ZOMITE' LUNGSIM LEH I UI LUNGSIM

ZOMITE' LUNGSIM LEH I UI LUNGSIM

Ui hon lakah saguh bawk khat lot leng kitawng in kilai ngeingai uh a, si leh nai kisuah uh hi. Saguh bawk kituh uh hi lel a, thupi lo hi.

Tua bang mahin ei Zomite a tam zawte pen:

1.Biakna vai kigen leh kitawng pah ngeingei, si leh nai kisuah...
A kithat ngam om zaw lai hi hang.
2.Pawlpi vai kigen leh kitawng pah ngeingai, khat leh khat min kilo in kikawkpah zelzul. Sisan leh naisan kisuah ngam pah hi hang.
3. Gam makaite vai khat kigen leh pawl khatin gum, pawl khatin gensia. Kitawngin kisel pah ngeingei leuleu.
Si leh nai kisuah ngam suk pah hi hang.
4. Biakna maikaite vai kigen kha leh pawl khatin gum, pawl khatin gensiatsak... Kitawng kisel pah ngeingai. Sisan naisan suah ding kikihta lo hi hang.
5. Beh min, phung min kigen kha leh i beh min leh i phung min tek su hum taw hum in hum nuam tek in, sih gup in gum, kitawng kisel pah...sisan naisan kisuah ngam pah hi hang.
6. Doctrine (biakna thu up guipi) vai khatin kigen kha leh ei doctrine bek mansa tek in, kitawng kisel pah ngeingai in si leh nai kisuah ngam ta zen hi hang.
7. Biakna, doctrine, pawlpi, gamvai thu khat social media ah kipost kha leh phulun khah khiat kibang ngeingei a, commentna ah a kiphin tawh, a kikawk tawh, a kipet tawh, a kihaizan tawh, a kilai tawh, a kithat tawh kizeel ngaingai in 24 hrs sung a mit thei lo meikuang bangin comment lut ziahziah.

Tua ahih manin i ui lungsim pen paih khiat hun ta hi. I ngaihsutna kibang lote hangin kitot, kisel, kilai, si leh nai kisuahna i piangsak den keei pen i kitelsiam lohna hi lel a, thupi lo hi Ui saguh bawk kituh tawh a kbang i hi bek hi. I mel, i puam, i khan khiatna, i sangkahna, i thumuhna, i teenna mun a kibat loh manin i ngaihsutna a kibang lo hi bek hi cih i telsiam ding kisam a, tua pen cidamhuai in, khantoh vai na hi zaw hi. Kam sungah lei leh ha zong a kinawk khan den hangun kituak takin om thei buang uh hi.

Khat leh khat aw kidang githa khau,
Mel tuamtuam a nei sakhituihup,
Aw guk ciang khat hi.
Meel sagih khat mah hi.
Lungtuak-a a pan' khawm uh ciang kilawm in, zaknop huai se a,
It huai in, etlawm se hi.

I kibat lohna, i ngaihsutna tuamtuamte
Kisaktheih pih na'ng, kisialh pih na'ng om lo a,
Thanemna ding om tuan lo hi.
A kibang lo teng gawm thei leng etlawm a, picin'na zong ahi hi.
Picing kisin ni. Jesuh sung kiseel ni.
Hong bawlpa khat hi, i biakpa a kikhat hi.
I teenna, i gam i lei a kibat loh hangin,
Kawlgam Vaigam i hei zongin,
I minam min leh i sisan a kibang ahi hi.
Kitelsiam lohna ding om peuhmah kei.

Gul pen a om lohna ding mun leh launa a neih ciangin,
A kua sungah a tai lut ziau hi. Tua mah bangin:
I kitelsiam lohna leh i lungsim kibat loh manin,
Kitotna, kiselna hong piang ding ciangin,
Kitheihsiamna, maisakna leh picin'na bawm sungah
Khia thei ziau leng vaiveng pah ding a,
Kitotna, kiselna, sisan naisan kisuahna;
Kimuhdahna leh ki-elna teng khempeuh....
Meii bangin theng mang ziau lel ding hi.

LUNGDAM DING DAN KISIN IN LA, LUNGDAM DEN IN

LUNGDAM DING DAN KISIN IN LA, LUNGDAM DEN IN

Ni khat mihaupa a tawlet (window) pan in a dak khiat leh a ninbung (dustbin) sung panin a kipaai nate tawm khawm khiankhian mi khat mu hi. Tua mipa a muh ciangin a thupha ngahte phawkin,
Topa' lungdam ing, mizawng nong hihsak loh ci-in lungdam thu ko hi.

Tua mizawngpa in a kiim leh paam a khuadak leh guaktang (naked) a om mibanglo khat lam dungah kivial lehleh khat mu a,
Topa lungdam ing, mihai a nawng siam loh ci-in lungdam thu ko hi.

Tua mihaipa in a galkhat lam a khuadak toh leh dam lo puakna mawtaw (ambulance) tawh a kipua cina kipua khat mu a,
Topa lungdam ing, cidam a nong nuntaksak ci-in lungdam thu ko hi.

Tua cinapa in zato inn ah misi luang hawlna (trolley) tawh hankhuk zuan dinga kipua siluang a muh ciangin,
Topa lungdam ing, nong sihsak loh ci in lungdam thu ko hi.

"Misite in ahi a, gamdaihna sungah a pai peuhpeuhte in ahi zongin Topa phat thei lo uh hi" (Late 115:17).

Misi lah hi buang lo na hih manin nisim in dawn ding tui man nei loin a khawnkhongin hong zangsak den, dik ding huih man nei loin hong pia, hunhoih hunpha hong pia den, nisim na nuntakna hong kibehlapsak den in thupha a kicingin hong pia den, silh ding teen ding hong guan den a, guaktangin hong vaksak ngei nai lo Topa' tungah na lungdam hiam? Lungdam na ko ngei hiam? Misi sate bek in Topa' tungah lungdam thu ko thei nawn lo bek uh hi.

Midangte tungah Topa' hoihna pulak in na hawmsawn zo diam? Na hopsawn zahzahin lungdamna na ngah ding hi.
"Topa thu sungah lungdam tawntung un, ka hong cihsa bangin tu-in zong lungdam un, ka hong ci kikik hi." (Filippi 4:4). "Mi khempeuh tungah na dik un. Topa hong pai baih ta ding hi" (Filippi 4:5).