VENEZUELA SUPREME COURT HELICOPTER ZANGIN KISUAM
June 28, 2017: Venezuelan Communication and Information Minister Ernesto Villegas in Venezuelan police agency in charge for criminal investigations (CICPC)-te helicopter in Supreme Court building housing tung lam panin va suam (attacked) hi. "Thau tawi mi khat in CICPCte helicopter pimang (hijacked) in Supreme Court building housing thau tawh suam hi. Hih pen Venezuela republic suamna hi," ci-in Communication and Information Minister Ernesto Villegas in ci hi ci-in NTN24 television channel in gen a, hih thupiang hangin Venezuela khuapi (capital) ah patauhna leh buaina lianpi piangsak hi ci-in gen hi.
Venezuelan President Nicolas Maduro in hih thupiang pen terrorism gamtatna hi ci-in a mawhpaihna thu pulak a, a helicopter kiman ding a, Supreme Court suamna ah kigolh a thau tawi pa leh a pawlte kiman ding hi ci hi. A helicopter pimang pa'n Caracas khuapi a om Supreme Court ah grenade bomb bang zah hiam khia hi ci-in gen hi. Hih thupiang kumpi langpang party tuamtuam kipawlkhawm (opposition coalition) Democratic Unity Roundtable ten zong a mawhpaihna thu pulak uh hi.
A helicopter pimang pa'n a helicopter Supreme Court building gamla lo ah lengsak in, tua mun panin granade li khia in, Supreme Court building cingte kiangah nih khia a, thau in 15 vei kap hi. Hih suamna hangin liamna tuak kuamah om lo a, a grenade puakkham lo hi ci-in President Manduro in gen hi. A kisuam lai takin Maduro in presidential innpi a journalists omte kiangah live in state television ah thu a gen laitak ahi hi. Venuzuela gam pen datsi pianna gam leh datsi hau gam hi a, datsi man kiamna hangin van man takpi a kiam man leh sepna nei tampi in sepna a taan lawh manun Manduro kitawp ding deih in lungphona kha thum sung mipi ten nei ta uh a, Manduro in US in kumpi kilaihna ding 'regimes change' a sawmna hang hi a, lungphona neite sum tawh guai in, tawsawn hi ci-in ngawh hi.
Coalition opposition ten hih suamna pen President Manduro in upadi (constitution) gelh thak kik ding a sawmna hangin lungphona neite a bet daih nop manin mipi lauhna ding thu a kizelhsak hi ci-in social media ah ngawh uh hi. Supreme Court a kisuam lai takin social media Instagram video kikhahkhia a, tua ah police squad pilot Oscar Perez in Manduro in ama deihna tawh gam uk hi ci-in ngawh a, mipite miphinna nei dingin kunh hi. Oscar Perez in, "Teel ding thu nam nih i nei hi : I khuaphuak theihna hangin zing ciangin thukhenna tuak ding maw ahih kei leh kumpi nekgukna tawh gam uk panin tu ni-in suahtakna ngah ding maw?" cih lai-in simkhia a, a kiangah galkap puan silh a maituam leh thau tawi mi li ding uh hi.
International Crisis Group ah senior analyst Phil Gunson in hih thupiang pen lamdang mahmah a, a sim tham a piang bangin galkap ten tu dong thuk kik nai lo uh a, mihai pawlkhat kipawl in galkap thahatna zangin kumpi laih (coup) sawm uh hi ci hi. Ahih hangin a lang khat lamah en leng kumpi in lungphona neite a bet daihna kisiamtanna dingin a bawl tawm zong hi kha thei hi ci hi.
Al Jazeera reporter Teresa Bo in kumpi in hih banga suamna bawlte kithei ta a, a sawt loin kiman pah ding uh hi ci hi ci-in Caracas khuapi panin gen hi. Zan in President Maduro in galkap thahat leh zawh thawh thu tawh aana in lumpi langpang ten social government hong paihkhiat leh kei leh hong gum ten thau tawi in ka lehdo ding uh hi ci-in khuapi lam dungte ah lungphona neite leh kumpi langpangte tungah vauna bawl hi. Ni 90 sung lungphona bet daihna sawmna hangin mi 75 in sihna tuak ta hi. "Venezuela gam ah buaina leh ngongtatna hong piang a, Bolivarian Revolution a kisuksiat leh galdo dingin thau kitawm ding a, galvan zangin pu leh pa leitang kihumbit ding hi," ci-in Manduro in ci hi.
Venezuela upadi July 30 in gelh phat kik a, special super-body Constituent Assembly bawlna dingin vote khiat ding Manduro in a sawm manin Congress ah majority thuneihna len kumpi langpang ten dal a, kumpi langpangte leh sangnaupang ten national charter gelh phat kik ding deih loin lungphona leh Manduro kitawp ding kalh uh hi.
President lui Hugo Chavez zong US nasia tak-a langpang ngam socialist makai hi a, US in CIAte zangin tam veipi thah ding leh president laih ding tam veipi na hanciam napi na lawhsam hi. Datsi (oil) man kiat manin leitunga datsi hau gam khempeuh economy sia a, Venezuela naksiat diak hi. International Monetary Fund in tu kum sungin Venezuela ah van man khang (inflation) 1600 per cent tung to dingin na genkhol hi. Vanman khan man leh upadi gelhphat ding deih lohna hangin lungphona a piang manin mi 75 securityte khut leh kinawktuahna hangin a sihna hangin US, UK, Israel, Georgia in Venezuela kumpi gamtatna Human Rights Forum ah hek hi.
Political analysts tuamtuam ten bel Ukraine gam ah Orange Revolution zangin US secret agent CIA ten kumpi a laih bangin Manduro' socialist government a laih nop man leh Venezuela gamte minamte pa Bolivaria in a patkhiat Bolivarian Revolution a bet daih nop manin buaina bawlte leh lungphona neite sum tawh guai sim in, a taw sawn manun hih bangin buaina hong piangkhia hi ci uh hi. News comments ka et suksuk ciangin tu ni-a Supreme Court suam pa zong CIAte van zat hi ci leh a thukim om hi.
Source: Al Jazeera and news agencies; Sputnik
@Thang Khan Lian #ZUNs
@Thang Khan Lian #ZUNs
