UPNA CINGTAAK NEI NAUPANGPA' UPA
Ni khat napangno khatin a sumtang kholna bawm (piggy bank) satkham in, a sunga a sumtang bang tan hiam a kholkhopte bang zah pha hiam ci-in tang khat khit tang khatin hong sim ciauciau hi. A sim khit ciangin a sim khialh khak ding lau ahih manin thum vei simpha kik hi. A sumtang sim phazah man hi cih a theih ciangin thawl neu sung khatah thun kik in, a sin (cap) lim takin a sit khit ciangin inn nunglam panin damin kuamah theih loh kalin hong pusuakkhia khinkhian hi.
A sum koihna thawl neu a khut tawh humcip cinten a, a manlang thei pen in khuapi sung lam manawh in hong pai samsam hi. Zatui kizuakna sumbuk hong tun ciangin a sungah va lut samsam pah a, zatui zaha zuak (pharmacist) ten ama' lut a thudon dong sumbuk ngak mai-ah dingin mit a mitphia loin en kilkel den in a counter mai-ah dai dide in va ding hi. Zatui sai ngakpa'n tua naupang in amah ngak hi cih a theih ciangin, "Ka tano aw, bang kong hih sak theih ding om hiam? Kong huh theihna om hiam?" ci-in dong hi. Naupangno in, "Na lamdang (miracle) ka lei nuam hi. Na lamdang hih lai-ah a kingah hiam?" ci-in dawng hi.
Zatui sai ngakpa'n lamdangsa lua ahih manin, "Bang e? Na lamdang e? Na thugen ka zakkhialh hiam hong genpha kik sin aw..." ci-in dawng hi. Naupangno in, "Ka sanggamnu a ci na mahmah a, ka pa'n na lamdang bekin damsak thei ding hi ci hi. Ka u nu' ading na lamdang lei nuam a hong pai hi'ng. Na lamdang bang zah man hiam? Na lamdang lei nuam a hong pai hi'ng,Na lamdang ka lei nuam hi. A kingah hiam?" ci-in dawng kik hi.
Zatui suakpa'n, "Ala! Poi si e, hih lai-ah ko lamdang zuak kei ve ung e... na lamdang ka nei kei uh hi. Hong maisak in," ci-in aw dam in lu kun sukin dawng hi. Nangpang in a thuzak um zo ahih manin, "Na lamdang leina dingin sum kong keng hi. A man zah hong gen ta peuh in... a leina ding sum ka nei hi. Na cih zahzah hong pia ding hi'ng," ci-in dawng hi.
Tua leh amau gel kihona kianga ding amau kihona teng a za pasal ham pian khat leh lim tak-a kizem sitset pa'n a kihona uh pau lo phun loin lim takin na ngai hi. Tua pa'n naupangno mai en in a kiangah, "Ka tano aw, Na sanggamnu'n koi dan na lamdangte kisam hiam?" ci-in dong hi. Napangno in, "Ka thei kei hi pa aw. Ka pa'n ka u' lutang sungah bang hiam om a, a lu sunga om pen khangkhang ahih manin na lamdang lo buang a damsak thei ding om lo hi ci hi. Ka u nu a ci na mahmah cih ciang bek ka thei hi. Siavuan ten manlang takin na at (operation) loh uh phamawh hi ci uh hi. Ahih hangin ka pa'n a sanggamnu' ki-atna ding sum nei lo hi. Ka sanggamnu hutkhiatna dingin na lamdang bek om a, tua ka kisam uh hi. Hehpihna tawh nong huh theih leh hong huh in. Ka sum khol teng leh ka sum neih khempeuh ka sanggamnu adingin ka zang ding hi," ci-in a mit panin khitui hong luangkhiate a biang ah hong luang sukin, a khabe panin a khitui sisan bangin hong takkhia keuhkeuh hi.
Papipa in naupangno kiangah, "Ka tano aw, lungkham kei in la, kilungnuam sak in. Tua ahih leh sum bang zah nei na hiam?" ci-in dong hi. "Dollar khat leh 12 cents ka nei hi," ci-in naupang in a aw kiza milmial in lu kun sukin dawng hi. "Eh! A kisap leh sum kisam lai teng zong kong ngaihtuah beh ding hi," ci-in tha khatin hong papipa' dawn' kik ma-in a thugen hong zom samsam hi. "Pha hi, kituakkha lian hang ei leh.. Na sanggamnu adinga kisam na lamdang man pen dollar khat leh 12 cents lian hi. Tu-in na sanggamnu kiangah hong tonpih in...bang na lamdang kisam hiam cih kong enkhia phot ding hi," ci-in papipa'n dawngin naupangno' sum a khut langkhat tawh la-in a khut langkhat tawh naupangno len in naupangte inn lam hong manawh samsam pah uh hi.
Tua papi ham pian puanhoih tawh kizempa pen zato inn hoih mahmah khat-a director hi a, na lamdang bekin a damsak theih numeino damsakna dingin a huh thei omsun pa tua naupangin va tuakkha hi. Tua zato inn director pa'n numeino manlang takin zato inn ah puak pah a, ama' makaihna tawh siavuan siam pen a tengkhiat teng tawh operation manlang takin a siam theih tawp suahin bawl kipan pah uh a, operation lawhcing takin zo thei uh hi.
A sawt loin numeino cidam in inn lum lo lum zuan kik a, sum peek khat zong bei loin cidamna ngah kik hi. Numeino nu'n phun siausiau in, "Hih pen na lamdang takpi hi. Sum tawh lei ding hi leh bang zah a bei tam ci-in numei no operation bawlna a makai zato inn director pa kiangah a lungdamna thu ko hi. Naupangno in na lamdang bang zah lian man hiam cih tel lua-in a tutmun panin na nui hieuhiau hi.
Dollar 1.12 cents leh naupangno' upna in na lamdang lei zo hi. Na up zah na muan ngam zah in na ngah ding a, na upna bek tawh hun sak loin sepkhiat leh hanciamna tawh zom lecin Pasian in na upna a mawkna suaksak lo ding a, na tama ngei kei ding hi.
🖋️Thang Khan Lian
