US-TE GALDONA TEEMBAW "STRIKE GROUP" IN KOREA PENINSULA MANAWH TA

US-TE GALDONA TEEMBAW "STRIKE GROUP" IN KOREA PENINSULA MANAWH TA

April 10, 2017: US in April 6 in Syrian airbase khat Tomahawk cruise missile 59 tawh a kap manin Trump in pahtakna ngah kisa pian pah hi ding hi ven zan in zong Pacific Tuipi nitumna lam-a USte galdona teembaw in Korean Peninsula (tuipi lian sunga lei/gam dawk khia) manawh a, Korean peninsula ah US in a baan thasangna lahna (muscle flexing) in koih sawm hi. Hih thu pen Pentagon in zong pulak hi.

Hih "strike group" pen Carl Vinson tawh kithuah a, Singapore gam tawn in Korean Peninsula ah lut ding hi. Hih bangin Korean Peninsula ah "strike group" a kisawlna hang pen North Korea phengtat in, nung diakin missile sitna a neih manin a kisawl hi ci-in US navy ulian khatin ci hi. (North Korea in Trump leh Chinese President Xi Xinping a kimuh ma deuh in missile sitna a neih ahi hi). "Carl Vinson Strike Group north pen Pacific Nitumna lam-a om ding leh galdo dinga kithawi sa-in om dingin US Pacific Command in koih dingin thu hong pia hi," ci-in US Pacific Command spokesman Commander Dave Benham in AFP news agencyte kiangah ci hi. Korea Peninsula kiim-ah vauna bawl leh a lauhuaina piangsak den pen North Korea gam hi a, a ut bangin phengtat in, missile sitna nei den in, nuclear galvan a neih uh tawh lungkim loin sit behna nei den uh hi ci-in gen beh hi.

Zanhal (Saturday) in zong US navy's Third Fleet in strike group pen leilu lam manawh in tai hi ci-in gen a, a paina ding bel pulak lo hi. Hih galdona teembaw in a kigeelna bangin Australia ah teembaw kingakna ah hawh (visit) lo dinga, western Pacific kiim-ah gamtang zaw ding hi ci-in gen beh hi. Hih Carl Vinson strike group pen western Pacific a USte galphual San Diego ah January 5 panin kikoih a, galdo kisinna tuamtuam, Japan Maritime Self Defence Force leh Republic of Korea Navy-te galdo kisinna ah zong kihel in, South China Sea ah maritime security panlakna leh a ngeina bangin galvil kisinna "routine patrol operations" in zong kizang hi. US in gakna leh vauna tampi a bawl khum hangin North Korea in a nuclear programme khawlsan loin dual tuam lo ahih manin US in a sawl ahi hi.

Tu kha bul in North Korea in "liquid-fuelled Scud missile" sitna nei a, a ngimna bangun sau leng lo hi. Tu kum bul mah in North Korean uliante leh a leikhamang uh Kim Jong-un in intercontinental ballistic missile (ICBM) leh ICBM tawh a kibang pian sitna kinei ding hi ci-in na tangko mun mahmah ta uh hi. Hih ICBM pen North Korea gam phuankhiapa pianni a 105 veina "Day of the Sun" kici April 15 ciangin pawi kham ding uh a, sit dingun ki-ummawh hi. North Korea in nuclear galvan tawh kithuah US kap khakna ding
long-range missile nasia takin a bawl laitak uh ahi hi. Nuclear nga vei sitna lawhcing takin nei khin zo uh a, nung kum bekin nih vei sitna nei uh hi.

Expert satellite imagery analysis ten a genna uh-ah North Korea ten nuclear galvan a guk veina sit dingin kithawithawi ta uh hi ci uh a, US intelligence ulian ten North Korea in nuclear galvan tawh US kap khakna ding kum nih sungin bawl khin ta ding uh hi ci uh hi. US President Donald Trump in Chinese President Xi Jinping tawh Florida ah a kimuhkhawmna uh-ah Trump in North Koreate nuclear programme khamna ding nakpi takin na hanciam beh lai-in ci-in kunh ngaungau hi. Trump' national security huh (aides) ten US North Korea' nuclear leh missile programmes-te a khawlsak ding zia geelna nei ta uh hi. Tuate lakah economic lamsang ah khalna khauhzaw bawl khum ding leh galkap lamsang thahatna khauhzaw zat ding, China in North Korea nakpi takin a thuhilh beh ding uh cihte kihel hi.

February in North Korea in a tuipi pang uh nisuahna lam panin a kizom in ballistic missiles li na kap uh a, thum in Japan kianga om EEZ deng kha hi. North Korea in Japan a USte galphual kapna ding kisinna a kilawn hi ci uh hi. Nung kum August kha-in North Korea in Japan lam ngatin tuinuai teembaw panin ballistic missile na lawn uh a, a beisa-a a sitte uh sangin sau leng zaw a, 500km dong leng zo ahih manin Kim Jong-un in lawhcinna thupi pen hi ci hi.

Source: News agencies
A tei: Thang Khan Lian 

SYRIA GAM US TEN A KAP THEIHNA DINGA ZUAUTHU BAWL DEN WHITE HELMETS-TE GAMTATNA KIPHOLAKKHIA TA

SYRIA GAM US TEN A KAP THEIHNA DINGA ZUAUTHU BAWL DEN WHITE HELMETS-TE GAMTATNA KIPHOLAKKHIA TA

April 11, 2017: Swedish NGO Doctors for Human Rights (SWEDHR) ten Syria Civil Defense (White Helmets a kici zaw) ten Syria gam mun tuamtuam Syria kumpi in chemical galvan tawh suam uh hi a kicihna ah a nasepna ua hutkhiatna nasepna a neihte uh thuman loin (falsifying information) pulak uh a, White Helmets ten hutkhiatna nasem ci-a a kineihnate (so-called "rescue" procedures) uh-ah naupang a site video zaih in, bawltawm uh hi ci uh hi. White Helmets kicite pen a tamzaw rebelste ukna Syria kumpi leh Russia in a kapna munte a hutkhiatna nasemte hi uh a, nung kum December kha-in Syria-Russia galkap ten rebelste ukna Aleppo a lak kikna dingun a nasia kap lai-un "human rights" palsat uh hi ci-a US leh a pawlte a otot lai-un hutkhiatna nasem in om uh hi.

SWEDHR ten hih banga White Helmets hutkhiatna nasep video a kibawltawm a pholakkhiat manin White Helmets-te thuman a gamtatna (ethical integrity) uh leh zatui lamsang siamte gamtatna tawh kilangpang (anti-medical procedures) vai lua hi cih dotna lianpi piangsak hi. White Helmets ten hutkhiatna nasemna a neih uh ciangin hutkhiatna nasem takpi bangin kineih (fake rescue attempts) in na a sep uh ciangin naungek si pen thuphuahna ding (propaganda purposes) a vanzat in nei uh a, galdona ah thukham palsatte (war criminals) bangin gamtang in, nasem uh hi ci-in Professor Marcello Ferrada de Noli in Indicter magazine ah a gamtatna uh pholakkhiatna dingin suaksak hi.

SWEDHR kici ten Syria gam-a Aleppo leh Idlib province sunga om Sarmin khua-ah April 15, 2015 in Syria kumpi in chemical galvan tawh suam hi cih ngawhna lim takin kan uh a, hih munte ah chemical tawh suamna vai kici ah White Helmets ten siavuan a zatte un hutkhiatna a bawl lai un video a zaih uh pen a bawltawm uh (staged) hi a, intracardiac-injection maneuver kici kisutna zatui kibawl phim tawh a sut lai un substance bangmah (e.g. adrenaline) zang lo uh ahih manin naupangte pen zatui a sutna hangun a si hi zaw ding hi ci uh hi. While Helmets ten bel naupang site pen sih theihna gu chlorine gas a si uh hi a cih hangin SWEDHR in a zuau bulom tang uh hi ci uh hi. Tua loin UK doctor ten zong tua a sihna tuakte pen zavom (opium) kikapna hanga drug overdose a si hi zaw uh hi hi ci-in Indicter magazine in suaksak hi.

SWEDHR ten hih bangin White Helmets ten dongtuakte a hutkhiatna uh pen video zaih in a bawl tawm hi a cih hangin White Helmets ten naupang lom thah uh hi ci-in ngawh lo hi ung ci hi. Veterans Today website in SWEHR ten a news headlines ah, "Swedish Medical Associations ten White Helmets Gas tawh suamna bawl tawm in naupang tampi lom that uh hi," ci-in ngawh uh hi ci-in a suahsak hangin SWEDHR ten tua bangin ka ngawh ngei nai kei uh hi ci-in nial uh hi. SWEDHR in kipawlna khatpeuh in mi lom thah uh uh hi ci-in ka ngawh ma-un thu lim takin ka kan uh hi ci uh hi.

A beisa hunin zong US leh a pawlte, UN nangawn in, Syria galkap ten helicopter zangin rebelste ukna munte a kap uh ciangin nautangte chlorine gas tawh kap mun mahmah uh hi ci-in a ngawh hangun SWEDHR in Syria galkapte tua bangin gamtang lo uh hi ci-in ngawhnate uh na nial mun mahmah hi. SWEDHR ten hih banga chlorine gas zanga nautangte kikap hi cih ngawhna lim takin thukanna "critical analysis" a kineihna panin US leh a pawl ten galvan leh training tawh huhna a piak Syrian rebelse gamtatna hi zaw hi cih kimu hi ci hi. Syria gam-a kumpi langpang-a lehdo Islamist opposition forces kicite pen chemical zanga nautangte suam-a thatthatte hi zaw a, rebels ten a nial hak mahmah dingin "specific and hard-to-deny visual clues" kici video a kizaih limte zangin Syria kumpi lamdang takin ngawh den uh hi ci-in Washington pansan Spokane ah independent investigator sem Adam Larson in Indicter magazine ah gelh hi.

SWEDHR pen meetna ding nei lo-a nasem non-profit, non-governmental organization (NGO) kipawlna hi a, Swedish professors, PhDs, medical doctors leh medical sciences and health-related disciplines ah university researchers tuamtuam kipawlkhawm a kiphuankhia hi a, leitung buaina mun tuamtuam ah human rights palsatna munte ah amau leh amau kipumpiak in thudik leh thuman kanin private basis in nasem kawikawi uh hi.
Professor Marcello Ferrada de Noli (ni danga Karoilinska Institute and Harvard Medical School a sem) pen SWEDHR chairman leh The Indicter ah editor-in-chief len hi a, Libertarian Books — Sweden ah zong CEO ahi hi.

Syrian Civil Defense/SCD (White Helmets) pen Turkish Search and Rescue Association ah training courses sin British officer lui James Le Mesurier in Turkey gam-a Istanbul khuapi ah 2013 in a phuankhiat ahi hi. 2013 kum bei kuanin SCD pen kipawlna picing hong suak a, volunteers 3,000 hong pha uh a, Syria gam sunga local civil defense centers za tampi ah nasep kipan uh hi. SCD pen external donor governments tuamtuam - UK Commonwealth Office, Denmark, Germany, Netherlands in huhna pia a, a tamzaw huhna pen US Agency for International Development (USAID) in huhna a piak hi a, rebelste omna mun tenga nasem ahi uh hi.

Syrian Civil Defence (known as the White Helmets) ten rebelste ukna leh chemical tawh a kisuam ngei a kicihna Ghouta nisuahna kiim-ah training session a zawh uh a certificates-te uh tawh November 22, 2016 in zong rebelste tawh selfie na kizaih khawm ngeingai dep uh hi. East Ghouta pen Damascus khuapi kianga om hi a, 21 August 2013 in chemical galvan tawh kisuam hi. A si zah a kigen dan kibang lo hi. US ten bel mi 1,449, French intelligence ten 241, UK intelligence ten 350, MSF ten 355, Damascus Media Office ten 494, SOHR in 502, SRGC in 635, VDC in 923, SNC in 1,300, LCC in 1,338, FSA in 1,729 si hi ci hi (US leh US leh Turkeyte' uino Free Syria Army rebelste mah kam uang pen zel hi). White Helmets ten hutkhiatna nasep a kipat khit nung uh mi 70,000 kiim hunkhia ta hi ung a kicih hangun a hutkhiatte uh maan kizaihte lim takin a ki-entel ciangin mi khat a hutkhiatna dingin a maan zaihte uh tampipi vei kimu in, mi kibang tampipi vei zang uh hi. Tua bek hilo in White Helmets members ten Syria tualgal ah rebelste gum uh a, a mawtawte uh rebelste galvan puakna dingin kizang in, Islamic lim lahna ding maante leh ISte maan peuh a mawtaw uh-ah kimuh khiatsak mun mahmah a, Syria galkap site si luang a bawlsiat gawpna man uh tam kimu mahmah ta hi. White Helmetste pen Syria kumpi laih nuam nitumna gam ten pakta mahmah uh a, 2016 in zong Right Livelihood award (Nobel Prize pahtawina sanga neuzaw deuh a kingaihsun) pahtawina ngah uh a, February 2017 in White Helmets-te nasepna tawh kisai Orlando von Einsiedel' director na nuai-ah documentary 40 minute sau in kibawl a, "Oscar for best documentary short feature" kici pahtawina Oscar Award 2017 in ngah a, US actor George Clooney in film in bawl sawm hi kici hi.

#Behlapna: A nuai-a photo 1 en lecin 1995 in Tokyo ah chemical galvan hanga chemical dik khate hunkhia ten gas mask, khutbulh (glove) leh gas in a pailet lohna dingin special suit silh uh hi. Al-Qaeda terrorist ten Syria kumpi in chemical zang hi ci-in a ngawh, US leh a pawl tengin a up mahmah, hutkhiatna nasem ten special suit, leivui dalna ding leh khutbulh nangawn bulh lo hi. Chemical gas kizang takpi dingin na um lailai hiam? Feb. 13 in zong KLIA ah zong Kim Jong-nam a nerve gas tawh kithat a kicih lai-in siavuan ten special suit, gas mask leh khutbulh bulh se lo uh hi. North Korea ten nerve gas tawh a gammi uh leh Kim Jong-un' sanggam lang a that hi takpi dingin na up hiam? Nang thuthu hi. Mihai i cih ten zuau thu leh thuman khen thei se lo uh a, a zak leh a kigen teng, a muh teng uh um pahpah lel uh hi.

Source: The Indicter magazine, Wikipedia and Sputnik
A teikhia: Thang Khan Lian @ Zomi United News (ZUNs)