POLITICS I CIHCIH BANG HI HIAM?
Politics (naingyanzi) kici pen gam sung ki-ukna leh kivaihawmna vaite tawh kisai (state affairs) ahih manin mimal leh society kuamah a kikhen thei ki-om lo hi. Tua ahih kuamah politics panin kidapkoih theih miumiau ziau lo hi. I lunglut kei zongin a paizia a pongpi khat beek theih kisam hi. Politics panin society + mimal a kituamkhen (isolated) liuleu thei a ki-om loh hangin biakna leh politics pen kinak khen theih lua mahmah ahih manin democratic gam khempeuh phialin politics leh biakna kikhenna (secular democratic system) na paipih ciat uh hi cih a constitution (upadi) uh sim le'ng kimu ciat hi. Bang hangin hiam cih leh gam khat sungah biakna tuamtuam a um leh zui, biakna zuih nei vet loin Pasian on hi cih a um vet lo (atheist) tampi om ahih manin biakna bulphuh gam ki-ukna (theocracy) pen nuclear galvan sangin a laihhuai zaw galvan suak thei hi.
Tua bang hi napi-in politics ah i secular mahmah hangin i biakna zuih ah secular luat theih lenlan na hilo leuleu zel a, conservative zek kisam den hi. Tua ahih manin politics leh biakna a kibatlohna i khentel siam mahmah kisam hi. Na political ideologies peuh politics thuzawhna leh ukna (controlled or dominion) nuai-ah na koih khak dihdih laizang leh na politics muhna leh na biakna thusan zia pen to (master) nih na a sem khawm sila na bang ngitnget den ding a, anne kawm laipi khualak vak daldal, daileng kimlai lasa in na aw neih teng tawh a kiko, biakinn sungah zawlla sa-in aw neih tawh a awng vava na bang den ding hi.
Secular democratic gam-a teng na hih leh politics leh biakna mekmat ahih gawmkhawmin kigulluksak (collusion) niloh pen na niangtui lakah ci leh cikhum (salt and sugar) a helkhawm Penglam tawh na kibang ding a, hai sungah vukkhal (ice) leh tuiso helkhawmin a dawn mipa, ice-cream leh coffee meh in a hawp, a kha duh kici napi-in tangkha leh thangkhuai (molasses) a meh khawm mipa tawh kibang ding na manin ui leh keel ahih kei leh zawngneu leh zusa khumkhop tawh kibang lenglung den ding hi.
Biakna leh politics gawmkhop pen biakna gam makaite siampite ahih kei leh biakna makaite in len in ki-ukna (theocracy) gam Iran, Saudi Arabia, Vatican City gam cihte khawng ah kizang thei bek a, Taliban ten Afghanistan gam Talibanisation regime tawh a uk hun uh 1996-2001, 2004 kiim pawlin ISIS a hatsan lai-in ISIS Caliphate in a huam khakna, Islamic fundamentalist Boko Haram terrorist group hatna sung khawng ah kimang thei bilbel bek hi.
Na biakna zuih peuh politics in hong ukkhum leh na biakna pen politics a suak khin zo a, gam uk makai ahih leh political leader peuh na biakna hong humbitsak bangin na ngaihsut leh political party or politiciante a bia a suak khin na hita hi. Na biakna pawlpi lutang pen Khris hi kha loin political party ahih kei leh political leader khatpeuh a suaksak khin na hi gige hi. Na ut kei zongin na hihna (identity) taktak tua mah hi khin zo hi.
Bang hang hiam cih leh, politics cih kammal zang masa pen "Father of Political Science" a kici Ancient Greek hun lai-in classical period ah Greek philosopher leh theihna ahih kei leh sinna zaipi a nei (polymath) Aristotle (384–322 BC) in kum zalom 4 BC hun in Greek city-state (polis) sungah ki-ukna leh kivaihawmna hoih a om theih leh pian' theihna dingin a ngaihsutna a classical work ah a gelhna ah Greek kammal Πολιτικά (Politiká) a zatna panin a kilasawn ahi hi. Aristotle kici biakna hahkat mi hi, cih politics ah kisin kha lo a, Greek biakna (religion) pen gupkhiat zawh loh, bawlphat zawh loh ahih kei leh diksak zawh loh a khial/a maan lo (irredeemable false) hi ci-in a ngaihsut hangin Greek city-state sungah a deihhuai ki-ukna (ideal polis) a pian' theihna dingin religious affairs (biakna vaite) a om kisam hi, na ci hi.
Aristotle in polis sunga a gam mi hihna neite (citizens) a lungdamna/lungkimna uh pian'sak theihna dingin Πολιτικά or Politiká pen "practical science" hi a, mihing in ahihna a hang, a thu, ah zatna ding a thupi pen a muh leh ngah theihna ding (to find the supreme purpose of life i.e. "virtue" a cih kammal zat) in kisam hi, ci-in a philosophy ah a na gelh hi. Tua bangin Aristotle in mihing in a "virtue" a ngah leh hamphatpih theihna dingun gam leh minam vai makai dingin a kizangte (politician) mawhpuakna poimawh pente lakah mi khempeuh - a zawng leh hau, a thahat leh thanem, kumpi leh nautang ahi zongin zuih ding a kibang upadi/thukham (laws or constitutions) a bawl ding uh a tavuan uh hi, na ci hi.
Ancient Greek hun lai-in Politeia (πολιτεία) cih kammal pen Plato leh Aristotle in Greek gam-a "city-state" ahih kei leh polis sunga gam mi hihna a neite hamphatna (the rights of citizens) a ngah dingun a kilawmte cih a tuamtuamte a kipanin hong uk ding kumpi sungah bang teng kihelin koici ki-uk ding (form of government) cihte a genna dingun a kammal na zang uh hi. Politics kammal pen Greek kammal polis (city state a cihna) leh politētes (citizen a cihna) kigawmin politikos panin a kila hi a; Latin leh Old French pau in politique na ci uh a, tua panin late Middle English kammal ah politics hong cih uh tu dong mah a kammal kizang suak ahi hi.
Ancient Greek hun lai-in pasian leh nusian (gods and goddesses) tampi a neih leh biakte uh lakah a minnei diakte pen - Zeus, Hera, Poseidon, Demeter, Athena, Apollo, Artemis, Ares, Hephaestus, Aphrodite, Hermes, leh Hestia or Dionysus cihte hi. Tu hunin Pasian khat bek om hi cih upna a nei biakna (monotheistism) a zui Abrahmic religions a kicite lakah Judaism, Islam leh Christianity biakna in i biak Pasian tawh Ancient Greek mite pasian kibang vet lo hi. Greek mipilte in polis sungah a deihhuai ki-ukna leh kivaihawmna a pian' theihna ding leh a gam mi hihna neite in hamphatna (rights) a ngah dingun a kilawmte a genna uh hi zaw a, biakna tawh politics kisai kha lo hi.
Tua hi napi-in politics sinna a nei vet lo ahih kei leh a kantel mel lopi-in a uk leh lawp pong biakna Sia nengnengte leh nautang pawl khatte in tu hun ciangin politics vai, political party leh a political ideologies neihte uh hong suut ciangun politics vai tawh thuman sangin phuahtawm thu, upmawh thu zak sawnna panin deihkaih thu, a bul a bal a kithei lopi thuthang kamdawn (rumours) a zak sawn teng peuh uh hong gawmkhawm ahih kei leh khilkhawm gawpin kigulluksak uh a, politics thu peuh biakna thu bangin a suut leh pheng gelh/khia tam lua mahmah ahih manin pulpit tungah a mot otot teng uh AMEN pia dinga kiman khinsa tengin AMEN na ci pahpah uh ahih politics peuh biakna zah in a ngaihsun kitam mahmah mawk ahih poi mahmah a, dahhuai mahmah thu suaksak zawsop uh hi.
Na ci a nat ciangin siavuante na va naih bangin politics thu i theih nop leh political science a sinte mah ahih kei leh politics vai thu limtakin a kantel mite mah dot tangtang huai hi. Nga na mat nop leh ngabeng leh nga mat siampa na dot kisam hi. Biakna thu na uk a, na telcian nop leh theology sanginn ah kahte dot kisam hi. Saben' zia na theihnop leh sabengpa na dot kisam hi. Na theihnop thu na telcian nop leh na dot dinga kilawm lopi na va zuat khak leh "thei kei ve'ng aw" hong cihsan nuam lo ding ahih manin a theih lohpi leh a upmawh thu teng peuh ahih kei leh a zuau bulomtang teng peuh hong hilh zawsop ding hi. Thuman sa zaw lai ding na hih manin thu telcian lopi leh dotna ding mun lopi ah na va tai khak manin nang a khial na hi zaw a, upmawh thu teng peuh ahih kei leh zuau bulomtang teng mah na gen loh kiphamawh ding hi.
A gelh: Thang Khan Lian #ZUNs reports
