BANG HANGA RUSSIA IN HILLARY KIAT THEIHNA DINGIN US KITEELNA AH DNC-TE COMPUTER SUAMSAK HIAM? COLD WAR BEI TAKPI MAH HIAM?
Jan. 8, 2017: News, lai tuamtuam ka simna leh ngaihsutna tam lo tawh hih thu kikum ni. Kidopi Nihna hun lai-in Allied Force (Russia+ UK+France leh a pawlte) leh Axis Force (Germany+Italy+Japan leh a pawlte) nasia takin a kido lai-un US in khutzep na gal et hithiat a, US in Allied lamte tungah a galvan leh thauvui thautang zuakin sumbawlna na nei a, leitung ah gam hausa pen hong suak hi. British PM Churchill bangin USte aw bang tan vei gal om lo bangin tu hithiat lai ding na hi uh hiam ci-in USte na taai bawl hi. Japan ten Hawaii tuikulh a om USte' teembaw phual Pearl Harbour December 7, 1941 in va suamsak gawp uh a (2,403 si, 1,178 liam), tua hang bekin gal nasiat bei kuanin US hong kihel pan hi. IR siam ten tua hun pekin US in a pawlte gum lo ahih manin Cold War (a sim tham a kidona, galkap zanga kimaituah a kikap lo napi kisim do) piang ta hi ci uh hi. IR siam pawl khat leuleu in Galpi 2na a bei in Churchill in May 5, 1946 in gal sungah Russia tawh kipawl napi Westminster College, Fulton ah (US President Harry S. Truman tawh platform tungah tu khawm uh hi) Fulton Speech kici a thugenna ah Russiate ki-ukna Communism a kizel gawp ding dalna ding leh English kampau US leh UK kipawlna a deihna thu a genna ah "iron curtain" kici kammal zang a, tua a kipanin Cold War hong kipan hi ci uh hi.
Bang hanga Russia US tungah lungkim lo a, bangci thuk kik hiam?
US in leitungah Communist dalna dingin Soviet gam phelkhap ding na hanciam den a, 1991 in Soviet gam hong kikhenkham gawp in Russia hong piang hi. Tua pen leitungah US bek thuneihna omsakna (uni-polar world) ding leh bi-polar world (Russia leh US bek hat penna) beisakna ding ngimna hi. US in gam 70 ah galphual 800 bawl a, Russia in gam 10 bekah galphual nei hi. US in gam tuamtuam ah galphual a bawl nop manin kumpi laih in, kumpi lehdote huhna pia a (Iraq, Libya, Afghanistan, Syria etc), kumpi a kilaih ciangin gal phual bawl behbeh ding bek ngim in nei hi. US military budget pen $597 billion hi a, Russiate a $66 billion bek ahi hi. Middle East ah thuneih ding a kituh den uh ahi hi.
Ni dangin Soviet a kikhen ma-in gam khat-a Soviet tawh a om Georgia leh Ukraine tungah US in NATO member piak dingin zol sim a, Russia in lungphona nei pah hi. US in a lunggulh pen thudang hilo a, Ukraine leh Georgia ah Russia ngimna dingin galphual a neih ding a ngimna bek hi lel hi. Hih thu hangin Aug. 2008 in Georgia panin South Ossetia leh Abkhazia a om rebels (USte thu bawl in) ten kiphinna nei uh a, Russia hong kigolh lut ciangin US in lungphona (protest) nei pah hi.
July 2013 in USte NSA contractor lui Edward Snowden in NSA ten mipite gamtatna teng a et simna (surveillance) deih loin NSA thusim pholak khia hi. US panin galtai a, Russia in bukna ding (asylum) a piak manin USte ciltang mek khak hong bang uh hi.
Feb. 2014 in Russia tawh kitanauna hoih mahmah nei Ukraine President Victor Yanukovch paih khiatna dingin US in President deih lote taw holh a, kiphinna lianpi hong pian' ciangin Russia ah Yanukovch galtai hi. Hih thu hangin Russia thangpai mahmah a, Ukraine gam-a Russia pau zang teng zong lungkim loin Ukraine panin a leng khiat theihna dingun kiphinna hong nei uh hi. March 14, 2014 in Russia pau a zang a tamzawte teenna Crimea in mipi tamzawte deihna tawh vote khiatna (referendum) nei uh a, Ukraine panin leng khia in, Russia beel uh hi. US leh EU gam ten Russia in Ukraine sim in, Crimea laksak hi ci-in khalna (sanctions) a koih khum ban ah G-8 panin Russia hawl khia uh hi.
Sep.30, 2015 in USte huh rebels ten Syria president laih zo ding hi cih hong kitel ciangin Syria ah Russia hong kigolh a, tu dong Assad a ding zo lai suak hi. Russia huhna tawh 2015 in ISte khut panin Palmyra kila a, Dec. 2016 in rebelste ukna Aleppo nisuahna lam teng Syria kumpi in la zoin Russia in jihadists kicite leh rebelste tang leh tahum tang bangin khentuam se loin nuai gawp hi. USte geelna a lawhsam dipdep hong suak hi.
2012 in Hillary in US Secretary of State a let lai-in Russia President dingin Putin a cin' kik manin lungphona piang hi. Tua pen Hillary in kiteel ma-in Putin kiat theihna ding na vaihawm in, Putin hong cin' ciangin lungphona nei dingte a taw sawnna hangin lungphona piang hi kici hi. Hih thu hangin Russia in US in democracy a kam dimpi tawh a tangkopih den pong hangin mipi tamzawte deihna tawh a kiteel kumpi langpang hi ci a, US kiteelna ah Hillary tungah phuba la kik cinten nuam ahih manin DNCte computer a hack sak uh ahi hi. Tua loin Trump in Muslim jihadist-te leh ISte do ding gen bel in nei ahih manin Russia in Hillary sangin Trump a cin' ding deih zaw hi. Tua banah Trump in Russia tawh kitanauna bawl hoih ding lunggulh ahih manin Putin in Trump gum hi.
Putin leh Trump bel tu ta dih in kihothei mahmah lai uh bang hi. Ahih hangin Democrats-te sangin Republicans ten Russia pen a tawntungin gal bawl zaw den in, Republicand President luite Russia tungah khauh pai mahmah uh a, Russia thanemna ding deih den uh hi. Soviet a kitamkhamna ding zong USte sunmang tangtun theihna dingin Republican President Reagan in hong lawhcingsak zo thong hi. 1991 Cold War bei/si hi a kici pen Obama in hong phong kik a, Cold War bei ta hi a kicih khit nung Obama' administration hunin US leh Russia kitauna a siatna pen dong Obama in tunpih hi ci-in kiciamteh hi. Putin leh Trump hong kilem theih kei uh leh bel Cold War a sihna panin a thi kik hong vak kawikawi kik ding cihna hi. Russia pen 1991 in hong ding kik/piangkhia ahih zenzen hangin dual tuan lo a, thahat tektek ding bang mawk hi.
