KIMANNA NEI LO-A SI HI DEN DING MAW?

 

KIMANNA NEI LO-A SI HI DEN DING MAW?

Tu hun ciangin Khristian a kici leh gam leh minam it in mapang a kici kitam mahmah napi Khristian ngeina banga nungta leh gam leh minam adingin hamphatna ngahna ding sepkhiatna tawh a lak khia kitawm mahmah hi. Jesuh a-um kici kitam mahmah ta napi ahih hangin, "upna gah" a-nei kitawm mahmah hi.

Lai Siangtho in tua dante pen, "upna si" na ci citciat hi. "Sepna om lo upna in, a si upna hi," ci in, Lai Siangtho sungah kigelh hi. Minam min tawh kipawlna gamvai leh minam min tawh kipawlna thau tawite in gam leh minam kisap hunin a khutme nangawn a tatsak nuam kei uh leh leh kiamman nei lo hi.

Sanggamte aw, mi khat in, “Upna ka nei hi,” a cih hangin a sepna in a zuih kei leh bang phattuamna om ding ahi hiam? Tua a upna bek in amah honkhia ding ahi hiam? Gentehna-in, na mipih khat peuhpeuh uh an nek tuidawn, nikten’ puansilh nei loin haksapi-in om hen la, note khat peuhpeuh in, ama pumpi kisapna bangmah pia lopi-in, “Khualum gilvah takin om in,” ci mawk lel le-uh cin bang phattuamna om ding ahi hiam? Tua ahih ciangin gamtatna in a zui lo upna guak pen a si ahi hi. Ahi zongin mi khatpeuh in, “Mi khat in upna nei a, a dang khat in gamtatna nei hi,” ci zenzen leh, gamtatna in a zui lo upna hong lak dih in; keimah in ahih leh ka upna ka gamtatna tawh ka hong lak ding hi, ka ci ding hi. Pasian khat bek om hi, ci-in na um hi. Tua pen hoih mahmah hi.

Dawite nangawn in zong tua bangin umin lau-in ling deldel uh hi. Lawmte aw, gamtatna in a zui lo upna pen a hawmpi ahihna thu ka hong lak ding hi. Eite’ pupi Abraham in biakna tau tungah a tapa Isaac a piakna hangin Pasian tawh kipawl thei hi. Tua ahih manin upna leh sepna kizom khawm a, sepna in upna a kicinsakna thu na thei uh hi. Lai Siangtho in, “Abraham in Pasian um a, a upna hangin Pasian in mihoihin a sang hi,” ci-in a genna thumanin tung takpi a, Abraham pen Pasian’ lawmpa kici hi. Tua ahih manin, mi khatpeuh in a upna bek tawh hi loin, a sepna tawh a kizuih ciangin Pasian tawh kipawl theihna ngah pan ahihna thu na thei uh hi. (Jeim 2:14‭-‬24)

Topa Jesuh hong sih khit/singlamteh khit hun pekpek khit ciangin zong Sawltak Paul in Rom 3:31 sungah, "Tua ahih leh hih upna thu i gen ciangin, Thukham a phiat ihi hiam? Hilo hi; a kipsak ihi hi," ci in na gelh hi.

Zomi Zogam ka it hi ci napi-in gamdangte thuman lohna teng peuh pumgup ngam zaw in, makaite golhgukna, nekgukna leh nongtatna teng peuh gum zawsop in, sum leh paai, neih leh lam hau mahmah napi Zomi cimawh gilkial dangtakte awlmawh lo gam it kici a pau lanlan kitam mahmah dep hi. Zomi leh Zogam puah ding leh zuunna dingin mikim in sep theih khatpeuh kinei ciat napi pilna sin ding, sum zong ding cih ngim masakna nei lopi-in zuau bulomtang bek tawh gamdang bekbek a lengkhiat ding veve ngim in a nei zong kitam mahmah mawk hi.

Hihte pen Zomi leh Zogam a itna a si mah hi veve hi. Gamdang tungin Zogam phawk nawn loin, sum leh paai a neih khit ciangin Zogam-a cimawh gentheite khual nawn lohna zong a mawknapi gam leh minam itna hi a, kam vang ta ci-a gam it, minam it a kici teng mahmah hi. Mina kin tawh kipawlna political party leh aremed group kipawlna a upat zah kisialpih pong napi-in gam leh minam adingin sepkhiatna i neih gen ding om kei leh lo lai-ah khaici teng a dep khuk khiat zawh loh kimanna a nei lo suangtum tawh kilamdan'na om kiuhkeuh lo hi.

Gam leh nam adingin mikim in i talent ciat zangin na sep theih kinei kim hi. "I minam min pen i sihpih ding hilo a, i hinpih ding hi zaw hi," ci-in Rev. Khup Za Go in a gen lungngaih kik huai ka sa hi. I gam leh i minam it masa loin nam dang leh gamdang it nawn kei ni. I kampi bek tawh i gam leh minam it loin i sep theih ciat suahkhia in, Zogam itna Iahna dingin singno khat beek suan kipan in, i Zogam zuun kipan ni ci-in i kicial hi.

I minam i it leh a mite ten'na leitang zong it in, puah in, zuun kipan ta ni. Cimawh beidong tawpkhong, lau in a patauh hunin humbit kem ngam in mapang khawm ngam ni. Na tut mun leh na omna mun peuh panin na nasem thei hi. Mi khut tawh gul mat sawm den nawn kei ni.

Min leh za deihna tawh na i sep leh i lawhcing ngei kei ding hi.
Nai cin' ngakna peuhin na i sep leh i lawhcing ngei kei ding hi.
⛐Na hauhna, na pilna leh kipawlnma a upat zah na kiphaksakpih leh kisialhpih png niloh leh sawt na khom kei ding hi.
Tap kual ah na ciakciak kalin mite in leitung kim vel ta hi.

Minam leh gam adingin mikim in septheih kinei ciat hi. Lungsim takpi tawh itna lahkhiatna leh thumanna tawh naa sepkhiat khat peuhpeuh a neu lua cih om lo hi. Hanlung ciam in lungkia loin khawlsan kei ni. Suahtakna lunggulh leh Pasian' gam zaina ding lunggulh khempeuh mapang khawm hun ta hi.

TAKKHEH!!!

 Thang Khan Lian #ZUNs reports 

ZOGAM ESAU LEH JUDAS ISKARIOT SUAKIN ZOMITE LEH ZOGAM BUANLEI SUAKSAK DING MAW?

 

ZOGAM ESAU LEH JUDAS ISKARIOT SUAKIN ZOMITE LEH ZOGAM BUANLEI SUAKSAK DING MAW?

Leitung mawhna a pua khia dingin a hong pai tuuno leh hell meilipi sung panin i suahtak theihna dingin a van tokhom nusiatsanin Pasian' tata tang neihsun nangawn singlam tungah sihna hong thuak hi. Suahtakna kici ngahna dingin sisan a luan' kul a, man piak kul hi. Singlamteh tungah a kikhai lup ma pekin a mipihte sungah thuneihna leh panmun khahsuah ding a patau Thukham hilh siate, Saddusi mite leh Farisai mite in jesuh na galbawl den uh hi. Thuman a gente leh dinpih ngamte pen zuauthu leh panmun bek a deihte tawh kilem thei ngei lo uh hi.

Singlamteh tungah a thah theihna dingun nungzui sawm-le-nihte sungah Judas Iskariot a kicipa ngun peek sawmthum tawh Jew biakna makaite in golhguk pia-in a lehhekpa dingin na zang uh hi. Gamvai tawh kisai-ah bbiakna makaite pen a kihtakhuai pente suak thei zawsop uh hi. Tua khit nungin Jew mite thukhenna sangpen upa (elders) 23 or 71 a tutna Jewish supreme judicial, ecclesiastical, leh administrative council SANHEDRIN a kici ah Jew leh Roman thukham palsatin zankim laipi-in mawhna nei lo Jesuh teci pang (witness) om lopi-in na mawhpaih uh hi.

Singlamteh tungah a khailup theihna dingin Farisai, Thukham hilh siate leh Saddusi mite in a tawholh Jew mite na ne awng keek uh a, mi khempeuh in, “Hih mipa’ sihna hangin gimthuakna, kote a kipanin ka suan ka khakte dongun ka thuak ding uh hi,” ci-in Judea gam uk Pilate na dawngin na awng henhan uh hi. (Matthai 25:25)

Mawhna nei lo Jesuh thah ding a zi' hilhna hoih leh leh ama' sia leh pha khen theihna tawh a kizo lo Pilate in singlamteh tungah khai lum un, ci-in a ot keekna uh bangmah phattuamna om loin buaina piang zaw kha ding, ci-in a theih ciangin, tui la-in mihonpi’ muhin a khut sil a, “Hih mipa a sihna thu-ah kei ka kihel kei hi. Note in thei ta un,” na ci hithiat hi. (Matthai 27:24). Pilate bangin a meidawi mi leh thuman sangin gam kipumkhatna ding paulapna ding a zong makaite kihtakhuai mahmah hi.

Newin hun 1962 kum panin Saw Maung leh Than Shwe' hun sung 1962-2011 Burma gam military junta dictatorship nuai-ah a om hun sung leh Feb. 1, 2021 coup khit nungin Tatmadaw in a ut peuh thah theihna ding LICENCE TO KILL nei hi. Kawlgam mite nengniam, nengcip, tuatcil gawp theihna ding rights nei a, a gamtatna uh tawh kituakin responsibility leh accountability bulphuhin tu dong dan tuak loin kipelh suak zo lai uh hi.

Feb. 1 ni-in coup leader Min Aung Hlaing in ukna hong buluhin state power organs, democratic institutions, human rights teng go lum khin mang hi. Hih bang hunin district hong pia takpi le-uh hamphatna kingah tuam ding a kilamen khuak nei napi-in a zang lo kitam dep hi. Junta regime SAC in mee khiatna electoral system ah amau adingin mee kipia zah parties ten a ngah theihna ding (proportional representatives) theihna dingin districts thak bawl beh ding, cih a geelna leh ngimna a pulakna ah district ngah thei dinga min kihelte lakah Tedim a kihel manin SAC tungah sial a gawh nuam bang om zen hi. Democracy ngeina bangin kiteelna results mee gukna (voter fraud) hi, a cite in DC lel panin election results hong sang ding uh hi, cih peuhmah hak gega kawmpipi kihing khemna hi.

Nov. 6 general election ah a maizumhuai guallelhna tuak junta in election results thuman US ex-president Donald tRump bangin ne zo loin ukna hong buluh uh a, democratic process, insitutition teng go lum uh hi. tRump in a pulak ngam loh martial law leh state of emergency pulakin kum khat khit nungin kiteelna neih ding a cih uh kum nih dingin sot to uh hi.

Hih bang hun - SAC in mipite meetang khiatna peuh kikhemna leh thuman lo hi ci-in a guallelhna uh tRump leh a bia Trumpists or tRumpanzees pawlte bangin "voter fraud" om hi, ci-in ukna hong buluh uh a (America aj Jan. 6, 2021 in lawhsap dikdek), military dictatorship nuai-ah a ngongtatna uh suakta takin hong zang uh hi. District kici pen a thuneihna neu mahmah napi-in gam buppi ah democratic insitutions, state power organs leh human rights teng go lumin mihing nuntakna man nei lo a suaksak SAC in district hong piakna nuai-ah hamphatna leh suahtakna ngah dingin a kilamen ui khuak a nei na kitam lai bilbel hi. Junta regime nuai-ah district a kingah zongin amau guan leh kigulluhpih military-apponted administrors lo buang panmun ngah zo om lo ding hi. Junta regime thapia nuamte adingin a lawphuai thu hi napi-in, junta regime a deih lote adingin kihtakhuai zaw hi. a deih leh deih lo kinawktuahna hagnin kul lo leh kisam lopi-in sisan luan'na ding hi zaw hi.

Esau in a innluahza be meh leh an kuang khat bek tawh a zuak ngam bangin Myanmar gam mite democratic rights, human rights, fedral system leh full democracy sunmang teng, state power organs leh mihing hihna tawh manphatna (human values and dignity) tawh thuneihna ngah ding kilametna tawh suahtakna leh thuman a deih mipite sunmang a go lum junta regime' khut sungah na zuak peuhmah leh nang leh na tu na khangte hong kimaisak zo ngei lo ding hi.

Thuneihna bek deih luatna tawh thuman leh mawhna nei lo mipa singlamteh tungah a sihna dingin thubawlte leh hekhek mipa na bat leh na mawhna hong kimaisak ngei lo ding a, nang leh na suan na khakte suahtakna a lunggulh mipite gal lianpen na suak ding hi.

Esau in a gilkial luat na hangin a innluahza a zuak bangin thuneihna deih lua-in kum 50 sung junta regime ngongtatna, nuainehna, nencipna leh henkol bulhna panin suahtakna a lunggulh teng junta dictatorship' Golden Jubilee cimtak lua khinin a kitomtom leh a lehdo na teng na hehhek leh langpan' lai teng, SAC tawh na kigulluk lai teng mipite gal lianpen PUBLIC ENEMY number #1 na suah bek hi loin Pasian in hong dawm vet lo ding hi. Na mipih mawhna nei lote sihna dingin district tawh zuak ngamin Pilate bangin na khut na sil siang hangin na khut sunga sisan kaite na sawp siang zo ngei kei ding hi.

Na suahtakna leh na hihna manphatna na humbit theihna dingin na kitom leh na lehdo ngam kei leh tuate na khahsuah leh mansuah khit teh teh kap nena sese ke'n la, a suahtaknma leh ahihna uh a manphatna humbit nuamin a kitom ngam leh a lehdo ngamte mawhsak leh mawh zon' sese dah zaw in. Suahtakna leh ahihna uh a manphatna gumin a kitom leh a lehdo ngamte leh sila lungsim paaite kipawl khawm thei ngeingei lo ding hi. sal lungsim a paaite leh suahtakna lunggulhte kipawl khawm thei ngei lo ding a, Zomi min leh kipawlna lel in gawmn khawm zo ngei lo ding hi.

Mi dangte sila bangin a bawl leh zang nuamte leh sila lungsim a paaite kipawl thei ngei lo ding uh hi. Sialvom leh sialvom mah kingai hi. Dai dide in junta ngongtatna kum 50 sung khut zep kawmin et hithiatna tawh na rights na humbit zo ngei kei ding hi.

 Thang Khan Lian #ZUNs reports