Na Zi - Na nakguh

NA ZI - NA NAKGUH...... 

(Numei pasal a huamkim thugenna)

1. Na zi pen awkhauh leh awtol tawh hopih ken, a lungsim na mahmah sim khinkhian thei hi. (Proverbs 15:1)

2. Mi dangte lakah na ko a na gensiat leh na gensiat bangin na Zi hong om thei takpi kha hi cih phawk gige in. (Gen. 2:19)

3. Na zi na Itna leh na Ngaihna pen midang pia sawn kei in. Tua pen Angkawm kici a, mawhna lianpi ahihi. (Matt. 5:28)

4. Na zi leh midangte tehkak kha ngei ken. Midangte sangin na zi hoihzaw pek hi. Tua ahih manin Pasian in nang hong pia ahi hi. (2 Cor. 10:12)

5. Nupa pen pumkhat ahih manin nang pumpi pen na Zi aa hi a, ama pumpi zong nang aa ahi hi. Tua ahih manin a kisam bangin zang khawm un la, kikut bawl liang a kul lo dingin kitheihsiamna nei tuak un. (1 Cor. 7:5)

6. Na zi in nang hong ngaih manin na khempeuh nusia in hong bel ahih lam thei in la, ama tungah vakhu bangin na nunnem sak in. Awtol tawh na hopih a na haitat gangam ciangin na Zi lungtang pen dawt let zah in na hi cih mangngilh kei in. (Eph. 4:2)

7. Na zi’ tungah thu seelsim bangmah nei kei in. Pumkhat hi ta na hihmanun no nupa kikal ah thusim a om loh ding uh thupi hi. (Gen. 2:25)

8. Na zi’ pumpi in na mit hong laak nawn loh, a hoihna paak bang hong vul kuan ciangin gensia in hawm thawh kha ken. A hoihna leh a paallaini khempeuh pia khia in na ta ngek teng hong paai sak hi. Amah pen pumpi bek hi lo kha a nei mihing ahih lam thei gige in.

9. Na zi pen a melhoihna leh a pumpi iplah huaina tawh ama manphatna teh kha kei in. It takin pom in la, a teek ciangin zong ama tungah lungkim sawm in. (Eph. 5:29)

10. Mite mai-ah na zi pen awkhauh tawh tawngin taai kha kei in. Thu khat peuh a om leh tuam sap in la, inndei sung kuamah hong muh lohna ding munah thuhilh zaw in. (Matt. 1:19)

11. Nang leh na ta teng limtakin Itna tawh hong kep hong khoi ahihmanin nuam in la lungdam ko in. Hih teng a sepna hangin haksatna tampi tak thuak lawh hi. (1 The 5:18)

12. Numei khempeuh a anhuan a mehhuan dan uh kibang kim lo hi. Nisim thumvei an leh meh ong huan sak den hi. Kum khat sungah ni 365 om hi. Pumkhat na suah zawh uh kum bangzah hi ta hiam? Na zi in an hong huan sak manin nuam in la lungdam ko zel in. (Pro. 31:14)

13. Na tate pen na zi sangin masak zaw kha ngei kei in. Nang leh na zi pen pumphat na hihmah bangun na tate khempeuh sangin na thupisim zawk ding ahi hi. (Gen. 2:24)

14. Na zi tawh hunnuam zang khawm un la, Lai Siangtho sim in thungen khawm tangtang un. (James 5:16)

15. Na zi tawh kimawl in kino zelzel un la, hunte nuam takin zang khawm un. Na sih ciangin na luang a tutpih ding na zi hi a, midangte amau nasep tek tawh buai ding ahih manun hong gaal man lo kha lai thei uh hi. (Ecc. 9:9)

16. Sum tawh na zi mai et in lungkim sak sawm kei in. Na neih khempeuh hong neihpih pen na zi ahi hi. Pasian ciaptehna ah nang si lecin na gamh a luah ding pen na zi ahihi. (1 Pet. 3:7)

17. Midangte lakah na zi kicinlahna pholaak kei in. Nang leh nang a kipholaak na hizaw hi. (Eph. 5:30)

18. Na zi’ nu leh pa zahtak sak in la, a sanggamte zong it sak in. (SOS 8:2)

19. Hong ngai lua ing, hong it lua ing cici lel in. Numeite in Itna Ngaihna thu zakcim ngei lo uh hi. (Eph. 5:25)

20. Pasian deih bangin gamta in nungta un, tua pen Zi hoih Pasal hoih suah theihna lampi ahihi. (Rom. 8:29) AMEN  👆

-Ngaih Anglai 

MISSIONARY: DAVID BRAINERD -A LAMETNA GAMAH SINGTANG MIMAWLTE PILUT SAWMPA

DAVID BRAINERD

 -A LAMETNA GAMAH SINGTANG MIMAWLTE PILUT SAWMPA

Ama’ nunga khangthak tampite hong to (challenge) khia ding David Brainerd pen Haddam, Connecticut, US ah April 20, 1718 in na piang hi. A pa Hazekiah Brainerd pen legislator (ei adingin MLA bangbang) hi a, a nu pen Dorothy ahi hi. Unau kua pha uh a (a pa’n a zi masa tawh a neih khat tawh gawm khawm in) , a pa kum sawmli leh guk a phakin si a, tua khit kum nga in a nu’n sihsan leuleu ahih manin kum 14 khawng bek ahih in nu leh pa nei lo, tagah hong suak hi. A nu leh pa’ sih khit nungin a sanggamnu Jerusha beel dingin East Haddam ah pai hi. Kum 19 a phakin Durham ah lo khat nei a, ahih hangin lo khawhna panin lungkimna mel nei lo ahih manin East Rodham ah kum khat khit nungin ciahkik hi. Tua khitin Yale college ah sangkah theihna dingin  kisakkholhna hong kipan hi.

Khalam ah pianthakna July 12, 1739 ni-in, “gen zawh loh thupina” (unspeakable glory) kici theician a, Pasian bek tawisang ding leh a gam leh a dikna bek zon ding cih lungsim takpi tawh kiptakin theician ta hi. A tangthu tampi a dairy book panin Jonathan Edwards in na gelh a, Pasian a it mahmah leh Ama’ lungkimna dinga a nuntakna zat a sawm cinten dan leh Red Indian nammawlte a lainat dan kimu thei hi. David Brainerd in a na gentheih diak man ahi diam aw cih theih liang dingin dam thei het loin hong khang khia hi. Yale college adingin kisakkholhna kha nih sung  a neih khitin Yale ah hong lut hi. Yale ah laisim in a om lai-in a kum nihna in dam lohna nasia tak hong tuak a, inn ah kisawl kik hi. Sisan hong lua khia a, a sisan tampi hong kiam ahih manin TB natna dingin ki-ummawh hi. A natna a kitheih loh hangun tuberculosis (TB kumzawn) a na hi ding dan hi a, hih natna tawh kikhen taktak thei loin a na sihpih zong hih tuak hi. 

A hong dam kang deuh ciangin November, 1740 in Yale mah-ah kah kik dingin ciahkik hi. Tua laitak in Pasian thugen tuamtuam - George Whitefield, Gilbert Tennent, Ebenezer Pemberton leh James Davenport ten a sanginn uh-ah thu hong gen uh a, sangnaupang tampite lakah kha lam-ah khanlawhthakna nasia takin hong tung  in, a siate uh piangthak lo leh Fasisaite banga a kineih hi hong ci uh ahih manin siate leh sangnaupangte kikal-ah buaina lianpi hong piang hi. Hih thu hangin Yale college ulian ten 1741 in thukham khauhmahmah (decree) hong bawl a, sangnaupang ten college Reactor, Trustees leh tutor khat peuhpeuh mi kineihsiam, piangtho lo leh Farisai tawh kibang hi a cih peuhmah leh kiciamteh ding a, nih vei tua bangin kampauna neite college panin kihawl khia ding hi cih thukhun hong bawl hi. Yale University ten Jonathan Edwards a graduation ni un a thugen dingin cial uh a, sangnaupang lamte dik zaw hi ci-in hong gen beh lai leh buaina hong kibehlap semsem hi. Ni khat David Brainerd in a siate khat Chaucey Whittelsey kicipa, “Hehpihna nei lo tutna (chair) tawh kibang hi,” a cih leh amah zong nawh khiat in om hi.

1742 kum in Brainerd in Lungdamna Thu gen (evangilicals) tuamtuam kipawlna “New Lights” kici tung panin Lungdamna Thu gen theihna ding phalna lai (license) ngah hi. Hih a ngahna hangin Yale college ah a khum kik sawm hangin a lawhsam New Jersey khua-a Presbytery ulian Jonathan Dickinson in Brainerd a deihsakna hong khang tektek hi. Ahih hangin 25 November 1742 kum in Society in Scotland for Propagation Christian Knowledge kicite’ huhna in singtangmi Red Indians (Native Americans zong a kici) te lakah Lungdamna Thu gen dingin cialna ngah hi. April 1, 1743 in Long Island ah na sep hong kipan a, tawl khat hong sep khit ciangin Native Americante kiangah missionary dingin hong kuan khia hi.  David Brainerd nasepna pen haksa lua ahih manin a natna hong nasia semsem ahih manin 1746 kum bei dek ciang bek sem zo liailiai hi.  Singtangmite lakah giahna ding zong mu zo ngei loin buhphual lak khawng peuhah gial zel in, an zong hoih takin a nek loh ni tam mahmah ahih manin a dam theih lohna hangin a tha nakpi takin hong kiam hi.  A dam theih loh banah giahna ding zong  nei loin an leh tui a manman in ne lo ahih manin kuamah  nuntak zawh ding hilo hi.   Singtang nam mimawlte kha thu lam-ah lainatna taktak nei lo ten nawngkai na sa lel uh a, thah ding bekin  na en zaw lai uh hi. Tuate lakah tang khat leh lungleng takin va om veve hi. A lunglen luat man leh a dam theih loh luat manin sih ding ut zaw ta ing a cih hun tam mahmah hi.

New York sunga om Nassau kianga om Kaunameek kicihna munah Houstonic Indian kicite lakah nasep hong kipan masa a, kum khat a om sungin naupangte adingin sanginn honsak a, Lai Siangtho Late Bu zong amau’ pau in tei khiat kipan a, a kum kik in New Jersey sunga teng Delaware Indians kicite lakah sem dingin huhna pia ten suan leuleu uh hi. Tua kumin Newark Presbytery in ordination pia in, a kum kik in Crossweeksung ah kisuan kik hi. Hih mun-ah a nasepna gahhoih pen a, kum khat sungin thu-um 130 hong pha hi.

Hih hun lai-in mission field nusia a pawlpi ah hunbit pastor sem dinga cialna tampi mu den a, singtangmi nammawlte a lainat manin cialnate nawl khin a, haksatna gen zawh loh tuak den napi amau lakah missionary nasepna pen nusiat sawm lo hi. Tua hun lai-in a dairy book ah hibang in na gelh hi:

“Min dang leh nasepna dang ka nuntakna ah neih ding ka ngaihsut ciangin suahtakna ka nei thei kei hi. Ka lungsim takpi a ka deih pen bel thu-um lo ten Pasian a hong muh ding uh hi a, ka lemetna khempeuh pen Pasian kiang bek ahi hi. Lawm leh gual leh ngaih teng tawh kimu a leitung-ah a nuam kicite sunga kibual dingin ka lungsim ah Pasian’ phalna mu in ka kithei kei hi,” ci hi.  

Gentheihna, thawmhauna, lunglenna, nek gina nek lohna leh nuntakna hamsa mahmah-a a om lai-in November in a sepna maban sem ding cih pen hi zo nawn lo a, gim lua ta ahih manin Jonathan Dickinson’ inn, Elizabethtown ah kisuan lut ta hi. Tua munah bang tan hiam sung a tawldam khit ciangin Northampton, Massachusetts ah kisuan kik leuleu a, thugen minthang mahmah Jonathan Edwards inn ah hong om hi. May 1747 in a dam lohna pen damask thei loh ding natna ahih lam hong kimukhia ta hi.

A natna in gimsak mahmah a, September 24 ni-a a diary book sunga a gelh, “Haksatna tawpkhong ka tuah pen cik mahin ka thuak ngei loh sa-ik hi a, hih sa-ik in hong phak ciangin ka gawl hong kimeksak bang a, ka luak suakin sisan ka lua khia hi,” ci-a  a ciamteh mah bangin a thuak khak ngei loh sa-ik leh luaksuak in genthei takin om hi. Tua hun in Jonathan Edwards’ tanu Jerusha Edwards kici nungak kum 17 mi in kem a,  ki-it mahmah uh hi.  Brainerd dam hi leh kiteng dingun uphuai hi kici hi. October 10, 1747, kum 29 bek a phakin ama’ natna phawk nawn lo ding leh nat leh sat, gentheihna thuak  nawn lo dingin Topa’n tawldam ding na la tat a hi.  Bridge Street Cemetery, Northampton ah Brainerd ah kivui hi. Jerusha Edwards zong Brainerd a kep manin TB natna ngah a, Brainerd kivuina kiang lianah February 1784  in kivui hi.

Brainerd’ hansuang tungah hih bang ki-at hi:

Rev. David Brainerd Phawkna siangtho.

Cihtakna leh thanuamna tak tawh Stockbrige, 

Delaware leh Sashquehanna sunga Indians 

singtangmite adingin missionary nasem hih khua ah si hi. 

October 10, 1747 AE 32.

Dam hi leh a sunghpa hong hi mai diam maw ci-a a na upmawh uh Jonathan Edwards in ama’ inn ah a kep sungin David Bernerd’ thungetna leh upna thupi sa mahmah a, a dairy book sunga thu kiciamtehte panin David Bernerd’ tangthu hong kaikhawm a, laibu hoih mahmah hong piang hi. Hih laibu pen ama sih khit nungin missionary thupi diak-a kigen hong hi ding Henry Martyn, William Carey, Jim Elliot, Adoniram Judson leh adangdangte a to (challenge) laibu hong suak hi. Pasian thugen minthang John Wesley in, “Pasian’ thugen peuhmah in David Bernerd’ tangthu sim tek uh hen,” na ci hi.

Topa’ adingin mai lam en kawm in a nasepna nuamzaw dinga tampi veipi a kisap lai-in zong na nolh in, minam mawlte a lainatna hangin a nuntakna manpha a na piak mi ten thupi ngaisut mahmah uh ahih manin a tangthu kigelhna laibu zong bei man loin kisun kik zel a, khang tampite Topa’ adingin a uk hi ta hi. Kum 29 bek dam ahih man sepkhiatna lam pen tam nei man lo hi. Ahih hangin ama’ nuntakna in khangthak tampi missionary dingin sam khia a, mi tampi Topa’ galkap hangsan hi dingin a topa (challenger) leh a sam lutpa suak hi. David Brainerd’ dam sung ngaihsun leng kum 29 bek hi a, khangmoi lai mahmah khat hi a, tangval thahat lai ahi hi. A tangval lai-in a sih hangin a thahat lai leh a hat lai ni tengin  Pasian na pia a, a nuam zaw sepna leh sap zong delh tuan loin a Topa’ sapna lam tang takin na zui a, a tunna ding a theihcian manin a nutsiatsan gam khialah leh ngai nawn loin ding tawldam ahih manin kampha mahmah hi.

America tangval,  leitung ngaihsutna ah nuam a sakna ding teng nusiatsan in haksatna lam vive teel zaw a, hih sangin a baih lam zaw in Jesu zui thei mahmah ding kimlai a Topa’ sapna a na theihcian manin Topa’n a it singtang mite a nusiatsan ngam lo hi zaw hi. A sepna mun haksat dan pen sawt dam zawhna ding hilo mah hi. Ahih hangin David Brainerd adingin sawt dam ding zong  na kisam loin thuman takin omna kisam zaw hi. Hih leitung ah lametna hau lo a, ahih hangin tawntung gamah lametna nei ahih manin Topa’n a zat  ding pen lungkim zaw a, teel zaw hi. Khatvei a piang ciatciat dingin teelna hoih na nei ahih manin a kampha pa hi zaw hi. Brainerd' nuntakna hangin US gam-a college hoihpen pawl-a kiciamteh Princeton College leh Dartmouth College hong piang khia hi. 'College of New Jersey' (tu-in Princeton a kici) pen New York Presbyterian Synods leh New Jersey Presbyterian Synods leh Yale kilemloh manin hong kiphuankhia ahi hi. Yale panin Brainerd kihawlkhia in a kilut kiksakna dingin Jonathan Dickinson leh Aaron Burr in a nget hangin Yale in Brainerd la kik nuam lo hi. Tua thu hangin John Dickinson’ ah May 1747 pan sang (class) kahna na sun zom to uh a, hih mun panin Brainerd in dam kangna hong ngah hi. Dartmouth College pen Native Americans-te leh US colonists-te adingin Eleazer Wheelock in a phutkhiat ahi hi. Brainerd in Native Americans-te pilna a awlmawhna in a lungtang lawng kha lua ahih manin Eleazer Wheelock in Dartmouth College a phuan ahi hi.

 “Pasian ka lunggulhna leh ka minthansak nopna hangin leitung deihna leh nopsaknate mangngilh in, ka valh tum hi” - David Brainerd

Source: Wikipedia, AZ Quotes, Lungdamna Aw, Feb. 2016 sunga “David Brainerd” by- Rev. Dr. Khai Za Kham