RAKHINE BUAINA HANGIN MISI 40 VAL IN SIH LAWH TA
Oct. 14, 2016: Rakhine State’s Security and Border Affairs Minister Colonel Htein Lin in September 18 in Muslimte building inn phalna lo tawh kibawl hi ci-in Muslimte biakinn (mosque) 12 leh sanginn (madrasas) 35, inn 2543, sumbuk 604 leh inn (building tuamtuam) 132 Maungdaw leh Buthidaung township ah a kisuksiatna dingin thu a piak manin lungphona piang a, Oct. 9 in Rakhine leilu gamgi kiim-a Kawl gamgi cingte galvilna (outpost) thum Muangdaw leh Rathedaung township ah kisuam in gamgi cingte mi 9 a thahna hangun buaina hong piang a, Kawl galkapte Rakhine sungah tampi lut in mi ban that uh a,hih buaina kipat a kipanin sihna tuak mi 40 val ta hi. Kawl kumpite uliante, Rakhine State Chief Minister U Nyi Pu leh State Border and Security Affairs Minister ten zanhal in Kyikan Pyin khua-a Myanmar Border Policete' headquarters omna panin tai 1 (1miles =1.6 km) gamlatna mun-a Kawl galkapte a kithahna mun va en uh hi.
Security officer min gen loh khatin a genna ah zanhal in ulian ten tua mun a phak lai un galkapte leh mel theih loh thau tawite kikaptuah lai uh a, liamna leh sihna tuak bel om lo a, gamnuaimi ten Maungdaw township sunga om Pyone Pyke khua-ah inn 40 halsak uh hi ci-in gen hi. Zanhal a Muagdaw township sung etna nei uliante- ministers’ team kici ten Buddhist leh Muslim khuamite kimuhpihna nei uh a, kumpi in nautangte kihumbit ding hi ci-in kamciamna nei uh a, ahih hangin hih kiim-a gamnuaimite tungah khauh takin kigamtang ding hi ci uh hi. Rakhine State Information Department head U Min Aung in bel Pyone Pyke khua tawh thu leh la bangmah kiza lo ahih manin inn 40 kihal hi cih thu za kha lo hi'ng ci-in gen hi. Muangdaw township ah Education Department makai U Khin Aung in zan in Maungdaw township a bomb puak kiza a, liamna leh sihna tuak a omna thu kiza lo hi ci hi.
Myanmar state media in hih buaina hangin Oct. 12 tan in mi 43 si ta a, tuate lakah Kawl galkap 13 kihel hi ci hi. Global New Light of Myanmar leh galkapte news Myawady in October 9 khit nungin thau tawi mi ngongtatte 30 kithat ta hi ci-in suakak uh hi. Myawady news outlet in zan in Oct. 12 in mi gilo ten Kyikanpyin khua-a galkapte border post a om staff quarterte hong suam sawm kik uh a, Tatmadaw galkap (troops) ten na nung hawl zo uh ahih manin mi gilote nung kik in, a ciah lam un Warpaik khua-ah inn 25 halsak uh hi ci hi.
State Counsellor leh Ministry of Foreign Affairs len Daw Aung San Suu Kyi in zanhal in a thugenna ah kumpi in thukham tawh kituak in hih buaina ven'sakna dingin gamta ding a, gamgi cing thatte thuman tawh thukhenna mai-ah kidingsak ding hi ci-in kamciamna nei a, ahih hangin mimal leh kipawlna min kuamah lo loin mawhsakna kam pau lo a, kumpi in thucian a kingah ciangin mipi' theih dingin kipulak khia ding hi ci hi. Kuate gamtatna hiam cih a kitel mateng kuamah kimawhpaih nai lo ding a, galkap ten thuman ciantak in a tel ciangun bangci bangin kigamta ding hiam cih kigen pan ding ci-in Nay Pyi Taw ah gen hi.
Myanmar Times reporter khat in Sittwe Airport ah helicopter gunships bangzah hiam zan nitak in bawh hi ci-in gen a, galkap ulian khatin bel Maungdaw township panin a tui thun dingin hong bawh pak hi ci-in gen hi. Ahih hangin Tatmadaw ulian khat in tua helicopterte koi panin hong kipan hiam cih kitel lo hi ci hi. U Min Aung in The Myanmar Times-te kiangah hih helicopter gunshipte pen gamnuami dinga upmawhte kapna in kizang nai lo a, huhna van leh galkapte buaina mun-a pua ding leh Maungdaw panin Buthidaung township ah sangsiate puak khiatna ding bekin kizang pan hi ci hi. Hih buaina hangin tu kal sung a kipanin Maungdaw leh Buthidaung townshipte ah sanginn 400 val kikhakcip ta hi.
Hih buaina thu a telcian ten bel gamnuamite gamtat hilo ding a, kumpi tunga lungkim lo mi pawl khatte gamtatna hi lel hi ci uh hi. Buddhist siampu Ashin Wirathu in hih buaina vai ah Rohingyate nasia takin mawhsak in, "Kong gen khin zo hilo hiam," ci hi
-The Myanmar Times
