EAST JERUSALEM PALESTINE KHUAPI HI: OIC
Dec. 14, 2017: Islamic makai ten zan in leitunga pan-Islamic body golpen ahi Organisation of Islamic Cooperation (OIC) Turkey khuapi Istanbul ah summit a neihna uh-ah Palestine khuapi pen East Jerusalem hi ci-in tangkokhiatna a neih ban uh-ah leitung bup in Israel ukkhumna East Jerusalem Palestine khuapi dingin a ciamtehna dingin ngetna bawl uh hi. IOC khawmpi ah Palestinian President Mahmoud Abbas in Israel-Palestine peace process ah US in kigolhna leh panmun khat beek len nawn lo hi ci-in a warning pulakkhia hi.
IOC summit Istanbul khuapi-ah Islamic gam makaite neihna hun Turkey President Recep Tayyip Erdoğan in zindo in makaih a, Erdogan in US President Trump in Israel khuapi dingin Jerusalem a ciamtehna Islamic gamte kipawlkhawm in kithuk kik ding hi ci hi. Ahih hangin IOC summit ah Islamic gam makaite kikal ah kituah lohna leh thukimna kician a neih theih loh manun US leh Israel tungah khalna (sanctions) pulak lo uh hi.
Ahih zongin thu tawpna pulakkhiatna "final statement" kici bawl uh a, “East Jerusalem pen State of Palestine khuapi” hi ci-in a pulakkhiat ban uh-ah gam khempeuh in State of Palestine a ciamtehna ding uh leh State of Palestine khuapi pen Israel ukkhumna East Jerusalem hi ci-in a ciamtehpihna dingun ngetna bawl uh hi. Tua loin Trump in Israel khuapi dingin Jerusalem khuapi ciamtehna dingin a thukhensatna a thukham tawh etna panin zatna leh kiman om lo hi (“null and void legally”) ci uh a, Trump in hih banga thukhensatna a bawl pen Israel-Palestine kilemna hanciamna a neusakna leh thagum zanga ngongtatte leh dipkuatna piangsakte gamtate (“extremism and terrorism”) tha pia hi ci-in kituak takin a mawhpaihna thu pulak khum uh hi.
Israel in Jerusalem khuapi khempeuh pen khen theih loh Israel khuapi ci-in ngaihsun uh a, Palestine ten Israel in a luakkhum amau adingin mailam hun adingin a khuapi dingin ngaihsun in bawl sawm uh hi. Jerusalem khuapi pen 1967 Six Days War in Israel in Jordan' khut sung panin East Jerusalem laksak a, (tu-in Palestine mite leitangin a kiciam hangin Israel in ukkhum hi) a, Palestine Authority in mawhpuakna leh political affairs teng mawhpuakna len a, a phelkhat West Jerusalem pen security leh defence leh political affairs lamsang Israel mawhpuakna nuai-a om ahi hi. Phel nih a kikhen khuapi hi.
OIC chairmanship pen a kilaih kawikawi hi a, tu lian a IOC Chairman len Turkey President Erdogan in Israel makaite kammal khauh tak a tona (diatribe) dingin Israel state pen mi leitang ukkhum leh dipkuatna piangsak gam (“occupation” and “terror” state) hi ci hi. "US in hih bangin thukhensatna a bawlna hangin terrorist gamtatna khempeuh gamtang Israel tungah thaman pia hi. Hih banga thaman/letsong pia pen Trump hi. Leitung bup thukham leh thumanna (international law and fairness) manphatna zahtak khempeuh in Israel' ukkhum Jerusalem khuapi pen Palestine khuapi dingin a ciamteh ding hi. Islamic gam ten hih ngetna kikhawlsan ngei lo ding hi," ci hi.
"US in kigolhna leh mawhpuakna nei nawn lo hi":
Palestine President Abbas in kamkhuah mahmah tawh, "Palestine khupi dingin Jerusalem a kiciamteh mateng West Asia ah kilemna, muanna leh bitna piang ngei lo ding hi. Hih bangin Trump in Israel khuapi dingin Jerusalem a ciamteh manin West Asia kilemna ding hanciam in palai len US in mawhpuakna leh kigolhna nei nawn lo a, political process ah US mawhpuakna kisang nawn lo hi. Bang hang hiam cih leh US in Israel bek angvantuam den hi," ci-in gen hi.
Tua ban-ah IOC in final statement a bawlna ah US administration makai Trump in hih bang thukhensatna a bawl manin West Asia ah kilemna piangsak dingin a mawhpuakna panin kidokkhia hi cih tangkokhia hi ci uh hi.
Source: Agence France-Presse
@Thang Khan Lian #ZUNs
@Thang Khan Lian #ZUNs
Photo: Palestine President Mahmoud Abbas
