TUUCING HOIH TAKTAK I CIH KOI DAN HIAM?

TUUCING HOIH TAKTAK I CIH KOI DAN HIAM?

🐑Tu hun in tuucing hoih i cihte in biakna leh politics mekkhawm gawp loin biakna thu bek mah bulbawlin biakna leh politics khen dan siam uh a, biakna leh politics gawmkhawm gam makaite pum phatphat in, pum gup loin a gamtatna uh leh a kampauna uh kizui mah hiam cih lim takin encik uh a, thungetna tawh na huh den zaw uh hi.

🐑Tuucing hoih i cihte in thu a gen ciangin, "Pasian it in, kihta ka hih manin keima deihna leh ngaihsutna bangin kong gen kei ding hi. A ngaihnophuai thu leh a minthang tangthu ahi kei zongin, note mimal takin hong sukha bak ding thu ahi ta zongin kissuanna nei sese loin nisim in lam hong lak i Lai Siangtho' deihna bangin thu kong gen ding hi. Hih pulpit tungah ciamnuih bawlin note hong nuihsak ngeingai ding, hong awngsak baba ding leh hong gualnuamsak (entertain) dinga hong ding ka hi kei hi," ci-in hangsan takin gen ngam hi.

🐑Tuucing hoih i cihte pen pulpil tungah a kahtoh ma-in inn panin a thugen ding khempeuh huhpa Kha Siangtho' huhna ngen khinsa leh a Topa' tungah ki-ap sinsen khinsa leh kithawi khin sitset sa-in hong kuan ahih manin pulpit tungah kithawisaan dingin kipan biangbuang phot in, ama thugen ding leh huhna ngetna dingin ki-apna in thu sawtpipi a nget kisam nawn lo ahih manin, "Lai Siangtho' hong hilhna bangin thu hong gen ding ka hih manin na LST uh tua mun tua mun na phen un," ci-in kipan a, phuahtawm tangthu vive leh ciamnuih bawlin awng baba in a hun mawk beisak lo hi.

🐑Tuucing hoih i cihte in Khristian hih manin thupha bekbek ngah ding leh leitung in a hong piak theih leh mite' pahtawina bekbek ngahna dingin lametna thu vive lam genbel in nei den lo a, "Pasian’ tung panin a hoih sang ihih ciangin siatna zong sang lo ding ihi hiam?” ci-in ze-etna i tuak zongin i san' siamna ding leh ze-etna panin i tuk lohna ding leh thasan'na i lakna dingin a tuute lamlak in hanthawn zaw hi. (Ref. Job 2:10)

Tuucing hoih in a tuute kiangah, "Khrih Jesuh’ galkap hoih hihna tawh thuak dingin a kisam khempeuh na na thuak in," ci-in thuakzawhna dingin hanthawn a (Ref. 2 Timoti 2:3), tanglai a kamsangte in bawlsiatna, thahna na thuak uh hi ci-in a pawlpi mite kiangah Khrih Jesuh' galkap hoih leh muanhuai a suah theihna dingun thapia a, silate bangin bawlin maipha leh thupha ngahna ding bekbek tawh hanthawn zawsop lo hi.

🐑Tuucing hoih in Pasian' phat zawhna hang, tumging ngaih manin laam leh dian' zawhna hang bek tawh gupna kingah lo hi cih telcian sinsen ahih manin Pasian' mit muhna ah midik in hong san' theihna ding leh gupna ngah theihna ding leh Ama' maipha ngah theihna dingin upna tawh kizui sepkhiatna genbel in nei hi. A puatham leh pumpi vun liamsakna tawh midik a kingah zawh lohna thu gen ngam hi (Ref. Na a sem mipa a sep thaman kipia hi. Tua a nasepna thaman pen a thalawhsa ahih manin piakkhongin kingaihsutsak lo hi. Ahi zongin Pasian’ maipha ngahna dingin nasepna suang loin upna a suang mipa pen Pasian in mimawh kimlai midik hi, ci-in sang ahih manin, amah tawh a kipawl theihna dingin Pasian in tua mipa’ upna thupi san' hi. Abraham a vun a ki-at ma-in a upna hangin Pasian in mihoih in a san'na lahtelna dingin a vun a kinung-at ahi hi. cf. Rom 4:4-5, 11a).

🐑Tuucing hoih in upna thu bekbek genbel in nei lo a, Khristian ka hi a ci minam leh gam makaite haipih liangin a etteh tham cing mahmah Khristian bangin gen in awngawng lo a, sepna ahih leh gamtatna tawh kizui lo upna guak pen a si hi ci-in hangsak takin LST bulphuh in Pasian' thu gen ngam zaw hi. A vaak khempeuh kham leh ngun bangin pumphat pah loin pahta pah henhan lo hi (Ref. Sanggamte aw, mi khat in, “Upna ka nei hi,” a cih hangin a sepna in a zuih kei leh bang phattuamna om ding ahi hiam? Tua a upna bek in amah honkhia ding ahi hiam? Tua ahih ciangin gamtatna in a zui lo upna guak pen a si ahi hi. James 2:14, 17)

🐑 Tuucing hoih i cihte in Khristian i suah khit ciangin i vangik khempeuh Pasian ahih kei leh Jesuh' in hong puaksak in, i vangik teng a beimang ziau ding bangin gen zuauzuau ngei lo a, Jesuh' hong suat hakkol nuam ahih manin tua tawh i vangik pua leng zang ding hi ci-in Khristian mite' nisim kalsuan ding zia man hong hilh hi (Matthai 11:28-30)

🐑 Tuucing hoih i cihte in nisim in Jesuh nuihzuih ding dan leh i mawhpuakna hong hilh a, eima deihna bangin gamta nawn loin, i singlamteh kisuanin Jesuh' nungzuih ding zia hong lah banah, "Jesuh' bekin simlamteh pua a, guakpai ding maw nang lei mi (ama nungzui mipa minu aw?") ci-in tona tawh tha hong guan hi [Matthai 16:24].

🐑Tuucing hoih in a tuute sihpih ngam hi. Tuucing i cihte pen a kicial tawm (guaih) tuucing mawkmawk hilo ahih manin a tuute lim takin kem a, LOVE GIFTS deih manin a tuute nusiatsan ngam liangin mundang, kuamdang leh gamdang ah tai kawikawi loin a tuute a kicial tawm tuucingpa bangin kem loin lim takin hunbit in kem ahih manin a mangthang om lo hi (Ref. Johan 10:11-13).

🐑Tuucing hoih in a tuute kisapna thei a, lo no-ah paipih in gilvah in lumsak a, a dangtak ciangun tuidam kiangah paipih ahih manin a tuute a zawngkhal, a bai leh mangthang om sak lo hi. (Ref. Late 23:2-3)

✍️ Thang Khan Lian #ZUNs

ISRAEL PM NETANYAHU IN SUM NEGU IN NGAWHNA TUAK TAKTAK TA

ISRAEL PM NETANYAHU IN SUM NEGU IN NGAWHNA TUAK TAKTAK TA

Nov. 21, Laizthai: Israel' attorney general Avichai Mandelblit in Israel siting Prime Minister lak panin thukham palsat masa pen hi ci-in ngawh (indicted) masakna pen tuak dingin Prime Minister Benjamin Netanyahu in golgukna, a man loipi-in thukham palsatna tawh sum ngah leh a tunga muanna om palsat (bribery, fraud and breach of trust) hih ngawhna thum a tunga omte thukham palsat in gamtang mah hi ci-in zan in pulak hi.

Netanyahu in a lawm sumbawl mihausate tung panin thukham palsat in sum ngah (fraud) in, ama thu kisai thuman khin lopi-in a hoihlam vive in press coverage a kibawlna dingin deihsakna tawh golhguk sum na pia hi ci-in hun sawtpi pek panin ngawhna na tuak khin zo hi. Financial fraud a tungah ngawhna om leh a tax returns lakkhia ngam loin imcip in a seelsim den US President Trump in federal laws giat kiim banga a tungah ngawhna a a presidency term bei leh a tuah theihte pen sikha siam bet bangin ama langte in hong ben'na (witch-hunt) hi a cih mah bangin Netanyahu in zong thukham palsat in a tunga ngawhna thum omte pen ama political langte left-wing leh media ten "witch-hunt" hong bawlna uh a, hihkhialh ka nei kei hi ci-in na nial den hi.

Israeli attorney general Mandelblit in Netanyahu in a tunga ngawhna thumte ah thukham a palsatnate ah mawh mah hi ci-in hih bangin a thukhenna a pulakkhiat pen April leh September elections ah government thak bawlkhiatna dingin Knesset ah MPs tutna kisam zah majority seat ngah zo parties kuamah a om loh manin gamvai tawh kisai-ah political parties kitattuahna leh kinangtuahna a om laitak a thupiang hi.

Zanhal in Netanyahu' prime minister kituhpihna ah a political langpa (rival) Benny Gantz in government thak din'sakna dingin parliament (Knesset) ah coalition government ka dingsak zo kei hi ci hi. Israel President Rivlin in Nentanyahu in coalition government a din'sak zawh loh khit nungin Centrist Blue and White party makai Gantz tungah coalition government a bawlna dingin hunciam ni 28 sung a piak Wednesday zan nai in 10 pm (2200GMT) in bei ta hi.

Kumpi a bawl thei dingin "Kingmaker" dinmun a ding Yisrael Beiteinu party makai leh Defense Minister lui Avignor Lieberman in ama party leh Netanyahu' Likud Party leh Gantz' Blue and White Party in unity government a din'sak ding leh coalition government gum nuam bek ahih manin Israel in kum khat sungin election thum vei nei dingin a mainawt bang ta hi. President Reuven Rivlin in tu ni-in thukham bawlte (lawmakers) kiangah cikmah hun in Israeli politics ah a piang ngei lo kum khat sungin thum vei election neih ding panin a kipelh theihna dingin prime minister len dingin candidate khat thukimna a neihna dingun ni 21 sung hun pia lai hi.

Netanyahu' tungah ngawhnate (charges) bang teng hi hiam?

Attorney-general Avichai Mandelblit in February kha pekin Netanyahu cases thum - Case 1,000, Case 2,000 leh Case 3,000 ah thukham palsat in ngawhna (indictment) ka bawl sawm hi ci-in na pulak a, tua ngawhna awk laite a tawpna pen dingin court ah ngaihkhiatna (pending final hearings) nung kha panin na kipan hi.

• Case 1,000: Hih case ah Netanyahu in "fraud leh breach of trust" cih ngawhna na tuak hi. Netanyahu in hamphatna lianpi mun tuamtuam (various high-value benefits) panin ngah hi cih ngawhnate lakah a lawm mihaute tung panin huhna a ngahte angvantuam in deihsaktuamna (favours) piak dingin a ciamte lakah pink champagne leh cigars a ngahna cihte kihel kha hi. Netanyahu in a lawm mihaute tung panin thukham palsat in hamphatna lianpi a ngahte pen lawmta hihna lahna lim (tokens of friendship) ahih banah huhna hong piakna hangun angvantuamna ka lah pen a kilawm lohna om lo hi ci a, a lawm mihaute in hihkhialh ka nei kei uh hi ci-in pang uh hi. A lawm mihau nih - Israeli Hollywood film producer Arnon Milchan leh Australian billionaire James Packer tung panin 2006 leh 2016, a tam zate cigars zatep gol leh champagne zu 956,800 shekels ($264,100; £199,200) man ding na ngahte hih case ah kihel hi.
• Case 2,000: Hih case ah zong Netanyahu in "fraud leh breach of trust" ngawhna mah na tuak hi. Netanyahu in ama political langa ding newspaper Yisreal Hayom kici a thanemna ding leh legislation a pass khum theihna dingin major newspaper Yedioth Ahronoth media group kici a businessman leh controlling shareholder Aron Mozes tawh a guk in thukimna (deal) na nei uh a, tua bangin amah lang daily newspaper a thanemsakna dingin legislation a bawlna hangin major newspaper in amah deihsak leh angvantuamna tawh a hoihlam (favourable media coverage) vive in a genna dingun thukimna na neihpih hi. Netanyahu in hih ngawhna a nial bangin Yedioth Ahrohoth media publisher in ka gamta khial kei uh hi ci-in nial uh hi. Netanyahu leh Mozes in hih bang vai tawh kisai meeting ka neihnate uh-ah ka gen kha kei uh a, Yisrael Hayom thanemsakna dingin legislation kibawl (passed) lo hi ci-in pang uh hi.
• Case 4,000: Hih case ah Netanyahu in fraud gamta in, breach of trust mah a palsat banah golhgukna (bribery) ngawhna tuak ahih manin case thum ngawhna a tuahte lak panin a khauh pen ahi hi. Netanyahu in leading communication company ahi news and media website Walla kici neipa Saul Elovitch tawh "illegal arrangement" nei-in Walla deihsaktuamna dingin regulatory decisions kici media dangte tungah gakna khensatna bawlkhum dingin thukimna nei a, tua bang thukimna a neih manun Walla news in Netanyahu' vai tawh kisai a hoihlam vive in media coverage gensak dingin thukimna nei uh hi cih ngawhna tuak hi.
• Netanyahu in 2014 panin 2017 kikal communications minister post na len hi. Tua hun in sumbawl mihau Elovitch in Israel telecommunications company Bezeq kici shareholder na uk khum (controlled) a, Walla news in a gen thumante lehhei in Bezez ah Elivitch in Neyanyahu angvantuama tawh a hoihna lam vive (pumphat i cihte) na suaksak den hi. Hih bangin Elovitch in Netanyahu' political hamphatna ding a bawlsak manin Netanyahu in Elovitch' hamphatna ding leh sumbawlna ah meetna bawlsak a, regulatory decision a bawlna hangin Bezeq in hamphatna ngah hi. Netanyahu in experts ten regulatory decisions ka bawlna hong gum uh a, hih bang khensatna ka bawlna hangin ngah kik ka nei kei hi ci-in nial hi. Shareholder in zong gamtatkhialhna ka nei kei hi ci-in pang hi. Ahih hangin attorney general in securities law nuai-ah Elovitch tungah golhgukna, thuman dalna, teci pan'na neihte genna suksiatna, a man lopi-in thukham palsat in sum pei leh report a bawlna ah thukham palsat (bribery, obstruction of justice, witness tampering, money laundering and reporting offences) hi ci-in thukhenna bawlkhum sawm hi.

Attorney-general Avichai Mandelblit in Israel Prime Minister tutna tunga tu kimlai thukham palsat masa penna dingin mawh hi ci-in a ngawh (indicted) masak pen Prime Minister Benjamin Netanyahu in case thum ah golgukna, a man loipi-in thukham palsatna tawh sum ngah leh a tunga muanna om palsat (bribery, fraud and breach of trust) gamtang hi ci-in ngawhna bawl a, Netanyahu' tunga case thum omte thukham palsat in gamtang mah hi ci-in a thukhenna pulak hi.

Source: BBC

@ Thang Khan Lian #ZUNs