PHIALPHIAH LEH VA-AK' KIHONA TANGTHU TOM
Ni dang lai-in phialphiah (swallow) leh va-ak khat in mun khat ah hong kimu kha uh a, holimna nei uh hi. Phialphiah in a melhoihna leh a mul kilawmte kisiahpihpih in va-ak kiangah,
"Lawm aw, en dih ve... Ka multe te sialsial in, vaak singseng a, ka meite sau zitzet in, kilawm mahmah hi. Ahih hang nang multe vom liakluak in, na mel beelmang hong kitat bang liang hi. Nang na meelsiat lam phawk lo nngei beek lo maw? I nuntak hun sunga poimawh pen i melhoihna hi. Nang hileng sun hun sung teng lengkhia ngam lo, gamtang ngam loin ka omcip ding a, zan ciang bekin a sim in ka gamta khiankhian zaw ding hi," ci-in ko bawl in, a zahpih bawl kawm in nuihsan hi.
Va-ak in phialphiah en in nui a,
"Lawm aw, na melhoih kha mah ding a, na etlawm kha mah ding hi. A vaak khempeuh zong kham leh ngun na hi khin pah sam lo hi. Na melhoihna leh na etlawmna pen sawt kimang lo ding hi. Bang hang hiam cih leh na hoihna pen tuuk hun (spring) sung bek kimang zoin hong khom lel ding a, phalbi a sawt loin hong tung pah ding hi. Phalbi hong tun ciangin khuavot leh vuuk kiate na thuakzo kei ding a, votsa in na liing den ding a, na kamsiat leh khuavot thuaklah in na si ding hi. Ahih hangin kei ka multe a vom hangin phalbi lai-a khuavot mahmah leh nipi lai-a khualum mahmah ka thuaklah ngei kei hi. I hoihna sangin i hihna leh i kizat theihna pen i nuntakna dingin manpha zaw pek hi," ci-in kamdam in dawng hi.
I nuntak hun sungin i hoihna leh i hauhna bekbek midangte tungah i kisialhpih khak ding kidophuai mahmah hi. Leitunga na hoih khempeuh, hauhna khempeuh sangin cidamna leh thahatna, a piang bangbang nawk zawhna pen poimawh zaw in, manphat zaw tham a, cidamna mah neih tham zaw hi. Upa ten zong, "Melhoih ningtui kihawp thei lo," na ci uh hi. Melhoihna pen midang tungah kisialpih ding hilo a, melhoih a hong bawl pa minthangna dingin zat siam ding hi zaw hi.
-Thang Khan Lian
