CHRISTIAN NA KICIH MAN BEK TAWH MI HOIH NA SUAK TUAM KEI HI
Na (thu) upna (Christianity, Judaism, Islam, Buddhism, Hinduism, Jainism, Sikhism etc) in mi hoih zaw hong suaksak tuam lo a, na gamtatna in mihoih hong suaksak thei bekin, na kampauna bek hi loin na gamtatna leh luheekziate leh sepkhiatnate panin mihoih na hihna kilangkhiasak zo bek hi. Christian mi diktak khatin kuamah deidantuam ngei lo a, sepna tawh kizui loin a kampauna bek tawh a thu upna bulphuh ngei lo hi.
Mi Deidan loh ding Hilhkholhna
Sanggamte aw, minthan'na vang tawh a kidim i Topa Jesuh Khrih umin na om lai takun a pualam-a kilang pianziate siksanin mi na deidan kei un. Gentehna-in, kham zungbuh bulhin puan manpha a silh mihau khat leh puan siasa a silh mizawng khat, note' kikhopna-ah hong paikhawm leh, lim takin a kizem mipa zahtakbawl zaw-in, “Hih lai-ah tutna nuamah hong tu in,” ci le-uh cin a, ahi zongin mizawngpa kiangah, “Tua lai-ah na ding phot in,” cihna ahi a, “Sual tung hih ka khe kiang khawngah hong tu in,” cihna ahi zongin kam na zat uh leh, mi a deidan na hi uh a, ngaihsutna hoih lo nei-in a gamta na hi uh hi.
Sanggamte aw, hoihtakin na ngai un. Pasian a it mite tungah piak dingin a ciam vantung gam a ngah ding leh upna thu-ah mihau a suak dingin Pasian in leitung mizawngte a teel hi napi-in, note in mizawngte na simmawhbawl uh hi. Note hong bawlsia-in thukhen zum hong tun' pahpahte, mihaute hi zaw uh hi. Pasian in note a hong phuah min hoih a gensiate, mihaute mah ahi uh hi.
Lai Siangtho sungah, “Nangmah na ki-it bangin na vengte na it in,” ci-in a genna Topa' Thukham zui le-uh cin a hoih hi pah hi. Ahi zongin mi na deidan uh leh note a khial na hi uh a, Thukham a palsat na hi veve uh hi. Mi khatpeuh in thukham dang khempeuh a zuih hangin khat a khialh nak leh a vekpi-in a khial mah ahi hi. Bang hang hiam cih leh, “Nu leh pa mawhna na bawl kei in,” a ci pa mah in, “Mi na that kei in,” ci thuah lai veve hi. Nu len pa mawhna na gamtat loh hangin mi na thah nak leh thukham palsat mah na hi veve hi. Tua ahih manin mi a khahkhia thei thukham tawh kizui-in thukhenna a thuak ding mi bangin kampau-in na gamta un. Bang hang hiam cih leh hehpihna lungsim a neilote tungah Pasian in thu a khen ciangin hehpih lo ding a, hehpihna lungsim a neite tungah Pasian in thu a khen ciangin a hehpihna in zozaw ding hi. (James 2:1-13)
Upna leh Sepna Kizui
Ahi zongin mi khatpeuh in, “Mi khat in upna nei a, a dang khatin gamtatna nei hi,” ci zenzen leh, gamtatna in a zui lo upna hong lak dih in; keimah in ahih leh ka upna ka gamtatna tawh ka hong lak ding hi, ka ci ding hi. Pasian khat bek om hi, ci-in na um hi. Tua pen hoih mahmah hi. Dawite nangawnin zong tua bangin umin lau-in ling deldel uh hi.
Lawmte aw, gamtatna in a zui lo upna pen a hawmpi ahihna thu ka hong lak ding hi. Eite' pupi Abraham in biakna tau tungah a tapa Isaac a piakna hangin Pasian tawh kipawl thei hi. Tua ahih manin upna leh sepna kizom khawm a, sepna in upna a kicin'sakna thu na thei uh hi. Lai Siangtho in, “Abraham in Pasian um a, a upna hangin Pasian in mihoihin a sang hi,” ci-in a genna thumanin tung takpi a, Abraham pen Pasian' lawmpa kici hi. Tua ahih manin, mi khatpeuh in a upna bek tawh hi loin, a sepna tawh a kizuih ciangin Pasian tawh kipawl theihna ngah pan ahihna thu na thei uh hi.
Numei paktat Rahab zong tua bangmah ahi hi. Israel mi thukante hoih takin zin na do-in, lampi dangah ciahsakin na suaktasak a, ama nasepna hangin Pasian tawh kipawl theihna a ngah ahi hi. Tua ahih manin hu a diik lo, hu a sang lo pumpi pen a si ahih mah bangin sepna tawh a kizom lo upna zong a si ahi hi. (James 2:18-25)
Indian President lui phamsa APJ Abdul Kalam in, "Mi thupite (gol leh liante) adingin biakna (religion) i cih lawm bawlna dinga lampi hi a; mi neute adingin biakna pen kilai kidona dingin vanzat hi," a cih ciamteh tham cing mahmah hi. Sepna tawh kizui lo upna pen hu a diik lo, hu a sang lo pumpi tawh kibang ahi ahih manin a si ahi hi.
Zakna ding bil a nei khempeuh in na za ta un.
@ Thang Khan Lian #ZUNs
