Kirsten Gillibrand leh Elizabeth Warren kihel hi.

1990 khit nung government li shutdown na piang ngei a, October 2013 shutdown in kumpi nasem 800,000 val ten tawl khat sung nasem theih loin maap (furloughed) uh a, 2018 shutdown ah essential federal services leh military ten zan a kipanin nasep kipan kik uh hi.

Source: Associated Free Press; Agence France-Pree; The Hindu; Al Jazeera

@Thang Khan Lian #ZUNs

US FEDERAL SHUTDOWN BANG HANGA PIANG A, SHUTDOWN HANGIN BANG TENG NAWK KHA DING? PART-II

US FEDERAL SHUTDOWN BANG HANGA PIANG A, SHUTDOWN HANGIN BANG TENG NAWK KHA DING?
PART-II

Jan. 22: US Congress ah immigration leh federal spending bill vote khiatna ah DACA tawh US gam lut sunmang neite (Dreamers) khangno 800,000te vai thukimna piang thei lo a, majority member nei Republicans party guallelhna (congressional stalemate) hangin Friday in federal government shutdown kici Trump' President zum tut kum khat cin' ni lianin piang hi.

Obama administration in DACA tawh kum cing lo mi 8,00,000 a lutsakte om theihna ding March kha ciangin bei ding a, DACA a phiat Trump in DACA hun ka sottoh beh kei ding a, kipuak kik ding hi ci hi. Democrats pen federal sum zatna ding (spending bill) ah DACA tawh lutte humbitna dingin thukhun (legislative measures) bawl ding kalh uh hi. Ahih hangin DACA tawh hong lutte humbitna ding thukhun a kibawl ding leh immigration Bill genna ah kihelsak a, kituah lohna lianpi pian'na omna US-Mexico gamgi ah kulbaang (wall) cian'na dingin sum zat ding hi ci-in Trump in kalh hi. Democrats ten kulhbaang cian'na ding Trump campaign kamciamna hi a, ko kamciamna hilo ahih manin Trump' kulhbang cian'na dingin immigration bill a sum kizang thei lo ding hi ci-in kikangtuah uh hi.

Democrats ten kulh cian'na dingin fund zat ding deih lo uh a, ahih hangin a Senate Majority Leader Chuck Schumer in hih kikan'tuahna vai thukimna a om theihna dingin kihona neih ding hi ci-in Trump tawh meeting a neih un kamkupna neikhawm uh hi. Ahih hangin Democrats ten DACA tawh lutte humbit ding a kalh uh Republicans ten nolh in puak kik ding hi ci-in pang uh hi. Hih banga thukimna a pian' theih loh ciangin a beisa kumte ah shutdown hangin federal government' sum zatna tam a beisak zaw leh US economy adingin supna lianpi piangsak federal shutdown hong piang hi.

‘Trump shutdown’: Obama administration hunin Affordable Care Act (Obamacare a kici zaw) a zat ding funding beisak a, Obamacare phiat ding Republicans ten a kalh manun Oct. 2013 in shutdown sawt pen ni 16 sung na om hi. Trump administration hun-a shutdown pen White House leh Republicans ten Democrats ngawh in, Senate ah a makai uh Schumer hang hi ci-in #SchumerShutdown ci uh hi. Schumer in, "Hih pen #TrumpShutdownhi. Shutdown pian' theihna dingin President Trump lo ngawh dinga kilawm zaw kuamah dang om lo hi," ci-in a Twitter ah tuangsak hi.

Immigration leh federal spending Bill passed theihna dingin vote 60 kisam a, ahih hangin Thursday vote khiatna ah Bill thukim a vote khia 50 bek pha hi. Senate ah tutna 100 a, Republican ten tutna 51 nei uh a, Democrats ten tutna 49 nei uh hi. Hih Bill kipassed thei hi leh Senate thukham bawl (lawmakers) ten 2018 in sum zatna ding kihona a neih theih tei sam hangun Senate in kha khat a sum zatna ding bill bawl theihna ding thuneihna ding hi. Bill vote khiatna cancer do a om senior Republican John McCain om loh banah Republicans Senators nga leh Democrats Senator nga ten a pan'na lam uh laih (switched) uh hi.

Republican leh Democratic ten Pizing (Monday) in government sum zatna bawl phat kikna dingin vote khiatna a neih kik ma uh Nipini (US Standard Time) in kihona nei kik dingun kilamen hi. Congress innpi nihte - House of Representation leh Senate ah Republicans ten Democrats sangin tutna tam zaw nei napi shutdown panin peng theihna dingin Bill vote khiatna ah guallelhna a ngahna uh leh Democrats tawh thukimna a bawl theih lohna uh pen Trump' administration kiciat lohna leh Trump' lungkhauh luat man bek hilo in populism a bulphuh luat man a shutdown piang ahi hi.

Friday in Democratic Schumer leh Trump in White House ah meeting a neih un thukimna nei thei dingun lametna lianpi om hi. Tua meeting hun-a a kamkupna uh a theihpih ulian khatin makai nih ten kihona a neihna uh Trump in Democratic ten a kalhna bangun DACA tawh lut 800,000 lak panin 700,000 khangno (undocumented immigrants; Dreamers kicite) humbit dingin thukimna nei uh a, Trump in US-Mexico ah kulhbaang cian'na ding sum leh security khauhsakna dingin Democrats ten sum zat ding ci-in a thukimna uh ngah hi ci hi. Ahih hangin a nitak in tua bang thukimna a neih uh hi napi Trump in conservative Republicans makaite a kimuhpih ciangin DACA vai thukimna na thukimpih lo uh ahih manin thukimna si hi.

Nung kalin Senate ah Democrats leh Republicans ten Deamers-te humbitna ding leh America gamgite ah gambeelte dalna dingin immigration enforcement a sum zat ding $ 2.7 billion zat dingin thukimna a neih hangun Trump in thukimpih lo hi. Hih thu hangin party nihte kikal ah kitelsiam lohna hong khang a, Senate ah Bill vote khiatna ah Bill vote ah 60 kisam lak panin vote 50 bek ngah uh ahih manin federal shutdown piang hi. Federal government funding Bill bawl kikna Feb. 16 kidal ahih manin thukimna a neih theih kei uh leh US khangthu adingin shutdown sawt pen hi ding a, US economy supna leh nasem tampi in sep ding a ngah lohna uh piangsak ding cihna hi.

Thukimna a neih theih mateng uh federal nisim nasepna (day-to-day operations) a tam zaw nawngkai ding a, financial regulators, siah dongte (tax collectors), scientists leh Pentagon a nautang sepna neite (civilian staffs) kihelin nasem thei loin om ding uh hi. Zanhal zingsang in Senate Majority Leader Mitch McConnell in geelna thak "new plan" kici bawl ding sawm a, tawlkhat sung sum zat theihna dingin phalna (temporary spending bill) Feb. 16 ma dong bawl theih loh ding ci-a om pen Feb. 8 in beisak dingin a geelna Democrats makaite kiangah luikhia hi. Ahih hangin Democrats ten nung kal-a ni li leh ni nga kikal sung bill bawl ding sotna hangin immigration thubuai ah party nih kikal ah kihona nasia sem neihna dingin hong nawh hi ci uh hi.

Washington khuapi-a sangsia kum 57 mi Dawn Gaither in, "Congress ten bill bawlna ding hun sotto in shutdown sung nasem loin om napi un sum ngah veve uh cih thu hi thei lo hi. I hih ding om na khat om pen hihte a taw uh suihsak a na sep sak ding hi," ci hi. Federal government nasem pension kum 65 mi Elke Schmacker in, "Ka pension sum ngahte leh health insurance ka ngahte hih shutdown hangin hong ki-eukhiatsak ding ka lunghimawh hi. Ka ip sung panin hih shutdown om hangin sum ka piak kisam kha ding hi cih kithei lo a, Obama hun-a shutdown om sung nangawnin na ka sem hi," ci hi.

Shutdown om hun sung ten nasemmi "non-essential employees" kici teng nasep ding nei loin tawlkhat sung maap;khawl (furloughed) ding uh a, tua ahih kei leh zong sum kipia loin tawlkhat sung khuan (temporary unpaid leave) kipia ding hi. Ahih hangin mipite bitna ding leh gambup bitna dingin police, galkapte leh traffic police ten nasem veve ding uh hi. A beisa hun-a shutdowns piang khinsate ah kumpi in nasem lo-a maapte sum a kilawm khat a piak mah bangin Trump administration in zong kipia ding hi ci hi. A kipiak hangin nasem lo leh pian'khiatsak (productivity) bangmah nei lopi-a nasep man piak ding cih pen kumpi adingin supna lianpi piangsak hi.

Defense Department in Friday in shutdown hangin Afghanistan gam leh Syria leh Iraq gamte ah ISte dona nawngkaisak lo ding hi ci hi. Ahih hangin Defense Chief James Mattis in shutdown sung teng US gal dona teembaw adingin sum zatna kipia zo lo ding a, gal vanleng teng lei-ah bawhcip ding uh hi ci hi. Tua loin White House a Trump administration ulian 1,715te lak panin 1,000 tawlkhat sung nasem loin om ding uh hi ci-in Friday in Trump administration in pulakkhia hi. Ahih hangin US Constitution tavuan nasepna ah Trump huh ding ulian bang zah hiam ten nasem ding uh a, Switzerland gam-a Davos khuapi-a World Economic Forum ah Trump kihel sawm hi.

#My take: Obama administration shutdown om lai-a Trump' kampau: "President in makaih zaa siamna neih loh manin shutdown piang hi. A party sunga Senators-te nangawn uk zo loin dei (room) sungah mi kaikhawm thei lo hi. Shutdown i cih President (Obama) thanemna hang hi," ci-in 2013 na ci hi. Obama in US President term nih (kum giat) sung Jan. 20, 2009 panin Jan.20, 2017 kikal na len hi. President a let a kum li leh kha kuana Oct. 1-16 kikal shutdown khat vei na om hi. Obama' thanemna leh makaih siam lohna hang tawh shutdown a kum nga cin'na dingin piang ahih leh a kum khat cin' ni a shutdown piang pah Trump makaih siam leh thahat pa a kici diam? US President-te tangthu (history) in hih thu mangngilh lo ding a, tawi tehna na nei ding hi. Kam in bel gen lah bangmah nei lo a, i kam beembem tawh i otot hilo in i sepkhiatna leh gamtatna tawh lahkhiatna panin i hihna midang ten na ciamteh hi.

Source: The Hindu; Reuters News Agency
@Thang Khan Lian #ZUNs

Photo: Democrats Senator Corry Booker in Congress pua-a rally ah Friday in a thugen laitak

US APEX COURT IN TRUMP' TRAVEL BAN THUKHAM TAWH KITUAK MAH HIAM CIH THUKHENSATNA NEI DING

US APEX COURT IN TRUMP' TRAVEL BAN THUKHAM TAWH KITUAK MAH HIAM CIH THUKHENSATNA NEI DING

Jan. 20: US sangpen thukhenna Supreme Court in Friday in presidential powers liante zangin a thukhensatna theihna a bawlna khiamna ding ngimna in Trump in a nunung pen dingin Muslim gam gukte lut ding dalna in "travel ban" a bawl thukham tawh kituak mah hiam (legality) cih vai thukhensatna neih dingin thukimna nei hi. US Supreme Court ah thukhen/sitni (judges) a tam zaw Conservative thukhen hi uh a, April ciangin Trump' travel ban thukham tawh kituak mah hiam cih Supreme Court ah kingialna ngaihkhiatna (hearing arguments) kinei ding a, June kha bei kuan ciangin federal immigration law pen US Constitution leh biakna hanga kideidantuamna (religious discrimination) phal loh ding cih tuangte palsat hiam cih thukhensatna nei ding hi.

Trump in US President zum ah a tut cil ni-in Muslim majority gam 7 ngimna in travel ban policy executive order suai na kai pah a, US lower Courts ten a dal manin travel ban executive order revision bawl kik a, suaikai kik hi. A thum veina dingin September kha-in travel ban executive order suai na kai kik a, Muslim gam sagih travel ban lak panin Iraq lakhia-in gam guk-
Chad, Iran, Libya, Somalia, Syria leh Yemen gammite lut ding na dal hi. US lower Courts ten na dalsak veve ahih manin travel ban thubuai Supreme Court kiden'na a, Supreme Court in travel ban pawlkhat; a kimkhat zat dingin ci-in "partial travel ban" kici Dec. 6 in phalna na pia a, hih travel ban thubuai thukhenna innpi ah kidiah den lai hi.

US a lower courts ten Trump' travel law a ban (dalsak) khit nungun Supreme Court in December 6 in 7-2 vote tawh partial travel ban zat theih dingin phalna a piak hangin Sate of Hawaii leh States dang ten thukhenna innpite ah Trump' travel ban na hek lai uh ahih manin tu dong lim tak-a zat theih lohin kidiah hi. Hih bang thubuai bialbualte hangin Trump in immigration law khauhsak ding leh US-Mexico gamgi ah Trump' kulhbaang a kici (wall) cian' ding nakpi takin hanciam hi. Hih thubuai leh DACA tawh kum cing lo naupang Dreamers kicite 800,000 puak kikna dingin Trump in DACA Act a phiatna hanga US federal government shutdown piang ahi hi. Trump in travel ban policy a ngimna Supreme Court in a dalsak leh a kamciamna lianpen leh populist gupna a ngahna ciampeelna suak kik ding hi.

“US Supreme Court in a tawp khongna dingin President in thukham tawh kituakin American mite bitna ding leh US gam security standards khauhsakna dingin a travel ban policy zat theih dingin phalna hong piak ding lametna lianpi kinei hi," ci-in White House spokesman Raj Shah in ci hi.

Trump' travel ban pen Trump leh Trump administration in thukham tawh kituak hi a cih hangun thukham lamsang siamte (legal experts), human rights groups leh US lower Courts a thukhen ten US federal immigration law leh US Constitution First Amendment a biakna kideidantuamna a phal lohna palsat hi ci uh hi. Analysts leh rights groups ten Trump' travel ban pen terrorism dalna ding leh US security hatsakna dingin US gam lutte dalna ding a ngimna hilo in terrorism funding tam pen gamte leh terrorism export nasia pen gamte kihel khasak lo ahih manin minam leh biana deidantuamna hi zaw hi ci uh hi.

Source: Reuters
@Thang Khan Lian #ZUNs

Photo: US Supreme Court

TURKEY GALKAP TEN SYIA AH KURDISH REBELS-TE MAKAIH SFT-TE A DO UH NI 4 CING TA: NI 4 SUNGA THUPIANG REPORTS

TURKEY GALKAP TEN SYIA AH KURDISH REBELS-TE MAKAIH SFT-TE A DO UH NI 4 CING TA: NI 4 SUNGA THUPIANG REPORTS

Jan. 24: Turkey galkap ten Syria leilu-nitumna lam-a Kurdish rebels-te makaih rebels pawl tuamtuam kigawm Syrian Democratic Forces (SDF) kicite ukna Afrin kiim luin a do uh a ni li cing ta hi. Gal kidona thupiang Sputnik news leh reports tuamtuam ten reports a piakna uh a tomkim in a poimawhte hih bang hi.

Military Action: Turkey galkap ten a gal dona uh a ni li ni-in Turkish Air Forces ten Turkey-Syria gamgi-a om Kurdish rebelste panmun Rajo khuapi tung lam panin kap zom lai uh a, Turkey in a tanks-te tawh Afrin gamgi panin Kurdish rebels-te panmun kap zom lai uh hi ci-in Sputnik Türkiye correspondent in ci hi. Turkish armed forces galkapte leh Turkey in huhna a piak FSA rebels-te kipawlin Azaz khuapi nitumna lam-a Kurdish rebels-te panmun kapsak uh a, Gülbaba khuapi-ah zong Turkey galkapte leh Kurdish galdo mite kikaptuah uh hi.

Turkey galkapte pawlkhat zong a galvan hoihte uh tawh Afrin kiim-a Killis a om Öncüpınar checkpoint ah lut uh hi. TV channel Al-Mayadin in Turkey' gal dona mawtaw honte Afrin kiim sunga Kurdish rebels omte nuai dingin Aleppo province leitaw lam-a kiim-ah lut ta uh ci hi. Firat news agency reports in a genna ah Turkey galkapte tawh kipawl Free Syrian Army (FSA) army kicite nawkna Kurdish rebels ten Afrin district ah na nang zo uh a, Kurdish rebels ten Turkey tanks thum kapsak uh ahih manin Turkey galkapte nung kik uh hi ci hi.

Al-Mayadin television in zan in Turkey thaupi (artillery) ten Syrian-Turkish gamgi a Qamishli khuapi kianga Kurdish mite khuata al-Hilalia kapsak uh hi ci a, reports dangin a genna ah Qamishli khuapi leh khuapi dangte zong kap hi ci-in a gen hangin a si leh a liam om hiam cih gen lo uh hi. Kurdish YPG militia ten zan in Agrin kiim pan-a 300 km gamla a om Ras al-Ayn khuapi kikapna hangin mi thum in sihna tuak hi ci-in gen a, a site amau galkap maw nautang mawh cih kigen thei lo hi ci-in SDF in gen hi. Agence France-Presse news in bel zan in Turkey gal dona hangin nautang 28 leh Turkey galkap nih in sihna tuak ta hi ci hi.

Zan zingsangin Afrin a YPG spokesman Sputnik kiangah Kurdish rebels ten Corna hunkhia in hih khua panin galte hawlkhia siang zo ta uh a, Turkey galkap ten Afrin kiim sunga khuata omte kap zom lai uh hi ci hi. SDF in media statement a bawlna ah Turkey galkap 53 kikaplum ta a, Afrin leh shahba cantons-te kikaptuahna hangin SDF lamte 38 in liamna tuak hi ci-in gen hi. Tua ma-in Turkish Foreign Minister Mevlut Cavusoglu in military operation kipat cil a kipanin Turkey galkap nih in sihna tuak ta hi ci-in gen hi.

SDF ten statement dang a bawlna uh-ah Afrin district sunga kikaptuahna ah Turkey galkapte puakna mawtawte a hunkhop kikapsiatsak a, Turkey galkap guk kikaplum ta hi ci hi. Amara khuata ah FSA rebels leh Kurdish rebelste kikaptuahna FSA rebels 24 kikaplum a, mun dangte ah zong kikaptuahna nasia mahmah cih reports om hi. Zan in Sputnik Arabic in Syria gam-a Kurdih rebelste dona ah FSA galkapte kihel hi ci-in FSA rebels-te maante suaksak hi. FSA kicite Turkey adingin galdo dingin 2011 in kiphuankhia a, FSA panin a om laite (remnants) Turkmen leh Arab rebels-te Turkey leilu lamah gamtang uh hi.

Turkey ulian ten Afrin panin rocket tawh Turkey gam-a Hatay provine leitaw lam hong kikap a, a liam leh a si om lo hi ci uh hi ci-in Hurriyet newspaper in gen hi. Zan in UN in Syria ah Turkey galdo hangin mi 6,000 bang galtai ta hi ci hi. Zan in Turkey military operation bawl hangin Turkey tawh kihona nei dingin Turkey ah US high-ranking uliante va hawh uh hi. Turkish Foreign Minister Cavusoglu a press statement bawlna ah US-Turkey kitanauna pen USte mailam ah a kalsuanzia uh bangin kinga ding a, Turkey in a pawl USte terrorists tawh kipawl loin Turkey tawh kipawl zaw dingin kilamen hi ci hi. Euphrates nisuahna lam, Afrin leh Manbij ah Turkey in galkap zanga a gal dona pen Russia, Syria ahih kei leh US phinna hilo a, terrorism dona hi ci hi.

Asia gamte a zin kualna ah reporters-te kiangah US Defense Secretary James Mattis in Turkey operation pen Syria gam dai zaw deuh a om nawngkaisakna leh dengdel sakna hi ci-in a mawhsakna thu gen a, Syria leh Iraq ah ISte dona thanemsak hi ci hi. (*Syria leh Iraq ah ISte kizo ta hi cite lakah US kihel hi). French Foreign Minister Jean-Yves Le Drian in zong Turkey leh US tawh kipawl Kurdish militia (rebels) kikaptuahna pen ISte kizawhsiang khit nunga buaina thak suak ding a, Turkish-Syrian Kurdish kikal buaina a suah khak ding France kipatau hi ci hi.

Zan in Turkey khuapi Arkara a zin NATO Deputy Secretary Rose Gottemoeller in zong Turkey gam makaite kiangah Kurdish militiate kihtakhuaina leh na thuk kikna uh kikimsak (balance) un ci-in hilhna hoih (advise) pia a, NATO Secretary Jens Stoltenberg zong Turkey makaite thukizatuah zel in lungkim a, NATO i cih pen innkuan gol ahih manin a member sunga kitelsiam lohnate beisak ding poimawh hi ci hi. Turkey in Syria gam-a Azaz khuapi-ah galtaite bukna ding galtai 3,0000 tatna ding bukno (tent) 500 kilam hi ci-in pulak a, Foreign Minister Cavusoglu in a statement ah Turkey in Syria galtai 3.5 million kila ta a, Syria ah mihing phattuamna ding huhna (humanitarian aid) gim leh tawl kici loin kisem zom ding hi ci hi.

Kurdish rebels-te ukna Afrin khua-a thunei ten Turkey galkapte operation dalna dingin khuamite pangkhawm a lehdo dingin kunh uh a, "Mipite deihna kizo ngei lo ding a, Afrin khuapi humbitna dingin mihangsante kipiakhia un," ci-in Afrin area civilian administration in a statement ah ngetna bawl uh hi ci-in Reuters news in gen hi. Turkey in Jan. 20 ni-in Operation Olive Branch kici operation tawh tung lam leh thaupi zangin SDFte panmun kap kipan uh hi. Hih operation bawlna ah Turkey galkap 6,400 leh FSA galkap 25,000 kiim kipawlin Afrin kii-a om militia fighters kici Kurdish leh a pawl rebels 8,000-10,000 do kipan uh hi. Syria in Turkey galdona pen Syria' sovereignty suamna hi ci a, Russia in Syria' leitang kipumkhatna (territorial integrity) kuapeuh in zahtak sak dingin ngetna bawl hi. US leh a pawl ten bel amau uino teng ngimna leh nuaina ding geelna tawh Turkish military operation ahih manin Turkey mawhsak mahmah uh hi.

Source: Sputnik; Agence France-Presse; Reuters

@Thang Khan Lian #ZUNs