LEITUNG GAM TUAMTUAMTE VAUNA TANGNIAL NORTH KOREA IN MISSILE TAMPI SIT KIK LEULEU
June 8, 2017: North Korea in tu zingsangin tuipi panga om Wonsan khuapi panin land-to-ship missiles tampi (multiple missile) sitna nei (tests) kik leuleu uh hi ci-in South Korea galkap South Korea's Office of Joint Chiefs of Staff in a statement a pulak a, 200 km leng hi ci-in gen hi.
Nuclear galvan a neihna hangin gam tuamtuam in a daang koih tuam (isolated) North Korea in a beisa nipi kalte ah kal sim phial in missile sitna nei den hi. "North Korea in missile theih loh tampi (multiple unidentified projectiles), surface-to-ship missiles dinga upmawh tu zingsang in Gangwon province sunga tuipi pang a om Wonsan khuapi panin sitna nei uh hi," ci-in South Korea galkap ten gen beh hi.
North Korea tawh kisai buaina (issue) thu Asia Security Summit khawmpi ah gen bel in kinei a, Japan kumpi in zong North ten missile sit kik mah uh hi ci hi ci-in Kyodo news agency in suaksak hi. "North Korea missile sit in ko gam hong deng kha loin, ka gam ua dingin ka security uh hong nawngkaisak kha lo a, ahih hangin United States leh South Korea tawh nasem khawm in, lim takin kikantel ding a, high level alert kikoih hi. Ka gam ua dingin security dengdel sak loin exclusive economic zone hong deng kha lo ahih manin kimawhpaih lo ding hi ci-in Japanese Foreign Minister Fumio Kishida in ci hi," ci-in Japan local media in suaksak hi.
Sputnik news in bel North Korea missile sit pen short-range surface-to-ship missiles hi a, a sangna lam 1.5 miles in leng a, 125 miles a gamla leng hi ci-in suaksak hi. South Korea galkapte statement in North Korea ten missile a sitna thu President Moon Jae-in kizasak pah hi ci-in gen a, tua lo a kitel zaw in gen beh lo hi.
North Korea in nuclear a guk veina ding sitna neih ding nak kithawi mahmah in, nuclear galvan tawh kithuah US kap khakna ding ICBM bawl a hanciam laitak ahi hi. United Nations Security Council in North Korea tungah khalna thak (new sanctions) bawl khum kik hangin North Korea in nuclear programme leh missile programme kikhawlsan tuan lo ding hi ci a, Trump in North Korea in a gamtat a khawlsan kei leh geelnate lakah galkap thahatna zat ding sabuai tungah mansa in om hi cici lai hi. North Korea in UN sanctions thak pen gitloh vai hi cihsan hi.
US Missile Defense Agency makaipi Vice Admiral James Syring in zan in North Korea' technological mainawtnate (advances) leh a beisa in kha guk sunga a ballistic missile programme uh pen lunghimawhna lianpi (great concern) hong guan hi ci hi. Syring in House Armed Services Committee ah North Korea in US leitang deng kha ding nuclear galvan tawh kithuah intercontinental ballistic missile (ICBM) nei dingin US Missile Defense Agency in ki-ummawh lo hi ci hi. Ahih hangin North Korea' vauna (threat) hangin lungnuam takin ki-om hithiat veve ka ci thei kei hi ci-in gen hi.
North Korea in hih bangin galvan thak sitna a neih niloh pen US in South Korea gamah a amau sim ding hi ci-in a ngawh US galkap 30,000 kikoihte a lakkhiat ding a deihna leh a kalhna hi a, tua loin South Korea-US-Japan galkap ten Joint Military Exercise a neih uh a khawlsan ding a kalhna ahi hi. University of North Korean Studies Professor Yang Moo-jin in North Korea in missile a kizom in sit ziahziah uh a, international sanctions hangin a gamtat uh khawlsan in, khukdin tuan lo ding uh hi cih kitel hi ci hi. US in South Korea ah USS Carl Vinson strike group, tuinuai teembaw (submarine) USS Michigan a sawl beh ban ah zanhal in South Korea teembaw kingakna Busan ah 6,900-tonne a gik USS Cheyenne submarine a sawl beh manin North Korea thangpai semsem hi ci-in AFP news agencyte kiangah ci hi.
#Bottom line: North Korea' missile sitte kapkhiat sak lianlian dingin USS Carl Vinson strike group, submarines nih - USS Michigan gan leh USS Cheyenne leh THAAD air defense system in bang hih hi mawk ding hiam cih ngaihsut tham cing ta hi.A tai thei lai takpi uh hiam cih sitna ding bekin sitna a neih uh ai tam cih huai phial ta hi. South Korea ah lah US in galkap 30,000 koih eauau mawk ahih cianga....
Source: News agencies; Sputnik
@Thang Khan Lian #ZUNs
@Thang Khan Lian #ZUNs
