Friday, 12 January 2018
TRUMP IN, 'TAWVANG GAMTE'' CIH KAMMAL A ZATNA HANGIN LEITUNG HEHNA PIANGSAK
TRUMP IN, 'TAWVANG GAMTE'' CIH KAMMAL A ZATNA HANGIN LEITUNG HEHNA PIANGSAK
Jan. 12, 2018: Zan in US Congress meeting ah gambeel vai "immigration" thu kikupkhawmna ah Trump in minam deidanna; muhdahna (racist) kammal zang a, El Salvador, Haiti leh African gamte pen "tawvang gamte; gam ninte" (shithole countries) hi cih kammal a zat manin UN, African Union leh Carribean gamte kihelin International organisations hehna piangsak hi. "Bang hanga hih gam ninte; tawvang gam panin hong i gam a omsak in la ding i hi hiam?" ci-in Trump in Congress members-te dotna bawl hi ci-in US media in suaksak ziahziah uh hi. Trump in zanhal in Norwegian Prime Minister Erna Solberg kimuhpih a, US in Norway gamte gambeel dingin a lutsak zaw ding hi ci-in cial ci hi.
"Hih bang kampaute racist hi. A beisa hunin bukno a teeng Nigeria mite bukno ah ciah kik lo ding uh a, Haiti mi ten US gam ah AIDS hong pualut uh hi na ci ngei hi. Hih bang kampau a zat pen mi tampi in Trump racist hi ci-a a ummawhna uh kiciansak hi. Trump in resist lungsim paai hi," ci-in Trump in US ah gambeel dingin Norway gammite a cialna vai Washington DC-based political analyst Bill Schneider in ci hi. UN human rights office spokesman Ropbert Colville in, "Gam khempeuh leh continent khempeuh a nin; tawvang hi ci-in na tuat;koih thei kei hi. Poisa mahmah ing, ahih hangin tua bang kampau pen bang dang hilo in racist hi. Hih bang kampau pen pau kilawm lo bek hilo a, mihingte hoih lohna lam kong hon'na hi," ci hi.
Africa gamte kipawlna African Union in, "Siang takin gen len patauhhuai hi," ci hi. "Tangthu man taktak etna panin US gam a tung African mite sila a kimante hi. Trump' kampau in a mi khempeuh saan' theih leh gamtatzia kituak loin a maitang uh-ah leng hi," ci-in AU spokeswoman Ebba Kalondo in ci hi. South African ruling ANC party spokesman in, "Trump' kampau pen 'kiphinna lian mahmah' hi. Tua bangin hong kingaihsut hangin ANC in ka hihna bangun kisangzo ngei lo ding hi," ci hi. Morocco-based Africa analyst Adama Gaye in Al Jazeera news kiangah, "Trump in Africa mite leh gam zawngte a simmawhna leh racist ahihna lak mun mahmah ta a, lakzom zel hi," ci hi.
Media reports in Trump' kampau a suahkhiat khitun White House in Trump in tua bang kampau a zat man mah hiam cih kitel lo hi ci-in statement pulak hi. "Washington politician ten gamdangte ading doin sem uh a, ahih hangin Trump in American mite ading do den ding hi," ci zaw lai hi. Trump (zong a haipau lam kiphawkkhia kik ahih kei leh mangilh ahih kei leh a mizia bangin khut lumlet bang samsam pah hi ding hi ven) in tua bang kampau kilawm lo a zat nial a,"Tua bang kammal ka zang kei a, ahih hangin ka kammal zat khauh mahmah hi. Ka gam level ban ah ka ka paipihna dingin siamna bulphuh nei "merit-based system" gambeelte leh siamna nei mite bek ka gam ah ka la ding hi," ci hi.
Trump in hih bang thubuai a tuah kikna pen UK ah a zin ding a khawlsan a, Obama in thukimna (deal) hoih lo a bawlna hangin ka zin ding ka khawlsan hi ci hi (a taktakin lungphona leh deih lohna tawh kimuak ding a kihtak man hi bek hi. London Major Sadiq Khan in zong nung lamin Trump in Muslimte tungah racist kammal a zat manin UK ah kimuak lo hi na ci khin hi).
Republicans party sunga politiciante kihel in social media zang ten zong Trump' racists kampau a mawhpaihna uh Twitter ah khahkhia ziahziah uh hi. Haitian-American Republican politician Mia Love in, "President' kampau pen gilo, mi khenna, a hoih penpen a kingaihsutna leh US manphatna tawh kituak loin US maitang ah leng hi," ci hi. Democratic State Senator Linda Dorcena Forry in a Twitter ah, "I president un a dahhuai leh minsiathuai, muhdahna kampau a zatna hangin ka lungkim lohna khat vei khit khat vei ka pulak kik hi," cih tuangsak hi. Leitung a gam vanglianpen zum a tu dingin lai thei lo; tei lo; pil veva lo (ignorant), lungsim niam/neu leh mikangte vanlianpen hi cih ngaihsutna nei (white supremacist) a kiteelcing pen US gammite leh ko adingin lungkiathuai ka sa mahmah hi," ci hi.
Writer Wajahat Ali in a Twitter ah, "Ni 11 khit bekin (a zum tut khit) Trump in 200 million teenna Pakistan, 11 million teenna Haiti, 6 million teenna El Salvador, (1.2 billion val teenna Africa gam bup) leitunga miliip 20% i.e. 1.5 billion mi simmawhbawl in hosia pah hi. Nipi kal khat zong bei man lo hi," ci hi. Haiti gam-a Twitter zang ten a gam etlawm uh maan leh lim kilawmte post uh a Trump pen #ShitHolePresident!" hi cih tuangsak uh hi. Harold Isaac in "Hey #ShitHolePresident! Hey hiah ka #shithole pen #shitholegate tawh kibang hi," cih tuangsak hi. Journalist Jacqueline Charles in Haiti gam mun etlawmte limte maan post a, "Kum tampi tawvang (shithole) ah bang hih ka hiam cih kua'n thei na hi uh hiam?" ci hi. Twitter zang Ryan Knight in Republicans ten Trump pen racist hilo ci-in nialin pang teta napi un a gamtatnate in racist hilo hi a cih uh maan lo hi cih thuman tawh lakkhia hi ci hi.
Norway gam-a Twitter zang Tuti @Shkurten in, "Trump in Norway gammite a gam uh-ah lut dingin hong zol hangin Norway gam ah ka om a, US ah cik mahin ka pai ngei kei ding hi. Norway ah health care hoih, simsinma man nei lo a khawnkhong, maap hun (vacation) nipi kal nga, nisim in nasep hun naikal 8 ka nei uh hi. Ut keng, lungdam ing Trump," cih tuangsak hi. George Takei in, "Trump in Norway gammi tamzaw deih a, shithole gam Africa mi deih lo hi. Shithole taktak na thei uh hiam? Pasian in hell tung dinga a samsiat (goddamn) Trump' kam hi," cih tuangsak hi.
Thau hanga ngongtatna (gun violence) beisakna ding hanciam a nasem activist Shannon Watts in, "Trump in a kibang lo minam tuamtuam (diversity) a makaih/lamlah zia: Africa: A nin; tawnvang gamte. Haiti mite: AIDS nei uh hi. Nigeria mite: Bukno a tengte hi; Puerto Rica mite: Thadah; Black Americans: Kipumkhat; pumkhatsuak (Ingrates). Mexica mite: Thukham palsatte leh numei buanmte (Criminals and rapists). Muslims: Dawi banga kihtakna patauhna piangsakte mi gilo (Evil terrorists). Numeite: A nin; tawvang bangin bawl un. White supremacists: Mihoih mahmahte hi," cih a Twitter ah tuangsak hi.
Source: Independent; Washington Post; The New Yorker; Vice; Al Jazeera
@Thang Khan Lian #ZUNs
@Thang Khan Lian #ZUNs
Haiti gam etlawmna maan na muh nop leh hih link na mek sin aw Trump in tawvang tawh kibang a sak nang zong kibang na sakpih hiam?
Subscribe to:
Comments (Atom)